1 አሮና ኮቻት ባንታ ኦሶ ማራን ሀይሳፈ ካልድ ፃፈትዳይሳታ። አሮና አደ ናይት ናዳባ፥ አብዮዳ፥ አላዛራነ እታማራ። 2 ሽን ናዳበይነ አብዮዳ ናአ የሎና ባንታ አዋፐ ስን ሀይቅዶሶና። ሄሳ ግሾ፥ አላዛርነ እታማር ካህነ ግድዶሶና። 3 ዳዊቲ አላዛራ ያራፐ ሳዶቃ፥ እታማራ ያራፐ አብመለከ ኤክድ አሮና ኮቻታ ኤንታ ኦሱዋ ማራን ጩጋን ጩጋን ሻክስ። 4 አላዛራ ያራታ ሀላቃት እታማራ ያራታ ሀላቃታፐ ዳር በንትዳ ግሾ አላዛራ ያራት ታማነ ኡሱፑን ጩጋን ሻከትን እታማራ ያራት ሆስፑን ጩጋን ሻከትዶሶና። 5 አላዛራ ያራታ ግዶንነ እታማራ ያራታ ግዶን ፆሳ ኬꬃ ሀላቃትነ ፆሳ ኦሱዋስ በሲያ ሀላቃት ደእያ ግሾ ኦሶይ ኤንታዉ ሳማን ሻከቴስ። 6 አላዛራ ያራትነ እታማራ ያራት ባንታ ማራን ማራን ሳማ ከስዶሶና። ሌወ ኮቸ ግድዳ ናትናኤላ ናአይ ፃፈይ ሻማየይ ኤንታ ማዝጋቤስ። ካዎይነ እያ ሞርናት፥ ካህነይ ሳዶቅነ አብያታራ ናአይ አብመለከይ፥ ካህነታነ ሌወታ ያራታ ሀላቃት ኡባይ ሄሳስ ማርካ።

7 ኮይሮ ሳማይ ዮኣርባስ ከይስ፤ ናምአንꬆይ ያዳያስ ከይስ። 8 ሄꬓንꬆይ ሀርማስ ከይስ። ኦይዳንꬆይ ሳኦርማስ ከይስ። 9 እቻሻንꬆይ ማልክያስ ከይስ። ኡሱፑንꬆይ ምያምናስ ከይስ። 10 ላፑንꬆይ አቆሳስ ከይስ፤ ሆስፑንꬆይ አብያስ ከይስ። 11 ኡዱፉንꬆይ እያሱስ ከይስ። ታማንꬆይ ሳካናስ ከይስ። 12 ታማነ እስንꬆይ ኤልያሴባስ ከይስ። ታማነ ናምአንꬆይ ያቅናስ ከይስ። 13 ታማነ ሄꬓንꬆይ ሁፓስ ከይስ። ታማነ ኦይዳንꬆይ የሸባስ ከይስ። 14 ታማነ እቻሻንꬆይ ብልጋስ ከይስ። ታማነ ኡሱፑንꬆይ እመራስ ከይስ። 15 ታማነ ላፑንꬆይ ሄዝራስ ከይስ። ታማነ ሆስፑንꬆይ ሀፍፄፃስ ከይስ። 16 ታማነ ኡዱፉንꬆይ ፓታሀስ ከይስ። ላታማንꬆይ የዘከላስ ከይስ። 17 ላታማነ እስንꬆይ ያክናስ ከይስ። ላታማነ ናምአንꬆይ ጋሙላስ ከይስ። 18 ላታማነ ሄꬓንꬆይ ዳላያስ ከይስ። ላታማነ ኦይዳንꬆይ ማዛስ ከይስ።

19 ጎዳይ እስራኤለ ፆሳይ ኤንታ ማይዛ አሮና ኪትን፥ እ ኤንታዉ ዎꬅዳ ዎጋꬆ፥ ባንታ ፆሳ ኬꬃ ገልያ ዎደ፥ ኤንቲ ኦꬃና ማራይ ሀይሳ።

20 ሀራ ሌወ ኮቻታ ሀላቃት፥ ሀይሳፈ ካልድ ፃፈትዳይሳታ።

የህዳይ ሳቡኤላ ባጋራ አምራማ ኮቸ።

21 ይሸይ ራሃባ ኮቸ።

22 ያሃት ሳሎምታ ባጋራ ይስሃራ ኮቸ።

23 ይርየይ፥ አማረይ፥ ያሀዝኤልነ ይቃምኣም ከብሮና ኮቸ።

24 ሻምር ምክያሳ ባጋራ ኡዝኤላ ኮቸ።

25 ዛካርያስ ምክያሳ እሻ ይሽያ ባጋራ ኡዝኤላ ኮቸ።

26 ማህል፥ ሙስነ ያእዝ ማራራ ኮቻታ። 27 ያእዛ ሄꬑ አደ ናይት ሾሃማ፥ ዛኩራነ እባራ። 28 ማህላ ናምኡ አደ ናይት አላዛራነ ቂሳ። አላዛራስ አደ ናእ ባዋ። 29 ቂሳ ይራህማኤላ ጌተትያ አደ ናእ ደኤስ። 30 ሙሳ ሄꬑ አደ ናይት ማህላ፥ ኤደራነ ይረሞታ።

ሀይሳቲ ሌወ ኮቻታ ሀላቃታ።

31 ካሰ ኤንታ ዳቦት አሮና ኮቸ ግድዳ ካህነት ኦꬅዳይሳዳ ሀይሳቲካ ካዎይ ዳዊቲ፥ ሳዶቅ፥ አብመለከይ፥ ካህነታነ ሌወታ ሀላቃት ደእያ በሳን ሳማ የግዶሶና። ባይራ እሻ ሶ አሳስነ ካሎ እሻ ሶ አሳስ እስ ግና ሳም ዎꬍስ።