1-2 Yo, ŋulinyaramirriyunydjayi ŋunhi ŋayi *9:1–2 DariusDariyatjnha buŋgawayina ŋuriki †9:1–2 BabylonBapilunbuyŋunydja wäŋawu, ŋarranydja ŋunhi maŋutji‐ḻaw'maraŋala djorra' Godku dhäruk, bala ŋarra nhäŋalana marrtjina dhäruk ŋunhina ŋunhi ŋayi Godthu wekaŋala ‡9:1–2 JeremiahDjiramayawala, bala ŋarra maḻŋ'maraŋalanydja ŋunhilimiyi djorra'ŋuranydja dhäruk waŋgany, balanyara gam'. §9:1–2 JerusalemDjurutjalamdja yurru wäŋa ḏaw'‐ḏawyunna muṉguythirrina dhikana yolŋumiriwyirrina, yana liŋgu yurru‐u‐u ga 70 dhuŋgarranydja djuḻkthun. Ga ŋunhi ŋarra nhäŋalanydja ŋunhiyi, bala ŋarra dharaŋarana dhunupana, ŋunhi ŋunhiyinydjayi walu dhä‐ḏir'yunaramirrinydja yaŋara‐dhawar'yunarana liŋguwuynha; dhuwalanydja walu gay gäthuranydja ŋunhi ŋayi yurru Godthu gäma nhanŋuwaynydja yolŋu'‐yulŋunha balayi giṯmaramayi ŋunhiwalayi wäŋalili walalaŋgalay. 3 Bala ŋarra bukumirriyaŋalanydja mirithinana yana dhika wal'ŋu wirrkina Garraywalanydja Godkalanydja, bitjarra ŋarra bukumirriyaŋalanydja yukurrana ŋoy‐ŋathamiriwnha wal'ŋu, ŋäthinana manapara ŋarra marrtjina, ga ŋayaŋu ŋarra ŋunha warwumirriyina ŋilimurruŋgalaŋuwu yätjku malaŋuwu. 4 Yo, bukumirriyaŋalanydja ŋarra yukurrana ŋunhi bitjarrayi, ḻakaranhamina ŋarrakuway ŋarra yätj ga ŋarrakalaŋuwu ŋuruku yolŋu'‐yulŋuwu yätjku, ga bitjarra ŋarra bukumirriyaŋalanydja gam'.

“Garray God Waŋarr, nhenydja biyapul wal'ŋu bathala, Waŋarr wal'ŋu, ga dhuwala ŋarra yukurra märr‐ŋal'yundja nhokalaynha yana. Bitjan liŋgu nhe ŋuli djämanydja bitjan yana liŋgu bitjarra nhe ŋunhi dhawu' nherrara, ga bitjan liŋgu nhe ŋuli märr‐ŋamathirrinydja märryu‐ḏapmaranharamirriyu ŋurikinydja walalaŋgu ŋunhi walala yukurra märryu‐ḏapmarama nhuna, ga ḏälkuma ŋayathama nhuŋu romnha.

5 “Garray, ŋanapurrunydja dhuwala dhuwurr‐yätj gal'ŋu yana; djämanydja ŋanapurru mirithina yana gal'ŋu ŋula nhä romdja nhäŋiniŋ', bitjarra ŋanapurru dhuwurr‐waḏatjtjurrunana nhuŋunydja rom. Nhenydja ŋunhi ḻakaraŋala ŋanapurruŋgu dhukarrnydja dhunupa nhinanharawu ŋamathanharawu, yurru ŋanapurrunydja bilyurruna, ga ŋapa warray wekaŋala nhuŋu; yaka ŋanapurru dhäruktja märraŋala nhuna. 6 Ŋuriŋi nhokala djämamirriyunydja yolŋuyu dhäwu'‐gänharamirriyunydja, liŋgu walala yukurrana ḻakaraŋala nhuŋu dhäruktja ga dhäwuny'tja ŋanapurruŋgalaŋuwala be buŋgawawala walalaŋgala ga ŋurru'‐ŋurruŋuwala ga bukmakkala yolŋu'‐yulŋuwala, yurru ŋanapurrunydja yaka warray ŋäkula, mäkiri'‐yaw'yunmina warray ŋanapurrunydja.

7 “Garray nhenydja ŋunhi ŋuli djäma rom‐dhunupayirri warray bitjan liŋgu, ga ŋanapurrunydja yukurra dhuwala gorana ŋuriŋi ŋunhi ŋanapurru ŋuli ŋula nhä djäma nhäŋiniŋ' rom. Bukmakthirri yana ŋanapurru yolŋunydja dhuwurr‐yätjmirri, ŋunha ŋunhi yolŋu walala ŋunhi walala yukurra nhina *JudeaDjudiya wäŋaŋura, ga be‐wala ŋunhi nhe barrkuwatjkuŋala walalanha wäŋalili barrkulili. Yo, nhe ŋunhi bitjarrayi ŋanapurrunha barrkuwatjkuŋalanydja, liŋgu ŋanapurru nhuna meṉguŋala ga ŋapa nhuŋu wekaŋala, ga bilyurruna ŋunha wiripuŋuwala waŋarrwala.

