4
ኣብራሃሜይ ኣማኖን ፂሊስ
1 ያቲን፥ ኑ ማይዛይ ኣብራሃሜይ ኣይ ዴሚዴ? 2 ኣብራሃሜይ ኦሶን ፂሊዳባ ጊዲያኮ፥ ኢ ጬቄቲያባይ ዴዔስ፥ ጊዶሺን፥ ፆሳ ሲንꬃን ጬቄታናው ዳንዳዔና። 3 ጌሻ ማፃፋይ፥ «ኣብራሃሜይ ፆሳ ኣማኒስ፤ ፆሳይ ሄሳ ኢያው ፂሎቴꬂ ኦꬂዲ ኤኪስ» ያጌስ። ሜꬌ 15፡6፤ ጋላ 3፡6
4 ኦꬂያ ኡራይ ኤኪያ ዳሞዜይ፥ ኢያ ኦሶ ዎልቃስ ጪጌቲያ ጋቴፔ ኣቲን ኢያው ኢሞታ ጊዴና። 5 ሺን ኦሶ ኦꬆና ኦኒካ ናጋራንቹዋ ፂሊሲያ ፆሳ ኣማኒኮ፥ ኢያ ኣማኖይ ኢያው ፂሎቴꬂ ጊዲዲ ታይቤቴስ። 6 ጌሻ ማፃፋን ዳዊቴይ፥ ኦሶይ ባይና ፆሳይ ፂሊሲያ ኣሳቲ ኣይ ሜላ ኣንጄቲዳኮ ሃይሳዳ ያጊዲ ቆንጪሴስ፡
7 «ኤንታ ባላይ ኣቶ ጌቴቲዳይሳቲኔ
ኤንታ ናጋራይ ካሜቲዳይሳቲ ኣንጄቲዳይሳታ። ማዝ 32፡1-2
8 ጎዳይ ኢያ ናጋራ ታይቦና ኣሲ ኣንጄቲዳይሳ» ያጌስ።
9 ያቲን፥ ዳዊቴይ ኦዲዳ ኣንጆይ ቃፃሬቲዳ ኣሳ ፃላላሴዬ? ዎይኮ ቃፃሬቲቦና ኣሳሴ? ኑኒ፥ «ጌሻ ማፃፋይ፥ ‹ኣብራሃሜይ ፆሳ ኣማኒስ፤ ፆሳይ ሄሳ ኢያው ፂሎቴꬂ ኦꬂዲ ኤኪስ› ያጌስ» ጊዳ። 10 ያቲን፥ ሄሲ ኣዉዴ ሃኒዴ? ኣብራሃሜይ ቃፃሬቲኔዬ? ዎይኮ ቃፃሬቶና ዴዒሺኔ? ቃፃሬታናፔ ሲንꬄ ሃኒሲፔ ኣቲን ጉዬ ጊዴና።
11 ኣብራሃሜይ ቃፃሬታናፔ ሲንꬄ ኢያ ኣማኖይ ኢያው ፂሎቴꬂ ጊዲዲ ታይቤቲዳይሳ ኤሪሳናው፥ ኢያ ቃፃሮይ ማላታ ጊዲስ። ሄሳ ጊሾ፥ ኣብራሃሜይ ቃፃሬቶና ኣማኔይሳታሲኔ ኣማኖን ፂሌይሳታ ኡባስ ኣዋ ጊዲስ። ሜꬌ 17፡10 12 ኢ ቃፃሬቲዳይሳታስካ ኣዋ። ኣብራሃሜይ ኤንታው ኣዋ ጊዲዳይ ኤንቲ ቃፃሬቲዳ ጊሾ ፃላላስ ጊዶናሺን ኢ ቃፃሬታናፔ ሲንꬄ ኣማኒዳ ኣማኑዋ ኤንቲ ካሊዳ ጊሾሳ።
ፆሳ ኡፋይሳይ ኣማኖን ኤኬቴስ
