22 Yo, ḻakaraŋanydja ŋarrakalaŋuwa yolŋu'‐yulŋuwanydja *IsraelYitjuralpuŋuwanydja dhuwala dhäruktja gam'. “Dhuwalanydja dhäruk ŋarrakuŋu ŋunhi ŋarranydja Gunhu' Waŋarr. Ŋunhi ŋarra yurru roŋinyamarama nhumalanha balayi nhumalaŋgalay wäŋalili, yaka waŋiya märr‐winya'yurranydja biyakanydja gam', ‘Godthunydja ŋanapurrunha walŋakuŋala, liŋgu ŋanapurrunydja dhuwala dhuwurr‐ŋamakurru' ŋunhi yolŋu walala.’ Yaka waŋiya biyakayinydja, liŋgu nhumanydja yaka dhuwurr‐ŋamakurru', yätj yana. Ŋunha wiripuŋuranydja wäŋaŋura yolŋuyu walalay liŋguna nhäŋalana nhumalaŋgu ŋunhiyi dhuwurr‐yätjtja, bala walala yukurra waŋanydja ŋarranhana yätj‐ḻakaramanydja. Yurru ŋarranydja yurru märrama walŋakuma warray nhumalanha Yitjuralpuyŋunhanydja, märr yurru yolŋuyunydja walalay nhäma, ŋunhi ŋarranydja ḏarrtjalk ŋarra God, ganaŋ'thun yukurra ŋuliŋuruyi yätjŋurunydja, bala walala yurru wokthunna märr‐yiŋgathirrina ŋarranha yäkunydja. 23 Yo, ŋarrapinydja yurru milkunharamirrina ŋarranhawuynydja ŋarra bukmakkalana bäpurru'wala yolŋu'‐yulŋuwala, märr yurru walala nhäma nhumalaŋgalana, ŋunhi ŋarrapi ḏarrtjalktja wal'ŋu Waŋarr, ga yakana yurru yätj marrtji galkithirrinydja ŋarrakala. 24 Yo, walala yurru marŋgiyirri ŋunhi ŋarranydja Waŋarr Garray, ŋunhi ŋarranydja yurru nhumalanha dhawaṯmarama birrka'mirriŋuru yana wäŋaŋurunydja, bala gäma nhumalanha roŋinyamarama nhumalaŋgalaynha wal'ŋu wäŋalili. 25 Ŋarra yurru bikpikthundja nhumalaŋgala ḏarrtjalknha ŋunhi gapunydja, warrpam'thun yana ŋarra yurru ḏarrtjalkkumanydja nhumalanha ŋayaŋuna, ga yakana biyapulnydja nhuma yurru ḏukṯukthirri wiripuŋuwunydja waŋarrwu ŋula nhäku maḏayin'kunydja malaŋuwu, ga yaka biyapul nhuma yurru djäma ŋula nhä yätjtja. 26 Ŋarranydja yurru wekama nhumalaŋgu yuṯana wal'ŋu ŋayaŋu, ga yuṯana yana ŋarra yurru nherraṉ walŋanydja nhumalaŋgala, ŋunha ŋayaŋulilinydja djinawa'lilinydja. Yo, ŋayaŋunydja nhuŋu mirithirrina ḏälnha, balanyarana biyaku ŋuli guṉḏa, yurru ŋarranydja ŋunhiyi yurru djaw'yunna, bala nherraṉdja ŋarra yurru nhumalaŋgala yuṯana wal'ŋu dhikana walŋamirrina ŋayaŋu, märr yurru nhuma yukurra bitjanna liŋguna dhäruktja märramana ŋanya Garraynha. 27 Yo, ŋarra yurru nherraṉ ŋarrakuwaynha ŋarra Walŋana Birrimbirr ŋunha nhokala wal'ŋu djinawa'lilinydja ŋayaŋulili, bala nhe yurru yukurra marrtjinydja ŋuliwitjanna liŋguna ŋarrakiyingalana dhukarrkurru, ga ŋayathama nhuma yurru baṯ bitjan ŋarrakuwaynha yana rom malanha, bukmakkuma yana. Bitjanna liŋguna nhuma yurru yukurra djämanydja ŋunhina liŋguna ŋunhi ŋarrapi ḻakarama yukurra nhumalaŋgu. 28 Bala nhuma yukurra yurru nhinana ŋunhiliyina wäŋaŋura ŋunhi ŋarrapi wekaŋala nhumalaŋgalaŋuwu märi'muwu ŋäthili. Nhumanydja yurru ŋunhi ŋarrakuwaynha yana miṯtji yolŋu walala, ga ŋarra yurru nhumalaŋgu Waŋarr God. 29 Ŋarra yurru nhumalanha dhawaṯmaramanydja ŋuliŋuruyi nhumalaŋgalaŋuŋuru yätjŋurunydja dhuwurrŋuru ga gatjaḻŋuru, ga yakana yana biyapulnydja nhuma yurru djäma ŋunhiyi djarrpi'. 