1 Ga dhäŋuru ŋuliŋuruyinydjayi buŋgawayu ŋuriŋiyi *NebuchadnezzarNipukanitjayu djuy'yurruna dhäruknha bukmakkuna bäpurru'wu yolŋuwu walalaŋgu, ŋayi ḻakaraŋalanydja bitjarrana, 2 “Way walala, ŋäkanydja walala ŋamathaŋa yana, ŋarra yurru nhumalaŋgu dhuwala dhäwu'na ḻakarama. Ŋuruŋu djiwarr'wuyyunydja Godthu Waŋarryu djäma biyapul wal'ŋu mulkuru, bathala wal'ŋu rom ŋarrakunydja. 3 Ŋayinydja ŋunha biyapul gal'ŋu Waŋarr, ga djämanydja ŋayi ŋuli biyapul wal'ŋu ganydjarr‐ḏumurru nhänydja malanha, ga ŋayinydja yukurra yurru nhina ŋurruŋu buŋgawa gupaḏalnha‐wala yana yurru, ga nhanŋu romdja yurru dhärrana yukurra yana mukthunna, dhä‐yawar'yunamiriwnha.

4 “Yo, ŋarra yukurrana nhinana dhapirrkŋura ŋanya dhika wal'ŋu bala'ŋura ŋarrakalay ŋarra, yana ŋarra yukurrana ḻayḻayyurruna ŋarrakalay ŋarra nhäŋura malaŋuŋura, ga bukmak ŋunhi warrpam' ḻatju' yulŋunydja. 5 Ga waŋganymirrinydja ŋarra bukaway'yinana, yurru mirithirrina barrarimirrina ŋunhi yulŋunydja, bitjarra ŋarranha ŋayi barrari‐wekaŋalana ŋuriŋiyi bukaway'yunydja. 6-7 Bala ŋarra waŋana ŋuriki ŋarrakalaŋu ŋarra be ḻiya‐djambatjmirriwu yolŋu'‐yulŋuwu ga marrŋgitjmirriwu, ŋarra ŋäŋ'thurruna walalanha bitjarra, ‘Way walala, ḻakaraŋa mak ŋarrakala mayali' ŋunhi bukaway'wuy,’ bitjarra. Yurru yakana ŋarraku ŋula yolthu ḻakaraŋalanydja, 8 ga yana liŋgu ga ŋayina †DanielDänyulnha bunana ŋunhili ŋarraku. Yo, yuwalk yana Godku Walŋanydja Birrimbirr nhina yukurra ŋurikalayinydjayi ḏarramuwala, bala ŋarra ḻakaraŋala ŋarrakuway bukawayny'tja ŋunhi nhanukalana. 9 Ŋarra waŋana bitjarra ŋanya Dänyulnha, ‘Nhenydja dhuwala Dänyul biyapulnha gal'ŋu ḻiya‐djambatj ŋurikala wiripu‐guḻku'walanydja. Ŋarra marŋgi nhuŋunydja, ŋunhi nhenydja yukurra dharaŋan gal'ŋu ŋunhi malanha ŋunhi yukurra djuḻuḻ'yun ŋorra. Nhenydja marŋgi, liŋgu Godkunydja Walŋanydja Birrimbirr dhuwali nhokala. Nhena yurru ŋarrakunydja ḻakarama nhä ŋunhiyi bukaway' mayali'.’

10 “Yo, ŋorrananydja ŋarra yukurrana, bala ŋarra nhäŋalana dharpa bena ŋanyana djaka'‐weyinnha, ŋayi yukurrana dhärrana ṉapuŋga' wal'ŋu dhiyala munatha'ŋura wäŋaŋuranydja, 11 yurru mukthurruna warray ŋayi ŋunhi marrtjina bala ŋutharanydja, yana liŋgu‐u‐u ga be‐wala wapthurruna, dhanu'yurruna ŋunha gäraktja djiwarrny'tja, ga birrka'mirriŋuru wäŋaŋuru malaŋuŋuru nhäŋalana ŋanya yukurrana ŋunhiyi dharpanha yulŋunydja. 12 Yo, marwat malanha man'tjarr ŋanya dhika dhapirrkmirri, ga borum malanha mirithirri guḻku' ŋurikiy dharpawuy, gana' yana bukmakku yolŋuwu walalaŋgu ŋunhi yukurra nhina ḻiw'marama dhiyalaŋumi munatha'ŋura. Ga wäyindja marrtjina ḻuŋ'thurruna, bala ŋorranana marrtjina ŋunhiwala dhuḏililina dharpalili ŋurrŋgitjlilina, ga wäyindhu malaŋuyu buṯthunaramirriyunydja djäma marrtjina yaluna walalaŋguway wäŋana ŋunhiwala baṉdja'‐baṉdjalilinydja. Ga bukmakthu ŋunhi nhäyu malaŋuyu walŋamirriyunydja yukurrana ḻukanana borumdja.

