2 Ŋulinyaramirriyunydjayi yolŋu'‐yulŋunydja ŋuli ŋunhi yana buku‐ŋal'yunanydja nhanŋu Godku barrkuwatj yana, wiripuŋura ga wiripuŋura wäŋaŋura malanyŋumi, liŋgu yakaŋga yana Godku Buṉbu dhärranha yukurranha ŋuli ŋunhili *JerusalemDjurutjalamdja. 3 †SolomonDjalamandja yukurranha ŋuli wirrkina dhika märr‐ŋamathinya Garraywu; ŋayi yukurrana malthurrunanydja yana dhukarrwunydja nhanukalaŋuwu bäpa'mirriŋuwu ‡DavidDaypitku, yurru wiripunydja ŋayi ŋuli bathana wäyin malanha, mundhurr wekanha wiripuŋuŋura ga wiripuŋuŋura wäŋaŋura.

4 Waŋganymirriyunydja waluyu ŋayi marrtjina bala §GibeonGipiyanlili wäŋalili, ga ŋunhala ŋayi bathara, mundhurr wekaŋala Godku. 5 Ŋulinyaramirriyu munhakuna Garray maḻŋ'maranhamina Djalamangala bukaway'kurru, bala ŋayi waŋana nhanukala, dhä‐wirrka'yurruna ŋanya Djalamannha bitjarra, “Nhäku nhe ḏukṯuktja? Nhä ŋarra nhuŋu yurru wekamanydja?” bitjarra.

6 Ga ŋayinydja Djalamandja buku‐ruŋiyinmaraŋala bitjarra gam'. “Bitjana liŋgu nhe ŋuli gänha yukurranha ḻatju'kunha dhika ŋarraku bäpa'mirriŋunha Daypitnha, 7 ga dhiyaŋunydja‐wala nhe nherraṉ yawungu ŋarranhana bäpa'mirriŋuwala ŋarrakalaŋuwala dharapullili wapmaranha, märr ŋarrana yurru yukurra mala‐ḏälkuma nhuŋu miṯtjinha. Yurru ŋarranydja dhuwala yuṯa muka yana gurrmul, ga yaka ŋarra marŋgi wirrki djäkawunydja. 8 Ḏukṯuktja ŋarra dharraywu dhiyaku nhokalaŋuwu malawu yolŋu'‐yulŋuwu walaŋgunharawu yana, yurru guḻku'na dhuwala walala malanydja, guḻku'na mirithirrina, gulkuruna ŋuli bothurrunydja malanydja walalanha. 9 God, ḻiya ŋarranha djambatjkuŋa, marŋgi‐wekaŋa ŋarranha, märr ŋarra yurru dharray yukurra ŋamathama, mala‐ḏälkuma dhuwala nhuŋu malanha. Dhiyaku bili ŋarranydja ḏukṯuk. Ŋuli nhe yurru yakanydja ŋarranha ḻiya‐djambatjkuma, ga ŋarranydja yurru nhaltjanna mala ḏälkuma dhuwala nhuŋunydja miṯtjinha yolŋu'‐yulŋunha.”

10 Ga Garraynydja wirrkina dhika ŋoy‐ŋamathina nhanŋu Djalamangu, ŋunhi ŋayi bitjarra yukurrana waŋana ŋäŋ'thurruna. 11 Ga Godtja waŋana bitjarra nhanukala, “Nhe bini ŋäŋ'thuna ŋula nhäku rrupiyawu dhaŋaŋgu, ga nhe bini ŋäŋ'thuna weyingunha walŋawu nhinanharawu, ga nhe bini ŋäŋ'thuna ŋarranha bunharawu ŋuruku miriŋuwu, yurru bäyŋu warray nhe bitjarrayi. 12 Bala ŋarranydja yurru nhuna wirrkina wal'ŋu gaḏamanguma, ḻiya‐djambatjkumana wal'ŋu wirrkina. 13 Ga bitjandhiyi ŋarra yurru wekamayi nhuŋu ŋunhanydja malanha ŋunhi nhe yaka ŋarranha ŋula dhä‐ŋäŋ'thurruna yukurrana. Nhenydja yurru ḻukunydjayirrina, ga bukmaktja yolŋu walala yurru nhuŋu yukurra märr‐ŋal'yunna. 14 Ŋuli nhe yurru ŋarrakuwaynydja romgu malthun, ga ŋarrakuwaynydja minawaŋ dhärukku bitjanna nhuŋu bäpa'mirriŋu yukurranha ŋuli bitjanayi, ga nhenydja yurru nhina weyinŋumirrina.”

15 Bala yana ŋayi Djalamandja gaŋgathinana yakurrŋurunydja, ŋunhi ŋayi yukurrana bukaway'yina, yurru marŋgithina ŋayi yulŋunydja ŋunhi ŋayipi God yukurrana waŋananydja nhanukala. Bala ŋayi Djalaman buku‐ŋal'yurrunana Godku, wekaŋala nhanŋu bathara mundhurrnha.