8 “Yo Garray, ŋanapurrunydja dhuwala goramirrina yulŋunydja, liŋgu ŋuriŋi ŋanapurruŋgala ŋurru'‐ŋurruŋuwala ga märi'muwala ŋanapurruŋgalaŋuwala dhuwurr‐yätjthinyarayu. Ŋanapurrunydja dhuwala ŋapa‐nherraṉminana, yaka ŋanapurru ḏukṯuk ŋanapurru yurru nhina galki nhokala, galkithirri. 9 Yurru nhenydja ŋunhiyi warray, mel‐wuyunaramirri warray God ŋanapurruŋgunydja; waḏutja warray ŋuli nhenydja bäy‐ḻakarama ŋurikiyi, ŋunhi ŋanapurru ŋuli roŋiyirri bilyun nhokala.

10 “Garray, nhe wekaŋala liŋgu nhuŋuwaynydja nhe romnha ŋanapurruŋgala, yurru ŋanapurrunydja yaka warray marrtjina ŋuliwitjarrayi nhokalanydja romgurru ga gatjaḻkurru. 11 Ŋanapurru †IsraelYitjuralyunydja bukmakthu yana bakmaraŋala nhuŋu romdja; yakana ŋanapurru dhäruk‐märraŋala nhuna. Ŋanapurru marrtjina gupa‐wuḻkthurrunana yana ŋanapurruŋgalaynha djälyu, ga dhiyakuyina märrwu ŋunhi marinydja marrtjinana lili ŋanapurruŋgu. 12-13 Ŋäthilinydja ŋunhinydja nhe ŋanapurrunha dharraykuŋala liŋgu ḻakaraŋala, ŋunhi yurru mari bathala buna ŋunhi ŋanapurru yurru yakanydja marrtji nhokalanydja romgurru, ga liŋguna dhuwala maḻŋ'thurrunana yulŋunydja, bitjarra yana liŋgu ŋunhi nhokala dhäwu'‐gänharamirriyu ḻakaraŋala. Nhe ŋanapurrunha dhä‐ḏir'yurrunanydja yuwalkkuŋala yana ga ŋanapurruŋgu ŋurru'‐ŋurruŋunha, yurru ŋanapurrunydja mukthurruna warray yana dhuwurr‐yätjthina djäma ŋula nhä; yaka ŋanapurru bilyurruna, ga marrtjina ŋuliwitjarra nhokalanydja yuwalkŋukurrunydja gal'ŋu romgurru ga dhukarrkurru. 14 Yo Garray, dhunupa ŋunhi nhuŋunydja, ŋunhi nhe ŋanapurrunha dhä‐ḏir'yurrunanydja, liŋgu ŋanapurru yaka nhuna dhäruk‐märraŋala.

15 “Garray Gunhu' Waŋarr, ŋanapurrunydja dhuwala nhuŋuway yolŋu walala, nhe ŋanapurrunhanydja dhawaṯmaraŋala beŋuru ‡EgyptYetjipŋurunydja ŋuriŋi nhokalay bathalayu gal'ŋu ganydjarryu, yurru ŋanapurrunydja dhuwurr‐yätjthina warray, ga djäma yätj warray rom. 16 Garray, nhenydja ŋunhi mel‐wuyunaramirri, yaka yana Garray mukthurra‐wala ŋaramurryiyanydja ŋanapurruŋgu. Ŋunha Djurutjalamdja wäŋa nhuŋuway yana wal'ŋu dhulŋuŋu, yurru ŋuruŋu ŋunhi yolŋuyu walalay ŋunhi walala yukurra nhina ḻiw'marama, walala yukurra waŋa yätjkumana dhika ŋunhayi wäŋanha ga ŋanapurrunha rrambaŋikumana, liŋgu ŋanapurru dhuwurr‐yätjthina, ga bitjarrayi liŋgu ŋuriŋi ŋanapurruŋgala märi'muyunydja walalay dhuwurr‐yätjkuŋalayi yana.

17 “Garray, ŋäka ŋarrakuŋu dhuwala bukumirriyanharawuynydja, ŋarra märrliliyamanydja yukurra wirrki yana nhokala. Gaŋgathinyamirriyaŋana ŋunhanydja yuṯakuŋana nhuŋuway Buṉbunhanydja, ŋunha marrtji ŋorra baḏuwaḏuyunara buḻwaŋ'thunara, biyaka djäma yuṯakuŋana gal'ŋu dhapirrkkuŋana, märr yurru wiripu‐guḻkuny'tja yolŋu'‐yulŋu marŋgiyirrina, ŋunhi nhepi warray yuwalkŋunydja gal'ŋu God.

