15 Bala walala ḻaw'yurrunana, wapmaraŋalana girriny'tja marrtjina, ga wäyin walalambalay walala, ga dhika nhä malanha, bala marrtjina ḻuŋ'maranhaminana waŋgany‐manapanmina Yitjurawalana, bala waŋganydhinana malanydja dhut‐gay nhinananydja walala galki mayaŋ'lilina.

21 Bala ŋayi ŋunhiyi Yitjuranydja yolŋu waŋana ŋunhinhanydja walalanha yolŋu'‐yulŋunha ŋunhi walala yurru malthun nhanbala balayi *JerusalemDjurutjalamlili bitjarrana, “Ŋäthilinydja ŋilimurru yurru dhuwala nyilŋ'maranhamirri ŋilimurrunhawuy ŋilimurru, ga wekanhamirri Garraywala. Ŋilimurru yurru yana bukumirriyama yukurra ŋäŋ'thun ŋoy‐ŋathamiriwyu walalay. Ŋilimurru yurru marrtji dhuwala weyinmarama bala, ŋula nhämunha' ŋaḻindi yurru ŋupan. Ŋilimurru ŋäŋ'thun bukumirriyama Godnha, märr yurru ŋayi ŋilimurrunha Godthunydja gäma marrtji bala ŋamathamana yana. 22 Yakana ŋarra yurru ŋäŋ'thun guŋga'yunarawu ŋula yolnha yolŋunha, liŋgu ŋarra ḻakaraŋala nhanŋu ŋuriki buŋgawawunydja, ŋunhi ŋilimurruŋgunydja dhuwala God Waŋarr ganydjarr‐ḏumurru warray wal'ŋu, biyapul warray. Yana ŋilimurru yurru märr‐nherraṉmirri nhanukalaynha Gunhu'wala Godkalana, ga ŋayina yurru djäka marrtji ŋilimurruŋgu, ga gäma ŋilimurrunha walŋakumanydja, liŋgu ŋayi goŋmirriyamanydja ŋuli yukurra ŋunhinhanydja walalanha ŋunhi walala ŋuli märr‐nherraṉmirri nhanukala. Ga wiripunhanydja miṯtjinha ŋayi ŋuli dhä‐ḏir'yunna yana, ŋunhinhanydja ŋunhi walala ŋuli ŋanydjaḻa'yun ga ḏiltji nhanŋu wekama,” ga bitjarra ŋayi Yitjara waŋananydja.

23 Bala walala ŋunhiliyinydja bukumirriyaŋalana yukurrana ŋäŋ'thurrunana Godnha, wekanhaminana manapara nhanukalaynha dharraylili, ga yakana walala bulunydja ŋula beyaṉiyina. “Ŋilimurru marrtjina yana yurru, liŋgu Godthu yurru ŋayipi gäma ŋilimurrunha marrtji bala,” bitjarrana walala waŋananydja. Bala dhunupana yana ḻaw'yurrunana, marrtjinana‐wala.

31 Marrtjinanydja walala yukurrana walu‐ŋupara‐a‐a, ga munhakunydja ŋorrana gandarrŋura, bitjarrana liŋguna bala‐a‐a. Wiripunydja ŋuli ŋuriŋi manaŋgandhunydja ŋula nhäyu miriŋuyunydja yukurranha ŋuli nhänha ŋulaŋuruna yana gali'ŋuruna, yurru yakana walalanha ŋuli marrtjinya ga bunhanydja, liŋgu walala ŋunhi goŋŋura nhanukalaynha Gunhu'walana Godkalana.

32-35 Yo, marrtjinanydja walala yukurrana‐a‐a, yana liŋgu‐u‐u ga wäŋa ŋunhi mulkana Djurutjalam. Bunananydja walala märr‐djawaryurrunana dhika, bala walala nhinananydja ganydjarrnydja ḻurrkun'nha walunydja. Ga ŋuriŋi wiripuŋuyunydja ḏaykun'thu, dhunupana walala wäŋgaŋalanydja Gunhu'walana buku‐ŋal'yunaramirrililina Buṉbulili, ga ŋunhiliyinydja walala buku‐wurrparana Godnha, buku‐wekaŋalana manapara. Ga biyapul walala bathara mundhurr wäyinnhana Godku, bala wekaŋala dhika nhäna malanha girri'na ŋurikiyi buṉbuwuna ḻatju'kunharawu.