1 ሄሳ ግሾ፥ ክርስቶስ ባ አሹዋን ኑስ ዋየትዳ ግሾ ህንተካ ሄ ቆፋን ህንተና ዳንጭስድ ምንድ ኤቅተ። ክርስቶሳ ግሾ ግድ ባ አሹዋን ዋየ ኤክዳ ኡራይ ናጋራ ኦꬅከ ግድ ቃንፅዳ አስ። 2 ሄ ኡራይ ባ አትዳ ላይꬃን ፆሳ ሸነ ኦꬃናዉ ኮዬስፐ አትሽን፥ ኢታ አሾ አሞን ዴና። 3 ካሰ ህንተ አማኖና አሳይ ደእዳይሳዳ ደእደታ። ህንተ ኢታ አሞን፥ ላይማተꬃን፥ ማꬆን፥ ቱናተꬅ ደንꬅያ የꬃን፥ ፖክያ ኤቃ ጎይኖን ካሰ ደእዳ ዱሳይ ግዳና። 4 አማኖና አሳራ ህንተ ሾር ባይና ኦሱዋ ኦꬆና ግሾ ማላለትድ ህንተና ጫዮሶና። 5 ሽን ኤንቲ ፓፃታ ቦላነ ሀይቅዳ አሳ ቦላ ፕርዳናዉ ደእያ ፆሳስ ዛሮ እማና። 6 ሀይቅዳ አሳስ ዎንገላይ ሳባከትዳይ ሀይሳ ግሾሳ። ኤንቲ አሳꬆ ባንታ አሹዋን ፕርደታና ቃስ ባንታ አያናን ፆሳꬆ ደኦን ዳና።

7 ህዛ፥ ኡባባስ ዉርሰꬃይ ማታትስ። ሄሳ ግሾ፥ ዎሳናዉ ዳንዳኤታና መላ ዎፑ ግዳ ዎዛን ደኦ፤ ማራራ ደእተ። 8 ሲቆይ ዳሮ ናጋራ ካምያ ግሾ፥ ኡባፈ አꬅድ እሶይ እሱዋራ ዎዛናፐ ሲቀትተ። ሌም 10:12. 9 ዙዙሞና እሶይ እሱዋ እማꬃተꬃን ሞክተ። 10 ህንተ ፆሳፈ ዱማ ዱማ አꬎ ኬሀተꬃ እሞታ ኤክዳይሳዳ ህንተ እሶይ እሶይ ሄ እሙዋ በሲያዳ ኦይክድ እሶይ እሱዋ ሀጋዝተ። 11 የሱስ ክርስቶሳ ባጋራ ኡባባን ፆሳይ ጋላተታና መላ ኦንካ ኦድያባ ግድኮ ፆሳፈ ቃላ ኤክዳዳ ኦዶ። ቃስ ኦንካ ማድያባ ግድኮ ፆሳይ እያዉ እምያ ዎልቃዳ ማዶ። ቦንቾይነ ዎልቅ መርናፐ መርና ጋካናዉ እያዉ ግዶ። አምንእ።

12 ታ እሻቶ፥ ህንተ ታማዳ ፁግያ ዋየ ፓጭያ ግዶራ አꬍያ ዎደ ኦራꬃባይ ሀንዳዳ ማላለቶፍተ። 13 ሽን እያ ቦንቾይ ቆንጭያ ዎደ ህንተ ኡፋይሳይ ግታ ግዳና መላ ክርስቶሳ ዋይያ ህንተ ኤከይሳን ኡፋይትተ። 14 ክርስቶሳ ሱንꬃ ግሾ አስ ህንተና ጫይያ ዎደ፥ ፆሳ ቦንቾ አያናይ ህንተ ቦላ ሸምፕያ ግሾ ህንተ አንጀትዳይሳታ። 15 ህንተፈ ዋየ ኤክያ ኦንካ ሸምፖ ዎꬍዳዳ ዎይኮ ካይሶትዳዳ ዎይኮ ኢታ ኦꬅዳዳ ዎይኮ ገልሶናባን ገልዳዳ ሀንድ ዋየቶፎ። 16 ግዶሽን፥ ክርስታነ ግድያ ግሾ ዋየትኮ ክርስቶሳ ሱንꬃ ግሾ ፆሳ ጋላቶፐ አትሽን፥ ዬላቶፖ።

17 ፕርድ ፆሳ አሳ ቦላ ዶምያ ዎደይ ጋክስ። ህዛ፥ ሄ ፕርዳይ ኮይሮ ኑ ቦላ ዶምያባ ግድኮ፥ ፆሳ ዎንገላስ ኪተቶና አሳ ዉርሰꬃይ አይ ግዳኔ? 18 ፅሎይ ኡንአን አትያባ ግድኮ፥ ማካላንቾይነ ናጋራንቾይ ያትን ዋናኔ?ሌም 11:31. 19 ሄሳ ግሾ፥ ፆሳ ሸነዳ ዋየ ኤከይሳት ባንታ ሸምፑዋ ባንታና መꬍዳ፥ አማንꬅያ ፆሳስ ሀዳራ እምሸ ሎኦባ ኦꬆ።