13 “Yo, nhäŋalanydja ŋarra yukurrana ŋunhiyi dharpanha, guyaŋina ŋupara bitjarrana, bala ŋarra nhäŋala yolŋunha djiwarr'wuynhana, ŋayi marrtjina lili dhunarrana beŋuru djiwarr'ŋuru. 14 Bala ŋayi waŋananydja wirrkina dhika yatjurruna bitjarrana, ‘Ma' djatthurrana dhuwali dharpanydja, guḻk‐guḻkthurrana marrtjiya waṉa'‐waṉanydja, ga rurr'‐rurryurrana man'tjarrnydja, ga barrkuwatjkuŋana borumnhanydja dhuwalinydja malaŋunha, ga gukuŋana wäyinnhanydja walalanha dhipuŋuruyi. 15 Ga dhuḏina yana yurru yukurra djingaryundja ŋayi dhuwali dharpanydja, yurru dhärranydja ŋayi yukurra yurru dhuḏi ŋunhiyi dharpa ḏapmaranhara djimuku'wuy raki'wuynydja. Yo, dhärra ŋayi yurru yukurra mukthun yana, yana liŋgu‐u‐u ga wakuluŋgul'yu yurru marrtji ŋunhiyi ŋäkirrmarama ŋanya, yurru ŋuriŋiyi dharpayunydja yukurra ḻakarama dhunupamirriyama yolŋunha.

16 “ ‘Yo, ŋanyanydja ŋunhi yurru bathalanhanydja yolŋunha yukurra djatthunna ŋunhiyi galkinyamaramana. Marrtjinydja ŋayi yurru ŋunhiyi bitjan muḻkurrmiriwnha yolŋu, balanyarana biyaku ŋuli wäyin; yana ŋayi nhina ŋorrana mulmuŋurana yurru, ga wakuluŋgul'yu ŋanya yurru monyguma, yanana liŋgu ga 7 yurru dhuŋgarra djuḻkthun. 17 Ga balanyarayina ŋunhi ŋuriŋi nhänharapuyŋuyunydja walalay nherrara, märr yurru bukmakthu nhämanydja yana, bala dharaŋanna ŋunhi dhuwalanydja wäŋa nhanŋuway yana ŋuruku djiwarr'wuywu Waŋarrwu Godku. Ŋayi wal'ŋu buŋgawa dhiyaku bukmakkunydja wäŋawu buku‐ḻiw'marama; ŋayipina yana waŋganydhuna yurru djarr'yundja yolkala ŋayi yurru wekama ŋunhi dhuwalayi goŋlili munatha' wäŋa.’ Ga bitjarra ŋayi ŋunhi djiwarr'wuynydja yolŋu waŋana.

18 “Yo, balanyarayi ŋarra ŋunhi bukaway'yinanydja. Ma' ḻakaraŋana ŋarrakala dhuwalayi bukaway'wuy mayaliny'tja. Ŋunha wiripu‐guḻkuny'tja ḻiya‐djambatjmirri yaka walala marŋgi, yurru nhena marŋginydja dhuwala, liŋgu Walŋanydja Birrimbirr Godkunydja nhina yukurra dhuwali nhokala warray.” Ga bitjarra ŋayi buŋgawa waŋananydja Dänyulwala.

19 Yo, ŋayinydja ŋunhi Dänyulnydja, yana ŋayi dharaŋara marrtjina ŋunhiyi bukaway'wuynydja nhanukuŋu, yurru wirrki ŋayi galŋa‐yätjthinanydja mirithina wal'ŋu, ga yakana ŋayi ḻakaraŋalanydja mayaliny'tja nhanukala buŋgawawalanydja ŋurikalanydja, yana ŋayi yukurrana nhinana dhärukmiriwnha yana, weyinŋumirrina märr.

Ga ŋayinydja ŋunhi buŋgawayunydja waŋana ŋanya bitjarra, “Dänyul, yaka nhe galŋa‐yätjthiya ŋuriŋi bukaway'yu, yana dhunupana ŋarrakala lili ḻakaraŋana,” bitjarra.

