1 ይሁዳ ኮቻት ፓረሳ፥ ሄስሮና፥ ካርማ፥ ሆራነ ሶባላ።

2 ሶባላ ናአይ ራይ ያሃታ የልስ፤ ያሃት አሁማያነ ላሀዳ የልስ። ሀይሳቲ ፆርአታ ያራታ። 3 ኤፃማ አደ ናይት እዝራኤለ፥ ይሽማነ ይድባሻ፤ ኤንታ ምችያ ሀፅለልፖኖ። 4 ፓኑኤል ጋዶራ የልስ። ኤፀር ሁሻ የልስ። ሁር ባ አየ ኤፍራታስ ባይራ ናአ፤ ሁር ቤተለመ አዋ። ሀይሳቲ ሁራ ያራታ።

5 ተቁሄ አዋ አሽሁራስ ሄሎነ ናእራ ጌተትያ ናምኡ ማቸት ደኦሶና። 6 ናእራ አሁዛማ፥ ሄፌራ፥ ተምናነ አሽታራ አሽሁራስ የላሱ፤ ሀይሳቲ ናእር ናይታ። 7 ሄላ አደ ናይት ደረታ፥ ይፅሃራነ ኤትናና። 8 ቆፀ አደ ናይት አኑባ፥ ፆበባነ አሀርሄላ።

9 ያበፅ ባ እሻታፐ አꬍድ ቦንቸትዳ አስ። እያ አይያ፥ “ታኒ እያ ኢታ እቀꬃን የልዳ ግሾ፥ እያ ሱንꬃይ ያበፃ” ጋዳ ፄጋሱ። 10 ያበፅ እስራኤለ ፆሳ ፄግድ፥ “አቤት ፆሳዉ፥ ታና አንጃ፤ ታ ዛዋ ዳልግሳ። ነ ኩሸይ ታራ ግዶ፤ ታና አዛንꬆና መላ ቆህያባፐ ናጋ” ያግድ ዎስን ፆሳይ እያ ዎሳ ስእስ።

11 ሹሀ እሻይ ካሉባ ማህራ የልስ፤ ማህር ኤሽቶና የልስ። 12 ኤሽቶን ቤት-ራፋ፥ ፓሰሀነ እርናሀሻ አዋ ታህና የልስ። ታህን ናሃሳ ካታማ አሳ የልስ። ሀይሳቲ ረካ ቢታን ደእዶሶና።

13 ቀነዛ አደ ናይት ጎቶንያላነ ሳራያ፤ ጎቶንያላ አደ ናይት ሀታታነ ማኦኖታያ። 14 ማኦኖታይ ኦፍራ የልስ። ሳራይ እዮኣባ የልስ። እዮኣብ ኩሸ ሂላታ ዛንጋራ ጌተትያ በሳን ደእያ አሳ የልስ።

15 ዮፎነ ናኣ ካለባ ናይት እራ፥ ኤላነ ናኣማ። ኤላ ናአይ ቀነዛ።

16 ይሀልኤላ ናይት ዚፋ፥ ዝፋሀ፥ ትራያነ አሳርኤላ።

17 ኤዝራ አደ ናይት የተራ፥ መሬዳ፥ ኤፈራነ ያሎና። መሬድ ግብፀ ካዋ ናእዉ ብትያ ኤክን እያ ማይራሞ፥ ሻማያነ ይሽባ የላሱ። ይሽብ ኤሽታሞአ የልስ። 18 ይሁዳ ቢታፈ ኤክዳ ማችያ ጋዶራ አዋ የረዳ፥ ሶኮ አዋ ሄቤራነ ዛኖሀ አዋ ያቅትኤላ የላሱ። 19 ናሀማ ምቸ፥ ሆድያ ማቸ ናይት ጋርማን ደእያ ቃእላ አዋነ ማእካን ደእያ ኤሽታሞአ አዋ።

20 ሽሞና ናይት አምኖና፥ እርና፥ በንሀናነ ትሎና።

ይሽአ ናይት ዞሄታነ በንዞሄታ።

21 ይሁዳ ናኣ ሴላ ኮቻት ሌካ አዋ ኤራ፥ ማሬሳ አዋ ለአዳነ ቤት-አሽበአ ካታማን ደእያ ሊኖ ማኦ ዳደይሳታ ያራታ። 22 ሀራት ቃስ ዮቅማ፥ እዮኣሳ፥ ያሹብለሄማ፥ ሞአበ ሃርዳ ሳራፋነ ኮዘባ ካታማን ደእያ አሳታ። ሀ የለታ ማዝጋበይ በንፐ ዶምድ ደኤስ። 23 ሀይሳቲ ናፃእማንነ ጋዴራን ደእያ መቃ ሚሸ መꬍያ አሳታ። ኤንቲ ካዋ ኦሶ ኦꬃናዉ እያራ እስፈ ደእዶሶና።

