1 ሳሜል እስራኤለ ኡባኮ፥ “ህንተ ታዉ ኦድዳ ኡባ ስአዳ፥ ህንተ ቦላ ካዎ ካዎꬃስ። 2 ሀእ ህንተና ካለꬃናዉ ካዎይ ደኤስ። ታኒ ዳሮ ጭማዳ ፑሉማስ፤ ታ ናይት ህንተራ ደኦሶና። ታኒ ታ ናአተꬃፈ ዶማዳ ሀች ጋካናዉ ህንተና ካለꬃስ። 3 ሄኮ፥ ታኒ ህንተ ስንꬃን ኤቃስ፤ ጎዳ ስንꬃንነ እ ትይዳ ካዋ ስንꬃን ታ ቦላ ማርካትተ። ታኒ ኦደ ቦሩ ኤካድና? ኦደ ሀረ ኤካድና? ኦና ጭማድና? ኦና ኡንኤꬃድና? በአሸ በኦናዳ ሀናናዉ ኦደፈ ዎꬋፈ ኤካድና? ሀይሳታፐ እሱዋ ታኒ ኦꬅዳባ ግድኮ ታዉ ኦድተ፤ ታ ቃንፃና” ያግስ።

4 ኤንቲ ዛሪድ፥ “ኔኒ ኑና ጭማባካ፤ ዎይኮ ኑና ኡንኤꬃባካ፤ ነ ኦደ ኩሸፐ አይባካ ኤካባካ” ያግዶሶና።

5 ሳሜል፥ “ህንተ ታ ኩሸን አይ ባላካ ደምቦናይሳ ጎዳይነ እ ትይዳ ካዎይ ሀች ህንተ ቦላ ማርካ” ያግስ።

አሳይ፥ “ኤ፥ ፆሳይ ማርካ” ያግዶሶና።

6 ቃስካ ሳሜል፥ “ሙሰነ አሮና ዶርዳይነ ህንተ ማይዛታ ግብፀፈ ከስዳይ ጎዳ። 7 ሀእ ህንተዉነ ህንተ ማይዛታስ ጎዳይ ኦꬅዳ ፅሎ ኦሶ ኡባስ ታኒ ህንተነራ ጎዳ ስንꬃን ሞተታና መላ ሀይሳን ኤቅተ። 8 ያይቆብነ እያ ሶ አሳይ ግብፀን ደእሽን፥ ግብፀ አሳይ ኤንታ ኡንኤꬅዳ ዎደ ህንተ ማይዛት ጎዳኮ ዋስዶሶና። ጎዳይ ሙሰነ አሮና ኪትስ፤ ኤንቲ ህንተ ማይዛታ ግብፀፈ ከስድ ሀይሳን ዎꬅዶሶና።

9 “ሽን እስራኤለ አሳይ ጎዳ ባንታ ፆሳ ዶግዶሶና። ጎዳይ ኤንታ ሀፆራ ቶራ ሞጮና ስሳራ ኩሸን፥ ፍልስፄመ አሳ ኩሸንነ ሞአበ ካዋ ኩሸን አꬅድ እምን ኤንታ ኦልዶሶና። 10 ኤንቲ፥ ‘ኑኒ ናጋራ ኦꬅዳ፤ ጎዳ አግድ፥ ባኣለነ አስታሮታ ጎይንዳ። ሽን ሀእ ነ ኑና ኑ ሞርከታ ኩሸፐ አሻ፤ ኑኒ ነና ጎይናና’ ያግድ ጎዳኮ ዋስዶሶና። 11 ጎዳይ ገድዮና፥ *ገድዮና፦ እብራወꬆ ዶናን የሩባኣላ ጌተቴስ ባራቃ፥ †ባራቃ፦ እብራወꬆ ዶናን ባዳና ጌተቴስ ዮፍታሄነ ሳሜላ ኪትድ፥ ህንተ ዩሾ ኡባን ደእያ ሞርከታ ኩሸፐ ህንተና አሽስ። ያትን፥ ህንተ ሳሮ ደእደታ።

12 “አሞነ ካዎይ ናኦስ ህንተኮ ይዳይሳ በእዳ ዎደ ጎዳይ ህንተ ፆሳይ ህንተ ካዎ ግድኮካ፥ ህንተ፥ ‘አካይ፥ ኑኒ ካዎ ኮዮስ’ ያግደታ። 13 ሀእ ህንተ ዶርዳነ ኦይችዳ ካዎይ ሀይስሽ። ሄኮ፥ ጎዳይ ህንተ ቦላ ካዎꬅስ። 14 ህንተ ጎዳስ ያይኮ፥ እያዉ ኪተትኮ፥ እያ ቃላ ስእኮ፥ እያ ኪታ ቦላ ማካሎና እፅኮ፥ ህንተነ ህንተ ቦላ ካዎትያ ካዎይ ጎዳ ህንተ ፆሳ ካልኮ ኡባባይ ሱራና። 15 ሽን ህንተ ጎዳ ቃላስ ኪተቶና እፅኮነ እያ ኪታ ቦላ ማካልኮ፥ ጎዳ ፕርዳይ ካሰ ህንተ አዋታ ቦላ ይዳይሳዳ ህንተ ቦላካ ያና።

16 “ህዛ ምንድ ኤቅተ፤ ጎዳይ ህንተ አይፍያ ስንꬃን ኦꬃና ግታባ በእተ። 17 ሀእ ግስተ ጫካ ዎደ ግደኔ? ጎዳይ ዳዳነ እራ የዳና መላ ታኒ ጎዳ ዎሳና። ህንተ ካዎ ኦይችድ፥ ጎዳ ስንꬃን አይ መላ ኢታባ ኦꬅዳኮ ህንተ አኬካና” ያግስ።

18 ሳሜል ጎዳ ዎስስ፤ ጎዳይ ሄ ጋላስ ዳዳነ እራ የድስ፤ ሄሳ ግሾ፥ አሳይ ጎዳነ ሳሜላ ዳሮ ያይዶሶና።

19 አሳይ፥ “ኑኒ ካዎ ኦይችድ፥ ኑ ናጋራ ኡባ ቦላ ሀ ኢታተꬃ ጉጅዳ ግሾ ኑኒ ነ አይለት ሀይቆና መላ ኑስ ጎዳ ነ ፆሳ ዎሳርክ” ያግስ።

20 ሳሜል አሳኮ፥ “ያዮፍተ፤ ህንተ ሀ ኢታተꬃ ኡባ ኦꬅደታ፤ ሽን ህንተ ኩመꬃ ዎዛናን ጎዳስ ኪተትተ፤ እያ ካሎ አጎፍተ። 21 ፓꬆናባ ግድያ ግሾ ማዶናነ አሾና ኤቃታ ካሎፍተ። 22 ጎዳይ ባ ግታ ሱንꬃ ግሾ ባ አሳ አገና፤ እ ህንተና ባ አሰ ኦꬃናዉ ኡፋይቴስ። 23 ህንተ ግሾ ዎሳ አጋዳ ጎዳ ቆሆይ ታፐ ሃኮ፤ ታኒ ህንተና ሎኦነ ሱረ ኦግያ ታማርሳና። 24 ጎዳ ያይተ፤ ህንተ ኩመꬃ ዎዛናን አማነትድ፥ እያዉ ኪተትተ፤ ህንተዉ እ ኦꬅዳ ግታባ ሀሳይተ። 25 ሽን ህንተ ዛር ዛር ናጋራ ኦꬅኮ፥ ህንተነ ህንተ ካዎይ ꬋያና” ያግስ።