1 Yo, dhuwalanydja gay' dhäwu' wekanhara Garraywuŋu Godkuŋu yolŋuwala yäkuwala *MalachiMalakaywala yolŋu'‐yulŋuwu ŋuriki †IsraelYitjuralpuyŋuwu miṯtjiwu. 2 Garraynydja waŋa yukurra nhanukalayŋuwu ŋayi yolŋu'‐yulŋuwunydja bitjan gam'. “Nhumanydja dhuwala mel‐wiḏi'na ŋarraku, marrkapmirrina walala.”

Ga walalanydja ŋunhi yolŋunydja walala buku‐wakmaraŋala nhanŋu bitjarra, “Yuwalk nhe yukurra märr‐ŋamathirrinydja ŋanapurruŋgu? Nhä dhika nhe ŋanapurruŋgu wekaŋalanydja?”

Ga ŋayinydja Garraynydja buku‐wakmaraŋala waŋana bitjarra, “Ŋunhanydja maṉḏa ŋunhi ‡EsauYetjunydja ga §JacobDjaykuptja, maṉḏanydja ŋunhi gutha'manydji, yurru waŋganygu ŋarra märr‐ŋamathinanydja yukurrana nhanŋuway Djaykupku, 3 ga ŋapa‐nherraṉminana ŋarra yukurrana nyinyaŋdhurrunana ŋuriki wiripuŋuwunydja Yetjuwunydja yäkuwu. Yo, ŋarra baḏuwaḏuyurruna ŋunhi Yetjuwunydja wäŋanha, ga ŋunhina bili wakinŋuna wäyin malanha nhinanydja yukurra ŋunhiliyi.”

4 Yo, ŋunhanydja ŋunhi *EdomYedambuynydja yolŋu'‐yulŋu ŋulaŋuru Yetjuwuŋu mala‐wunharawuy, ga waŋanydja walala yukurra bitjanna, “Wäŋanydja ŋanapurruŋgu dhuwala räwaknha, yolŋumiriwnha, baḏuwaḏuyunarana warrpam'puynha, yurru biyapul ŋanapurru yurru dhärranhamarama, dhuḻ'yundhi yulŋunydja.” Ga ŋayinydja Garraynydja waŋana buku‐wakmaraŋala bitjarra, “Ŋuli nhuma yurru dhuḻ'yun biyapulnydja ŋunhiyi wäŋa nhumalaŋguway, ŋarranydja yurru baḏuwaḏuyundhi biyapul. Ŋuruŋu wiripuŋuyunydja miṯtjiyu yurru ḻakarama nhumalanha ŋunhi nhumanydja yätjmirrina yanana gal'ŋu yolŋu walala miṯtji. Yo, yuwalk yana ŋayi yurru Garraynydja ŋaramurrthirri ŋuriki yolŋu'‐yulŋuwu Yedambuyŋuwunydja miṯtjiwu gupaḏalnha‐wala, yakana ŋayi yurru bäy‐ḻakaramanydja walalaŋgu.”

5 Yo, ŋuriŋi yolŋu'‐yulŋuyu Yitjuralpuyŋuyunydja yurru nhämana walalaŋgalay walala maŋutjiyuna, bala waŋanydja walala yurru bitjanna, “Yuwalk muka dhuwala Garraynydja Waŋarr ŋayi, ga djämanydja ŋayi ŋuli yukurra mirithirri wal'ŋu bathala yana romdja birrka'mirrikurru wäŋakurrunydja, yaka yana dhiyalaŋumi Yitjuralnydja wäŋaŋura.”

