1 ህዝቅያስ ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ አቡ፤ እያ ዛካርያሳ ናአ። 2 እያ ማይዛይ ዳዊቲ ኦꬅዳይሳዳ ህዝቅያስ ጎዳ ስንꬃን ሱረባ ኦꬅስ።

3 ህዝቅያስ ባ ካዎትዳ ኮይሮ ላይꬃን፥ ኮይሮ አጌናን፥ ፆሳ ኬꬃ ፐንገታ ዶይድ ኦራꬅስ። 4 ካህነታነ ሌወታ ፆሳ ኬꬃ ዶሎሀ ባጋራ ደእያ ዳባባን ሺሽስ። 5 ኤንታኮ፥ “ሌወቶ፥ ታ ኦደይሳ ስእተ! ህንተናተꬃ ጌሽተ፤ ጎዳ ህንተ አዋታ ፆሳ ኬꬃ ጌሽተ፤ ፆሳ ኬꬃ ቱንስያባ ኡባ ድግተ። 6 ኑ አዋት አማነትቦኮና፤ ጎዳ፥ ኑ ፆሳ ስንꬃን ኢታባ ኦꬅዶሶና። ኤንቲ ጎዳ አግድ፥ ጎዳይ ደእያ በሳፈ ባንታ ሶምኦ ሀራ ሶ ዛሪድ፥ እያዉ ባንታ ዞኩዋ ዛርዶሶና። 7 ቃስ፥ ኤንቲ ፆሳ ኬꬃ ፐንገታ ጎርድዶሶና፤ ፆምፐታ ቶይስዶሶና። ፆሳ ኬꬃን እስራኤለ ፆሳስ እፃነ ጩይስቦኮና ዎይኮ ፁሳ ያርሾ ያርሽቦኮና። 8 ሄሳ ግሾ፥ ጎዳ ሀንቆይ ይሁዳ ቦላነ የሩሳላመ ቦላ ዎꬍስ። ህንተ፥ ህንተ አይፈን በኤይሳዳ ጎዳይ ኤንታ ቦላ ያሽ፥ ዳጋማነ ህርጋ የድስ። 9 ሄሳ ጋሶን፥ ኑ አዋት ማሻን ሀይቅዶሶና፤ ኑ ናይትነ ኑ ማቸት ድኤትዶሶና። 10 ጎዳ ሀንቆይ ኑ ቦላፈ ክቻና መላ ታኒ ጎዳራ፥ እስራኤለ ፆሳራ ጫቃናዉ ታ ዎዛናን ቆፓስ። 11 ታ ናይቶ፥ ህንተ ጎዳ ስንꬃን ኤቃና መላ፥ እያዉ ኦꬃና መላ፥ እያ ኦሳንቾ ግዳና መላነ እፃነ ጩይሳና መላ ጎዳይ ህንተና ዶርዳ ግሾ ቀል ጎፕተ” ያግስ።

12 ሄ በሳን ደእያ ሌወት ሀይሳፈ ካልድ ፃፈትዳይሳታ።

ቃሃታ ያራፐ አማሳያ ናኣ ማሃታነ አዛርያሳ ናኣ እዩኤላ።

ማራራ ያራፐ አብዳ ናኣ ቂሳነ ይሀልኤላ ናኣ አዛርያሳ።

ገድሶና ያራፐ ዚማ ናኣ እዮአክናነ ዮኣሀ ናኣ ኤደና።

13 ኤልፃፋና ያራፐ ሽምራነ ኡዝኤላ።

አሳፋ ያራፐ ዛካርያሳነ ማታና።

14 አማና ያራፐ ይኤላነ ሳመአ።

ኤዶታመ ያራፐ ሻማያነ ኡዝኤላ።

15 ኤንቲ ባንታ ዳቦታ ሺሽድ ባንታና ጌሽዳፐ ጉየ ካዎይ ኤንታ ኪትዳይሳዳ ጎዳ ህግያዳ ፆሳ ኬꬅ ጌሾ ዶምዶሶና። 16 ሄሳ ግሾ፥ ካህነት ጎዳ ኬꬃ ጌሻናዉ ገልዶሶና፤ ፆሳ ኬꬃ ግዶን ደእያ ቱናባ ኡባ ከስድ፥ ፆሳ ኬꬃ ዳባባ ኤህዶሶና። ያትን ሌወት ኤክድ ቀድሮና ዛንጋራን ሆልዶሶና። 17 ኤንቲ ኮይሮ አጌናን፥ ኮይሮ ጋላስ ፆሳ ኬꬃ ጌሾ ዶምዶሶና፤ ሄ አጌናን ሆስፑንꬆ ጋላስ ባራንዳ ጋክዶሶና። ሀራ ሆስፑን ጋላስ ፆሳ ኬꬃ ጎይኖስ ጊግስዶሶና። ኮይሮ አጌናን ታማነ ኡሱፑንꬆ ጋላስ ኤንቲ ኦሱዋ ፖልዶሶና።

18 ሌወት ካዋ ህዝቅያሳኮ ገልድ፥ “ኑኒ ፆሳ ኬꬃ፥ ፁሳ ያርሾ በሳነ ያርሾ በሳን ጎኤትያ ሚሸ ኡባ፥ ጎዳ ስንꬃን ዎꬅያ ኡይꬃ ፃርጴዛነ ሄ ፃርጴዛን ደእያ ሚሸታ ኡባ ጌሽዳ። 19 ካዎይ አካዝ ካዎትድ ደእያ ዎደ ፆሳስ አማነቶና እፅድ ኤፍዳ ሚሸ ኡባ ኑ ዛሪድ ጌሽዳ። ሄኮ፥ ኑ ጌሽዳ ሚሸ ኡባይ ጎዳ ያርሾ በሳ ስንꬃን ደኤስ” ያግዶሶና።

