1-2 Bala Garray waŋana *14:1–2 MosesMawtjitjkala bitjarra, “Ma', ḻaw'yurrana walala ga marrtjiyana. Mukthurra yana marrtjiya yukirriya walala, ga yana liŋgu ga wäŋa yurru ŋayi gilitjirri ŋunhiyi raŋi, ga ŋunhilina nhuma yurru ŋorra'‐ŋurranydja, 3-4 liŋgu ŋayi yurru buŋgawanydja waŋa bitjanna, ‘Way, ŋunhanydja walala yurru gaṯthunna ŋunhala ŋanhdharkŋuranydja, yakana walala yurru winya'‐winyayun ŋunha ŋarrakalanydja goŋŋuru.’ Bitjanna ŋayi yurru ŋunhi buŋgawanydja waŋa, liŋgu nhanŋu ŋayaŋunydja ŋarra ŋunhi ḏälkuŋalana. Bala ŋayi yurru nhumalanha goyurr‐ŋupanna, liŋgu guyaŋirri ŋayi yukurra, yanapi ŋayi yurru ŋayathama, bala roŋiyinyamaramana nhumalanha. Yurru ŋarranydja yurru ŋurikiyi djuḻkthun warray, nhanŋu buŋgawawu ga nhanukalaŋuwu miṯtjiwu. Bala walala yurru bukmakthirrina ŋunhalayi †14:3–4 EgyptYetjiptja marŋgiyirri ŋunhi ŋarranydja waŋarrnha wal'ŋu Garray Godnha.” Ga bitjarra ŋayi Garraynydja waŋana. Bala walala yuwalkthi marrtjinana‐a‐a, ga ŋunhiliyina walala wäŋaraŋalanydja raŋiŋurana, galki mayaŋ'ŋura yäkuŋura Miku Gapuŋurana.

5 Ŋe. Ŋunhi ŋayi buŋgawayu Yetjippuyŋuyu ŋäkulanydja ‡IsraelYitjuralpuyŋunha liŋguwuynha marrtjinyarana, ga biyapul ŋayinydja marrtjina djambi ŋanyapinyay ŋayi ḻiyanydja, ga nhanbala djämamirri walala bitjarrayi liŋgu djinydjim, bala walala waŋana bitjarrana, “Nhäku ŋilimurru walalanha ŋunha djuy'yurrunanydja? Yolthuna ŋilimurruŋgu yurru djäma dhiyalanydja?” 6-7 Bala ŋayi djuy'yurruna nhanbalay ŋayi miṯtjinha miriŋunhana ḻundu‐ŋupanarawuna Yitjuralpuyŋuwunydja, yarraman'thuna walalay warryu'‐warryurruna guḻku'na dhaŋaŋnha dhikana miriŋu ḏiltji'yurruna marrtjina, 8 liŋgu Garrayyu rom‐ḏälkuŋalayi ŋanya ŋunhi buŋgawanhanydja ŋunhalanydja bäyma Yetjiptja. Ḻundu‐ŋuparana walala ŋuriŋi Yetjippuyŋuyunydja, 9 bala maḻŋ'maraŋalanydja walalanha ŋunhimalayi warray wäŋalili, ŋunhi walala yukurrana wäŋaraŋala galki gapuŋura mayaŋ'ŋura.

10 Walala Yitjuralpuyŋuyunydja dharr‐way nhäŋalana, walala nhinana gundupuŋala lili, bala walala barrarinanydja wirrkina dhika walalambala, yatjunminana yukurrana Garraywalana märrliliyaŋala guŋga'yunarawuna. 11 Bala walala waŋana ŋarrtjurrunana Mawtjitjnhanydja, “Nhäku nhe yawungu ŋanapurrunha garr'yun ŋulaŋuru Yetjipŋurunydja? Nhe ḏukṯuk ŋanapurruŋgu, ŋanapurru yurru murrmurryunna dhiyala ŋanhdharkŋurana wäŋaŋura? 12 Ŋunhala Yetjiptja ŋanapurru liŋgu muka waŋana nhokala, nhe bini gonha'yuna muka ŋanapurrunha; ŋanapurru bini ŋunhalaŋga bäyma nhinanha Yetjip muka, ga djäma bini Yetjippuyŋuwuŋga. Liŋgu ŋunhanydja Yetjippuynydja ḻatju'na wäŋa; ŋanapurru bini ŋunhalaŋga bäyma djäma yukurranha, märr ŋanapurru yakaŋga murrmurryuna dhiyala ŋanhdharkŋuranydja wäŋaŋura.”

