6
Libro iyemboyaa reta
Jare aecha Ovecha-raɨ uipea penti jocua libro iyemboyaa. Jayave ayandu penti mbaembae icove vae jei:
—Eyu.
Ara jɨapu vae echa uyemɨngueta yave.
Jare aecha penti cavayu tĩ vae, jare opo cavayu re vae güɨnoi güɨrapa. Jare uñemee chupe corona. Jare jecuaeño upurumɨamɨri.
Jare Ovecha-raɨ uipea ĩru libro iyemboyaa. Uyepea ma mocui. Jayave ayandu ĩru mbaembae icove vae jei:
—Eyu.
Jare aecha oo ĩru cavayu. Ẽrei cua cavayu pɨ̃ta vae. Jare opo cavayu re vae pe uñemee mbaepuere umɨñerãro vaerã ɨvɨ pegua reta uyeyuca vaerã. Jare uñemee vi chupe penti quɨsepucu tuicha ete vae.
Jare Ovecha-raɨ uipea ĩru libro iyemboyaa. Uyepea ma mbapɨ. Jayave ayandu ĩru mbaembae icove vae jei:
—Eyu.
Jare aecha ĩru cavayu. Ẽrei cua cavayu jũ vae. Jare opo cavayu re vae güɨnoi ipo pe umɨpesa pɨpe vae. Jare ayandu ñee jocua irundɨ mbaembae icove vae reta ipɨte pe jei:
—Mocui libra trigo jepɨ penti ara mbaravɨquɨ jepɨ pegua, jare seis libra cebada jepɨ penti ara mbaravɨquɨ jepɨ pegua. Jare agüɨye erucumegua aceite jare vino.
Jare Ovecha-raɨ uipea ĩru libro iyemboyaa. Uyepea ma irundɨ. Jayave ayandu ĩru mbaembae icove vae jei:
—Eyu.
Jare aecha ĩru cavayu. Ẽrei cua cavayu iyu vae. Jare opo cavayu re vae jee co Mano. Jare Cañɨtei jee vae oo Mano jee vae jaɨcue. Jare uñemee chupe reta mbaepuere jeta ye ye ɨvɨ pegua reta re, ipuere vaerã uyucaca reta quɨsepucu pe jare caruai pe jare mbaerasɨ pe jare maemɨmba pochɨ vae reta pe.
Jare Ovecha-raɨ uipea ĩru libro iyemboyaa. Uyepea ma pandepo. Jayave aecha uñemeearenda igüɨ pe Tumpa iñee jeco pegua uyeyucaca vae reta. Echa'ã jae reta uyeyucaca, umɨmbeu Tumpa iñee ĩru vae reta pe ramo. 10 Jare jae reta iñeeãta reve jei:
—Nde co jae iyoa mbae vae, oreYa. Nde co jae añete vae jei vae. ¿Maera pa ndeiño neãa ɨvɨ pegua oreyuca vae reta? ¿Quirãi yave pa ndiporaracata chupe reta? —jei reta.
11 Jare temimonde tĩ vae uñemee penti penti pe, jare penti vae jei chupe reta:
—Peputuuño joco pe michi pegua. Echa'ã uyeyucacata vi rani perɨvɨ Tumpa pe uyeyocui vae reta, pe reta piyeyucaca rami —jei.
12 Jare aecha Ovecha-raɨ uipea ĩru libro iyemboyaa. Uyepea ma seis. Jayave ɨvɨ tanta ucãta. Jare guarasɨ uyeyapo jũ penti tarapo jũ vae rami, jare yasɨ uyeyapo pɨ̃ta tugüɨ rami. 13 Jare yasɨtata ara re ñugüɨnoi vae reta oa ɨvɨ pe, penti ɨva ía yagüɨye mbae vae reta oa jãca güi ɨvɨtu tanta umɨcãta yave vae rami. 14 Jare ara etei uyembɨyao mbɨte rupi jare uñeñoma penti tupapire uñeñoma rami. Jare opaete ɨvɨtu reta jare ɨvɨ ɨ mbɨte pe ñugüɨnoi vae reta usɨrɨ jenda güi. 15 Jare ɨvɨ pegua reta juvicha guasu reta jare mburuvicha reta jare icocatu vae reta jare sundaro reta juvicha reta jare mbaepuere güɨnoi vae reta jare opaete uyeyocui vae reta jare opaete uyeyocui mbae vae reta uñemi ɨvɨcua reta pe jare ita ɨvɨtu reta re ñugüɨnoi vae reta ipɨte rupi. 16 Jare jei ɨvɨtu guasu reta jare ita reta pe:
—Pea oreré. Oreñomi guapɨa pe uguapɨ vae jova güi. Oreñomi, agüɨye vaerã nduecha Ovecha-raɨ. Echa'ã jae pochɨ ete oreve —jei reta—. 17 Ou ma uvãe ara Ovecha-raɨ pochɨ vaerã oreve, jare mbaetɨ etei quía ipuere umɨaguanta —jei reta.