1-2 Yo, Garraywu ŋunhi Dhawu'‐nherraṉminyarawuy Bathi ŋunhala yukurrana djingaryurruna waŋganygala ḏarramuwala yäkuwala *6:1–2 AbinadabBinatapkala. Ŋuriŋiyi Dhawu'‐nherraṉminyarawuyyu Bathiyu yukurra mel‐ḻakarama ŋanyapinyay Waŋarrnha Godnha, ŋunhi ŋayinydja ŋunhalaŋumi ṉapuŋga, ŋunhi ŋayinydja yukurra ganaŋ'thun gal'ŋu biyapulnha‐wala, ga garrkuḻuknha dhikana djeŋarra'na. Ga †6:1–2 DavidDaypittja waŋanana ŋurikiyi bitjarrana, “Gul' ŋilimurru marrtjina, ga märrama ŋunhayi dhawu'‐nherraṉminyarawuynydja Bathi, ga gäma lilina, ga nherraṉ dhipalana ‡6:1–2 JerusalemDjurutjalamlilina,” bitjarra. Bala walala marrtjinana. 3-4 Marrtjinanydja walala yukurrana‐a‐a, ga ŋawatthurruna goŋliliyaŋala ŋunhiyi Dhawu'‐nherraṉminyarawuynhanydja Bathinha, bala yana walala gurrunharanydja nherraranydja ŋunhimala yuṯalilina be nhälili girri'lili, ga märrma' bulikiny'tja maṉḏanha warryunarawu ŋurikiyi. Yurru Binatapku gäthu'mirriŋunydja maṉḏa malthurrunayi walalaŋgu, yurru djäka marrtjina maṉḏanydja ŋunhi ŋurikiyi Bathiwu, marrtjinanydja maṉḏa yukurrana gali'kurru maṉḏanyŋukurru dhukarr ŋupara. 5 Ga walalanydja Daypittja ga wiripu‐guḻku' yolŋu'‐yulŋu §IsraelYitjuralpuyŋu giritjinana dhikana marrtjina barkparkthurrunana manapara, buku‐ŋal'yurrunana Garraywuna marrtjina bala märr‐ŋal'yurrunana manapara; walala ŋaḻwa'yurrunanydja dhika bitjarra rirrakay manapanminana manikayyu ga yiḏakiyuna marrtjinana yukurrana girri'yuna malanyŋuyu dhika nhäyuna, märr‐yiŋgathinana wokthurrunana Garraywuna, ŋunhi walala marrtjina bala gäŋalanydja ŋunhiyi Bathinydja bala Djurutjalamlilina.

6 Ŋunhi walala marrtjinana yukurrana bala, bala waŋganydja wäyin buliki nyaḻwaŋ'thurrunana ŋurru‐ṉiṉ'thurrunana, ga ŋayi *UzzahWatja yäku ḏarramu, ŋayinydja waṉa‐djarr'yurruna ŋurikiyi, bala mulkanana ŋayi galŋa‐mundurrkuŋala ŋunhiyi dharrpal bathi. 7 Yurru Garraynydja wirrkina ŋaramurryinana nhanŋu, bala bumarana ŋanya Watjanhanydja rakunyguŋalana, liŋgu ŋayi goŋ‐ŋal'yurruna ŋunhi, ŋunhi ŋunhiyinydja gänana wal'ŋu Garraynydja, ganaŋ'thun yukurra.

8 Ga Daypittja wirrkina dhika ŋayaŋu‐yätjthina, liŋgu Garrayyu dhä‐ḏir'yurruna bumara ŋunhi ḏarramunha bitjarrayi. 9 Ga ŋayi Daypittja beyaṉiyinayi Garraywu. “Nhaltjanna yurru dhuwala ŋarranydja gäma ŋunhayi Bathi?” bitjarrana ŋayi waŋananydja. 10 Bala ŋayi yana gonha'yurruna ŋunhimalayi liŋgu dharapullili, ŋunhimala wäŋalili †Obed EdomYapititamgalana wäŋalili, ŋunhimala liŋgu gonha'yurruna ŋayi, yakana ŋayi gäŋala bala Djurutjalamlilinydja ŋulinyaramirriyunydjayi waluyu. 11 Yurru yukurrana ŋunhi Garraywu Dhawu'‐nherraṉminyarawuynydja Bathi ŋunhili dhärrana ḻurrkun' ŋaḻindi ŋupara, ga Garrayyunydja guŋga'yurruna yukurrana ŋunhiyi ḏarramunha ga nhanŋu miyalknha ga yumurrku'nha, gäŋalana yukurrana ḻatju'kuŋala walalanha ŋunhimala wäŋalili.

