1 ሄሳፌ ጉዬ፥ ጎዳይ ሃራ ላፑን ታማኔ ናምዑ *ላፑን ታማኔ ናምዑ፡ ኢሲ ኢሲ ማፃፋቲ ላፑን ታማ ጎሶና፤ ቃሲ ፓይዶ 17 ፄላ። ኣሳታ ዶሪስ። ኢ ባናው ቆፒዳ ካታማኔ ጉታ ኡባ ሲንꬃቲዲ ባናዳ ናምዓ ናምዓ ኦꬂዲ ኪቲስ። 2 ዬሱሲ ኤንታኮ፥ «ሄኮ ሺቃና ካꬃይ ዳሮ ሺን ኦሳንቾቲ ጉꬃ። ያኒያ ጊሾ፥ ካꬃ ጎዳይ ኦሳንቾታ ኪታና ሜላ ዎሲቴ። ማቶ 9፡37-38 3 ሂዛ፥ ቢቴ፥ ዶርሳታዳ ሱꬉሜታ ጊዶ ሂንቴና ታኒ ዬዳና። ማቶ 10፡16 4 ሂንቴ ቢያ ኦጊያስ ኣይኮካ ኦይኮፊቴ፥ ሚሼ ጊዲን ካꬂ ጊዲን ጫማ ኦይኮፊቴ። ኦጌ ቦላ ኦናካ ሳሮꬆፊቴ።ማቶ 10፡7-14፤ ማር 6፡8-11፤ ሉቃ 9፡3-5 5 ሂንቴ ጌሊያ ኬꬃ ኡባ ኮይሮቲዲ፥ ‹ሳሮይ ሃ ኬꬃስ ጊዶ› ያጊቴ። 6 ሳሮ ዶሲያ ኣሲ ሄ ቤሳን ዴዒኮ፥ ሂንቴ ሳሮይ ያን ሼምፓና፤ ኢፃስ ጊኮ ሂንቴ ሳሮይ ሂንቴው ሲማና። 7 ኦሳንቾስ ዳሞዜ ቤሲያ ጊሾ ሂንቴ ጌሊዳ ኬꬃን ሂንቴው ሺሺዳባ ኡባ ሚሼኔ ኡዪሼ ያን ጋምዒቴ። ኢሱዋ ሶፔ ኢሱዋ ሶ ዩዮፒቴ። 1ቆሮ 9፡14፤ 1ፂሞ 5፡8 8 ኣይ ካታማካ ሂንቴ ጌሊያ ዎዴ ኣሳይ ሂንቴና ሞኪዲ፥ ሂንቴው ሺሺዳባ ኡባ ሚቴ። 9 ሄ ካታማን ዴዒያ ሃርጋንቾታ ፓꬂሼ፥ ‹ፆሳ ካዎቴꬃይ ሂንቴኮ ማቲስ› ያጊዲ ኦዲቴ። 10 ሺን ኢሲ ካታማ ጌሊያ ዎዴ ኣሳይ ሂንቴና ሞኮና ኢፂኮ ዳባባ ኬዪዲ ሃይሳዳ ጊቴ፡ ሃ.ኦ 13፡51 11 ‹ኑ ቶሁዋ ቦላ ዴዒያ ሂንቴ ካታማ ባና ፒቶስ፥ ሺን ፆሳ ካዎቴꬃይ ሂንቴኮ ማታቲዳይሳ ኤሪቴ።›ማቶ 10፡7-14፤ ማር 6፡8-11፤ ሉቃ 9፡3-5 12 ፒርዳ ጋላሳን ሃ ካታማፔ ሶዶሜ ካታማስ ፒርዳይ ካዉሼ ጊዳናይሳ ታ ሂንቴው ኦዳይስ» ያጊስ። ሜꬌ 19፡24-28፤ ማቶ 10፡15፤ 11፡24

13 ካሊዲካ፥ ዬሱሲ፥ «ኔኖ ኮራዚኔ፥ ኔኖ ቤቴሳይዳ፥ ኣዬ፥ ሂንቴናን ኦሴቲዳ ማላታቲ ፂሮሳኒኔ ሲዶናን ኦሴቲዳኮ ያን ዴዒያ ኣሳይ ካሌ ማዒዲ፥ ቢዲንꬃ ቦላ ኡቲዲ ቤኒ ማሮታን ጌሊ ኣጋናሺን። ኢሳ 23፡1-18፤ ሂዝ 26፡1-21፤ ኢዩ 3፡4-8፤ ኣሞ 1፡9-10፤ ዛካ 9፡2-4 14 ሄሳ ጊሾ፥ ሂንቴፌ ኣꬂዲ ፂሮሳሲኔ ሲዶናስ ፆሳ ፒርዳይ ካዉያና። 15 ኔካ ቂፊርናሆሜ፥ ሳሎ ጋካናው ኔና ꬎቁ ኦꬃናው ኮያይ? ኔ ዱጌ ሲዖሌ ሆሌታና» ያጊስ። ኢሳ 14፡13-15

