16
1 ኤንቲ ፆሳ ታቦትያ ኤህድ ዳዊቲ ታቦትያ ዎꬃናዉ ኤስዳ ዱንካንያ ግዶን ዎꬅድ፥ ፁሳ ያርሾነ እስፈተꬃ ያርሾ ፆሳስ ያርሽዶሶና። 2 ዳዊቲ ፁሳ ያርሾነ እስፈተꬃ ያርሾ ያርሽድ ፖልዳፐ ጉየ ጎዳ ሱንꬃን አሳ አንጅስ። 3 እስራኤለ አሳ ኡባስ ማጫስነ አደስ፥ ሁጰን ሁጰን እስ ሙመ ኡይꬅ፥ እስ ቃንፆ አሾነ እስ ዎይነ ኑካ ግሽስ።
4 ጎዳ ታቦትያ ስንꬃን ኦꬃና መላነ ጎዳ እስራኤለ ፆሳ ሳባና መላ፥ ጋላታና መላነ ቦንቻና መላ ጉꬃ ሌወታ ዳዊቲ ሹምስ። 5 ሌወታ ሀላቃይ አሳፋ፤ አሳፋ ካልድ ዛካርያሳ። ዛካርያሳ ካልድ ደኤይ ይኤላ፥ ሻምራሞታ፥ ይኤላ፥ ማትታ፥ ኤልኣባ፥ ባናያነ ኦቤድ-ኤዶመ። ኤንቲ ማስንቆነ ዲꬅ ዲፃናዉ ሹመትዶሶና፤ ሽን አሳፍ ዳላ ግርሳናዉ ሹመትስ። 6 ካህነይ ባናይነ ያሀዝኤል ፆሳ ጫቆ ታቦትያ ስንꬃን ኡባ ዎደ ሞይዘ ፑናናዉ ሹመትዶሶና። 7 ሄ ጋላስ ዳዊቲ አሳፍነ እያ ዳቦት ጎዳ ሳባና መላ ሀ ማዝሙርያ ኮይሮ ኪትስ።
ጋላታ ማዝሙረ
(ማዝ 105:1-15፤ 96:1-13፤ 106:1፥ 47-48)
8 ጎዳ ጋላትተ፤ እያ ሱንꬃ ፄግተ፤
እያ ኦሱዋ ካዎተꬃታ ግዶን ኦድተ።
9 እያ ሳቢተ፤ ጋላታ ማዝሙርያ እያዉ የፅተ፤
ማላልስያ እያ ኦሶ ኡባ ኦድተ።
10 እያ ጌሻ ሱንꬃን ጬቀትተ፤
ጎዳ ኮየይሳታ ዎዛናይ ኡፋይቶ።
11 ጎዳነ እያ ዎልቃ በእተ፤
ኡባ ዎደ እያ ስንꬃ ኮይተ።
12-13 ህንተኖ፥ እስራኤለ ኮቻቶ፥
ዶረትዳ ያይቆባ ናይቶ፥
እያ ማላታ፥ እ እምዳ ፕርዳነ ማላልስያባታ ሀሳይተ።
14 እ ጎዳ ኑ ፆሳ፤
እያ ፕርዳይ ቢታ ኡባ ቦላና።
15 እያ ጫቁዋ መርናዉ
ሙኩሉ የለተꬃ ጋካናዉ፥
እያ ቃላ ናግተ።
16 አብራሃመራ ጫቅዳ ጫቁዋ ናጌስ፤
ይሳቃስ ገልዳ ቃላ ምንꬄስ።
17 ያይቆባስ ዎጋ፥
እስራኤለስ መርና ጫቁዋ፥
ኦꬅድ ምንꬅስ።
18 “ታኒ ነዉ ካናነ ቢታ እማና፤
እ ነ ኮቻስ ላታ ግዳና” ያግስ።
19 ሄስ ህንተ ታይቦን ጉꬃነ
ካናነን በተ ግድድ ደእያ ዎደ ሀንስ።
20 እስ ደርያፐ ሀራ ደረ ፕንዶሶና፤
እስ ካዎተꬃፈ ሀራ ካዎተꬅ ዩይዶሶና።
21 ፆሳይ ኤንታ ኦንካ ናቃና መላ እምቤና፤
ኤንታ ግሾ ካዎታ ሴርስ።
22 “ታኒ ትይዳይሳታ ቦቾፍተ፤
ታ ናበታ ቆሆፕተ” ያግስ።
23 ሳአን ደእያ አሳ ኡባይ ጎዳስ የፅተ፤
እያ አሹዋ ጋላስ ጋላስ ኦድተ። ማዝ 96:1-13.
