1 Yo, nhuma yolŋu walala *IsraelYitjuralpuyŋu, ŋäka walala dhäruk dhuwala Garraynha, liŋgu Garrayyunydja ŋayipinydja yukurra ḻakarama nhumalanha dhuwurr‐yätjnha yanana. Yaka nhuma yukurra yana märr‐nherraṉmirri nhanukala, ga yaka nhuma yukurra maŋutji‐wuyun ŋuruku ŋunhi wiripu‐guḻku'wunydja yolŋu'‐yulŋuwu, ga yaka yana nhuma yuwalkkuma wal'ŋu marŋgi Godkunydja dhiyalaŋuminydja wäŋaŋura. 2 Yo, waŋa nhuma ŋuli yätjkuma ga ḻakarama bothirri, ga manaŋirri nhuma ŋuli ŋulaŋuru yolŋu'‐yulŋuwala wiripu‐guḻku'wala, ga djäma marramba' dhika nhä malanha rom, ga buma nhuma ŋuli wiripunydja yolŋunha, buma murrkay'kuma yana. 3 Ga dhiyakuyinayi märrwu ŋayi yurru dhuwalanydja wäŋa yätjthirrina dhikana wal'ŋu yana; bukmaknha yurru yolŋu walala nhina yukurra galŋa‐yätjthirrina, rirrikthunmirrina walala yurru, ga nhina yalŋgi'na yana, ga wäyin walala yurru marrtji murrmurryunna, ga bitjandhi liŋgu yurru guya ŋunha gapuŋuranydja moṉukŋuranydja rakunydhirriyi.

4-5 Ŋayi Garraynydja yukurra waŋa bitjan, “Yaka dhunupamirriyaŋa ŋunha wiripuŋunhanydja yolŋunha; yaka waŋiya biyakanydja, ‘Nhuŋu ŋunhiyinydja ŋurru.’ Yaka biyakanydja mel‐wulaŋa wiripuŋunhanydja yolŋunha, liŋgu nhumapi yana yätjtja gal'ŋu; ŋarranydja yukurra dhuwala dhunupamirriyama nhumalanha, ḏalkarra'mirrinha yana yolŋu'‐yulŋunha. Ga dhiyakuyinayi märrwu nhuma yurru galkirrinydja, ga ŋunha djawarrkmirri yolŋu, dhäwu'‐ḻakaranhamirri walala yurru bitjandhi liŋgu galkirri, rrambaŋithirriyi nhumalaŋgala. Nhumanydja dhuwala balanyara bitjan dharpa räwak ŋunhi, bala ŋarra yurru baḏuwaḏuyunna ŋunhiyi, djatthunna wal'ŋu, dhawar'maramana; birrka'mirriyu waluyunydja nhuma yurru rakunydhirrinydja. 6 Yo, ŋarrakunydja yolŋu walala yukurra murrmurryunna, liŋgu walala dhuŋamirrina; yakana walala wal'ŋu yuwalk marŋgi ŋarrakunydja, liŋgu nhumanydja ḏalkarra'mirri walala yukurra ŋuyulkthirri warray, ŋapa‐nherraṉmirri warray ŋarrakalaŋunydja romgu. Yaka warray nhuma yukurra marŋgikuma ŋunhi yuwalkŋunydja gal'ŋu ŋunha yolŋu'‐yulŋunha, ga dhiyakunayi ŋarranydja nhumalaŋgu ŋapa‐wekaŋalana ŋuyulkthinana. Nhuma meṉguŋala ŋarrakunydja romnha, ga bitjandhi liŋgu ŋarranydja yurru meṉgumayi yana nhumalaŋgunydja gäthu'mirriŋunha walalanha, yakana walala yurru ŋarrakunydja ḏalkarra'mirri walala yolŋu'‐yulŋu.

7 “Yo, ŋarrakunydja ŋunhi ḏalkarra'mirri walala marrtjina yukurrana mirithina wal'ŋu guḻku', yurru bitjarra warray liŋgu walalanydja yukurrana djäma dhuwurr‐yätjthina warray, buku‐yattjatkuŋala warray marrtjina ŋunhiyi malanha yätj warray dhika. Ŋäthilinydja ŋunhinydja, walala nhinana yukurrana ŋarrakalay wal'ŋu ḻatju'ŋura dhika djarraṯawun'ŋura, yurru dhiyaŋunydja‐wala walala yukurra yurru nhina goramirrina. 8 Yo, ŋunhiyi malanha ḏalkarra'mirri walala nhina yukurra galŋa‐djulŋithirrina ŋunhiliyi yätjŋuranydja romŋura, ga ŋuriŋi wiripuŋuwalanydja yolŋu'‐yulŋuwala yätjthu djämayu walalanhanydja galŋa‐djulŋikuma warray ŋuli yukurra, bala walala ḏukṯuktja walala yurru mukthunna yana djäma yätjnha‐wala.