18 “Garray, ŋanapurrunydja dhuwala nhina yukurra ŋayaŋu‐yätjthirrina. Ŋäka ŋanapurruŋguŋu ŋäthinyarawuynydja, ga nhäŋa ŋanapurrunha ŋuriŋi mel‐wuyunaramirriyuna, liŋgu ŋanapurru djäma djarrpi' yana gal'ŋu, yaka dhunupa. 19 Garray, ŋäka ŋanapurruŋguŋu dhuwala bukumirriyanharanydja, ga bäy‐ḻakaraŋana yana. Garray, djämana yana yulŋunydja ŋuriŋi nhokalay ganydjarryuna; djämanydja waḏutjana, märr yurru bukmaknha yolŋu marŋgiyirrinydja ŋunhi nhepi Godtja yana. Liŋgu dhuwala wäŋa ga ŋanapurru dhuwala yolŋu'‐yulŋu yäkumirri nhokalaŋumirri yana.” Ga bitjarrayi ŋarra yukurrana bukumirriyaŋalanydja.

20 Yo, bitjarra liŋgu ŋarra yukurrana bukumirriyaŋalanydja Godnha, bitjarra ŋarra ḻakaraŋala marrtjina ŋarrakuway ŋarra yätj malanha ga ŋarrakalaŋuwu yolŋu'‐yulŋuwu ŋuriki §IsraelYitjuralwu, ŋunhi ŋanapurru djäma yätjkuŋala djarrpi'kuŋala, yaka dhunupa. Ga bitjarra liŋgu ŋarra yukurrana ŋäŋ'thurruna Garraynha yulŋunydja yuṯakunharawunydja ŋuriki nhanukalaŋuwu dharrpalwunydja Buṉbuwu.

21 Ŋunhi ŋarra yukurrana mukthurrunaŋga yana bukumirriyaŋala, bala ŋarra nhäŋalana djiwarr'wuynha yolŋunha yäkunha *GabrielGaypurulnhana, ŋunhinhanayi ŋunhi ŋarra nhäŋala ŋanya ŋäthili wal'ŋu, ŋayi marrtjinanydja lili ŋarrakala ŋulinyaramirriyuna waluyu ŋunhi walala bini yukurranha bukumirriyanha ŋunhiliyi Godkala Buṉbuŋura. 22 Marrtjinanydja ŋayi, bala waŋana ŋarranha bitjarra, “†DanielDänyul, ŋarranydja dhuwala marrtjina lili guŋga'yunarawu nhuŋu, märr yurru nhe marŋgiyirri nhaltjan yurru ŋunhiyi maḻŋ'thun yalala, nhä ŋayi Godthu ŋunha nherrara. 23 Ŋulinyaramirriyunydja ŋunhi nhe ŋurru‐nherrara bukumirriyaŋala bitjarrayi, Godthunydja nhuna ŋäkula ŋunhi, ga dhunupana ŋayi djuy'yurrunanydja ŋarranhana lili nhokala. Yuwalkthi nhuŋu ŋayi yukurra mirithirri märr‐ŋamathirrinydja, bala ŋayi djuy'yurrunana ŋarranha lili nhokala, ḻakaranharawu ŋurikinayi ŋunhi ŋayi Godthu nherrara, nhä yurru ŋunhi maḻŋ'thun ŋunhala bala yalala.

24 “Yo, Godkunydja yolŋu walala nhanŋuwaynydja ŋunhi yurru yukurra nhina dhiyala ‡BabylonBapilundja wäŋaŋura 70 dhuŋgarranydja, ga dhurrwaraŋuru ŋuliŋuruyinydjayi ŋayi yurru Godthunydja dhawaṯmaramana walalanha, märramana yurru dhipuŋurunydja wäŋaŋuru. Ga ŋulinyaramirriyunydja ŋunhi 400 ga 90nydja yurru dhuŋgarra djuḻkthun, ŋulinyaramirriyunydja ŋayi yurru warrpam'nha yana dhawaṯmarama ŋuliŋuru yätjŋurunydja romŋuru wal'ŋu; nhuma yolŋu walala ga dharrpal ŋunhi wäŋa yurru ḏarrtjalknha ŋanyana dhikana, dhuwurr‐yätjmiriwnha ŋula nhämiriwnha. Yo, Godthunydja yurru buwayakkumana yana nhumalaŋgu yätjtja warrpam'nha, bala djäma nhumalanha yurru ḏarrtjalkkumana ŋanyana dhikana dhapirrkkumana wal'ŋu, ga dhäŋuru ŋuliŋuruyinydjayi nhumanydja yurru bukmakthirrina nhinanydja yukurra ŋunhilinayi nhanukalaynha rom‐dhunupaŋurana gal'ŋu romŋuranydja, gupaḏalnha‐wala yana yurru. Ŋäthilinydja ŋunhinydja, ŋuriŋi dhäwu'‐gänharamirriyu ḻakaraŋala, ŋunhi Godku Buṉbunhanydja yurru biyapul gaŋgathinyamirriyamayi dhuḻ'yundhi, ga yuwalk yana yurru bitjandhiyi maḻŋ'thundja; yuwalk yana yurru biyapul dhuwalayi wäŋanydja dhärra yukurra ḏarrtjalk yana, ganaŋ'thunara Godku nhanŋuway dhulŋuŋu.

