36
ይሁዳ ካዋ እዮአካዛ
(2 ካዎ 23:30-35)
1 ሄ ቢታ አሳይ እዮስያሳ ናኣ እዮአካዛ ዶርድ እያ አዋ በሳን የሩሳላመን ካዎꬅዶሶና። 2 እዮአካዝ ካዎትያ ዎደ እያዉ ላይꬅ ላታማነ ሄꬓ፤ እ የሩሳላመን ሄꬑ አጌና ካዎትስ። 3 ግብፀ ካዎይ እዮአካዛ ካዎተꬃፈ ዎꬅስ፤ ሄꬑ ሙኩሉነ ኦይዱ ፄቱ ክሎ ግራመ ብራነ ሀስታማነ ኦይዱ ክሎ ግራመ ዎርቃ ይሁዳ አሳይ ጊራና መላ ኦꬅስ። 4 ግብፀ ካዎይ፥ ናኮይ፥ እዮአካዛ እሻ ኤልያቄመ ይሁዳ ቦላነ የሩሳላመ ቦላ ካዎꬅድ እያ ሱንꬃ እዮአቄማ ያግድ ላምስ። ያትድ እዮአቄማ እሻ እዮአካዛ ግብፀ ኤፍስ።
ይሁዳ ካዋ እዮአቄማ
(2 ካዎ 23:36—24:7)
5 እዮአቄም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ እስ ላይꬅ ካዎትስ። ባ ጎዳ ፆሳ ስንꬃን ኢታባ ኦꬅስ። 6 ባብሎነ ካዎይ ናቡካዳናፆር እያ ኦልድ፥ ባብሎነ ኤፋናዉ ናሰ ብራታ ሳንꬃላታን ቃችስ። 7 ቃስ ናቡካዳናፆር ፆሳ ኬꬃ ሚሽያ ኤክድ ባብሎነ ኤፍድ፥ ባ ካዎ ጋꬎን ዎꬅስ።
8 እዮአቄም ኦꬅዳ ሀራባይ፥ ኦꬅዳ ቱናባይነ ኦꬅዳ ኢታባ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ። እ ሀይቅን፥ እያ በሳን እያ ናአይ ዮአክን ካዎትስ።
ይሁዳ ካዋ ዮአክና
(2 ካዎ 24:8-17)
9 ዮአክን ካዎትያ ዎደ እያዉ ላይꬅ ሆስፑና፤ እ የሩሳላመን ሄꬑ አጌናነ ታሙ ጋላስ ካዎትስ። እ ጎዳ ስንꬃን ኢታባ ኦꬅስ። 10 ላይꬃ ላመን፥ ካዎይ ናቡካዳናፆር አሰ ኪትድ፥ ዮአክናነ ፆሳ ኬꬃን ደእያ አልኦ ሚሸታ እያራ እስፈ ባብሎነ ኤህስ። ያትድ እያ አዋ እሻ ሰደቅያሳ ይሁዳነ የሩሳላመ ቦላ ካዎꬅስ።
ይሁዳ ካዋ ሰደቅያሳ
(2 ካዎ 24:18-20፤ ኤርም 52:1-3)
11 ሰደቅያስ ካዎትያ ዎደ እያዉ ላይꬅ ላታማነ እስኖ፤ እ የሩሳላመን ታማነ እስ ላይꬅ ካዎትስ። 12 ባ ጎዳ ፆሳ ስንꬃን ኢታባ ኦꬅስ፤ ቃስ ጎዳ ቃላ ኦድያ ናብያ ኤርምያሳ ስንꬃን ባና ካዉሽቤና።