13 ኣብራሃሜሲኔ ኢያ ሼሻስ፥ «ኣላሚያ ታ ሂንቴው ኢማና» ያጊዳ ኡፋይሳይ፥ ኣብራሃሜይ ኣማኖን ፂሊዳ ጊሾሳፌ ኣቲን ሂጌ ናጊዲ ፖሊዳ ጊሾ ጊዴና። ሜꬌ 17፡4-6፤ 22፡17-18፤ ጋላ 3፡29 14 ሂጌስ ኪቴቲዳይሳቲ ፆሳይ ኢማና ጊዳ ኡፋይሳ ላታኤይሳታ ጊዲኮ፥ ኣሳ ኣማኖይ ማዴና፤ ፆሳ ኡፋይሳይካ ሃዳ ጊዲስ። ጋላ 3፡18 15 ሂጌ ሜንꬆይ ፆሳ ሃንቆ ኤሄስ፥ ሺን ሂጌይ ባይናሶን ሂጌ ሜንꬆይ ባዋ።
16 ሄሳ ጊሾ፥ ፆሳይ ኢሚዳ ኡፋይሳይ ኣማኖን ኤኬቴስ። ሃ ኡፋይሳይ ኣብራሃሜ ሼሻ ኡባስ ፆሳ ኣꬎ ኬሃቴꬃ ባጋራ ኢሜቲዳይሳ ቆንጪሴስ። ሄሲካ ሂጌ ናጌይሳታ ፃላላስ ጊዶናሺን ኣብራሃሜዳ ኣማኒዳ ኡባሳ። ኣብራሃሜይ ኑ ኡባስ ኣዋ። ጋላ 3፡7 17 ጌሻ ማፃፋን፥ «ታ ኔና ዳሮ ካዎቴꬃታስ ኣዋ ኦꬃስ» ጌቴቲዲ ኣብራሃሜ ጊሾ ፃፌቲስ። ሃ ኡፋይሳይ ኣብራሃሜስ ኢሜቲዳይ ሃይቂዳይሳታስ ዴዖ ኢሜይሲኔ ኦራꬃባ ኦꬂያ ፆሳይ ኢያ ጊዴይሳ ኢ ኣማኒዳ ጊሾሳ። ሜꬌ 17፡5
18 ፆሳይ ኣብራሃሜስ ዳሮ ዜሬꬂ ኢማናይሳ ጫቂስ። ኡፋይሲ ኦꬃናው ኣይኮካ ዳንዳዔቶና ዎዴ ኣብራሃሜይ ፆሳን ኣማኒዳ ጊሾኔ ኡፋይሲ ኦꬂዳ ጊሾ ዳሮ ካዎቴꬃታስ ኣዋ ጊዲስ። ሜꬌ 15፡5 19 ኣብራሃሜስ ፄቱ ላይꬂ ኩማና ሃኒኮካ፥ ባ ዳቡሪዳ ኣሳቴꬃኔ ሳራ ናዓ ዬላናው ዳንዳዖናይሳ ኤሪሼ ባ ኣማኑዋን ዳቡሪቤና። ሜꬌ 17፡17
20 ጊዶሺን፥ ኢ ባ ኣማኑዋን ሚኒዲ ፆሳስ ቦንቾ ኢሚስፔ ኣቲን ፆሳይ ኢሚዳ ኡፋይሳ ኣማኖና ኢፂዲ፥ ሲꬊቤና። 21 ኣብራሃሜይ፥ ፆሳይ ጫቂዳ ጫቁዋ ፖላናይሳ ባ ኩሜꬃ ዎዛናን ኣማኒስ። 22 ሄሳ ጊሾ፥ ፆሳይ ኢያ ኣማኑዋ ፂሎቴꬃን ታይቢስ።
23 ሺን፥ «ኢያው ፂሎቴꬃን ታይቢስ» ጊያ ቃላይ ኣብራሃሜ ፃላላስ ፃፌቲቤና። 24 ሄ ቃላይ ኑ ጎዳ ዬሱሳ ሃይቆፔ ዴንꬂዳ ፆሳ ኣማኒያ ኑስካ ኑ ኣማኖይ ፂሎቴꬃን ታይቤታና ሜላ ፃፌቲስ። 25 ፆሳይ ኢያ ኑ ናጋራ ጊሾ ሃይቆስ ኣꬂዲ ኢሚስ፤ ኢ ኑና ፂሊሳናው ሃይቆፔ ዴንዲስ። ኢሳ 53፡4-5