19
1 ያቲን፥ ሳሎን ዳሮ ኣሳይ፥
«ፆሳይ ጋላቴቶ!
ኣቶቴꬃይ፥ ቦንቾይኔ ዎልቃይ ኑ ፆሳስ ጊዶ።
2 ኢያ ፒርዳይ ቱማኔ ፂሎ።
ሳዓ ቱኒሲዳ ኢታ ላይሚው ፆሳይ ፒርዲስ።
ፆሳይ ባ ኣይሌታ ሱꬃ ኢፔ ኣቺስ»
ያጊሺን ሲዓስ። ዛሬ 32፡43፤ 2ካዎ 9፡7
3 ሄ ኣሳይ ዛሪዲ ባንታ ቃላ ꬎቁ ኦꬂዲ፥
«ፆሳ ጋላቲ ጋኮ።
ሄ ካታሚያ ሜሪናው ጩያሼ ዳና»
ያጊዶሶና።ኢሳ 34፡10
4 ላታማኔ ኦይዱ ጪማቲኔ ዴዖን ዴዒያ ኦይዱ ሜꬌቴꬃቲ ኣራታን ኡቲዳ ፆሳስ ጉፋኒዲ፥
«ኣሚንዒ! ፆሳ ጋላቲ ጋኮ»
ያጊዲ ጎይኒዶሶና።
5 ያቲን፥
«ፆሳ ኣይሌቲ፥
ፆሴ ያያ ጉꬂኔ ጊቲ ኡባይ፥
ኑ ፆሳ ጋላቲቴ»
ያጊያ ቃላይ ኣራታፔ ኬዪስ። ማዝ 115፡13
6 ያቲን፥ ዳሮ ኣሳዳ ዎጫሚያ፥ ዎልቃማ ሻፋዳ ጉሚያ፥ ዳዳዳ ዴቺያ ጊርሳይ፥
«ፆሳ ጋላቲ ጋኮ፤
ኑ ጎዳይ፥ ኡባፌ ዎልቃማ ፆሳይ ካዎቲስ። ሂዝ 1፡24፤ ማዝ 93፡1፤ 97፡1፤ 99፡1
7 ዶርሳ ያጋኖይ ጋኪዳ ጊሾኔ ኢያ ጌሊያራ ጊጊዳ ጊሾ
ኑ ኡፋይቶስ፥ ጋላቶሲኔ ዶርሳ ቦንቾስ።
8 ጌሎስ ጊጊዳራ ጶሊያኔ ጌሺ ጊዲዳ
ሊኖ ማዖ ማዓና ሜላ ኢው ኢሜቲስ»
ያጊሺን ታ ሲዓስ። (ሊኖ ማዖይ ጌሻታ ፂሎ ኦሶ ሌሚሶ።)
9 ሄሳፌ ጉዬ፥ ኪታንቾይ ታኮ፥ «ዶርሳ ያጋኑዋ ፄጌቲዳይሳቲ ኣንጄቲዳይሳታ» ጋዳ ፃፋ። ሄ ኪታንቾይ ጉጂዲ፥ «ሃይሲ ፆሳ ቱማ ቃላ» ያጊስ። ማቶ 22፡2
10 ሄ ዎዴ ታ ኢያ ጎይናናው ኢያ ቶሁዋ ቦላ ኩንዳስ። ሺን ኢ፥ «ሄሳ ኦꬆፋ! ታኒ ዬሱሳባ ማርካቲያ ኔ ሜላኔ ኔ ኢሻታ ሜላ። ኔ ፆሳ ጎይና» ያጊስ። ሂዛ፥ ዬሱሳባ ማርካቲዳይሳታስ ናቤቴꬃ ኣያኒ ዴዔስ።
ቦꬃ ፓራ ቶጊዳይሳ
