1 Yo. Bala Gunhu' Godtja waŋanana, romnha nherrara nhanukalayŋuwu ŋayi yolŋu'‐yulŋuwunydja; dhuwala malanha ŋayi romdja nherrara gam'. 2 “Ŋarra dhuwala Garraynydja Godtja nhumalaŋgu Waŋarrnydja, ŋunhiyina ŋunhi ŋarra nhumalanha dhawaṯmaraŋala ŋulaŋuru wäŋaŋuru *EgyptYetjipŋurunydja, ḏirrwiḏirrwi‐mulkanharamirriŋurunydja. 3 Yakana yanana nhuma yurru yukurra buku‐ŋal'yun wiripuŋuwunydja waŋarrwu malaŋuwu, liŋgu ŋarrapi dhuwala waŋgany yana waŋarrnydja nhumalaŋgu.

4 “Yakana nhuma yurru waŋarrkuma ga maḏayin' ḻakarama ŋula nhä yolŋuwuŋu goŋbuy ŋamaŋamayunara, yakana yana nhuma yurru djäma wäyinguma ga yolŋukuma ga moḻ'ŋukuma ga guyakuma ŋula nhäkumanydja nhumalaŋguway buku‐ŋal'yunarawunydja. 5 Yaka märr‐ŋal'yurra ga waŋarr‐ḻakaraŋa ŋula nhänhanydja, liŋgu ŋarra dhuwala Garray nhumalaŋgunydja waŋarr God. Ŋarranydja djäl nhumalaŋgu, nhuma yurru ŋarrakuway wal'ŋu yana dhulŋuŋu. Ŋuli nhuma yurru märr‐ŋal'yun wiripuŋuwunydja waŋarrwu ga raŋgawu, ŋarranydja yurru ŋaramurryirrina ŋuriŋinydjayi mel‐ḏi'yunna, bala nhuma yurru ŋayaŋu‐yätjthirri ŋuriŋina nhumalaŋgala gatjpaḻ'yunarayuna; nhe ga nhuŋu djamarrkuḻi' ga walalaŋgu djamarrkuḻi' yurru bitjandhi liŋgu ŋayaŋu‐yätjthirrina yukurra ŋuriŋiyinydja ŋunhi nhe ŋarranha nyinyaŋdhurruna nhäŋala, bala ḏiltjina‐wekaŋala ŋarraku. 6 Yurru ŋarra yurru mel‐wuyunaramirrinydja ŋurikina ŋunhi walala yurru ŋayaŋuyu‐ḏaparama ŋarranha, ga dhäruk‐märrama ŋarranha; walalana yurru yukurra nhina walaŋgumanydja dhikanydja wal'ŋu, liŋgu nhinanydja walala yurru yukurra ŋayaŋu‐ŋamathirrina ŋarrakala märr‐ŋamathinyaraŋurana. Ga bitjandhi liŋgu ŋarra yurru mel‐wuyundhi gäma yukurra yumurrku'nhanydja ŋurikiyi dhäruk‐märranharamirriwunydja walalaŋgu, bitjanna liŋguna gupaḏalnha‐wala walalaŋguna mala‐wunharanydja yurru nhina yukurra ŋarrakala märr‐ŋamathinyaraŋuranydja.

7 “Yaka yana nhuma yurru Garraynha yäku‐ḻakarama waŋa yänanydja wakalkurrunydja, ga ŋunhi nhe yurru ŋula yolkala dhawu'‐nherraṉ Garraywalanydja yäkuyu, bala yurru nhuma rumbalkuma yana ŋunhiyi dhäruktja, yakana yana buku‐dhumukthiyanydja meṉguŋanydja. Liŋgu Godthunydja nhuna yurru ḻakarama yätjnha yana nhe, bala dhä‐ḏir'yunna yurru, yakana ŋayi yurru waŋa bitjandja ‘Bäythi’ bitjandja, ŋunhi nhe yurru Garraynha yäku ḻakarama yana wakalkurrunydja.

