1 ሂዛ፥ ፆሳይ ዶሲያ ናይታዳ ኢያ ዳኒቴ። 2 ኪሪስቶሲ ኑና ዶሲዲ ባና ኑ ጊሾ ፆሳስ ሳዊያ ኢሞኔ ያርሾ ኦꬂዲ ኢሚዳይሳዳ ሂንቴካ ሲቆን ዴዒቴ። ኬሳ 29፡18፤ ማዝ 40፡6

3 ሺን ላይማቴꬂ፥ ቱናቴꬂኔ ኡዜቴꬂ ኣማኒያ ኣሳስ ቤሶና ጊሾ ሂንቴ ጊዶን ኡባራካ ሲዔቶፎ። 4 ፆሳ ጋላቲቴፔ ኣቲን ዬላያባይኔ ኤያ ኦዲ ዎይኮ ቂꬌይ ሂንቴው ቤሶና ጊሾ ሂንቴ ጊዶን ኡባካ ዴዖፖ። 5 ሃይሳ ኤሪቴ፤ ኦኒካ ላይማቴይ ዎይኮ ቱናባ ኦꬄይ ዎይኮ ኡዜቴይ ኪሪስቶሳ ካዎቴꬃኔ ፆሳ ካዎቴꬃ ላታናው ዳንዳዔና። ኡዜቴꬂ ኤቃ ጎይኖ ሜላ።

6 ሃይሳታ ጋሶን ፆሳ ሃንቆይ ኪቴቶና ኣሳ ቦላ ያና ጊሾ ኦኒካ ሂንቴና ፓꬆና ኦዳን ጪሞፎ። 7 ሄሳ ሜላ ኣሳራ ኢሲፌቴꬂ ኦꬆፊቴ። 8 ካሴ ሂንቴ ꬉማን ዴዒዴታ፥ ሺን ሃዒ ጎዳ ባጋራ ፖዖን ዴዔታ። ሂዛ፥ ፖዖ ኣሳዳ ፖዖን ሲሜሬቲቴ። 9 ፖዖይ ሎዖቴꬂ፥ ፂሎቴꬂኔ ቱማቴꬂ ኣይፌስ።

10 ጎዳ ኡፋይሲያባ ኦꬃናው ኮዪቴ። 11 ጎዒ ባይና ꬉማ ኦሶ ቆንጪሲቴፔ ኣቲን ኢያራ ኢሲፎፒቴ። 12 ኤንቲ ጌማን ኦꬂያ ኦሱዋ ሃሪ ኣቶሺን ኦዳናዉካ ዬላዬስ። 13 ሺን ኡባባይ ፖዖን ኬያ ዎዴ ቆንጬን ቤንቴስ። 14 ፖዖይ ኡባባ ቆንጬን ቤሴስ። ሄሳ ጊሾ፥

15 ሂዛ፥ ሂንቴ ዋኒዲ ዴዒያኮ ኣኬኪ ቤዒቴ። ጪንጫታ ጊዲቴፔ ኣቲን ኤያታ ጊዶፒቴ። 16 ላይꬃይ ኢታ ጊዲያ ጊሾ ኢንጄቲያ ዎዴ ኡባ ጎዔቲቴ። ቆላ 4፡5 17 ሄሳ ጊሾ፥ ጎዳ ሼኔይ ኣይቤኮ ኣኬኪቴፔ ኣቲን ኤዮፒቴ።

18 ጌሻ ኣያናን ጋላስ ጋላስ ኩሚቴፔ ኣቲን ꬋዮኮ ሂንቴና ካሌꬂያ ጊሾ ዎይኔ ኡሻን ማꬆቶፊቴ። 19 ማዝሙሬን፥ ሳባኒኔ ኣያና ዬꬃን፥ ኢሶይ ኢሱዋራ ኦዴቲቴ። ቃሲ ሂንቴ ዎዛናን ዛማሪሼኔ ሳቢሼ ጎዳ ጋላቲቴ። ቆላ 3፡16-17 20 ኑ ጎዳ ዬሱስ ኪሪስቶሳ ሱንꬃን ኡባ ዎዴ ፆሳ ኣዋ ኡባባስ ጋላቲቴ።

21 ኪሪስቶሳ ቦንቹዋስ ጊዲ ኢሶይ ኢሱዋስ ሃሬቲቴ።

22 ማቼቶ፥ ጎዳስ ሃሬቴይሳዳ ሂንቴ ኣዚናታስ ሃሬቲቴ። ቆላ 3፡18፤ 1ጴፂ 3፡1 23 ኪሪስቶሲ ዎሳ ኬꬃስ ሁዔ ጊዴይሳዳ ኣዚኒካ ባ ማቼስ ሁዔ። ቃሲ ኪሪስቶሲ ባ ኣሳቴꬂ ጊዲዳ ዎሳ ኬꬃ ኣሼይሳ። 24 ሺን ዎሳ ኬꬃይ ኪሪስቶሳስ ሃሬቴይሳዳ ማቼቲ ባንታ ኣዚናታስ ኡባባን ሃሬታናው ቤሴስ።

25 ኣዚናቶ፥ ኪሪስቶሲ ዎሳ ኬꬃ ዶሲዲ ባና ኢው ኢሚዳይሳዳ ሂንቴካ ሂንቴ ማቼታ ዶሲቴ። ቆላ 3፡19፤ 1ጴፂ 3፡7 26 ኢ ዎሳ ኬꬃ ባ ቃላ ባጋራ ሃꬃን ሜጪዲ ጌሺስ። 27 ኪሪስቶሲ ዎሳ ኬꬃ ቂቲ ዎይኮ ሶምዖ ቱሲ ዎይኮ ሄሳ ሜላባይ ባይና ኢ ኩሜꬃ ቦንቹዋራ ጌሺኔ ቦሬቶናሮ ኦꬂዲ ባኮ ሺሻናው ኮዪዲ ሄሳ ኦꬂስ። 28 ሄሳዳካ፥ ኣዚናቲ ባንታና ዶሴይሳዳ ባንታ ማቼታ ዶሳናው ቤሴስ። ባ ማቺው ዶሴይሲ ባና ዶሴስ። 29 ባና ኢፂያ ኣሲ ኦኒካ ባዋ፥ ሺን ኪሪስቶሲ ዎሳ ኬꬃስ ኦꬄይሳዳ ባ ኣሳቴꬃ ሙዜሲኔ ናጌስ። 30 ኑኒ ኪሪስቶሳ ኣሳቴꬃ ቢሊቴታ።

31 ፆሳ ቃላይ፥ «ሄሳ ጊሾ፥ ኣሲ ባ ኣዋኔ ባ ኣዪው ኣጊዲ፥ ባ ማቼራ ኢሲፌ ዳና፤ ኤንቲ ናምዓይካ ኢሲ ኣሾ ጊዳና» ያጌስ። ሜꬌ 2፡24 32 ሃይሲ ጊታ ፁራ፥ ሺን ታኒ ሄሳ ኪሪስቶሳባኔ ዎሳ ኬꬃባ ሌሚሶ ኦꬃዳ ኦዳይስ። 33 ጊዶሺን፥ ሂንቴ ኢሶይ ኢሶይ ሂንቴ ማቼታ ሂንቴ፥ ሂንቴና ዶሴይሳዳ ዶሲቴ። ኢሲ ኢሲ ማቻ ባ ኣዚና ቦንቻናው ቤሴስ።