13 ሰደቅያስ፥ አማነታና መላ ባና ፆሳ ሱንꬃን ጫቅስዳ ናቡካዳናፆራ ቦላ ማካልስ። ጎዳ፥ እስራኤለ ፆሳኮ ስሞና እፅስ፤ ባ ዎዛና ፆሳ ቦላ ምንꬅስ። 14 ቃስ፥ ይሁዳ አሳይነ ኤንታ ካለꬅያ ካህነት፥ አማነቶና እፅዶሶና። ኤንቲ ሀራ ካዎተꬃት ኦꬅያ እፀትዳ ኦሶታ ካልድ፥ ጎዳይ የሩሳላመን ጌሽዳ ፆሳ ኬꬃ ቱንስዶሶና።
የሩሳላመ ኩንደꬃ
(2 ካዎ 25:1-21፤ ኤርም 52:3-11)
15 ጎዳይ፥ ኤንታ ማይዛታ ፆሳይ ባ አሳስነ ባ ኬꬃስ ቃትያ ግሾ፥ ባ ናበታ ኤንታዉ ዛር ዛር ኪትስ። 16 ሽን ጎዳ ሀንቆይ ኤንታ ቦላ ዎꬋና ጋካናዉነ ኤንቲ ከስ ኤክያሶ ꬋያና ጋካናዉ ፆሳ ኪታንቾታ ቀልቅስዶሶና፤ እያ ቃላ ካꬍዶሶና፤ ናበታ ቦላ ሚጭዶሶና። 17 ሄሳ ግሾ፥ ጎዳይ ካልዳወታ ካዋ ኤንታ ቦላ ደንꬅን፥ እ ኤንታ ያላጋ አደታ ፆሳ ኬꬃን ማሻን ዎꬍስ። እ ያላጋ አደታስ ዎይኮ ጌላኦታስ ዎይኮ ጭማታስ ዎይኮ ጬጋታስ ቃቶና ዉርስስ። ፆሳይ ኤንታ ኡባ ናቡካዳናፆራ ኩሸን አꬅድ እሚስ። 18 ባብሎነ ካዎይ ፆሳ ኬꬃን ደእያ ሚሸታ ኡባ፥ ግታነ ጉꬃ፥ ፆሳ ኬꬃን ደእያ ቡቁራ፥ ካዎ ቡቁራነ እያ ሞርናታ ቡቁራ ኡባ ኤክድ ባብሎነ ኤፍስ። 19 ኤንቲ ፆሳ ኬꬃ ታማን ፁግድ፥ የሩሳላመ ግምበ ድርሳ ላልዶሶና። ካዎ ጋꬉዋ ታማን ፁግድ፥ ያን ደእያ አልኦ ሚሸ ኡባ ꬋይስዶሶና።
20 ማሻፈ አትዳይሳታ ካዎይ ድእድ ባብሎነ ኤፍስ። ፋርሰ ካዎተꬃይ ደንዳና ጋካናዉ ኤንቲ እያዉነ እያ ናይታስ አይለ ግድዶሶና። 21 ጎዳይ ናብያ ኤርምያሳ ባጋራ ኦድዳ ቃላይ ፖለትስ። ዉርሰꬃን ቢታይ ላፑን ታሙ ላይꬅ አስ ባይና በሲ ግድድ ሸምፕስ። ቢታይ ሳምባታ ሸምፖ ደምስ።
22 ፋርሰ ካዎይ ቅሮስ ካዎትዳ ኮይሮ ላይꬃን ናብያ ኤርምያሳ ባጋራ ጎዳይ ኦድዳይሳ ፖልስ። ፋርሰ ካዎይ ቅሮስ ባ ካዎተꬃን ኡባን ሀይሳዳ ያግድ አዋጃና መላነ ፃፍድ ዎꬃና መላ ጎዳይ እያ አያና ደንꬅስ። 23 ፋርሰ ካዎይ ቅሮስ፥ “ጎዳይ፥ ሳሎ ፆሳይ ሀ ሳኣ ካዎተꬃታ ኡባ ታዉ እሚስ። ቃስ ይሁዳን ደእያ የሩሳላመን ታ እያዉ ፆሳ ኬꬅ ኬፃና መላ ታና ሹምስ። ፆሳ አስ ግድዳ ኦንካ ያ ቦ። ጎዳይ እያ ፆሳይ እያራ ግዶ” ያግስ።