1 ሄ ዎዴ ዬሱሳ ታማሬቲ ዪዲ፥ «ሳሎ ካዎቴꬃን ኡባፌ ኣꬌይ ኦኔ?» ያጊዲ ኦይቺዶሶና። ሉቃ 22፡24 2 ዬሱሲ ኢሲ ጉꬃ ናዓ ፄጊዲ ኤንታ ጊዶን ኤሲዲ ሃይሳዳ ያጊስ። 3 «ታኒ ሂንቴው ቱማ ኦዳይስ፤ ሂንቴ ላሜቶናኔ ጉꬃ ናይታዳ ሃኖና ኢፂኮ ሳሎ ካዎቴꬃ ኡባራካ ጌላናው ዳንዳዔኬታ። ማር 10፡15፤ ሉቃ 18፡17 4 ሂዛ፥ ሃ ጉꬃ ናዓዳ ባና ካዉሺያ ኦኒካ ሳሎ ካዎቴꬃን ኡባፌ ኣꬌይሳ ጊዳና። 5 ሃይሳ ሜላ ናዓ ታ ሱንꬃን ሞኪያ ኦኒካ ታና ሞኬስ።

6 «ሺን ታናን ኣማኒያ ሃ ጉꬃታፔ ኢሱዋ ናጋራ ኦꬃና ሜላ ꬉቤ ጊዲያ ኦኒካ ጊታ ጋቻ ዎፃ ባ ቆꬌን ቃቺዲ ጪሞ ኣባን ሚቴቲኮ ኢያው ሎዖ። 7 ኣላሜን ኣሳይ ናጋራ ኦꬃና ሜላ ኦꬂያባቲ ዴዒያ ጊሾ ኣላሚያ ኣዬ። ሄሳ ሜላባቲ ዮና ኣቴና፥ ሺን ꬉቤይ ኢያ ጋሶን ያ ኡራ ኣዬ።

8 «ኔ ኩሼይ ዎይኮ ኔ ቶሆይ ኔና ባሌꬂኮ ኔፔ ቃንፃ ዬጋ። ኔኒ ናምዑ ኩሼራ ዎይኮ ናምዑ ቶሆራ ሜሪና ታማን ዬጌታናይሳፌ ኩሼ ዎይኮ ቶሆ ዱፃ ጊዳዳ ሜሪና ዴዖ ዴሜይሲ ኔው ሎዖ። ማቶ 5፡30 9 ቃሲ ኔ ኣይፌይ ኔና ባሌꬂኮ ኢዮ ዎጫ ኬሳዳ ዎራ ሆላ። ኔኒ ናምዑ ኣይፌራ ጋናሜ ታማን ዬጌቴይሳፌ ኢሲ ኣይፌራ ሜሪና ዴዑዋ ጌሌይሲ ኔው ሎዖ። ማቶ 5፡29

10 «ታ ሂንቴው ኦዳይስ፤ ሳሎን ዴዒያ ኤንታ ናጊያ ኪታንቾቲ ኡባ ዎዴ ሳሎን ዴዒያ ታ ኣዋ ሲንꬃን ዴዒያ ጊሾ ሂንቴ ሃ ጉꬃታፔ ኢሱዋካ ካꬎና ሜላ ናጌቲቴ። ሉቃ 19፡10 11 ኣሳ ናዓይ ꬋይዳይሳታ ኣሻናው ዪስ» *ኣሳ ናዓይ ꬋዪዳይሳታ ኣሻናው ዪስ፡ ኢሲ ኢሲ ቤኒ ማፃፋቲ ፓይዶ 11 ጉጆሶና። ያጊስ።

12 ቃሲ ዬሱሲ፥ «ሂንቴው ኣይ ዳኒ? ኢሲ ኡራስ ፄቱ ዶርሳቲ ዴዔይሳታፔ ኢሶይ ꬋዪኮ ኡዱፉን ታማኔ ኡዱፉናታ ዴሪያ ቦላ ዬጊ ኣጊዲ ሄ ꬋዪዳይሳ ኮያናው ቤኔ? 13 ታ ቱማ ኦዳይስ፤ ኢ ዴሚዳ ዎዴ ኡዱፉን ታማኔ ኡዱፉናታፔ ኣꬂዲ ꬋዪዲ ቤንቲዳ ኢሲ ዶርሳን ኡፋይቴስ። 14 ሄሳዳካ፥ ሳሎን ዴዒያ ሂንቴ ኣዋይ ሃ ጉꬃታፔ ኢሶይ ꬋያና ሜላ ኮዬና።

15 «ኔ ኢሻይ ኔና ቆሂኮ ኔርካ ኢያኮ ባዳ ኢያ ባላ ኢያው ኦዳ። ኢ ኔና ሲዒኮ ኔ ኢሻ ኔው ኢሻ ኦꬃ።ሉቃ 17፡3 16 ሺን ኢ ኔና ሲዖና ኢፂኮ፥ ናምዑ ዎይኮ ሄꬑ ኣሳ ማርካን ሞቶይ ላሴቲያ ጊሾ ኢሲ ዎይኮ ናምዑ ኣሲ ኤካዳ ኢያኮ ባ። ዛሬ 19፡15 17 ኢ ኤንታና ሲዖና ኢፂኮ፥ ዎሳ ኬꬃስ ኦዳ። ዎሳ ኬꬂ ጊያባ ሲዖና ኢፂኮ ኣማኖና ኣሳዳ ዎይኮ ቃራፃ ቃንፂሲያ ኣሳዳ ኢያ ፓይዳ።

