5
ዶርሳይ ፃꬃ ማፃፋ ዶዪስ
1 ሄሳፌ ጉዬ፥ ኣራታ ቦላ ኡቲዳይሳ ኡሻቻ ኩሼን ጊዶራኔ ካሬራ ፃፌቲዳ ላፑን ማታሜን ጎርዴቲዳ ፃꬃ ማፃፋ ቤዓስ። ሂዝ 2፡9 2 ኢሲ ሚኖ ኪታንቾይ ባ ቃላ ꬎቁ ኦꬂዲ፥ «ማታሚያ ቢላናዉኔ ማፃፋ ዶያናው ቤሴይ ኦኔ?» ያጊዲ ኣዋጂሺን ቤዓስ። 3 ሺን ሳሎን ጊዲን ሳዓን ዎይኮ ሳዓፔ ጋርሳን ጊዲን ሄ ፃꬃ ማፃፋ ቢላናዉኔ ጊዱዋ ቤዓናው ዳንዳዔይ ኦኒካ ቤንቲቤና። 4 ፃꬃ ማፃፋ ቢላናዉኔ ኢያ ጊዱዋ ቤዓናው ቤሲያ ኣሲ ꬋዪዳ ጊሾ ታ ዳሮ ዬካስ። 5 ያቲን፥ ጪማታፔ ኢሶይ ታኮ፥ «ዬኮፋ! ሄኮ፥ ዪሁዳ ዜሬꬂ ጊዲያ ጋሞይ፥ ዳዊቴ ሼሻይ፥ ላፑን ማታሜታ ቢላናዉኔ ማፃፋ ዶያናው ዳንዳዒስ» ያጊስ። ሜꬌ 49፡9፤ ኢሳ 11፡1
6 ሄሳፌ ጉዬ፥ ሹኬቲዳ ዶርሳይ ኣራታስ፥ ኦይዱ ዴዖን ዴዒያ ሜꬌቴꬃታሲኔ ጪማታስ ጊዶን፥ ኤቂዳይሳ ቤዓስ። ኢያው ላፑን ካጬቲኔ ላፑን ኣይፌቲ ዴዖሶና። ሄሳቲ ሳዓ ኡባ ኪቴቲዳ ፆሳ ላፑን ኣያናታ። ኢሳ 53፡7፤ ዛካ 4፡10 7 ሄ ዶርሳይ ቢዲ፥ ኣራታ ቦላ ኡቲዳይሳ ኡሻቻ ኩሼፔ ፃꬃ ማፃፋ ኤኪስ። 8 ኢ ሄ ፃꬃ ማፃፋ ኤኪዳ ዎዴ ዴዖን ዴዒያ ኦይዱ ሜꬌቴꬃቲኔ ላታማኔ ኦይዱ ጪማቲ ዶርሳ ሲንꬃን ኩንዲዶሶና። ኤንቲ ኢሶይ ኢሶይ ዲꬂኔ ጌሻታ ዎሳ ጊዲዳ ኢፃኔይ ኩሚዳ ዎርቃ ሻቴ ኦይኪዶሶና። ማዝ 141፡2 9 ኤንቲ፥
«ፃꬃ ማፃፋ ኤካናው፥
ማታሚያ ቢላናው ኔው ቤሴስ። ማዝ 33፡3፤ 98፡1፤ ኢሳ 42፡10
ኣይስ ጊኮ፥ ኔኒ ሹኬታዳሳ፤
ዜሬꬂ ኡባፌ፥ ዱማ ዱማ ዶናፔ፥
ያራታፔኔ ካዎቴꬃታ ኡባፌ
ኔ ሱꬃን ፆሳስ ዎዛዳሳ።
10 ኤንቲ ኢያ ፆሳ ኣዋስ ኦꬃና ሜላ
ኤንታና ካሂኔ ካዎቴꬂ ኦꬃዳሳ።
ኤንቲካ ቢታ ኡባ ሃራና»
ያጊዲ ኦራꬃ ማዝሙሬ ዬፂዶሶና። ኬሳ 19፡6፤ ዮ.ቆ 1፡6
11 ታ ቤዒያ ዎዴ ሙኩሉ ቶሆ ሙኩሉኔ ታሙ ሙኩሉ ቶሆ ታሙ ሙኩሉ ጊዲያ ኪታንቾታ ጊርሳ ሲዓስ። ኤንቲካ ኣራታ፥ ኦይዱ ዴዖን ዴዒያ ሜꬌቴꬃታኔ፥ ጪማታ ዩሹዋን ኤቂዶሶና። ዳኔ 7፡10 12 ሄ ኪታንቾቲ ꬎቁ ጊዳ ቃላን፥
«ሹኬቲዳ ዶርሳይ ዎልቃ፥ ዱሬቴꬂ፥
ጪንጫቴꬂኔ ሚኖቴꬂ፥
ቦንቾ፥ ሳባኔ ጋላታ ኤካናው ቤሴስ»
ያጊዶሶና።
13 ሄሳፌ ጉዬ፥ ሳዓን፥ ሳሎን፥ ሳዓፔ ጋርሳኒኔ ኣባ ጊዶን ዴዒያ ሜꬌቴꬂ ኡባይ፥
«ኣራታ ቦላ ኡቲዳይሳሲኔ ዶርሳስ፥
ጋላታይ፥ ቦንቾይ፥ ሳባይኔ ዎልቃይ
ሜሪ ሜሪናው ጊዶ»
ያጊዲ ዬፂሺን ሲዓስ።
14 ኦይዱ ዴዖን ዴዒያ ሜꬌቴꬃቲ፥ «ኣሚንዒ» ያጊዶሶና፤ ቃሲ ጪማቲ ጉፋኒዲ ጎይኒዶሶና።