1 Ga yurruna Garrayyu djuy'yurruna dhäwu'‐gänharamirrinha ḏarramunha yäkunha *NathanNaythannha †DavidDaypitkala, ga bitjarra ŋayi ḻakaraŋalanydja Daypitku dhulmu‐mayali'mirri dhäwu gam'. “Wiripunydja märrma' yukurra yolŋu maṉḏa nhina waŋganyŋura wäŋaŋura, waŋganydja ḻukunydja, ga waŋganydja ŋurruwuyk. 2 Ga nhanbala ŋuripa ḻukunydjawanydja dhaŋaŋnha dhika wäyin malanha, buliki' ga bembi malanha. 3 Ga nhanŋu ŋurikinydja ŋurruwuykkunydja waŋganynha yana bembi, ŋunhina bili waŋganynha, yurru ŋayi ŋuli wirrkina dhika djäkanydja ŋurikiyi ŋunhiyi ŋurruwuyktja yolŋu, ga yumurrkuny'tja nhanŋu ga yindina ḏukṯuk ŋuriki wäyingu. Ŋayi ŋuli ŋathanydja wekanha nhanŋuway ŋunhi ŋatha, ga ḻaw'maranha ŋayi ŋuli makarrlili ŋal'maranha dhangi'yuna, balanyara yana liŋgu bitjan ŋunhinydja nhanŋu ga yothu'na.

4 “Waŋganymirriyunydja waluyu yolŋuyu withiyan buna ŋayi ŋunhala ŋuriki ḻukunydjawu ḏarramuwu, ga ŋayinydja ḻukunydjanydja waŋa bitjanna, ‘Wanhaka dhika ŋarra yurru maḻŋ'marama wäyindja, bala wutthun ḻukanharawunydja? Yakana ŋarra yurru wutthun ŋarrakuwaynydja dhuwala wäyin.’ Bala yana ŋayi ŋunhinayi märraŋala, ŋurruwuykpana ŋunhi wäyinnha bembinha, bala wutthurrunana, bala walala ḻukanana.”

5-6 Ga ŋayi Daypitthunydja ŋäkulana ŋunhiyi, bala wiṯthurrunana dhika maḏakarritjthinanydja gay' ŋurikina ḻukunydjawuna yolŋuwu, bala ŋayi waŋanana bitjarrana, “Yätjnha ŋiniya dhuwalanydja. Ŋuli ŋayi rakunydhina ŋunhiyinydja ḻukunydjanydja. Yol ŋayi dhika yäkunydja?” 7 Ga Naythandhunydja waŋana ḻakaraŋala bitjarrana, “Nhäŋga ŋunhiyinydja ḏarramu,” balanyarayinydjayi. “Godthu yukurra waŋa nhunanydja bitjan gam', ‘Ŋarra nhuna nherrara ŋurruŋukuŋala Yitjuralpuyŋuwu miṯtjiwu, ga gungaŋala ŋarra nhuna Djolwala. 8 Ŋarra wekaŋala nhokala nhanŋu dhuwali yolŋu'‐yulŋunha goŋlili, ga ŋarra nhuŋu marrtjina wekaŋala miyalknha walalanha. 9-11 Nhäku nhe ŋarrakunydja dhärukku yukurra ŋuyulkthirri? Nhäku warray nhe dhuwala bitjarrayinydja yätjtja djäma rom? Marina yurru bunanydja bay' nhuŋu ga nhokalaŋu miyalkku ga yumurrku'wu, liŋgu nhe bumara Yurayanha ga djaw'yurruna nhe nhanbala miyalknha; ŋarra yurru nhuna gombuma dhuwala miyalknhanydja ga wiripuŋuwana gathan ḏarramuwa. 12 Yätjnha nhe yukurrana djäma gayulnha ga walalanydja nhäma warray yurru ‡IsraelYitjuralpuyŋuyunydja bukmakthu, ŋunhi nhuŋunydja miyalk yukurra yurru nhina wiripuŋuwalana ḏarramuwala.’ ” 13 Ga Daypitthunydja buku‐ruŋiyinmaraŋala bitjarra, “Ŋarrapi yätjthina. Yätjkuŋala Garraynha ŋarra ŋayaŋu‐yätjkuŋala.”

Ga Naythandja buku‐ruŋiyinmaraŋala waŋana bitjarra, “Garrayyunydja liŋguna bäy‐ḻakaraŋalana nhuŋu, yakana nhe yurru rakunydhirri. 14 Yurru yothu'na ŋunhiyi nhuŋu yurru walkurnha rakunydhirrinydja, liŋgu nhe yaka dhäruk märraŋala Garraynha; miriŋuyunydja nhokala nhäŋala yukurrana ŋunhi nhe djarrpi'kuŋala djäma, bala walala nhäŋiniŋ'‐ḻakaramanydja yukurra ŋanya Garraynhana.”