18 «ታ ሂንቴው ቱማ ኦዳይስ፤ ሳዓን ሂንቴ ዲጊያባቲ ኡባይ ሳሎን ፆሳ ማታን ዲጌቲዳባ ጊዳና። ሳዓን ሂንቴ ሃኖ ጊያባቲ ኡባይ ሳሎን ፆሳ ማታን ሃኒዳባ ጊዳና። ማቶ 16፡19፤ ዮሃ 20፡23

19 «ቃሲካ ታ ሂንቴው ኦዳይስ፤ ሳዓን ሂንቴፌ ናምዓይ ባንታ ዎሲያባስ ኢሲ ዎዛናን ጊዲዲ ፆሳ ዎሲያባ ጊዲኮ ሳሎን ዴዒያ ታ ኣዋይ ሂንቴው ኦꬃና። 20 ታና ካሌይሳታፔ ናምዓ ዎይኮ ሄꬓ ጊዲዲ ሺቂያ ቤሳን ታኒ ኤንታ ጊዶን ቤንታና» ያጊስ።

21 ሄ ዎዴ ጴፂሮሲ ዬሱሳኮ ዪዲ፥ «ጎዳው፥ ታ ኢሻይ ታና ቆሂኮ ኣፑን ቶሆ ታኒ ኣቶ ጋናው ቤሲ? ላፑን ቶሆ ጋካናሴዬ?» ጊዲ ኦይቺስ። ሉቃ 17፡3-4

22 ዬሱሲ ዛሪዲ፥ «ጊዴና፥ ላፑን ታሙ ቶሆ ላፑናፔ ኣቲን ላፑን ቶሆ ጊዴና። ሜꬌ 4፡24

23 «ሄሳ ጊሾ፥ ፆሳ ካዎቴꬃይ ባ ኦሳንቾታራ ባ ሚሼይ ፓጪዳኮኔ ፓላሂዳኮ ቤዓናው ቆፒዳ ካዉዋ ዳኔስ። 24 ሄ ካዎይ ሚሼይ ፓጪዳኮኔ ፓላሂዳኮ ቤዒያ ዎዴ ዳሮ ጊንዲጊንዳ ኣጮይ ዴዒያ ኢሲ ኡራ ኢያኮ ኤሂዶሶና። 25 ሺን ሄ ኣይሌይ ኣጩዋ ቃንፃናው ፆኔቲን ኢያራ፥ ኢያ ማቼራ፥ ኢያ ናይቲኔ ኢያው ዴዒያባይ ኡባይ ባይዜቲዲ ኣጮይ ጪጌታና ሜላ ኢያ ጎዳይ ኪቲስ። 26 ያቲን ኣይሌይ ባ ጎዳ ቶሁዋ ቦላ ጉልባቲዲ፥ ‹ታ ጎዳው፥ ሃያና ጉꬃ ዎዴ ታካርኪ፥ ታ ኣጩዋ ኡባ ታ ጪጋና› ያጊዲ ዎሲስ። 27 ካዎይ ኢያው ቃꬌቲዲ፥ ዬዲ ኣጊስ፤ ኢያ ኣጩዋ ማሪስ።

28 «ሺን ሄ ኣይሌይ ኬዪ ቢዲ ባ ላጌ ኦሳንቾታፔ ኢሶይ ባፔ ዳሮ ጉꬃ ሚሼ ታልዒዳይሳ፥ ‹ኔ ቦላ ዴዒያ ታ ሚሺያ ታው ጪጋ› ጊዲ ቆꬌ ኦይኪስ።

29 «ሄ ኢያ ላጌ ኣይሌይ ኢያ ሲንꬃን ጉልባቲዲ፥ ‹ሃያና ጉꬃ ዎዴ ታካርኪ ታኒ ታ ኣጩዋ ኡባ ጪጋና› ያጊዲ ዎሲስ።

30 «ሺን ኢፂዲ ኤኪ ኤፊዲ ባ ላጌይ ኣጩዋ ቃንፃና ጋካናው ቃሾ ኬꬂ ጌልሲስ። 31 ሄሳ ጊሾ፥ ሃራ ላጌ ኦሳንቾቲ ሄሳ ቤዒዳ ዎዴ ዳሮ ዪሎቲዲ፥ ቢዲ ባንታ ጎዳስ ኢ ኦꬂዳባ ኡባ ኦዲዶሶና።

32 «ያቲን ካዎይ ሄ ኣይሊያ ፄጊሲዲ፥ ‹ሃ ኢታ ኣይሊያው፥ ኔኒ ታና ዎሲዳ ጊሾ ታ ኔ ኣጩዋ ኡባ ኔው ማራስ። 33 ያቲን፥ ታኒ ኔ ኣጩዋ ማሪዳይሳዳ ኔኒ ኔ ላጌ ኣይሊያ ኣጩዋ ማራናው ኔው ቤሴኔ?› ያጊስ። 34 ሄሳ ጊሾ፥ ካዎይ ዳሮ ዪሎቲዲ፥ ኢ ባ ኣጩዋ ኡባ ጪጋና ጋካናው ፓፃ ካዔታና ሜላ ቃሾ ኬꬃን ዬጊስ።

35 «ሄሳዳካ፥ ሂንቴ ኢሶይ ኢሶይ ሂንቴ ኢሻ ዎዛናፔ ማሮና ኢፂኮ ሳሎን ዴዒያ ታ ኣዋይ ሂንቴና ሄሳዳ ኦꬃና» ያጊስ።