1-30 Yo, ga ŋunhalayi bukuŋuranydja Garrayyu ḻakaraŋala *26:1-30 MosesMawtjitjkala, ŋayi yurru djäma buṉbu Godku, märr yurru ŋayi God yukurra nhina ŋunhili nhanukalaŋuwala yolŋu'‐yulŋuwala miṯtjiŋura, yurru dhuḻ'yundja walala yurru buṉbunydja ŋunhiyi ruwaŋga'mirri girri', gänha'‐ganharamirri yana, ga ḻakaraŋalanydja ŋayi nhanukala bitjarra muṉguykuŋala marrtjina dhika wal'ŋu, nhaltjan ŋayi yurru djäma yukurra dhuḻ'yun djaka' ga miny'tji dhika nhä malanha. Ŋayi waŋananydja ḻakaraŋalanydja bitjarra, “Nhe yurru djämanydja dharpa malanha ŋäthilinydja nherra'‐nhirrala ŋurikiyi buṉbuwu, ga ŋunhiyinydjayi yurru malanha ŋäkirrmaramanydja ḻatju'yuna dhikana wal'ŋu girri'yunydja, milkuminy'thu ga miku'yu ga ḻingarryinyarayu miny'tjiyu, ga biyapul nhuma yurru yukurra djäma djiwarr'wuy yolŋu walala ŋunhiliyi dhomala'lili. Ga ŋunhiyinydja nhe yurru ŋäkirrmaraŋa ŋapakurrunydja barrwaṉ'thu wäyingalana.

31-37 “Bala nhe yurru gulk‐gulkthunna ṉapuŋgany'tja ŋunhiyinydja buṉbunydja, märrma'kumana yurru dhaḻakarrnydja maryakalyu ḻatju'yu dhika wal'ŋu miny'tjimirriyu, gungama yukurra yurru ṉapuŋga'na, märr yurru ŋunhinydja bala djinawany'tja wal'ŋu ŋärrany'tja, ŋarrakuwaynydja wal'ŋu ŋunhiyinydja yurru ganaŋ'thun yukurra djingaryun ŋuliŋuru bala wiripuŋuŋurunydja dhuyuŋuru wäŋaŋuru. Ga ŋunhinydja wal'ŋu bala djinawa'lilinydja wal'ŋu nhe yurru nherraṉ ŋunhiyinayi Mel‐wuyunaramirrina dhaḻakarr, ŋunhi yurru yukurra djingaryundja ŋapaŋura Dhawu'‐nherraṉminyarawuyŋura Bathiŋura. Ga ŋunhinydja wal'ŋu dhuyunydja, dharrpalnydja wal'ŋu wäŋa, warraŋul märr, nhe yurru ŋunhiwalayinydjayi gurrunhan bala'pala ŋathamirri waŋganylili gali'lili, ga wiripulilinydja gali'lili nhe yurru nherraṉ lanhdhirra'na ŋunhiyi baṉdja'‐baṉdjamirri. Ga djämanydja nhuma yurru dhurrwaranydja ŋurikiyi buṉbuwu ḻatju' wal'ŋu dhomalany'tja, miny'tjimirri yana dhika wal'ŋu, yurru mel‐warumuk ŋunhiyi girriny'tja, ga girriny'tja ŋunhiyi yurru yukurra dhaŋgama ḏämbumirriŋura dharpaŋuranydja, dhaḻ'yundja yukurra ŋunhiyi dhurrwaranydja.” Ga bitjarrana ŋayi Godthu ḻakaraŋala Mawtjitjkalanydja; ŋayi wekaŋala nhanukala ŋunhiyi mali ŋuriki buṉbuwunydja, ŋunhi ŋilimurru yurru ḻakarama dhiyaŋunydja‐wala dapanakulnha.