13 Ŋayi Mawtjitjtja waŋana buku‐wakmaraŋala bitjarra, “Yaka nhuma barrariya. Yana djingaryurra walala dharraḏayiya, ŋoy‐ḏälthiya yana, bala Garrayyu yurru ŋilimurrunha walŋakumana. Yo, gäthuranydja nhuma yurru nhämana ŋanya djämawuynha, nhaltjan ŋayi yurru djäma nhumalaŋgu. Nhämanydja nhuma yukurra ŋunha Yetjippuyŋunhanydja, walala marrtji yukurra lili, yurru Garrayyunydja nhumalaŋgala miriŋunhanydja yurru bumana; yakana nhuma bulunydja yurru walalanha nhäma. 14 Nhumanydja yana djingaryurra yukirriya mukthurra, ŋoy‐ḏälthiya yana, liŋgu Garraynydja ŋunha ŋilimurruŋgala warray gali'ŋura, ŋayipina yurru baḏuwaḏuyun warrpam'thuna walalanha.”

15 Bala ŋayi Garraynydja waŋana Mawtjitjkalana, “Nhäku nhuma marrtji wäthunmirri ŋarrakunydja? Ma' waŋiya Yitjuralpuyŋunha, walala yurru marrtjina‐wala yana. 16 Ma' garrwarkuŋana dhuwali wapitjany'tja, ga dhunupamirriyaŋa gapu, bala yurru gapunydja gulkthunna, märr yurru yolŋu'‐yulŋu Yitjuralpuyŋunydja marrtji buḏapthunna yukurra balakurruna‐wala ŋunhamala ḻaypalilinydja, nhuma yurru buḏapthundja yukurra baṉḏany'kurruna. 17 Yo, ŋarra yukurra dhuwala rom‐ḏälkuma Yetjippuyŋuwunydja yolŋu'‐yulŋuwu ŋunhi, bala walala yurru ŋupandja nhumalanha, ga ŋarranydja yurru walalanha buwayakkuma warray, buŋgawanha ga nhanbala miṯtjinha miriŋunha, ga nhanbala yarraman'nha walalanha. 18 Walala yurru Yetjippuyŋuyunydja nhämana, bala marŋgithirrina ŋarraku, liŋgu ŋarra dhuwala Garray Godtja.”

19-20 Bala ŋunhi djiwarr'wuy watjarr‐mulkanharamirrinydja Godkuŋu ŋunhi ŋayi yukurrana mel‐warryurruna walalanha, giṯthurrunanydja ŋayi ḻundulilina walalaŋgala, ga bitjarrayi bili waŋupininy'tja giṯthurrunayi ga ḻunduliliyi wapthurruna, ṉapuŋga'lilina djingaryurruna, walalanhana ŋapatjkuŋala Yitjuralpuyŋunhana, bala Yetjippuyŋuwunydja gungaŋalana. Ga munha‐ŋuparana maŋandja yukurrana djingaryurruna ŋunhilina liŋgu waŋganyŋurana dharapulŋura, warumukthuna yukurrana mel‐monyguŋala Yetjippuyŋunhanydja.

21 Bala ŋayinydja Mawtjitjtja waṉa‐djarryurruna goŋ‐wapitja'mirrina, dhunupamirriyaŋala gapuna, bala ŋayi Garrayyu djuy'yurruna watana, dhimurru'ŋuruna gali'ŋuru ŋayi bo'yurrunanydja bitjarra, ŋutu'na dhikana wata, wirrkina yukurrana bo'yurruna munha‐ŋuparana, bala gapunydja gulkthunmaraŋalana barrkuwatjkuŋalana, bitjarra bala bo'yurruna wirrkaḏay'lili, ga dhipala bala bo'yurruna dhunupa'ŋulili gali'lili märrma'kuŋalana. 22 Bala yolŋunydja walala buḏapthurrunana yukurrana ŋulawitjarrana baṉḏany'kurruna, ga ŋunhi gapunydja yukurrana djingaryurruna dhunupa'ŋuŋura gali'ŋura ga wirrkaḏay'ŋura gali'ŋura.