20 ካዎይ ህዝቅያስ ዎንተꬃ ጋላስ ዎንታ ጉራ ደንድድ ካታማ ሀላቃታ ሺሽድ፥ ኤንታራ እስፈ ፆሳ ኬꬅ ብስ። 21 ኤንቲ ካዎተꬃ ግሾ፥ ፆሳ ኬꬃ ግሾነ ይሁዳ አሳ ግሾ፥ ላፑን ኮርማታ፥ ላፑን ማራዘታ፥ ላፑን ዶርሳ ኡርገታነ ላፑን ኮለታ ናጋራ ያርሾስ ኤህዶሶና። አሮና ኮቸ ግድያ ካህነት፥ ጎዳ ያርሾ በሳን ሀይሳታ ያርሻና መላ ካዎይ ኪትስ። 22 ካህነት ኮርማታ ሹክድ ሱꬃ ያርሾ በሳ ቦላ ꬋርጭዶሶና። ማራዘታ ሹክድ ሱꬃ ያርሾ በሳ ቦላ ꬋርጭዶሶና። ዶርሳ ኡርገታ ሹክድ ሱꬃ ያርሾ በሳ ቦላ ꬋርጭዶሶና። 23 ናጋራ ያርሾስ ሀንያ ኮለታ ካዋ ስንነ አሳ ስን ኤህዶሶና፤ ኤንቲ ኡባይ ባንታ ኩሽያ ዴሻታ ቦላ ዎꬅዶሶና። 24 ካዎይ ፁሳ ያርሾነ ናጋራ ያርሾ ያርሻና መላ ኤንታ ኪትዳ ግሾ ካህነት ዴሻታ ሹክድ እስራኤለ አሳ ኡባ ናጋራይ አቶ ጌተታና መላ ኤንታ ሱꬃ ያርሾ በሳን ያርሽዶሶና።

25 ጎዳይ ካዋስ ቆንጨꬅ በእያ ጋደነ ናብያ ናታና ባጋራ ካዋ ዳዊቲ ኪትዳ ኪታ ህዝቅያስ ካልድ፥ ሌወታ፥ ዳላ፥ ዲꬅነ ማስንቆ ኦይꬅድ ፆሳ ኬꬃን ኤስስ። 26 ሌወት ዳዊቲ ጎኤትያ የꬃ ሚሸታ ኦይክን፥ ካህነት ዛየ ኦይክድ ኤቅዶሶና። 27 ኤንቲ ፁሳ ያርሾ ያርሻና መላ ህዝቅያስ ኪትስ። ፁሳ ያርሾይ ያርሸትያ ዎደ ዛየይነ እስራኤለ ካዋ ዳዊታ የꬃ ሚሸታን ጎዳስ የꬅ ዶመቴስ። 28 ፁሳ ያርሾይ ፖለታና ጋካናዉ ሺቆ ኡባይ ጎዳ ጎይኔስ፤ የፀይሳት የፆሶና፤ ዛየ ፑነይሳት ፑኖሶና። 29 ካህነት ያርሹዋ ፖልዳ ዎደ ካዎይነ እያራ ደእያ አሳ ኡባይ ጉልባትድ ጎይንዶሶና። 30 ካዎይ ዳዊቲነ ቆንጨꬅ በእያ አሳፍ ፃፍዳ ጋላታ ማዝሙረ ጎዳስ የፃና መላ ካዎይ ህዝቅያስነ ሀላቃት ሌወታ ኪትዶሶና፤ ኤንቲ ኡባይ ኡፋይሳን ጋላትሸ ጉልባትድ ጎይንዶሶና።

31 ሄሳፈ ጉየ፥ ህዝቅያስ፥ “ሀእ ህንተ ህንተና ጎዳስ ዱማይደታ። ያርሾነ ጋላታ ያርሾ ፆሳ ኬꬅ ኤህተ” ያግስ። ሺቅዳ አሳይ ያርሾነ ጋላታ ያርሾ ኤህዶሶና፤ ዎዛን ዶስዳ አሳይ ፁሳ ያርሾ ኤህዶሶና። 32 ሄ ሺቅዳ አሳይ ኤህዳ ፁሳ ያርሾ ታይቦይ ላፑን ታሙ ኮርማታ፥ ፄቱ ማራዘታነ ናምኡ ፄቱ ዶርሳ ኡርገታ፤ ሄ ኡባይ ጎዳስ ፁሳ ያርሾ። 33 እስፈተꬃ ያርሾስ ኡሱፑን ፄቱ ኮርማታነ ሄꬑ ሙኩሉ ዶርሳት ሺቅዶሶና። 34 ግዶሽን፥ ፁሳ ያርሾ ኡባ ሹክድ፥ ጋልባ ቃራናዉ ደእያ ካህነት ታይቦን ጉꬃ ግድያ ግሾ ኦሶይ ዉራና ጋካናዉነ ሀራ ካህነት ባንታና ጌሻና ጋካናዉ ኤንታ ዳቦ ግድዳ ሌወት ማድዶሶና። ባንታና ጌሾን ሌወት ካህነታፐ አꬍድ አማነቶሶና። 35 ፁሳ ያርሾራ ሺቅያ እስፈተꬃ ያርሹዋ፥ ሞꬉዋነ ኡሻ ያርሹዋ ጉጅያ ዎደ ፁሳ ያርሾይ ዳሮ።

ሄሳዳ ሀንድ ፆሳ ኬꬃ ኦሶይ ዛሪድ ዶምስ። 36 ህዝቅያስነ አሳ ኡባይ ኦሱዋ ኤለስድ ፖላና መላ ፆሳይ ኤንታ ማድዳ ግሾ ዳሮ ኡፋይትዶሶና።