16 ቃሲካ ዬሱሲ ባ ታማሬታኮ፥ «ሂንቴና ሲዔይ ታና ሲዔስ፥ ሂንቴና ኤኮናይ ታና ኤኬና፥ ታና ኤኮናይ ታና ኪቲዳይሳ ኤኬና» ያጊስ። ማቶ 10፡40፤ ማር 9፡37፤ ሉቃ 9፡48፤ ዮሃ 13፡20

17 ላፑን ታማኔ ናምዑ ታማሬቲ ኪቴቲዳ ቤሳፌ ኬሂ ኡፋይቲሼ ሲሚዶሶና። ዬሱሳኮ ሺቂዲ፥ «ጎዳው፥ ኔ ሱንꬃን ቱና ኣያናቲካ ኑስ ኪቴቲዶሶና» ያጊዶሶና።

18 ዬሱሲ ኤንታኮ፥ «ፃላሄይ ሳሎፔ ዎልዓንꬃዳ ዎꬊሺን ታ ቤዓስ። 19 ሄኮ፥ ሾሻኔ ኮርኔ ዬꬋና ሜላኔ ሞርኪያ ዎልቃ ዛራና ሜላ ማታ ሂንቴው ኢማስ። ሂንቴና ቆሃናባይ ኣይኮይካ ዴና። ማዝ 19፡13 20 ጊዶሺን፥ ሂንቴ ሱንꬃይ ሳሎ ማዝጋባን ፃፌቲዳ ጊሾ ኡፋይቲቴፔ ኣቲን ቱና ኣያናቲ ኪቴቲዳ ጊሾ ኡፋይቶፊቴ» ያጊስ።

21 ሄ ዎዴ ዬሱሲ ጌሻ ኣያናን ኡፋይቲዲ፥ «ሳሉዋ ሳዓ ጎዳው፥ ሃይሳ ጪንጫታፔኔ ኤራንቾታፔ ጌንꬃዳ ያላጋታስ ቆንጪሲዳ ጊሾ ጋላቴታ። ኤ ታ ኣዋው፥ ሄሳ ኔ ኦꬃናው ሎዖ ሼኔ ጊዲስ።

22 «ኡባባይ ታ ኣዋፔ ታው ኢሜቲስ። ናዓይ ኦኔኮ ኣዋፔ ኣቲን ሃሪ ዎይኮ ናዓይ ቆንጪሳናው ኮዬይሳፌ ሃሪ ኦኒካ ኣዋ ኤሬይ ባዋ» ያጊስ። ዮሃ 3፡35፤ 10፡15

23 ካሊዲካ፥ ዬሱሲ ዱማ ባ ታማሬታኮ፥ «ሂንቴ ቤዔይሳ ቤዔይሳቲ ኣንጄቲዳይሳታ። 24 ቱማ ዳሮ ናቤቲኔ ካዎቲ ሂንቴ ቤዔይሳኔ ሲዔይሳ ቤዓናዉኔ ሲዓናው ኣሞቲዶሶና፥ ሺን ቤዒቦኮና፥ ሲዒቦኮና» ያጊስ።

25 ሄኮ፥ ኢሲ ጋላስ ሙሴ ዎጋ ኤሪያ ኢሲ ኡራይ ዴንዲዲ ዬሱሳ ያጊዲ ፓጬ ኦይሾ ኦይቺስ። «ኣስታማሪያው፥ ሜሪና ዴዑዋ ላታናው ታኒ ኣይ ኦꬆ?» ያጊስ። ማቶ 22፡35-40፤ ማር 12፡28-34

26 ዬሱሲ፥ «ሙሴ ማፃፋን ፃፌቲዳይ ዎይጊ? ኔ ዋታ ናባባይ?» ያጊስ።

27 ኣዴይ ዛሪዲ፥ « ‹ኔ ጎዳ ኔ ፆሳ፥ ኔ ኩሜꬃ ዎዛናፔ፥ ኔ ኩሜꬃ ሼምፑዋፌ፥ ኔ ኩሜꬃ ዎልቃፌኔ ኔ ኩሜꬃ ቆፋፔ ዶሳ። ቃሲ ኣሴ ኔ ሾሩዋ ኔ ሁዒያዳ ዶሳ› ያጌስ» ያጊስ። ሌዌ 19፡18፤ ዛሬ 6፡5

