1 Ga ŋuliŋurunydja wäŋaŋuru walala yanayi giṯthurruna. Marrtjinana walala yukurrana‐a‐a yana liŋgu‐u‐u, ŋanhdharkkurruna yukurrana marrtjina wäŋakurru‐u‐u, ganbarkkurruna‐a‐a. 2 Bala ŋunhi yolŋunydja walala *IsraelYitjuralpuyŋunydja waŋanana marrtjina, ŋarrtjurruna maṉḏanhana †MosesMawtjitjnha ga ‡AaronYärunnhana bitjarrana, 3 “Ŋunhi bini ŋayi Garrayyu ŋilimurrunha ŋunhalaŋga bäyma baymatthuna §EgyptYetjip muka, ŋunhinydja bini ŋamakurru' warray. Ŋunhalaminydja ŋatha guḻku'na, ga wäyin ḻukanharawu. Nhäku nhuma maṉḏa ŋanapurrunha gäŋala lilinydja dhipalanydja ganbarklilinydja wäŋalili? Ḏukṯuk nhuma yulŋunydja? . . . ŋanapurru yurru dhiyala gay' murrmurryun djaṉŋarrthinyarayu?”

4 Bala Garraynydja waŋana Mawtjitjkala bitjarra, “Ŋarra yurru rarryun ŋayaŋayny'tja nhumalaŋgu djiwarr'ŋuru, ga balakurruyina ŋarra yurru walalanha gatjarr'yundja, wanhaka walala yurru ŋarrakuway dhärukku malthun, mak bäyŋu warray. Bitjan liŋgu walu ŋupan yurru yolŋuyu walalay ŋathanydja yukurra djoṉguma, yurru walala boŋgama djoṉguŋunydja marrtji waŋga'‐waŋganydhu bala ḏaykun'thunydja, gana' yana waŋganygu waluwu bala‐a‐a biyaku. 5 Ga ŋuriŋinydja bala waluyu 6‐thunydja, walala boŋguŋu djoṉguŋu buku‐waŋganynha, märrma'wuna waluwu, liŋgu walala boŋguŋu rulwaŋdhurruna ŋunhiyinydja, ruwamŋukuŋuna nhinanharamirriwuna waluwu.”

6 Bala Mawtjitjthunydja ga Yärundhunydja ḻakaraŋalana Yitjuralpuyŋuwanydja yolŋu'‐yulŋuwa bitjarrana, “Gäthuranydja munhaku nhuma yurru nhämana Garraywu djämanydja, bala yurru nhuma marŋgithirrina, ŋunhi Garrayyu ŋayipi yawungu nhumalanha dhawaṯmarama ŋulaŋuru Yetjipŋurunydja, 7 liŋgu goḏarrny'tja boŋguŋunydja nhuma nhäŋu ḻatju' wal'ŋu dhika rom nhanŋu Garraywunydja. Liŋguna Garrayyu ŋäkula nhumalanha ŋarrtjunaranydja, liŋgu Garraynhana nhuma ŋuli yukurra dhuwala ŋarrtjundja ŋunhi, yaka ŋilinyunhanydja.”

8 Ga bitjarra bili ŋayi Mawtjitjthu ḻakaraŋala yolŋu'‐yulŋuwanydja, “Yo munhakunydja ŋunhinydja, Garrayyu yurru wekama marrtji ŋanak wäyin nhumalaŋgu ḻukanharawu, ga goḏarrny'tja ŋunhinydja ga guḻku'na ŋathanydja nhuma yurru ḻuka yukurra, liŋgu ŋayi Garrayyunydja ŋäkula nhumalanha ŋunhi nhuma yukurrana morrumurru' waŋana ŋanya. Liŋgu yuwalktja ŋunhi nhuma yukurrana morrumurruny'tja ŋanya warray Godnha warray, ŋunhi ŋinyalanhanydja nhuma yukurrana morrumurru'.”

