Yurru Djatjuwanydja ŋayipinydja marrtjina murrŋaram'thinana, ga Garraynydja waŋana nhanukala bitjarra, “Liŋguna dhuwala nhe murrŋaram'nha, ga dhika bala wiripuŋuranydja wäŋaŋura malaŋumi miriŋu malanha mukthunga nhina marrtji, ga wiripunydja malanha wäŋa mukthunga yana walalaŋgala goŋŋura. Nhe yurru gulk‐gulkthurrana dhuwalanydja wäŋa barrkuwatjkuŋana, bala goŋ‐nherralana dhuwali Yitjuralpuyŋunhanydja, märr yurru walala mala ga mala ga mala bitjanna yurru marrtji nhinanydja bala walalaŋgalay walala wäŋaŋuranydja malaŋumi.”

Bala yana yuwalkthi Djatjuwayunydja gulk‐gulkthurrunana wäŋanydja ŋunhiyi, bala weka'‐wikaŋalana bäpurru'lili ga bäpurru'lili ga bäpurru'lili. Yurru yaka ŋayi wekaŋala waŋganygunydja bäpurru'wu *13:8—14:4 LeviLepaywunydja ŋula waŋgany wäŋa, liŋgu Lepaynydja dhuwala bäpurru' ḏalkarra'mirri yana yolŋu walala, ga nhina walala yukurra yurru ŋurikala walalaŋgala ŋunhi wäŋamirriwala bäpurru'wala walalaŋgala. Bala walala yurru yukurra ŋathanydja ḻuka ŋuliŋuruyina ŋunhi walala ŋuli yolŋu'‐yulŋuyu gäma marrtji mundhurr‐wekanharawu Godku. Liŋgu ŋayipina Garraynha walalaŋgunydja märr‐bakthunaramirri; ŋuriŋiyina walalanha yurru ŋunhi Godkunydja ḏalkarra'mirrinha walalanha märryu‐bakthunmarama yukurra.