6 Yo, ŋayinydja ŋunhi Garraynydja Waŋarrnydja Ganydjarr‐ḏumurrunydja waŋa yukurra ŋurikala ḏalkarra'mirriwalanydja yolŋuwala bitjan, “Gäthu'mirriŋunydja ḏarramunydja ŋuli märr‐ŋal'yun nhanukalaŋuwala bäpa'mirriŋuwala, ga djämamirrinydja yolŋu ŋuli märr‐ŋal'yun nhanukalaŋuwala buŋgawa'mirriŋuwala. Ŋarranydja dhuwala nhumalaŋgu be muka bäpa'mirriŋu, ga nhämirri ŋuli nhuma märr‐ŋal'yurru ŋarrakuwaynydja? Ŋarranydja dhuwala nhumalaŋgu be muka ŋurruŋu wal'ŋu ga nhämirri nhuma ŋuli rom‐wiyaṉiyi ŋarrakunydja? Bitjan liŋgu nhuma ŋuli nhämanydja marrtji ŋarranha, nhäŋiniŋ' ḻakarama bitjanna. Ga nhumanydja ŋuli ḏalkarra'mirrinydja yolŋu walala buku‐wakmarama waŋa bitjan warray, ‘Yaka warray ŋanapurru nhuna ŋuli dhika nhäŋiniŋ' ḻakaramanydja. Nhä dhika ŋanapurru djämanydja djarrpi'kuŋalanydja?’ ”

7 Ga ŋayinydja waŋana Garraynydja balanydja buku‐wakmaraŋala, bitjarrana ḻakaraŋala, “Ŋunhinydja mundhurr‐wekanharanydja nhumalaŋguŋu ŋarraku yätjnha yanana wal'ŋu. Wiripunydja nhuma ŋuli gäma ŋarraku lili mundhurr‐wekanharawu yätjmirrina dhikana, yakana ŋamakurru' wal'ŋu.” Ga nhumanydja ŋuli dhä‐wirrka'yun lili ŋanyana bitjan, “Nhä dhika ŋayi yukurra yätjthirrinydja ŋuli?”

8 Ga ŋayinydja Garraynydja waŋana buku‐wakmaraŋala bitjarra, “Mäkiri'‐witjurra ga ŋäka, ŋarranydja yurru ḻakaramana nhumalaŋgu. Nhumanydja ŋuli ŋunhi gäma wäyinnha mundhurr‐wekanharawu ŋarrakunydja rerrimirrinhana ga bambaynhana ga bunhdhurrnhana. Nhä dhuwalayinydja? . . . manymak wo yätj? Yätjnha yanana ŋunhiyinydjayi, ga ŋuriŋiyinydjayi romdhu nhuma ŋuli ŋarranhanydja wakalkumana. Nhaltjan ŋayinydja yurru ŋuriŋi buŋgawayunydja gal'ŋu ŋurruŋuyunydja yolŋuyu? . . . Ŋunhi nhe yurru wekama wäyinnha rerrimirrinydja ŋunhi nhanŋu? Ŋayaŋu‐djulŋithirrinydja? märrama ŋayi yurru ŋunhiyi nhokuŋu? . . . ga wekama nhuŋu ŋunhi nhäku nhe yurru ŋäŋ'thun?”

9 Ga nhuma ḏalkarra'mirri walala yolŋu'‐yulŋu, nhuma ŋuli gawaw'yun Godkala waŋa bitjan, “Garray, guŋga'yurra ŋanapurrunha. Garray, wekaŋa ŋanapurruŋgu ŋamakurru' wal'ŋu,” bitjandhina nhuma ŋuli bukumirriyamanydja nhanukala, yurru ŋayinydja Garraynydja ŋuli yakana ŋurikiyinydjayi mäkiri'‐witjun nhumalaŋgalaŋuwu bukumirriyanharawuywunydja, liŋgu nhuma ŋuli yaka wekama ŋamakurru' nhanŋu. 10 Yo, ŋayi Garraynydja waŋa yukurra bitjan gam', “Wanhaka dhika be ḏalkarra'mirrinydja yolŋu, ŋunhi ŋayi yurru dhaḻ'yun dhurrwara wäŋa? . . . märr yurru walala ŋuruŋu yolŋu'‐yulŋuyu yakana gäma rerrimirrinhanydja ŋula nhänhanydja wäyinnha? Yakana ŋarra yukurra ŋuriŋiyinydja malaŋuyu ŋayaŋu‐djulŋithirri ŋuli, ga yakana ŋarra yurru märrama balanyarayinydjayi mundhurr nhumalaŋguŋunydja goŋbuy wekanhara.