9-10 Yo, maŋandja ŋunhi mukthurruna yukurrana djingaryurruna ŋunhili bäyma walalaŋgala, ga ŋunhi ŋayi yukurrana Yärundhu waŋana yolŋu'‐yulŋunhanydja, bala walalanydja yolŋu'‐yulŋuyunydja nhäŋala ŋunhiyi waŋupininy'tja wiripuŋuyinana dhikana, ŋayi marrtjina ŋunhi waŋupininy'tja ḻatju'thinana dhikana djarraṯawun'thinana, liŋgu ŋayipi ŋunhi yana Garray yulŋunydja milkunhamina ŋanyapinyay ŋayi ŋunhiliminydja maŋanŋura. 11-12 Bala ŋayi Garraynydja waŋana Mawtjitjkala ŋulaŋuru maŋanŋurunydja bitjarrana, “Liŋguna ŋarra ŋäkula yolŋu'‐yulŋunha Yitjuralpuyŋunhanydja, walala yukurra morrumurru' waŋa gupa‐waŋa ŋarranha. Ḻakaraŋanydja walalambala biyakana gam'. ‘Biyaku liŋgu munhaku, nhuma boŋguŋu yukirri ḻuki wäyindja, ga biyakuyi liŋgu munhakumirrinydja nhuma boŋguŋu yukirri ḻuki ŋayaŋayny'tja goŋbuy ŋarrakuŋuway wetjpuy wekanhara. Ga balakurru‐witjanna nhuma yurru dharaŋan marŋgithirrinydja, ŋunhi ŋarra dhuwala Waŋarr nhumalaŋgunydja God.’ ”

13 Yo, ga ŋulinyaramirriyu bili yana munhaku, wäyinnha walmana djirikitjnha guḻku'na, bala djirryurrunana marrtjina dhika wäŋalilina, warrpam'nha gungaŋala wäŋanydja. 14 Ga munhakumirri, djaḏaw'bitjarra, nhäŋala walala, ŋayi be nhä yana ŋal'yunmina marrtjina gaywaraŋu'mirri, muṉguy dhika warrpam'nha munathany'tja gungaŋala, ŋunhiyi ŋanhdharktja wäŋa. 15 Ga walalanydja Yitjuralpuyŋunydja dhä‐wirrka'yunminana marrtjina, waŋanhamina bitjanminana, “Nhä dhuwala yulŋunydja?” bitjarra, liŋgu walala yaka marŋgi ŋurikiyi, nhä ŋunhiyi ŋatha.

Ga Mawtjitjthunydja ḻakaraŋalana walalambala, “Dhuwalinydja ŋayaŋay' Garraywuŋu wekanhara. 16 Ga dhuwalanydja romnha ŋayi Garrayyu Godthu nherrara bitjarrayinydja. Nhuma yurru marrtji djoṉgumanydja, yurru gana' yana dhuwala yulŋunydja waŋganygu waluwu.” 17 Bala walala ḻaw'yurrunanydja, bala djoṉguŋalana marrtjina, yurru wiripu‐guḻku'yunydja djoṉguŋala marrtjina mirithinana wal'ŋu, ga wiripu‐guḻku'yunydja märr‐ŋuli ḻurrkun'. 18 Ga ŋuriŋinydja walalay ŋunhi walala dhaŋaŋguŋala marrtjina djoṉguŋala, ga yakana walalaŋgu bäythinyara goḏarr'wunydja, ga wiripu‐guḻku'wunydja ŋurikinydja ŋunhi walala ḻurrkun' märr galkara, ŋunhiyinydja gana' warray walalaŋgunydja yana, yakana walala yukurrana marrya' nhinana.

19 Yo, Mawtjitjtja waŋana walalaŋgala, “Yaka gurrunharra goḏarr'wunydja ŋayaŋay',” bitjarra. 20 Yurru wiripuwurruyunydja yaka warray märraŋala Mawtjitjnha dhäruk; walalanydja ruwamŋukuŋala goḏarr'wu warray, ga djaḏaw' bitjarranydja, nhäŋala marrtjina ruwamŋukunharanydja ŋatha ŋunhi barrpa'na, boŋirriny'nha. Bala Mawtjitjtja bena maḏakarritjthina walalaŋgu, wirrkina dhikana.

21 Ga bitjana liŋgu munhakumirrina walu‐ŋupana walala ŋuli marrtjinya djoṉgunha ŋunhiyi ŋathanydja, gana'na yana waŋganygu ḏaykun'ku, ga ŋunhi walu marrtjinya ŋuli walmanha, bala ŋuli ŋayaŋayny'tja ŋunhi buwayakthinyana, winya'‐winyayunana.

22 Ga ḏämbumirriyunydja waluyu walala ŋuli ŋatha djoṉgunha waŋga'‐waŋganymirri bala, ga wiripuŋuyunydja waluyu walala buku‐waŋganynha märraŋala, bili Mawtjitjthu waŋana ḻakaraŋala walalambala bitjarranydja, 23 “Bitjan yukurra Garraynydja waŋa gam', ‘Goḏarrny'tja dhuwala walu nhinanharamirrina dharrpalnha yana Garraywu. Djoṉguŋa dhuwalinydja ŋayaŋayny'tja, ga goḏarr'wuna gurrunharra.’ ” 24 Ga yuwalkthi walalanydja bitjarrayi, ga yakana boŋirriny'thinanydja ŋula.