Ga ŋayi Dänyulnydja waŋana nhanŋunydja bitjarrana, “Buŋgawa, dhiyaŋuyinydjayi bukaway'yunydja ḻakarama yukurra nhunana dhuwala. Ŋarra bini ŋunhi ŋayaŋu‐djulŋithinya warray yulŋunydja, ŋunhi bini dhiyaŋu ḻakaranhanydja ŋunhi miriŋunhanydja nhuŋu. Ŋarra yaka ḏukṯuk dhiyakuyi yätjku ŋunhi yurru maḻŋ'thun nhuŋunydja bitjandhiyi. 20-21 Dhuwala ŋunhiyi bukaway' mayaliny'tja gam'. Ŋunhiyi dharpa dhärrana yukurrana be‐wala wal'ŋu djaka'‐weyindja, yana liŋgu ga dhanu'yurruna ŋunha djiwarr', ga marwattja dhika dhapirrk ŋanya wal'ŋu man'tjarrnydja, ga borum dhika nhä malanha guḻku', ga wäyin malanha nhinana marrtjina ŋurrŋgitjkuŋalana ŋunhiliyi. 22 Yo, dharpayunydja ŋuriŋiyi yukurra ḻakarama nhunana. Nhenydja dhuwala ganydjarr‐ḏumurru wal'ŋu buŋgawa, ga nhokala romdhunydja yukurra warrpam'thun ŋäkirrmarama monyguma dhuwala munathany'tja wäŋanha. 23 Yo, nhäŋalanydja nhe ŋunhiyi dharpanhanydja djatthunara warray, ga yana yukurrana dhuḏina guḻkthunarana ŋunhi dhärrananydja, ga djimuku'wuynha ḏapmaranharanydja ŋunhiyi dhuḏinydja ŋayi dharpa, ga bitjarrana ŋayi ŋunhi yulŋunydja bitjan wakuluŋgul'wuynha monygunhara, balanyarana bitjan wäyin djurruknha.”

24 Bala ŋayi waŋana Dänyul bitjarrana, “Buŋgawa, balakurruyina bukaway'kurru ŋayi Godthu yukurrana maḻŋ'maraŋala warraŋulkuŋalanydja nhokala nhaltjan yurru maḻŋ'thun yalala. 25 Nhe yurru muḻkurrnha bawa'mirriyirri, ga yolŋuyu walalay nhuna yurru gukumana. Yo, nhinanydja nhe yurru ŋunha warraŋulnha gal'ŋu, bitjanna bitjan wäyin ḏapmaranhara djimuku'wuy raki'wuy, ga ḻukanydja nhe yurru marrtji mulmuna, yana liŋgu‐u‐u ga 7 yurru dhuŋgarra djuḻkthun. Ga dhäŋuru ŋuliŋuruyinydjayi bala nhe yurru dharaŋanna, ŋunhi yuwalk yana dhuwalanydja wäŋa munathany'tja nhanŋuway yana Godku wal'ŋu, yaka nhuŋu. 26 Yakana biyapulnydja nhe yurru guyaŋinyamirri ga ḻakaranhamirri nhunapinyay nhe, yanapi nhe bathala wal'ŋu buŋgawa dhiyaku munatha'wu wäŋawu. Ga ŋunhi nhe yurru waŋa bitjandja, ‘Yuwalk muka dhuwala munathany'tja wäŋa nhanŋuway yana Godku, yaka ŋarraku,’ bitjandja yurru, ga dhäŋuru ŋuliŋuruyinydjayi Godthunydja nhuna yurru baḏarraŋ'kumana muḻkurrnydja, ga biyapul ŋayi yurru nhuna gaŋgathinyamirriyama, ga buŋgawayirri biyapul nhe yurru.

27 “Wäy buŋgawa, nhämirri nhe ŋuli mäkiri'‐witjurrunydja ŋarrakunydja dhärukku. Ŋanydjaḻa'yurrana dhipuŋuruyi yätjŋurunydja djämaŋuru romŋuru, ga djäma ŋamathaŋana wal'ŋu. Yakana biyapulnydja buŋgawa‐ḻakaranhamiya nhunapinyay nhe, yana biyaka mel‐wuyurra, guŋga'yurra marrtjiya ŋunha ŋurruwuyknhanydja yolŋunha. Mak ŋayi yurru Godthunydja nhuŋu bäy‐ḻakaramana, märr yurru nhe nhina yukurra ŋamathamana, ga yakana yurru nhuŋu dhuwalayi malanha maḻŋ'thundja bitjandhiyi.” Ga bitjarra ŋayi Dänyulnydja waŋana yukurrana.

28 Yurru ŋayinydja ŋunhi buŋgawanydja yaka warray mäkiri'‐witjurruna ga ŋäkula, yaka warray ŋayi be nyilŋ'maranhamina ŋanyapinyay ŋayi.