11 ያቲን፥ ሳሎይ ዶዬቲን፥ ያን ቦꬃ ፓሪ ዴዔይሳ ቤዓስ። ሄ ፓራ ቶጊዳይሲ ኣማኔቲዳይሳኔ ቱማንቾ ጌቴቴስ። ኢ ፂሎቴꬃን ፒርዴሲኔ ኦሌቴስ። ሂዝ 1፡1 12 ኢያ ኣይፌይ ታማ ላጮ ዳኔስ፤ ኢያ ሁዔን ዳሮ ካላቺ ዴዔስ። ኢያ ቦላ ኢ ኣቲን ሃሪ ኦኒካ ኤሮና ፃፌቲዳ ሱንꬂ ዴዔስ። ዳኔ 10፡6 13 ኢ ሱꬃን ሙኬቲዳ ማዖ ማዒስ፤ ኢያ ሱንꬃይካ ፆሳ ቃላ። 14 ጶሊያኔ ጌሺ ጊዲዳ ሊኖ ማዖ ማዒዳ ሳሎ ኦላንቾቲ ቦꬃ ፓራታ ቶጊዲ ኢያ ጌዶ ካሎሶና። 15 ካዎቴꬃታ ቃንፂያ ማሺ ኢያ ዶናፔ ኬዬስ። ኢ ቢራታ ፃምዓን ኣሳ ሃራና። ኡባፌ ዎልቃማ ፆሳ ሃንቆ ዎይኔ ኡሻ ጉምዒያ ቤሳ ኢ ዬꬋና።ማዝ 2፡9፤ ኢሳ 63፡3፤ ኢዩ 3፡13፤ ዮ.ቆ 14፡20 16 ኢያ ማዑዋ ቦላኔ ኢያ ዎዲሪያ ቦላ፥ «ካዎታ ካዉዋኔ ጎዳታ ጎዳ» ያጊያ ሱንꬃይ ፃፌቲስ።
17 ሄሳፌ ጉዬ፥ ኢሲ ኪታንቾይ ኣዋ ቦላ ኤቂዳይሳ ቤዓስ። ሄ ኪታንቾይ ሳሎራ ፒራꬊያ ካፎ ኡባስ ባ ቃላ ꬎቁ ኦꬂዲ፥ «ሃ ዪቴ! ፆሳ ጊቢራ ማናው ኢሲ ቤሲ ሺቂቴ። ሂዝ 39፡17-20 18 ዪዲ ካዎታ ኣሹዋ፥ ሻላቃታ ኣሹዋ፥ ዎታዳሬታ ኣሹዋ፥ ፓራታ ኣሹዋ፥ ፓራታ ቶጌይሳታ ኣሹዋ፥ ኣሳ ኡባ ኣሹዋ፥ ኣይሌታ ኣሹዋ፥ ዎማኖታ ኣሹዋ፥ ጊታታኔ ጉꬃታ ኣሹዋ ሚቴ» ያጊስ።
19 ዶዓይ፥ ፓራ ቶጊዳይሳራኔ ኢያ ኦላንቾታራ ኦሌታናው ሳዓ ካዎቲኔ ኤንታ ኦላንቾቲ ኢሲ ቤሲ ሺቂዳሺን ቤዓስ። 20 ሺን ሄ ዶዓይኔ ኢያ ሱንꬃን ማላታታ ኦꬂዳ ዎርዶ ናቤይ ኢያራ ኢሲፌ ኦይኬቲስ። ሄ ማላታታን ዶዓ ማላይ ዴዔይሳታኔ ኢያ ሚሲሊያ ጎይኔይሳታ ኢ ባሌꬂስ። ዶዓይኔ ዎርዶ ናቤይ ናምዓይካ ዲኔን ኤፂያ ታማ ኣባን ፓፃ ዬጌቲዶሶና። ዮ.ቆ 13፡1-18 21 ኣቲዳይሳቲ ፓራ ቶጊዳይሳ ዶናፔ ኬያ ማሻን ሃይቂዶሶና። ካፎቲ ኡባይ ኤንታ ኣሹዋ ሚዲ ካሊዶሶና።