23 Yo, walala Yitjuralpuyŋunydja mukthurrunaŋga yana buḏapthurruna yukurrana, ga walala Yetjippuyŋuyunydja ŋupara yukurrana lili walalanha, buḏapthurrunayi ŋuliyi dhukarrkurru, ga yana liŋgu ga ṉapuŋga'lilina marrtjina wapthurruna. 24 Yo, wäŋanydja marrtjina galki djaḏaw'yurrunana, ga ŋayi ŋunhi Garraynydja ŋunhiliyi nhinana yukurrana, nhäŋala yukurrana ŋunhi Yetjippuyŋunha ŋuliŋuruyi waŋupini'ŋuru ga gurthaŋuru, yana ŋayi walalanha ŋulthu'yunmaraŋala, bala walala bukmaknha yana gundupuŋalanydja, 25 bala walala djuḻum'thunminana dhoḻulilina, yarraman' walala ga miriŋu yolŋu'‐yulŋu. Gulkuruna walala ganydjarr‐warryunminanydja bala‐bitjarra, ga lili‐bitjarra, liŋgu walala djuḻum'thunmina dhoḻulilina warrpam'nha yana. “Gul' ŋilimurru gonha'yunna Yitjuralpuyŋunhanydja go, roŋi'‐ruŋiyirrina ŋilimurru, bili Garraynydja dhuwala walalaŋgala gali'ŋura. Ŋayi ŋuli ŋilimurrunha balaŋu baymatthurruna,” bitjarra walala Yetjippuyŋunydja waŋanhamina. Yurru gulkuruna walala roŋinyamaranhaminanydja yukurrana.

26 Ga ŋunhalana bala wiripuŋuŋurana gali'ŋura makarrŋura wäŋaŋura, Yitjuralpuyŋunydja dhawaṯthurrunana yukurrana‐a‐a, baṉḏany'kurru warray yana, yana liŋgu‐u‐u bukmaknha dhawa‐yawaṯthurrunana. Bala Garrayyunydja waŋana Mawtjitjnha bitjarrana gam'. “Ma' waṉa‐djarryurrana biyapul gapulili, bala gapuyunydja maṉḏaŋuyu yurru monygumana, dhä‐monygumana Yetjippuyŋunhanydja miriŋunha ga yarraman'nha walalanha.” 27 Bala Mawtjitjthu dhunupamirriyaŋalana dhunupana, bala gapunydja balayi roŋiyina, bitjarrana bitjana ŋuli ŋäthili bäninya yukurranha, ŋulinyarayi yana liŋgu.

Yo. Wäŋanydja djaḏaw'yurrunana marrtjina, ga walalanydja Yetjippuyŋunydja baḏak ŋunhala bäyma yana gaṯthurruna dhoḻuŋura, ganydjarr‐warryurruna gundupunharawu, yurru gulkuruna, liŋgu Garrayyuna walalanha ŋunhinydja gulyunmaraŋala ŋunhiliyi ṉapuŋgany'tja mayaŋ'ŋura dhukarrŋuranydja. 28 Bala gapunydja ŋunhiyi dhunupa roŋiyinana ḻupmaraŋalana, dhä‐monyguŋalana walalanha warrpam'nha; bukmaknhana yana gapuyuna guḻwuḻmaraŋala, yarraman'nha ga yolŋu'‐yulŋunha ga girri' walalambala, yakana waŋgany ŋula walŋathinanydja. 29 Yurru Yitjuralpuyŋunydja yolŋu walala buḏapthurruna marrtjina walŋamirri warray bukmaknha yana, baṉḏanygurru warray wäŋakurru, liŋgu walalaŋguway ŋunhiyinydja gapu ḻapthunara yukurrana djingaryurruna, dhunupa'ŋu ga wirrkaḏay', dhukarr wekaŋala walalaŋguway buḏapthunarawu.

30 Yo, bitjarrayi ŋayi Garrayyu Yitjuralpuyŋunhanydja miṯtjinha dhawaṯmaraŋalana Yetjippuyŋuwalanydja goŋŋuru, bala walala Yitjuralpuyŋuyunydja nhäŋalana yukurrana ŋunhi Yetjippuyŋunhanydja, walalanha marrtjina dhaḻinyguŋala gapuyuna raŋililina, bukmaknhana rakunymirrinhana. 31 Ga walalanydja ŋunhi Yitjuralpuyŋunydja miṯtji borrk‐barrarinana Garraywunydja, ŋetjnha walala, liŋgu walala nhäŋala Garraywuna djäma ŋutu'na dhikana, bala walala ŋayaŋu‐yuwalkthinana Garraywunydja, ga bitjarrayi bili walala ŋayaŋu‐yuwalkthina Mawtjitjkunydja, Garraywalaŋuwunydja dhäruk‐märranharamirriwu.