11 “Yurru yalalaŋumirriyunydja ŋunhinydja yolŋu walala yurru märr‐ŋal'yunna ŋarrakalanydja yukurra yäkulili birrka'mirriŋurana wäŋaŋura ḻiw'marama, beŋuru ŋunhi walu marrtji walma, yana liŋgu ga ŋunha bala gulŋiyirri ŋayi yurru marrtji walu ŋunhi. Yo, birrka'mirriŋurana walala yurru bathan marrtji buŋgan bäwny'tja ŋarraku, buku‐ŋal'yunarana manapanara, ga ŋunhiyinydjayi walalaŋguŋu mundhurr‐wekanharanydja ŋarra yurru ŋaḏupthunna yana märramana, liŋgu yuwalknha yanana yurru ŋunha mulkurunydja yolŋu walala märr‐ŋal'yun yukurra ŋarrakalaŋuwunydja yäkuwu, ga ḻakarama ŋarranha yurru waŋarr ḻakaramana. 12 Yurru nhumapinydja ŋarrakuwaynydja ŋunhi yolŋu walala gal'ŋu, nhuma ŋuli wakalkumana yäku ŋarranhanydja, ŋunhi nhuma ŋuli waŋa yanapi ŋunhi ŋarrakunydja barŋ ŋula nhä wakalŋu nhäŋiniŋ'. Nhuma ŋuli waŋa ḻakarama yolŋu'‐yulŋuwala bitjan, ‘Ŋunhi nhuma ŋuli gäma wäyin mundhurr‐wekanharawu rerrimirri ŋula nhä malanha, ŋunhinydja manymak warrpam'.’

13 “Ga wiripunydja nhuma ŋuli ḏalkarra'mirri walala yolŋu'‐yulŋu waŋa bitjan, ‘Ŋanapurrunydja marrtji märr‐yawaryunna dhuwala dhiyaŋu djämayu. Garraywunydja dhuwala dhukarr ḏälnha mirithirrina, gumurr‐wuṉḏaŋarrnha,’ bitjandhi nhuma ŋuli waŋanydja, bala nhuma ŋuli djäma nhepina nhokalaynha nhe ḏukṯukthu, yakana nhe yurru dhäruk ŋarranha märrama. Nhä dhuwalayinydja? . . . manymak wal'ŋu? . . . ŋunhi nhuma ŋuli mundhurr‐wekama Garraywu ŋunhi manaŋinyarawuy wäyin ŋula yolku dhulŋuŋu? Ga ŋunhiyi ŋunhi nhuma ŋuli wekama Garraywu rerrimirrinha ga bunhdhurrnha wäyinnha, nhä ŋunhiyinydjayi? . . . ŋamakurru'? Yakana yana ŋarra yurru ŋaḏupthun ga märrama ŋunhiyinydjayi be nhänydja nhäŋiniŋ'tja nhumalaŋguŋu.” Bitjarra ŋayi Garray waŋananydja.

14 “Yo, ŋunhi ŋayi yurru yolŋuyu ŋayathama yukurra ḻatju' dhika wäyin, yurru ŋayinydja yurru gäma rerrimirrinha ga bunhdhurrnha warray ŋarrakunydja, liŋgu ŋayi ŋuli guyaŋirri yanapi yurru ŋayi mayali'‐wama ŋarranha, ŋuriŋiyinydjayi yolŋuyu yurru märrama ŋarrakuŋunydja yätjthi yana, yaka ŋamakurru'. Liŋgu ŋarranydja dhuwala ŋurruŋu wal'ŋu buŋgawa, ga yäkunydja ŋarraku be wal'ŋu bathala yana. Ŋunhanydja ŋunhi mulku'‐mulkurunydja yolŋu walala marŋgi ŋarraku, ŋunhi ŋarranydja ŋuli dhä‐ḏir'yun dhuwurr‐yätjmirrinhanydja yolŋu'‐yulŋunha, bala walala ŋuli rom‐wiyaṉiyirrina ŋarrakunydja.” Bitjarra ŋayi Garraynydja waŋana.