25 Yo. Djaḏaw'‐way djaḏaw'yurruna Garraywuna walu, bala ŋayi Mawtjitjtja waŋana bitjarrana, “Gatjuy ḻukiyana walala dhuwali ŋayaŋayny'tja ŋunhi yawungu nhuma gurrunhana, liŋgu dhuwalanydja Garraywuna walu. Nhuma yurru yakana gäthuranydja maḻŋ'marama ŋayaŋay'. 26 Yo, waŋgany ruluyu ga waŋgany bäythinyarayu waluyu nhuma yurru yukurra djoṉgumanydja, ga wiripuŋuyunydja ŋuriŋinydja waluyu Nhinanharamirriyunydja nhuma yurru nhinana yukurra buku‐ŋal'yun Godkuna nhanŋuwaynha, yakana yurru nhuma wiripuŋuyunydja waluyu maḻŋ'marama ŋula nhä ŋatha.” 27 Yurru wiripuwurrunydja yolŋu walala marrtjina wäŋgaŋala bala, warrya'yurruna ŋurikiyi ŋayaŋay'wuna, yurru gulkuruna ḻarruŋalanydja, yakana ŋula walala maḻŋ'maraŋala ŋuriŋiyi waluyu Nhinanharamirriyu.

28 Bala ŋayi Garraynydja waŋana Mawtjitjkala bitjarra, “Nhäthaŋga yurru walala mulka ŋarrakunydja rom malanha? 29 Yo, ŋunhiyinydja walu Nhinanharamirrinydja ŋarra wekaŋala nhumalaŋgu nhinanharawuna yana, ga ŋarra yurru nhumalaŋgu ŋunhiyinydja rulwaŋdhun ŋurikinydja waluwu ŋunha bala ŋathil'yun. Ŋuriŋinydjayi Nhinanharamirriyunydja nhuma yurru waluyu nhinana, yakana yurru marrtji ga djäma ŋula nhaltjan ŋuriŋiyinydja.” 30 Bala walala yolŋu'‐yulŋunydja nhinanhana ŋuli ŋuriŋiyinydja waluyu dhuyuyunydja.

31 Walala Yitjuralpuyŋuyunydja ŋuli ḻakaranha ŋunhiyinydja ŋayaŋay' mana' yäkunydja. Yo, balanyara ŋayaŋayny'tja ŋunhi rumbalnydja bitjan borum gumbu, gaywaraŋu'mirrina, ga dhäkaynydja ŋayi ŋunhi ŋayaŋay' bitjan dämba wuŋay'mirriyanhara.

32 Yo, bala ŋayi Garrayyunydja waŋana Mawtjitjnhana bitjarrana, “Nhe yurru märraŋa ŋuliŋuruyi ŋatha mana', ga gurrunharra gupaḏalŋuwuna, märr yurru dhuḏi'‐dhuḏiŋuyunydja yumurrku'yu nhämana, bala marŋgithirrina ŋunhi nhaltjana ŋarra nhumalanha marrtjinya ŋuli maranhu‐wekanha ŋula lili ŋanhdharkkurru wäŋakurru, ŋunhi ŋarra nhumalanha dhawaṯmaraŋala Yetjippuyŋuwala goŋŋuru.” 33 Bala ŋayi Mawtjitjthunydja djuy'yurruna Yärunnhana bitjarra, “Gatjuy marrtjiya ga ŋatha märraŋa mana', bala rarryurra banikin'lilina, bala gurrunharra Garraywalana gumurrlilinydja, märr yurru ŋilimurru gurrunhandja ŋurukuna ŋunhi dhuḏi'‐dhuḏiŋuwuna yumurrku'wu nhänharawu ga marŋgithinyarawu.” 34 Bala yuwalkthi ŋayi bitjarrayinydja, bala walala gurrunhara ruwamŋukuŋalana ŋunhiyi ŋathanydja gupaḏalŋuwuna‐wala.

35 Bitjarrana liŋguna dhuŋgarra ŋuparana walala Yitjuralpuyŋuyu yukurrana ḻukananydja ŋunhiyi ŋayaŋay' mananydja; goḏarr'‐ŋupana yana munhakumirri bitjanna liŋgu djoṉgunhana, dhuŋgarranydja ŋupara 40, yana liŋgu‐u‐u ga wäŋalili walala gärrina ŋunha *CanaanGaynanlili ŋatha guḻku'mirrilili.