29 Yo, ga dhuŋgarra waŋgany djuḻkthurruna, bala waŋganymirrinydja ŋayi yukurra nhina nhanukalay ŋayi wäŋaŋura garrwar gal'ŋu, bala ŋayi yukurra nhämana ŋuliŋuruyina warrpam' wäŋa ŋunhi ‡BabylonBapilunbuy ŋaraka, bala ŋayi waŋana bitjarrana, 30 “Nhä dhuwalanydja bathalanydja wal'ŋu dhikanydja wäŋa, dhapirrktja ŋanyanydja dhikanydja. Ŋarrapi warray dhuwalanydja djäma ŋarrakalay warray ŋarra ganydjarryu wal'ŋu. Ŋarrakunydja wäŋa dhuwala be warray wal'ŋu garaŋanydja. Ŋarranydja dhuwala biyapul ŋarra bathala wal'ŋu, ga dhuwalanydja wäŋa dhapirrktja ŋanyanydja bukmak ŋarrakalay warrpam'.” Ga bitjarra ŋayi ŋunhi buŋgawa waŋananydja.

31 Ga dhunupana rirrakaynydja waŋana nhanukala djiwarr'ŋurunydja bitjarrana, “Way buŋgawa Nipukanitja, ŋäka ŋarranha, mäkiri'‐witjurra ŋarraku. Dhipuŋurunydja dhäŋuru nhe yurru yakana buŋgawa dhiyakunydja wäŋawu. 32 Walala yurru ŋupanna nhuna gukumana, ga nhinanydja nhe yurru ŋunhana ya' warraŋulnha, bitjanna bitjan wäyin, yana liŋgu ga nyilŋ'maranhamirri nhe yurru nhunapinyay nhe wal'ŋu, ga waŋa bitjan, ‘Yuwalk muka dhuwalanydja wäŋa munathany'tja nhanŋuway Godku yana, ga ŋayipi waŋgany ŋunha ŋurruŋunydja wal'ŋu, bathalanydja. Ŋayipi ŋuli yana djarr'yundja ŋula yolkala ŋayi yurru ŋunhiyi goŋlili wekama dhuwala wäŋa.’ ”

33 Ga Dhunupana ŋayinydja ŋunhiyi buŋgawanydja muḻkurrnydja nhanŋu waṉḏinana bawa'mirriyinana, ga yakana biyapulnydja ŋayi nhinana yukurrana yolŋu'‐yulŋuwala miṯtjiŋura, yana walala ŋanya ŋuparana dhawaṯmaraŋalana, ga nhinananydja ŋayi yukurrana warraŋulnha ŋunhana, bitjarrana bitjan wäyin, ḻukana marrtjina mulmuna ŋathanydja. Yo, yukurranhanydja ŋayi ŋuli marrtjinya warraŋulnha yana, ga wakuluŋgul'yu ŋuriŋi ŋuli monygunhana ŋanya, djurrukkunhana ŋanya ŋuli rumbal. Ga marwattja nhanŋu ŋunhi ŋutharana marrtjina bena dhika ŋanya, weyindhinana ŋuthara, bitjarrana bitjan ḏamala bulka', ga goŋbuynydja ŋunhi dharirr nhanŋu weyindhinana ŋuthara, bitjarrana bitjan wäyin dharirr.

34 Yo, 7 dhuŋgarra djuḻkthurruna, bala waŋganymirrinydja ŋayi ŋuriŋiyi buŋgawayu dhupuŋala bala djiwarr'lilina, bala nhanŋu muḻkurrnydja marrtjina yarrkthurruna ralkthurrunana balayi roŋiyinayi, bala ŋayi ŋamathaŋalayi guyaŋina. Bala dhunupana ŋayi wokthurrunana Garraynhanydja Godnha djiwarrwuy'nhanydja, märr‐ŋal'yurruna märrliliyaŋalana manapara, waŋana bitjarrana,

36 Yo, buŋgawa ŋunhiyi dhawar'maraŋalanydja waŋana marrtjina bitjarrayina, “Yo, ŋarraku muḻkurrnydja balayi ḻatju'yinayi yarrkthurrunayi, ga dhuwalana ŋarra biyapul balayi buŋgawayi nhina yukurra, ga biyapul ŋarraku yolŋunydja walala märr‐ŋal'yun yukurra. 37 Yurru dhiyaŋunydja‐wala ŋarranydja yukurra wokthun nhanŋuwaynha Godkuna yana, yakana ŋarra yurru märr‐ŋal'yun ŋarrakuwaynydja; nhanŋuwaynha yana ŋarra yurru märr‐ŋal'yundja yukurra. Ŋayinydja ŋuli bitjan warray liŋgu djäma rom‐waŋganydhirri warray yana, ga dharraḏakumanydja ŋayi ŋuli yindikunharamirri ŋanyapinyay ŋayi.” Ga bitjarra ŋayi ŋunhi buŋgawa waŋananydja.