15 Ga ŋuliŋurunydja dhurrwaraŋuru ŋunhi ŋayi Naythandja marrtjina wäŋalilina, bala yothuny'tja ŋunhala rirrikthurrunana, ŋunhiyinydjayi ŋunhi Yurayawala miyalkthu gurrukaŋala yothunha ŋunhi nhanŋu Daypitku walkur. 16-17 Wirrkina ŋayi ŋunhi dhika rirrikthurrunanydja, ga Daypittja bukumirriyaŋala yukurrana Garraynha ḏäwalakunharawu nhanŋu, walŋakunharawu ŋuriki yothuwu. Ga Daypittja wirrkina dhika ŋoy‐yätjthina, bäyŋuna ŋayi ŋula ŋathanydja ḻukana, ga bitjanana liŋgu munha‐ŋupana ŋayi ŋuli ŋorranha marrtjinya ŋoykurruna munatha'kurruna yana. 18 Yo, yothuny'tja ŋunhi yukurrana rirrikthurruna waŋgany‐rulu ga märrma' bäythinyara walunydja ŋupara, ga ŋuliŋurunydja dhurrwaraŋuru bala yana ŋunhiyi rathany'tja rakunydhinana. Ŋunhi djämamirrinydja walala buku‐wiyaṉiyinana ḻakaranharawu Daypitkunydja, 19 yurru ŋayi Daypitthunydja nhäŋala walalanha waŋanhaminyara giyalkiyalwuy, bala ŋayi dhä‐wirrka'yurruna walalanha, “Yothuny'tja be rakunynha?” bitjarrana.

Ga walalanydja buku‐ruŋiyinmaraŋala bitjarra, “Ŋe, liŋguna rakunynha.”

20 Bala ŋayi Daypittja gaŋgathina, rurrwuyunminanydja ŋayi‐i‐i, bala yana nherrara ḏarrtjalknha girri', bala yana marrtjinana‐wala buṉbulilina, bala buku‐ŋal'yurruna Garraywuna yukurrana ŋunhalana. Ga dhäŋuru ŋuliŋurunydja ŋunhi ŋayi roŋiyina wäŋalili, bala ŋathana ḻukana.

21 Ga djämamirrinydja walala ŋunhi wirrkina dhika ṉirryunmina, ga waŋana bitjarrana, “Ŋunhi ŋayi yukurrana yothu yana rirrikthurrunaŋga yurruna ŋayi rakunydhina, nhenydja ŋunhi yana ŋäthinana yukurrana, ga yakana ŋula ŋathanydja ḻukana. Ga ŋunhi ŋayi rakunydhinana, bala nhenydja gaŋgathinana, bala dhunupana ŋathana ḻukana? Nhäku warray nhe bitjarranydja?”

22 Ga Daypittja buku‐wakmaraŋala waŋana bitjarra, “Ŋunhi ŋayi walŋaŋga yana, ŋarranydja yukurrana nhinana ŋoy‐ŋayaŋay'miriw, bukumirriyaŋala yana yukurrana ga ŋäthina, ŋarra guyaŋina yana bini Garray ŋarrakunydja mel‐wuyuna ŋula, ga walŋakunha ŋanya. 23 Ga dhiyaŋunydja‐wala ŋayi rakunynha liŋguna, ga nhäkuna ŋarra yurru ŋoy‐ŋathamiriwnydja nhina? Bay' nhaltjan ŋarra yurru ŋunha yothu'nhanydja? . . . roŋiyinmarama walŋakumayi ŋanya ŋuriŋi ganuruyu ga ŋäthinyarayu? Ŋula nhäthaŋumirriyu ŋarranydja boŋguŋu marrtji balayi ŋunhamalayi ŋunha ŋayi yukurra nhina, yurru ŋayi yakana yurru roŋiyirri biyapulnydja liliyinydja dhipala, ŋarrakunydja buna.”

24 Ga ŋayinydja Daypittja dhika §BathshebaBatjipawuna nyeyaḻ nhinana yukurrana, ga biyapul ŋayi yothu'mirriyina, ga gurrukaŋalanydja ŋayi ga ḏarramunha yana yothu'nhanydja, ga yäkunydja ŋayi Daypitthu ŋanya nherrara *SolomonDjalamannha. Ga Garraynydja wirrkina dhika märr‐ŋamathina yukurrana ŋurikiyi ḏarramuwu Djalamangunydja.