30 Yo, ŋathanydja yurru ŋuthan mirithirrina dhikana wal'ŋu ḻatju'thirrina, ga ḻukanydja nhuma yurru, bala märr‐bakthunna ŋuriŋinydjayi, ga yakana ŋayi yurru biyapul ŋunhiyi wäŋa baṉḏanydhirri ga räwakthirri, ŋathamiriwyirrinydja. 31 Bala nhuma yurru guyaŋirri balayi roŋiyirrina ŋunhi nhaltjana nhuma ŋuli yukurranha djäma yätj ŋäthili, bala nhuma yurru waŋanydja bitjanna, ‘Ŋilimurruŋguwaynydja ŋunhi gatjaḻ yätjnha gal'ŋu yanana,’ bitjanna yurru, bala yurru nhuma gorana ŋuriŋiyinydjayi djarrpi'yunydja romdhu ŋunhi nhuma yukurrana ŋäthili djäma bitjarrayi. 32 Biyaka goriyana ŋurikiyinydjayi nhokalaŋunydja nhe romgu ga gatjaḻwu. Yuwalk yana ŋarra yurru nhumalanha walŋakumanydja yuṯakumanydja, yurru yaka ŋarra yurru ŋunhi walŋakumanydja nhumalanha yana märr‐ŋal'yunarawu nhumalaŋguwaynydja. Ŋarranydja yurru nhuna djäma yuṯakumana dhikana, ḏarrtjalkkuma wal'ŋu, märr yurru nhumalanha yolŋu'‐yulŋuyunydja nhämana, bala dharaŋanna yurru, ŋunhi nhäyinyara ŋarranydja, ḏarrtjalk wal'ŋu, bala walala yurru märr‐ŋal'yunna ŋarrakuwaynha. Dhuwalanydja dhäruk ŋarrakuŋuway, ŋunhi ŋarra Garray wal'ŋu dhuwalayinydja nherrara.” Ga bitjarra ŋayi Garray waŋananydja.

33 Ga biyapul ŋayi Garray waŋana, “Yo, ŋulinyaramirriyunydja ŋunhi ŋarra yurru ḏarrtjalkkuma nhumalanha, märr yurru nhuma yakana biyapulnydja djäma bitjandhiyi yätjkuma, märr nhuma yurru nhina yukurra ŋunhilina nhumalaŋgalaynha wal'ŋu wäŋaŋura, ga biyapul nhuma yurru buṉbunydja ŋunhiyi malanha buḻŋu'kunharawuynydja dhuḻ'yundhi balayi dhärranhamaramayi. 34 Dhiyaŋunydja‐wala nhumalaŋgu wäŋa yukurra dhärra yätjnha ŋanyana dhikana wal'ŋu dhukun'‐mäypamirrina, yurru ŋulinyaramirriyunydjayi ŋunhiyi wäŋa yurru dhika dhapirrkthirrina, ḻatju'yirrina dhikana ŋatha‐mäypamirriyirrina. 35 Bala yurru walala ŋuriŋi yolŋuyunydja walalay nhäma, bala waŋa yurru bitjanna, ‘Way, nhä dhuwalanydja wäŋa ḻatju'na, ŋanyana dhika ŋiniya! . . . dhapirrknha. Dhuwala ŋunhi ŋäthilinydja wäŋa ḏaw'‐ḏawyunaraŋga, dhukun'‐mäypamirriŋga, räwak muka, ga dhiyaŋunydja‐wala dhuwala wiripuŋuyirrina, dhapirrkthirrina dhikana wal'ŋu, balanyarana biyaku ŋuli ḻatju' dhika ŋanya gärul,’ bitjanna walala yurru waŋa. 36 Yo, ŋuruŋu ŋunhi mulkuruyunydja yurru nhämana ŋunhiyi ṉirryunna, bala walala yurru dharaŋanna ŋunhi ŋarrapi ŋuli Garrayyu gaŋgathinyamirriyama yuṯakumanydja ŋunhiyi wäŋanha ŋunhi yukurrana dhärrana baḏuwaḏuyunara. Ŋarrapi dhuwala Garrayyu dhawu'mirriyaŋalanydja bitjarrayi, ga yuwalk yana ŋarra yurru djämanydja bitjandhiyi.”

37-38 Yo, ŋayi Garray waŋananydja bitjarra, “Galkunna ŋarra yukurra dhuwala ŋarrakalaŋuwunydja ŋarra yolŋu'‐yulŋuwu, walala yurru ŋunhiyi waŋanydja ŋäŋ'thun guŋga'yunarawuna ŋarranha, bala ŋarranydja yurru djämana‐yana, goŋmirriyamana yurru walalanha, ga dhäŋuru ŋuliŋuruyinydja ŋunhiyi wäŋanydja yurru dhika dhapirrkthirrina biyapul, ga wäyin malanha yurru ŋuthan miṯtji‐guḻku'yirrina, ga wäŋa ŋunhiyi yurru biyapul birrŋ'thun yolŋu‐mäypamirriyirri dhika wal'ŋu. Bala walala yurru marŋgiyirrina dharaŋanna, ŋunhi ŋarranydja ŋarrapi Garray God.” Ga bitjarra ŋayi Garray waŋananydja.