4 Yo, Garray Godtja yukurra waŋa bitjan, “Ŋarranydja dhuwala Waŋarr God nhumalaŋgu, ŋunhi ŋarra gäŋala nhumalanha beŋuru dhawaṯmaraŋala garrpiṉminyaraŋuru romŋuru *EgyptYetjipŋuru. Ŋarrapi yana waŋgany nhumalaŋgu Godtja; yakana ŋula wiripuŋuyunydja waŋarryu walŋakuma ŋuli yolŋu'‐yulŋunha. 5-6 Ŋarrapi yana nhumalanha ŋurru‐warryurrunanydja marrtjina, gäŋalanydja lili ŋuliwitjarra ŋanhdharkkurrunydja ŋamathaŋala yana wal'ŋu. Ŋarra maranhu‐wekaŋala nhumalanha ŋamakurru'yu yana ŋathayunydja; nhuma ḻukananydja marrtjina, bala maranhuyinana, märr‐ḏaw'yurrunana yana ŋuriŋiyinydjayi ŋathayu. Bala nhumanydja ŋurr'yurruna warray, be‐e‐e warray, bathala‐ḻakaranhamina warray nhumalanhawuy nhuma, bala meṉguŋalana ŋarranhanydja. 7-8 Bala ŋarranydja yurru yana bitjanna nhumalanha, bitjan ŋuli wäyindhu ŋuriŋi manbuḻmaramana mulka wäyinnha, bala ŋanaktja guḻk‐guḻkthunna, bala ḻukana; 9 bitjandhina ŋarra nhumalanha yurru baḏuwaḏuyundja †IsraelYitjuralnhanydja, bala yolthuna nhumalanha yurru guŋga'yundja dhika? 10 Nhumanydja ḏukṯukthina buŋgawawu warray wal'ŋu, yurru ŋunhiyi yolŋunydja, nhumalaŋgu buŋgawanydja, yakana ŋayi yukurra ganydjarr ŋayathama walŋakunharawu ŋuriki nhumalaŋgalaŋuwunydja miṯtjiwu. 11 Yo, liŋgu ŋarra wekaŋala buŋgawanhanydja nhumalaŋgu, liŋgu ŋarra ŋaramurryina nhumalaŋgala; ga bitjarrayi ŋarra djaw'yurrunayi nhumalaŋgu buŋgawanhanydja, liŋgu ŋarra nyinyaŋdhunna yukurra ŋuriki nhumalaŋgalaŋuwu romgunydja.

12 “Yo, yuwalk yana Yitjuralwunydja nhä malanha yätjtja yukurra bena buku‐yattjat‐dharrana, girri'‐ŋamathirri yukurra ŋuriki dhä‐ḏir'yunarawuna, ga yaka yana ŋarra meṉguŋalanydja nhumalaŋgu yätjtja. 13 Yitjuralnydja ŋunha bitjan be nhäna dhuŋana, bawala'mirrina miṯtji, bitjanna bitjan yothu yukurra mukthun nhina ŋunha ŋäṉḏi'mirriŋuwala guḻunŋura, ga rakunydhirri ŋayi yurru ŋunhala liŋgu yana guḻunŋura ŋäṉḏi'mirriŋuwala, liŋgu yakana ŋayi yurru ŋunhi dhawal‐wuyaŋirrinydja. Yo, nhuma bini ŋunhi gonha'yuna muka nhumalaŋguway ŋunhi yätjtja malanha dhuwurr, märr bini ŋarranydja nhumalanha walŋakunha dhawaṯmaranha walŋamirrinha. 14 Bala nhaltjanna ŋarranydja yurru dhika? . . . dhawaṯmaramana ŋunhi Yitjuralnhanydja miṯtjinha ŋuliŋuru rakunyŋurunydja romŋuru? . . . bala walŋakumana? Yä‐ä‐äw yaka warray. Go marrtjiyana lili rakunydja, bala buŋana walalanha rerriyunydja dhika nhäyuna; yakana yurru ŋarra nhämanydja ga mel‐wuyun Yitjuralwunydja. Yitjuralnydja yurru rakunydhirrina yana, liŋgu walala yurru yakana nyamir'yun yätjtja walalaŋguway ga gonha'yun.

15 “Yo, Yitjuralnydja gurarrthina bena miṯtji waḻatjthinana dhikana wal'ŋu, yurru balanyarana walala ŋunhi yulŋunydja bitjan gulwaṉi mulmu. Bala dhunupana ŋarranydja yurru yana djuy'yunna gorrmurnha ŋanyana dhika wata, märr yurru ŋayi ŋunhi bo'yunna‐wala yana, baṉḏa'‐baṉḏanygumana yurru ŋunhiyi gapunydja. Yo, gapunydja yurru ŋunhi baṉḏanydhirrina ganbarkthirrina, ga wäŋa yurru ŋunhiyi räwakthirrina dhikana wal'ŋu. 16 Yo, ŋunha ‡SamariaDjamariyanydja wäŋa yurru buwayakthirrina dhika warrpam'thunna, dhawar'yunna yurru; ŋunhiyi wäŋa yukurra yurru djingaryun yolŋumiriwnha dhikana wal'ŋu, liŋgu ŋayi ŋarraku ŋunhiyi wäŋa bitjarra ŋuyulkthina, ŋapa‐wekaŋala ŋarrakunydja. Yo, yolŋunydja walala yurru ŋurikiyyi wäŋawuy murrmurryun marrtji ŋuriŋi bunharaminyarayuna yana; ŋuriŋi miriŋuyu yurru marrtji bumana yo‐yuthunhanydja yolŋunha walalanha, ga bitjandhi liŋgu yothu'mirrinhanydja ŋunhi yolŋu'‐yulŋunha.” Bitjarra ŋayi Garray waŋananydja yukurrana.