1 ፆሳ ኬꬃ ፐንግያ ናገይሳት ሀይሳፈ ካልድ ፃፈትዳይሳታ።

ኮይሮይ ቆረ ኮቻፈ አሳፋ አደ ናይታፐ ቆረ ናአ ማሱላማ። 2 ማሱላም ላፑን አደ ናይታ የልስ፤ ኤንቲ ባንታ የለታ ማራን ዛካርያሳ፥ ይድኤላ፥ ዮዞባታ፥ ያትንኤላ፥ 3 ኤላማ፥ ይሆናነ ኤልሆና።

4 ፆሳይ ኦቤድ-ኤዶማ አንጅዳ ግሾ፥ እ ሆስፑን አደ ናይታ የልስ። ኤንቲ ባንታ የለታ ማራን ሻማያ፥ ዮዛባታ፥ እዮኣሳ፥ ሳካራ፥ ናትናኤላ፥ 5 አምኤላ፥ ይሳኮራነ ፑላታ። 6 ኦቤድ-ኤዶማ ናአይ ሻማየይ ኡሱፑን አደ ናይታ የልስ፤ ኤንቲ ምኖ አስ ግድዳ ግሾ፥ ባንታ አዋ ሶ አሳስ ሀላቃ ግድዶሶና። 7 ሻማያ ናይት ኦትና፥ ራፋኤላ፥ ዮቤዳነ ኤልዛባዳ፤ ኤንታ እሻት ኤልሁይነ ሳማክ ቃራ አሳታ። 8 ሀይሳቲ ኡባይ ኦቤድ-ኤዶማ ኮቻታ፤ ኤንቲ፥ ኤንታ ናይታነ ኤንታ ዳቦት ኦሶስ ምኖ። ኦቤድ-ኤዶማ ኮቻት ኩመꬅ ኡሱፑን ታማነ ናምአ።

9 ማሱላማስ ምኖ ናይትነ ምኖ ዳቦት ደኦሶና፤ ኤንቲ ኩመꬅ ታማነ ሆስፑና።

10 ማራራ ያራፐ ሆሳ ጌተትያ አድያስ ኦይዱ አደ ናይት ደኦሶና። ሽምር ባይራ ናአ ግደና፥ ሽን እያ አዋይ እያ ሀላቃ ኦꬅስ። 11 እያ እሻት ካልቀ፥ ዛባላነ ዛካርያሳ። ሆሳ ናይትነ እያ ዳቦት ኩመꬅ ታማነ ሄꬓ።

12 ፆሳ ኬꬃ ፐንግያ ናገይሳት ባንታ ሶ አሳ ሀላቃታ ጩጋን ጩጋን ሻከትዶሶና። ሀራ ሌወታዳ ኤንታካ ፆሳ ኬꬃ ኦሶይ ሻሆን ጋክስ። 13 እስ እስ ፐንግያ ናጋናዉ ባንታ ሶ አሳን አሳን ናአ ጭማ ጎና ሳማ የግዶሶና። 14 ዶሎሀ ፐንግያ ናጋናዉ ሳማይ ሳላማስ ከይስ። ሎኦ ዞረ ዞርያ እያ ናኣ ዛካርያሳ ፑደሀ ፐንግያ ናጋናዉ ሳም ከይስ። 15 ኦቤድ-ኤዶማስ ዱገሀ ፐንግያ ናጋናዉ ሳም ከይስ። እያ ናይታስ ቡቁራ ምንጅያ ኬꬃ ናጋናዉ ሳም ከይስ። 16 ዉሎሀ ፐንግያነ ቆሞ ባጋራ ደእያ ሻለኮታ ፐንግያ ናጋናዉ ሳም ሱፍማስነ ሆሳስ ከይስ። ናጎይ ማራን ማራን ጋኬስ።