25 “Ŋäka mäkiri'‐witjurra ga marŋgithiyana yulŋunydja. Yo, ŋuriŋi buŋgawayunydja wal'ŋu yurru nherraṉ rom, märr yurru yolŋuyu walalay dhuḻ'yundhi biyapul dhuwala §JerusalemDjurutjalamdja wäŋa, ga dhäŋuru ŋuliŋuru ŋunhi 49 dhuŋgarra yurru djuḻkthun, ga biyapul yurru ŋayi ŋunhiyi wäŋa Djurutjalambuynydja biyapul wuṉḏaŋarryirriyi dhärra yukurra ḻiw'maranhara yana ḻoḻuwuynydja gunganhara. Yurru ŋulinyaramirriyunydjayi dhuwalayi wäŋanydja mukthun yurru mari‐yakay yukurra djingaryun. 26 Ga dhäŋuru ŋuliŋuruyinydjayi märr‐weyin ŋula nhämunha' dhuŋgarra, yana liŋgu‐u‐u 400 ga 34 dhuŋgarra yurru djuḻkthun, bala ŋayina yurru ŋunhiyinayi Godkuŋuna ŋunhi djarr'yunara walŋakunharamirrina yolŋu burakirri, walala yurru buma ŋanya murrkay'kumana, yaka nhanŋuwaynydja, wiripu‐guḻku'wu.

“Ga yalalaŋumirriyunydja ŋayi yurru wiripuna yolŋu buŋgawa maḻŋ'thun, ŋunhinydja yurru ŋayinydja biyapulnha gal'ŋu miriŋu guḻku'mirrina marrtji lili, bala ŋayi yurru baḏuwaḏuyun Djurutjalam wäŋa, ga biyapul ŋunhiyi Buṉbu Godkuna. Yo, ŋunhiyi miriŋunydja yurru marrtji ŋurruthirrina, bala ŋurruŋu‐yuḻkthunna yurru djuḻkthunmaramana, ga dhika nhäna bunharamirrina yukurra yurru, bathalana ŋanyana mari, bunharamirri yukurra yurru bitjanna liŋguna, yana liŋgu ga ŋunhiyi dhä‐yawar'yunaramirri walu yurru buna. 27 Yo, ŋuriŋinydja ŋayinydja buŋgawayunydja yurru nherraṉ dhawu'na ŋurikala yolŋu'‐yulŋuwalanydja miṯtjiwalanydja 7 dhuŋgarra, ga dhika ṉapuŋgany'tja yurru, ŋunhi yurru ḻurrkun' märr dhuŋgarra ga 6 ŋaḻindi djuḻkthunna, bala ŋayinydja yurru ŋunhiyi dhawuny'tja nhanŋuway ŋayi bakmaramana; ŋayi yurru ḏaḏawmarama yolŋu'‐yulŋunha ŋuliŋuruyi buku‐ŋal'yunaraŋuru, märr yurru walala yakana yukurra biyapulnydja mundhurr wekama Godku ŋunhiliyi Buṉbuŋuranydja. Ga ŋayipi yana ŋuriŋi bili yurru ŋal'marama ŋunhiwala Godkala Buṉbulili ŋula nhä yana, yätjnha gal'ŋu mirithirrina, ga yakana yurru ŋayi ŋunhiyi Buṉbu ḏarrtjalktja yukurra djingaryun biyapulnydja, ganaŋ'thunara nhanŋuway Godkunydja, liŋgu ŋayina yurru ŋunhinayi ŋula nhäna yukurra djingaryun ŋunhili Godkalanydja Buṉbuŋura, ga yana liŋgu‐u‐u ga Godthu yurru ŋayipi baḏuwaḏuyundja ŋunhiyi ŋula yolnhanydja yolŋunha yätjnhanydja, ŋulinyaramirriyunydjayi ŋunhi Godthu ŋayipi liŋgu nherrara ŋurikiyinydjayi, ŋunhi ŋanya yurru ŋayi baḏuwaḏuyun rumbal‐winya'yunmarama.”