8 “Guyaŋiya Nhinanharamirrinydja ŋunhi Walu, ga yaka meṉguŋa, liŋgu ŋunhiyinydja walu ganaŋ'maranhara Garraywu. 9 Nhuma yurru djämanydja ḏämbumirriyu ga waŋgany‐bäythinyara munhanydja ŋupan, 10 bala ŋuriŋinydja wiripuŋuyunydja waluyu nhinanharamirriyunydja, ganaŋ'maranharana ŋunhiyinydja ḏaykun' buku‐ŋal'yunarawuna yana nhokalayŋuwu Garraywu Waŋarrwuna. Nhuma yurru yakana djäma ŋuriŋiyinydja waluyu; nhuma yurru nhinana yukurra yana galkunmirrina, nhe ga nhipala gäthu'mirriŋu walala, ga nhuŋu djämamirri walala, ga wäyin nhuŋu, ga ŋunhi yolŋu mulkuru ŋunhi ŋayi yukurra nhina nhokala wäŋaŋura. 11 Nhuma yurru nhiniya yukirriya mukthurra ŋuriŋinydja waluyu, liŋgu ŋayipi Garrayyunydja djäma waluyu ḏämbumirriyu ga waŋganydhu bäythinyarayu, dhiyaŋunydja waluyu malanyŋuyu ŋayi bokmara ŋunha djiwarr' ga dhuwala munatha' ga gapu, ga bukmak nhä malanha ŋunhi marrtji ŋorra, bala ŋayi ŋuriŋinydja waluyu nhinana märr‐ŋurr'yurrunana. Bala ŋayi Garrayyu ganaŋ'maraŋalana ŋunhiyinydja walu, nhanŋuwayliliyaŋalana, dharrpalnha wal'ŋu gänana yana.

12 “Nhuma yurru märr‐ŋal'yurra nhokalaŋuwala ŋäṉḏi'mirriŋuwala ga bäpa'mirriŋuwala, märr nhe yurru walŋa nhina weyinga ŋunhala nhumalaŋgalanydja wäŋaŋura, ŋunhi Garrayyu wekaŋala nhumalaŋgu.

13 “Yaka nhuma baymatthurra rakunyguŋanydja ŋula yolŋunha.

14 “Yaka nhuma marramba'thiya.

15 “Ga yaka manaŋiya, ga djaw'yurra dhulŋuŋunydja ŋula nhä yolpa.

16 “Yaka ḻakaraŋa bothiya wiripuŋunha yolŋunha.

17 “Ga yaka mel‐ŋamathiya ŋula nhä malanha wiripu‐guḻku'wa yolŋuwa; nhanbala wäŋa, nhanbala miyalknha, nhanbala djämamirrinha, ga nhanbala wäyin, ŋunhiyinydja ŋuripa bili nhanbala, yaka nhuma yurru ŋoy‐ŋapuyurra ḏukṯukthiya.”

Ga bitjarrayina ŋayi Garrayyu romdja nherrara nhanukalayŋunydja ŋayi yolŋu'‐yulŋuwu.

18 Ga walala yolŋu'‐yulŋunydja ŋunhi mukthurrunaŋga marrtjina djinga'‐djingaryurruna ŋunhiliŋga bäyma. Walala ŋäkula murryu'‐murryunara marrtjinyara, ga rirrakay yiḏaki ŋäkula, ga nhäŋala djaḻka'‐djaḻkarryunara ga ŋawulul ṉoluŋdhinyara marrtjinyara bukulili, bala wirrkina walala wilwilyunmina, barrarinanydja manapara. Bala walala marrtjina djinga'‐djingaryurrunana bitjarrana bala, barrkuna ya'.