12-13 Ga ŋayi Daypitthunydja ŋäkulana ŋunhi nhaltjarra walalanha ŋunhiyi walalanha guŋga'yurruna Garrayyu, liŋgu ŋunhiyi Dhawu'‐nherraṉminyarawuy Bathi ŋunhiliŋumi walalaŋgala wäŋaŋura. Bala yana ŋayi Daypittja marrtjinana lili märranharawu yana ŋuriki bathiwuna, ŋayi yurru märrama bala gäma Djurutjalamlilina, yurru ŋayi gäŋalanydja ŋamathaŋalana wal'ŋu dhunupayaŋalana. Ŋuriŋi ḏalkarra'mirriyuna walalay ḻaw'maraŋalanydja ŋunhiyi, bala gäŋalanydja marrtjina, yurru ḻambarryuna walala gäŋalanydja yukurrana, bitjarra yana liŋgu ŋunhi walalaŋgu Garrayyu ḻakaraŋala ŋäthili. Ga ŋunhi walala ŋuriŋi ḏarramuwurruyu ḻaw'maraŋalanydja ŋunhi Bathi, ga marrtjina walala bitjarra dhawa‐yawaṯthurruna yaka weyin, bala ŋayi Daypitthunydja walalanha waŋana gulmaraŋalayi. Ga ŋunhala ŋayi Daypitthu wutthurruna wäyinnha maṉḏanha, ga bathara mundhurr buku‐wekaŋala Garraywu ŋunhili galki, gumurrŋura ŋunhili Dhawu'‐nherraṉminyarawuyŋura Bathiŋura. Ga ŋuliŋurunydja dhäŋuru walala marrtjinana‐wala yana, barkparkthurrunana marrtjina walala Daypittja ga yolŋu'‐yulŋunydja ŋunhi, ga marryurrunana ŋunhi walala marrtjinanydja yukurrana bala. 14 Ŋayi Daypittja wiṯthurrunana wal'ŋu giritjina dhika, märr‐ŋal'yurrunana yukurrana Garraywu, 15 ga bukmaknha dhika yolŋu'‐yulŋu barkparkthurruna, ŋoy‐djulŋithinana dhikana, märr‐yiŋgathinana manapara, wokthurrunana Garraywuna.

16 Ga ŋunhi walala ŋayathaŋalana ŋunha Djurutjalambuy wäŋa, ga walalanydja marrtjina bala djuḻkmaraŋalana Daypitkunydja nhanŋuwaynydja wäŋa ŋunhi, ga nhanukala Daypitkala miyalkthunydja, rurraŋ'thurruna yukurrana, ŋayi nhäŋalanydja yukurrana dhaḻakarrkurru, nhäŋalanydja ŋayi yukurrana ŋanya Daypitnha giritjinyara wapthu'‐wapthunara, giritjinyara marrtjinyara bala, buku‐ŋal'yunara Garraywalaŋuwuy. Bala ŋayi gupa‐waŋanana ŋanya ŋayaŋuyuna nhanukalay ŋayi.

17 Yo, walala gäŋala ŋunhiyi Dhawu'‐nherraṉminyarawuy Bathinydja, ga ŋunhamalana gurrunharanydja ḏalwaḏalwa'lilina buṉbulili ŋunhi ŋayi Daypitthu ŋäthiliŋga yana buṉbuŋala ŋurikiyi Bathiwu. Ga ŋunhalayina walala wekaŋala mundhurr Garraywunydja bathara, buku‐ŋal'yurrunana nhanŋu. 18 Dhäŋuru ŋuliŋurunydja ŋunhi walala wekaŋala Garraywu, Daypittja yukurrana bukumirriyaŋalana ŋurikina yolŋu'‐yulŋuwuna, märr yurru Godthu guŋga'yun walalanha, gäma yukurra yurru ḻatju'kuma. 19 Bala yana Daypitthu ŋathana wekaŋala marrtjina waŋga'‐waŋganygu yana ŋuriki yolŋu'‐yulŋuwunydja, ga dhäŋuru ŋuliŋurunydja bala walala marrtjina roŋiyinana wäŋalilina.

20 Ŋayi Daypittja marrtjina wäŋalilina roŋiyina, bala ŋunhala ŋayi wäŋaŋuranydja bunana; ŋayi miyalkthunydja nhanukala waŋana bitjarrana, “Nhä dhuwala nhenydja ḻuḻatj ḻawaḻawa? Be nhenydja dhuwala buŋgawaŋga ŋurruŋu Yitjuralpuyŋuwu, bala nhuna walala dhäykawurruyunydja nhäŋalana marryunarana ŋunhi nhe yukurrana giritjinanydja.”

21 Ga ŋayi Daypittja waŋana bitjarra, “Ŋarranydja ŋunhi yukurrana giritjina Garraywu yana, märr‐ŋal'yurruna nhanŋu. Ŋayipi ŋarranha djarr'yurruna, ga nherrara ŋayi ŋarranha nhokalaŋuwala bäpa‐ŋaliwala dharapullili, märr ŋarra yurru dharray yukurra Godkalaŋuwu malawu Yitjuralpuyŋuwu. 22 Ŋarranydja yurru bitjanna liŋguna giritjirrina yukurra, märr‐ŋal'yunna yurru Garraywu; yakana ŋarranydja yurru ḏaḏawyun.”

23 Bala ŋayi Djolwu ŋunhi gäthu'mirriŋu miyalk, ‡MichalMikuḻ yäku yothumiriw nhinananydja yukurrana, dhalwaŋiny' yana liŋgu‐u‐u ga rakunydhina ŋayi yothumiriw yana.