24 ስሞና ናይት ነሙኤላ፥ ያምና፥ ያርባ፥ ዛራነ ሳኡላ። 25 ሳኡላ ናአይ ሳሉማ፤ ሳሉማ ናአይ ምብሳማ፤ ምብሳማ ናአይ ማስማአ፤ 26 ማስማአ ናአይ ሀሙኤላ፤ ሀሙኤላ ናአይ ዛኩራ፤ ዛኩራ ናአይ ሳመአ። 27 ሳመእ ታማነ ኡሱፑን አደ ናይታነ ኡሱፑን ማጫ ናይታ የልስ። ሽን እያ እሻቲ ዳሮ ናአ የልቦኮና። ይሁዳ ኮቻዳ ስሞና ኮቻይ ዳርቦኮና።

28 ስሞና ኮቻት በርሳበ ካታማንነ ሞላዳ፥ ሀፃር-ሹኣላ፥ 29 ባላ፥ ኤፀማ፥ ቶላዳ፥ 30 ባቱኤላ፥ ሆርማ፥ ፅቅላጋ፥ 31 ቤት-ማርካቦታ፥ ሆፃር-ሱስማ፥ ቤት-ብራነ ሻኣርማ ካታማታን ደእዶሶና። ዳዊቲ ካዎታና ጋካናዉ ሀይሳቲ ካታማታ ግድድ ደእዶሶና። 32 ቃስ ኤንታ ጉታት ኤፃማ፥ አይና፥ እርሞና፥ ቶከናነ አሻና። ኤንቲ ኩመꬅ እቻሹ ካታማታ። 33 ባኣለ ጋካናዉ ሀ ካታማታ ዩሹዋን ደእያ ጉታት ኡባይ ኤንታን ጉጀቶሶና። ሀይሳቲ ኤንቲ ደእያ በሳታነ ባንታ የለታ ማራ ማዝጋበን ፃፍድ ኦይክዶሶና።

34 ስሞና ያራታ ሀላቃት ሀይሳፈ ካልድ ፃፈትዳይሳታ። ኤንቲ ማሾባባ፥ ያምለካ፥ አማስያሳ ናኣ እዮስያ፥ 35 እዩኤላነ ዮሽባ ናኣ እዩ። እዩ አዋ አዋይ አሳኤላ ናአ ሳራያ። 36 ሀራ ሀላቃት ቃስ ኤልዮአና፥ ያይቆባ፥ ያሾሀያ፥ አሳያ፥ አድኤላ፥ ያስምኤላ፥ ባናያነ 37 ዚዛ። ዚዝ ሽፋ ናአ፤ ሽፍ አሎና ናአ፤ አሎን ያዳያ ናአ፤ ያዳይ ሽምራ ናአ፤ ሽምር ሻማያ ናአ። 38 ስሞና ያራታ ሀላቃት ሀይሳታ።

ኤንታ አዋታ ኮቻይ ዳርሸ ብስ። 39 ኤንቲ ባንታ መህያስ ሄምያ በሲ ኮይሸ ጋዶራ ገልያ በሳ ማታን ደእያ ዛንጋራፐ ዶሎሀ ባጋራ ደእያ በሳ ጋካናዉ ብዶሶና። 40 ያን አራዳነ ሎኦ ሄምያ በሲ ደምዶሶና፤ ሄ ቢታይ ዎፓተꬅነ ሳሮይ ኩምዳ ዳልጋ ቢታ። በን ዎደ ሄ ቢታን ደእዳይሳት ካማ ኮቻ። 41 ሀይሳፈ ቆሞን ሱንꬃይ ፃፈትዳ ስሞና ኮቻት ይሁዳ ካዋ ህዝቅያሳ ዎደ ጋዶራ ቢታ ብድ ያን ደእያ ካማ ኮቻነ ማኡና አሳታ ኦልድ ꬋይስዶሶና። ሄ ቢታን ኤንታ መህያስ ሄምያ በሲ ደእያ ግሾ፥ ስሞና ኮቻት ሀች ጋካናዉ ያን ኡትዶሶና።

42 ስሞና ኮቻፈ እቻሹ ፄቱ አሳይ ሳይረ ዙማ ብዶሶና። ኤንታ ሀላቃት ይሽአ ናይታ ፓላፃ፥ ናራ፥ ራፋያነ ኡዝኤላ። 43 ባቃትድ አትዳ አማለቃ አሳ ꬋይስድ ኤንቲ ሀች ጋካናዉ ሄ ቢታን ደኦሶና።