1 Yo, dhuwalanydja gay Garrayyu maḻŋ'maraŋala warraŋulkuŋalana djawarrkmirriwala yolŋuwala yäkuwala *HabakkukWapakakkala, bitjarra gam'. 2 Ŋayi Wapakakthunydja ŋäŋ'thurruna ŋanya dhä‐wirrka'yurruna bitjarra, “Garray, ŋarranydja yukurrana dhuwala bukumirriyaŋala weyinŋumirrina, ŋäŋ'thurruna nhuna guŋga'yunarawunydja. Ga nhätha nhe yurru ŋämanydja ga wekama buku‐ruŋinyamaranharawuynydja? Ŋuruŋunydja yätjthunydja ŋuriŋinydja romdhu yukurra ŋanapurrunha bumana wal'ŋu murrkay'kumana. Nhäthana nhe yurru walŋakumanydja ŋanapurrunha? 3 Birrka'mirriŋura wäŋaŋura ŋarra yukurra nhäma yolŋu'‐yulŋunha djämawuy yätjkunharana yana dhikana, djarrpi'kunharana rombuy, ga bukmaknha yukurra birrka'mirrina yolŋu walala nhina galŋa‐yätjthirrinydja dhikanydja wal'ŋu, liŋgu ŋuriŋiyinayi mariyuna. Yolŋu walala yukurra bitjanna liŋguna bunharamirrina, ŋayaŋu‐yätjkunharamirrina dhikana, ga birrka'mirriŋura bitjandhi yana liŋgu yukurra dhä‐ḏälthinyamirri waŋanharamirri ŋarrtjunmirri. 4 Yo, guḻku'yuna mirithirrina yolŋuyu walalay yukurra ŋuli romdja bak‐bakmarama, yurru ŋunhi ŋaḻapaḻmirrinydja yolŋu'‐yulŋu rom‐ḏälmirrinydja yalŋgi'mirrina yanana, yakana walala yurru ḏaḏawmarama ŋunhinydja yolŋu'‐yulŋunha ŋunhi walala ŋuli djäma djarrpi'kuma, ga yakana yana walalawuynydja yurru yukurra djäma rom‐waŋganydhirrinydja. Guḻku'na wal'ŋu mirithirrina yana yätjmirrinydja wal'ŋu yolŋu'‐yulŋu, ga märr‐ḻurrkun'nha yukurra nhina rom‐dhunupanydja.” Ga bitjarrayina ŋayi yukurrana Wapakak waŋananydja Garraywala.

5 Bala ŋayinydja Garraynydja buku‐wakmaraŋala waŋana bala Wapakakkunydja bitjarrana, “Nhäŋa ŋunha ya' mulku'‐mulkurunha yolŋunha walalanha miṯtjinha ga bäpurru'nha, nhe yurru nhämanydja ŋoy‐wiḻaŋ'thunna wirrkina dhikana wal'ŋu, liŋgu yuwalk yana ŋarranydja yurru djäma wiripuyama, galki yurru dhuwalayi maḻŋ'thunna yulŋunydja. Ŋunhi bini yolŋuyu walalay ḻakaranha nhokala ŋäthilinydja, ga nhenydja bini yakana märr‐yuwalkthinya ŋänha ŋunhi. 6 Ŋunhanydja ŋunhi †BabylonBapilunbuyŋunydja yolŋu walala be nhäna nyalmirimirrina yolŋu'‐yulŋu wal'ŋu ga ganydjarr‐ḏilkurruna; galkina walala yurru gaŋgathirrina dhärrana, bala nyäṉ'thunna yurru marililina; walala yurru marrtjinydja bena‐wala baḻaka'yunna birrka'mirrililina wäŋalilinydja buku‐ḻiw'maramana, bala bumana marrtji wiripu‐guḻku'nhanydja ŋunhi bäpurru'nha ga miṯtjinha baḏuwaḏuyunna, bala djaw'‐djawyunna wäŋanydja walalambala. 7 Ga bukmaknha yolŋu walala barrarirrinydja yukurra ŋuriki miriŋuwunydja, liŋgu walala ŋuli djäma walalaŋgala yana djälyu wal'ŋu, yana walala yurru djaw'‐djawyunna nhäku walala djäl, ga yakana yurru ŋula yolthu walalanha gulmaramanydja ḏaḏawmaramanydja. 8 Yarraman'tja ŋuli walalaŋgu gundupuma ganydjarryuna dhikana wal'ŋu bala marililinydja, gäma yurru ŋunhiyi miriŋunhanydja walalanha. Marrtjinydja walala yurru beŋuru barrkuŋuru wal'ŋu wäŋaŋurunydja, yurru ganydjarryuna walala yurru marrtjinydja‐wala yana, bitjanna bitjan ḏamala ŋuli marrtji ganydjarryu, ga dhiṯthun ŋayi yurru mulka ŋula nhä wäyinnha, bitjannayi yurru. 9 Yo, marrtjinydja walala yurru lili bunharawuna wal'ŋu yanana, baḏuwaḏuyunarawuna ganydjarryuna wal'ŋu yana bathalayuna, bitjan wärrk, ga bukmakthirrina yurru yolŋunydja walala barrarirrina wal'ŋu, liŋgu walala yurru märrama ḻuŋ'maramanydja yolŋu'‐yulŋunhanydja, bala djaw'‐djawyunna‐wala yanana biyapulnha dhaŋaŋnha, bena wal'ŋu miṯtji. 10 Walala yurru gitkitthunmirrina ŋuriki buŋgawamirriwunydja yolŋu'‐yulŋuwu wal'ŋu, bitjan warku'yunna walalanha yurru, ga ḻakarama ganydjarrmiriwnha bitjanna; liŋgu walala yurru yana ŋunhi bak‐bakmaramana dhikana ḻoḻunydja ŋunhinydja ḏälmirrinydja ga buṉbu malanha, bala djaw'‐djawyunna yana ŋula nhänydja walalaŋguwaynha walala ŋuliŋuruyi, ga yakana yurru ŋula yolthu walalanha ḏaḏawmaramanydja gulmaramanydja. 11 Yo, marrtjinydja walala yurru yana djarrany' bitjanna bitjan watayu yurru ŋayi bo'yun waḏutja dhika; yurru yuwalk yana yurru ŋayi Garrayyunydja dhä‐ḏir'yunna yanana walalanha, liŋgu walala ŋuli yukurra ŋunhi ŋurr'yun ŋuriŋina walalaŋgalay walala, ḻakaranhamirri bitjanna, ‘Ŋanapurrunydja dhuwala ḏälmirrina gal'ŋu mirithirrina, liŋgu ŋuriŋi ŋanapurruŋgalay Waŋarrwala ganydjarryu,’ bitjanna walala yurru waŋa yukurra.”