17 ጋላስ ጋላስ ዶሎሀ ባጋራ ኡሱፑን፥ ፑደሀ ባጋራ ኦይዳ፥ ዱገሀ ባጋራ ኦይዱ ሌወት ናጎሶና። ቃስ ቡቁራ ምንጅያ ኬꬃ ናምኡ ናምኡ ሌወት ናጎሶና። 18 ዉሎሀ ባጋራ ዳባባኮ ኤፍያ ኦግያ ኦይዱ፥ ቃስ ዳባባ ናምኡ ሌወት ናጎሶና። 19 ህዛ ቆረስነ ማራራ ኮቻስ እመትዳ ፐንገ ናጎ ኦሶይ ሀይሳ።

20 አክያ ጌተትያ ሌወይ ፆሳ ኬꬃን ደእያ ቡቁራነ ፆሳስ ዱማይ ዎꬅዳ እሞታታ ናጋናዉ ሹመትስ። 21 ገድሶና ናኣ ላዳና ያራፐ ይኤል ዱማ ዱማ ሶ አሳስ አዋተስ። 22 ይኤላ ናይት ዘታማነ እያ እሻ እዩኤላ፤ ኤንቲ ፆሳ ኬꬃን ደእያ ቡቁራ ናጋናዉ ሹመትዶሶና።

23 አምራማ፥ ይስሃራ፥ ከብሮናነ ኡዝኤላ ያራታስ ኦሶይ ሻከትድ እመትስ። 24 ሙሰ ናኣ ገድሶና ያራ ግድዳ ሳቡኤል ፆሳ ኬꬃን ደእያ ቡቁራ ናገይሳታ ሀላቃታ ቦላ ሹመትስ። 25 እ ገድሶና እሻ አላዛራ ባጋራ ሳሎሞታስ ዳቦ። አልአዛር ራሃብያ የልስ፤ ራሃብ የሻያ የልስ፤ የሻይ ዮራማ የልስ፤ ዮራም ዝክራ የልስ፤ ዝክር ሳሎምታ የልስ። 26 ሳሎሞትነ እያ ዳቦት ካዎይ ዳዊቲ፥ እያ ሶ አሳ ሀላቃት፥ ሻላቃት፥ ማቶ ሀላቃትነ ቶራ ሞጮናታ ፆሳስ ዱማይዳ ሚሸ ኡባ ቦላ ሹመትዶሶና። 27 ሀ አሳት ኦላን ድኤትድ ይዳ ሚሸታፐ ባጋ ፆሳ ኬꬃን ዱማይድ ዎꬅዶሶና። 28 ቆንጨꬅ በእያ ሳሜል፥ ቂሳ ናአይ ሳኦል፥ ኔራ ናአይ አበኔርነ ፃሩያ ናአይ እዮኣብ ካሰ ዱማይድ ዎꬅዳ እሞታ ኡባ ሳሎሞትነ እያ ዳቦት ናጎሶና።

29 ይስሃራ ያራታፐ ካናነይነ እያ ናይት ፆሳ ኬꬃፈ ካረራ ደእያ ኦሶን እስራኤለ አሳ አይሳናዉነ ዳይናታናዉ ሹመትዶሶና።

30 ከብሮና ያራታፐ ሀሻብነ እያ ዳቦት 1,700 ምኖ አሳት፥ ጎዳ ኦሱዋስነ ካዋ ኦሱዋስ ዮርዳኖሰፐ ዉሎሀ ባጋራ ደእያ እስራኤለ አሳ ቦላ ሹመትዶሶና። 31 ከብሮና ያራታ ማዝጋብያ ማራን ይርይ ኤንታ ሀላቃ። ዳዊቲ ካዎትዳ ኦይታማንꬆ ላይꬃን ማዝጋበን ኮይን ኤንታ አሳ ግዶፈ ምኖ አሳት ጋላዳ ቢታን ያእዜራ ጌተትያ በሳን በንትዶሶና። 32 ኤንታ ሶ አሳስ ሀላቃ ግድዳ ይርያ ዳቦት ምኖት 2,700. ካዎይ ዳዊቲ ፆሳ ኦሱዋስነ ካዋ ኦሱዋስ ሮቤላ፥ ጋደነ ምናሰ ኮቻታፐ ባጋታ ቦላ ኤንታ ሹምስ።