19 Bala walala waŋana †MosesMawtjitjkalana bitjarra, “Way, nhepina waŋiya ŋanapurruŋgalanydja; ŋanapurru yurru mäkiri'‐witjundja nhuŋuna. Yaka yurru Waŋarryunydja Godthunydja waŋa ŋanapurrunha; ŋanapurru ŋuli gonhana raku'‐rakunydhina.” 20 Yurru Mawtjitjtja waŋana ŋurikala yolŋu'‐yulŋuwalanydja, “Yaka nhuma barrariya. Garraynydja Waŋarrnydja liŋgu milkunharamina ŋanyapinyay ŋayi dhuwalana gay' ganydjarryu maḻŋutjthuna wal'ŋu dhikana, gatjarr'yundja yukurra nhumalanha. Ŋayi djäl nhumalaŋgu marŋgithinyarawu nhäyinyara waŋarr ŋayinydja, märr nhuma yurru borrk barrarirriŋga nhanŋu, ga yakana biyakayi biyapulnydja baḏatjurra ga ŋula nhä djäma yätj.”

21 Walala yolŋu'‐yulŋunydja ŋunhala bala barrku yukurrana djingaryurruna, bala ŋayi Mawtjitjtja marrtjina galkililina, Garraynhana Waŋarrnhana withiyara ŋunhimalana, ŋunhi maŋan yukurrana gorruŋala warumukthina. 22 Ga Garrayyunydja waŋana Mawtjitjnha bitjarra, “Ḻakaraŋa yolŋu'‐yulŋuwu ‡IsraelYitjuralpuyŋuwunydja biyaka, ‘Liŋguna nhuma nhäŋalana nhumapina maŋutjiyu ŋunhi ŋarra nhumalaŋgala yukurrana waŋana djiwarr'ŋuru. 23 Yaka nhuma yurru djäma ŋula nhä waŋarrkumanydja nhumalaŋguway nhuma; yana bini wiripunydja ŋunhi waŋarr malanha rrambaŋi be ŋarrakala. Ŋarrakala yana waŋganygala nhuma yurru yukurra buku‐ŋal'yun waŋarrkumanydja. 24 Nhuma yurru yana munatha'na ŋal'‐ŋalmaramanydja djäma barŋdja, bala batharrana wäyin ŋunhimalayi ŋarrakuway waŋganygu buku‐ŋal'yurranydja yana. Ga ŋunhi nhuma yurru waŋgany‐manapanmirri waŋganylilinydja ḻukanharawu ŋuriki wäyingunydja rrambaŋi waŋganyŋuranydja, ga wiripunydja nhuma yurru ŋuliŋuruyi wetj bathan barŋlili, buku‐ŋal'yun manapan ŋarraku ŋuriŋiyinydjayi wetjthu wekanharayu. Yo, ŋarrapi yurru wäŋanydja ḻakarama marrtji bala, märr yurru nhuma marrtji bala buku‐ḻuŋ'marama ŋunhilimi wäŋaŋura malaŋumi ŋarrakunydja buku‐ŋal'yunarawu; yaka nhuma yurru wäyinnha mundhurr‐wekama ŋarraku birrka'mirriŋuranydja wäŋaŋura. Ga ŋunhi nhuma yurru waŋgany‐manapanmirri ŋunhiliyi dharrpalŋuranydja wäŋaŋura buku‐ŋal'yunarawu ŋarrakunydja, ŋarranydja yurru nhumalanha withiyanna ŋunhimalayinydja, bala goŋmirriyamana ŋarra yurru nhumalanha.

25 “ ‘Ga ŋunhi nhuma yurru djäma barŋ malanha ŋal'‐ŋalmarama guṉḏanydja, yaka ŋunhiyi guḻk‐guḻkthurranydja marrtjiya guṉḏanha dhapirrkkuŋanydja, buyuwuyukuŋanydja ŋula nhäyunydja, liŋgu ŋunhiyinydja dharrpalnydja wäŋa yurru yäraŋuthirri yana ŋuriŋiyi nhokalay goŋbuy djämawuy. 26 Ga yaka yurru nhuma yukurra ŋal'‐ŋalyun ŋuliwitjandhiyi garrwarkurru barŋgurrunydja.’ ”