12 “Garray nhepi waŋgany ḏarrtjalktja gal'ŋu Waŋarr God. Nhenydja ŋunhi beŋuru liŋgu ŋurruŋura yana, ŋunhiyi liŋgu dhärranhayŋu Waŋarr. Nhenydja ŋanapurruŋguway Waŋarr God, ‡IsraelYitjuralpuyŋuwu yana, ga nhepi ŋanapurruŋgu waŋgany gunganharamirrinydja. Garray, nhäku warray nhe ŋunha Bapilunbuyŋunhanydja gaŋgathinyamirriyaŋala, yana ŋanapurrunha walala yurru buma dhawar'marama warrpam'thun, ga ŋuliwitjandhinydjayi nhenydja yukurra dhä‐ḏir'yun ŋanapurrunhana, märr yurru ŋanapurrunydja bilyunna ga gonha'yunna ŋunhi ŋanapurruŋguway yätjtja. 13 Nhenydja ḏarrtjalk gal'ŋu, gäna wal'ŋu nhepi God; wirrki yana nhe yukurra ŋapa‐nherraṉmirrinydja, maŋutji‐yaw'yunmirrina nhe yukurra ŋuriki yätjkunydja wirrkina. Ŋunhanydja Bapilunbuyŋunydja yolŋu walala mirithirrina yana yätjmirrina gal'ŋu, djuḻkmaramana yukurra ŋanapurrunhanydja, ga walalanydja yukurra ŋunha baḏuwaḏuyunna ŋanapurrunhana, rumbal‐winya'yunmarama. Nhäku warray nhe yukurra nhämanydja, bala dhäruk‐mukthunna yukurra nhina? Nhämirri warray nhe ŋuli dhä‐ḏir'yurru walalanhanydja? 14 Ŋanapurrunydja dhuwala goŋmiriwŋurana, buŋgawamiriwnha walala, bitjanna bitjan guya ŋunhi ŋunha gapuŋura moṉukŋura. Nhenydja djäl walala yurru ŋanapurrunha mulka, bala bumana murrkay'kumana? . . . liŋgu ŋanapurruŋgu bäyŋu buŋgawa djäkawu ŋanapurruŋgu? Dhiyakuyi nhe ḏukṯuktja?

15 “Yo, ŋuriŋiyinydjayi miriŋuyunydja yurru ŋanapurrunha gaṯmarama, bitjanna bitjan yolŋuyu ŋuli gaṯthunmarama ŋarirri bikaŋ'thu, bitjandhiyina yurru, bala warryu'‐warryunna ŋanapurrunha yurru ŋuriŋina ganybuyuna. Bala walala yurru waŋanydja goŋmirriyirrina dhikana wal'ŋu bitjanna, ‘Way nhäna dhuwalanydja? . . . dhaŋaŋdja mirithirrinydja ŋanapurru bumara,’ bitjanna yurru. 16 Bala walala yukurra ŋunhi märr‐ŋal'yunna bitjandhinydjayi ŋuriki ganybuwuna malaŋuwu, waŋa yukurra bitjanna, ‘Dhuwalanydja malanha ganybunydja ŋanapurruŋgu waŋarrnha; dhiyaŋuyinydjayi ganybuyunydja ŋanapurru yurru märrama birrka'mirrina wal'ŋu nhäku ŋanapurru ḏukṯuk.’

17 “Garray, nhaltjan nhe yurru walalanha yulŋunydja? . . . yana gananna walalanha ŋunhimalayina liŋguna, ga yakana ŋula dhä‐ḏir'yundja yurru? . . . märr yurru walala mukthunna yana buma marrtji yolŋunhana walalanha gupaḏalnha‐wala?” Ga bitjarrayi ŋarra dhä‐wirrka'yurrunanydja Garraynha.