24 ካዎተꬃታ ግዶን እያ ቦንቹዋ፥
ማላልስያ እያ ኦሱዋ አሳ ኡባ ግዶን አዋጅተ።
25 ጎዳይ ግታ፤ አꬎ ጋላታይ እያዉ በሴስ፤
ፆሳታ ኡባፈ አꬍድ ቦንቸታናዉ በሴስ።
26 ሀራ ካዎተꬃታ ፆሳት ኡባይ ኤቃታ፤
ሽን ጎዳይ ሳሎታ መꬍዳ ፆሳ።
27 እያ ስንꬃን ቦንቾይነ ቴም ደኤስ፤
ምኖተꬅነ ኡፋይስ እ ደእያ በሳን ደኤስ።
28 ህንተኖ፥ ቢታ ካዎተꬃቶ፥
ጎዳ ቦንቾነ ዎልቃ እምተ።
29 እያ ሱንꬃስ በሲያ ቦንቾ እምተ፤
ያርሾ ኤክድ እያ ስን ዪተ፤
እያ ጌሻተꬃ ቴማን ጎዳ ጎይንተ።
30 ቢታን ደእያ አሳ ኡባይ እያ ስንꬃን ኮኮርተ፤
ሳአይ ምን ኤቅዳ ግሾ ቃፀና።
31 ሳሎት ኡፋይቶ፤ ሳእ ሀሹ ጎ!
ካዎተꬃታ ግዶን ኤንቲ “ጎዳይ ካዎትስ!” ያጎ።
32 አባይነ እያ ግዶን ደእያ ኡባይ ጉሞ፤
ጋደይነ እያን ደእያ ካꬃ ኡባይ ኡፋይቶ።
33 ሄ ዎደ ዎራን ደእያ ምꬃ ኡባይ
ኡፋይሳን ጎዳ ስንꬃን የፃና።
እ ሳኣ ቦላ ፕርዳናዉ ዬስ።
34 ጎዳይ ኬሀ ግድያ ግሾነ
እያ ሲቆይ መርናሳ ግድያ ግሾ፥
ጎዳ ጋላትተ።
35 “አቤት ኑና አሽያ ፆሳዉ ኑና አሻ፤ ማዝ 106:47-48.
ኑኒ ነ ጌሻ ሱንꬃ ጋላታና መላነ
ነ ቦንቹዋን ኑ ቦንቸታና መላ፥
ካዎተꬃታ ግዶፈ ሺሻዳ ኑና አሻ” ያግተ።
36 ጎዳይ እስራኤለ ፆሳይ፥
መርናፐ መርና ጋካናዉ ጋላተቶ!
አሳ ኡባይ፥ “አምንእ” ግድ፥ ጎዳ ጋላትዶሶና።
37 ጎዳ ጫቆ ታቦትያ ስንꬃን ጋላስ ጋላስ ጎይኖስ ኮሽያባ ኡባ ዎደ ኤንቲ ኦꬃና መላ ዳዊቲ አሳፋነ እያ ዳቦታ ዎꬅስ። 38 ቃስ ኦቤድ-ኤዶመነ ኡሱፑን ታማነ ሆስፑን እያ ዳቦታ ኤንታራ ኦꬃና መላ ዎꬅስ፤ የዱቱና ናኣ ኦቤድ-ኤዶመነ ሆሳ ፐንግያ ናጋና መላ ዎꬅስ።
39 ካህነይ ሳዶቅነ እያራ ኦꬅያ ካህነት ጋባኦናን ደእያ ꬎቃ በሳን፥ ዱንካንያ ስንꬃን ኦꬃና መላ ኤንታ ያን አግስ። 40 ጎዳይ እስራኤለስ እምዳ ህግያን ፃፈትዳይሳዳ ኤንቲ ዎንታነ ኦማርስ ኡባ ዎደ ፁሳ ያርሾ ያርሻና መላ ኦꬅስ። 41 እያ ሲቆይ መርናሳ ግድያ ግሾ ጎዳ ማዝሙረን ጋላታና መላ ሄማና፥ የዱቱናነ ዶረትዳ ሀራታ ዳዊቲ ኤንታራ እስፈ ዎꬅስ። 42 ሄማንነ የዱቱን ሞይዘ ፑኖሶና፥ ዳላ ጊርሶሶና ጋላታ ማዝሙረ የፅሸ ካእያ ሀራ ሚሸታ ካኦሶና። የዱቱና አደ ናይት ፐንግያ ናጋናዉ ሹመትዶሶና።
43 ሄሳፈ ጉየ አሳ ኡባይ ባ ሶ ሶ ብስ። ዳዊቲካ ባ ሶ አሳ አንጃናዉ ስምስ።