9 “Yo, ŋunhiyi ḏalkarra'mirrinydja walala mirithirrina yanana yätjmirrina dhikana wal'ŋu, bitjan yana liŋgu bitjan nhuma yolŋu'‐yulŋu dhuwala, bala ŋarra yurru dhä‐ḏir'yunna nhumalanha yulŋunydja bukmakkumana yana, rrambaŋikumana, liŋgu ŋuriŋi nhumalaŋgala yätjthu djämayu. 10 Yo, ŋuriŋiyi ḏalkarra'mirriyu walalay yurru ḻukana marrtji ŋatha, ŋunhina ŋunhi walala ŋuli yolŋu'‐yulŋuyu gäma mundhurr‐wekanharawu Godku; ḻuka warray walala yurru yulŋunydja, yurru yakana walalanha märr‐bakthunmaramanydja yurru ŋuriŋiyi, mukthun yana walala yurru marrya'mirri nhina yukurra. Walala yurru marrtji märramanydja dhäykawurrunhanydja guḻku'na dhika wal'ŋu, ga mukthun yana walala yurru nhina yukurra dhäpark yana yothumiriw walala, liŋgu walala bilyurruna ŋarrakalaŋuŋuru, bala walala yukurra malthundja ŋunha wiripuŋuwuna waŋarrwu.” Ga bitjarra ŋayi Garray waŋananydja.

11 Yo, ŋayi Garray waŋana bitjarra, “Nhumanydja dhuwalanydja ŋarrakunydja ŋunhi yolŋu walala, bitjarra nhuma bawa'mirriyinana muḻkurrnydja, liŋgu ŋuriŋina djäl‐ḏumurruyinyarayuna ga ŋänitji'yuna ḻukanharayu nhumalanha ḻiyanydja‐dhumukkuŋala nhäŋiniŋ'kuŋalanydja. 12 Yo, ḻiyanydja nhumalaŋgu bawa'mirriyinana, liŋgu nhuma ŋuli waŋa dharpanha ŋunhinha bitjan gam', ‘Nhenydja ŋarraku waŋarrnha dhuwala. Ma' maḻŋ'maraŋa ŋarrakala yuwalkŋu wal'ŋu.’ Ga ŋuriŋi dharpayunydja djämayu nhuma yurru be maḻŋ'maramana nhäyinyara ŋamakurru' ga nhäyinyara yätj. Yo, nhumanydja dhuwala balanyara bitjan marramba'mirri dhäyka, liŋgu nhuma gonha'yurrunana ŋarranha, bala marrtjinana‐wala yana gupa‐wuḻkthurrunana, ga yuwalk yana nhuma djäl‐ḏumurruyirrinydja yukurra wirrki yana wal'ŋu ŋuriki be nhäkunydja waŋarrwu goŋbuywunydja, ga ŋuriŋiyinydjayi romdhu nhumalanha gatjpaḻ'maraŋalana ŋuliŋuruyi yuwalkŋuŋurunydja dhukarrŋuru. 13 Ŋunhala bukuŋuranydja nhuma ŋuli yukurra mundhurr‐bathan, buku‐ŋal'yun wiripuŋuwu waŋarrwu, ga bitjandhi liŋgu nhuma yukurra bathan buŋgan bäwny'tja ŋurikiyi malaŋuwu waŋarrwu, ŋunha ya' ŋurrŋgitjŋura dharpaŋura. Ga ŋunha dhuyuŋuranydja be wäŋaŋura nhumalaŋgala djamarrkuḻi'yunydja ga dhäykawurruyu yukurra marramba'na djäma dhika nhäna, buku‐ŋal'yun ŋurikiyina malaŋuwu waŋarrwu. 14 Yurru yaka ŋarra dhäykawurrunhanydja yurru bitjandhiyi dhä‐ḏir'yun ŋurikiyinydjayi; nhumalanha ḏarramuwurrunha ŋarra yurru dhä‐ḏir'yundja wirrkinydja wal'ŋu yananydja, liŋgu ŋunha dhäykawurrunydja yukurra malthun munguyun nhumalaŋgalaŋuwu dhukarrwu djarrpi'wu ŋuriki. Bitjan warray liŋgu nhumanydja ḏarramuwurrunydja yukurra djäma marramba' warray, djaw'‐djawyun nhuma marrtji wiripu‐guḻku'nha dhäykawurrunha ŋunhimalayina malaŋulili dharrpallilina bena wäŋalili, buku‐ŋal'yun ŋuriki wiripuŋuwuna waŋarrwu ŋunhiliyi. Bala nhumalanhanydja dhuwalinydja yolŋunha walalanha yurru warrpam'thunna yana baḏuwaḏuyunna, liŋgu dhuwalina nhumalaŋgu muḻkurrnydja bawa'mirriyinana, yakana nhe yukurra guyaŋirri ŋamathama.” Ga bitjarra ŋayi Garray waŋananydja.