28 ዬሱሲ ኢያኮ፥ «ኔኒ ሊኬ ዛራዳሳ፥ ኔካ ሄሳዳ ኦꬃ። ኔኒ ሜሪናው ዴዖን ዳና» ያጊስ። ሌዌ 18፡5

29 ሺን ኡራይ ባና ፂሎ ኦꬃናው ኮዪዲ፥ «ሃኖስ ኢ ታ ሾሮይ ኦኔ?» ያጊስ።

30 ኢያ ኦይሻስ ዬሱሲ ያጊዲ ዛሮ ኢሚስ፥ «ኢሲ ኣሴ ዴዔይሲ ዬሩሳላሜ ካታማፔ ዱጌ ኢያርኮ ካታማ ቢሺን ኦጌ ቦላ ፓንጋቲ ኬዪዲ ሾጪዶሶና። ኢያ ማዑዋ ቃሪ ኤኪዲ ሃይቆፔኔ ፓፃፔ ጊዶን ዬጊዲ ቢዶሶና። 31 ጉዬፔ፥ ኣይሁዴ ካሂኔ ኢሶይ ሄ ኦጊያራ ባ ቡሱ ቢሼ ኡራ ቤዒዲ ዴሺ ጊዲ ኣꬊስ። 32 ቃሲ ኢሲ ሌዌ ዴዔይሲ ሄ ቤሳ ጋኪሼ ኡራ ቤዒዲ ሃራሶራ ኣꬊዲ ቢስ። 33 ሺን፥ ኢሲ ሳማሬ ቢታ ኣሴ ዴዔይሲ ሄ ኦጊያራ ዪሼ ኡራ ቤዒዲ ኢያው ቃꬌቲስ2ታሪ 28፡15 34 ኢያኮ ሺቂዲ፥ ኢያ ማዱንꬃ ቦላ ዛይቴኔ ዎይኔ ቲጊዲ ቃቺስ። ባ ሃሪያ ቦላ ኡቲሲዲ ኢማꬂ ኣቂያ ኬꬂ ኤፊስ። ሄ ቤሳን ኢያው ኮሺያባ ኡባ ኦꬂስ። 35 ዎንቴꬄ ናምዑ ዲናሬ ኬሲዲ ኢማꬃ ኬꬃዋስ ኢሚዲ፥ ‹ሃያና ሃ ኡራ ሎይꬃ ፄላ። ታኒ ኔው ኢሚዳይሳፌ ቦላራ ኔ ኬሲያባ ኡባ ታ ኔው ጪጋና› ያጊስ።

36 «ሂዛ፥ ሃ ሄꬑ ኣሳታፔ ፓንጋቲ ሾጪዳ ኡራስ ሾሮቴይ ኔው ኦና ዳኒ?»

37 ኡራይ ዛሪዲ፥ «ኢያው ቃꬌቲዳይሳካ» ያጊስ።

ዬሱሲ፥ «ኔካ ባዳ ሄሳዳ ኦꬃ» ያጊስ።

38 ዬሱሲ ባ ታማሬታራ ኦጌ ቢሼ ኢሲ ጉታ ጋኪስ። ያን ማርታ ጌቴቲያ ኢሲ ማጫሲያ ኢያ ባ ሶን ሞካሱ። ዮሃ 11፡1 39 ኢዉካ ማይራሞ ጊያ ሚቺያ ዴዓዉሱ፥ ማይራማ ቃላ ሲዓሼ ጎዳ ቶሁዋ ማታን ኡታሱ። 40 ሺን ማርታ ዳሮ ኦሶን ኡንዔታዳ ዬሱሳኮ ሺቃዳ፥ «ጎዳው፥ ታ ሚቺያ ኦሱዋ ታ ፃላላስ ዬጋዳ ኡታ ኣጊን ታ ዳቡሪያ ዎዴ ኔኒ ቤዓሼ ሲዒ ጋይ? ኢያ ታና ማዳና ሜላ ኦዲኪ» ያጋሱ።

41 ሺን ጎዳይ ሃይሳዳ ጊዲ ዛሪስ፥ «ማርታ፥ ማርታ፥ ኔኒ ዳሮባን ኡንዔታሳኔ ሜቶታሳ። 42 ጊዶሺን፥ ኮዬቴይ ኢሲባ ፃላላ። ማይራማ ሎዖባ ዶራሱ፥ ሄሲካ ኢፔ ኤኬቴና» ያጊስ።