1 የሱስ ክርስቶሳ ሀዋረይነ እያ አይለይ፥ ታኒ፥ ስሞን ጰፅሮስ፥ ኑ ፆሳነ ኑና አሽያ የሱስ ክርስቶሳ ፅሎተꬃ ባጋራ ኑይሳ መላ አልኦ አማኖ ኤክዳይሳታስ ሀ ዳብዳብያ ፃፋስ።

2 ፆሳነ ኑ ጎዳ የሱሳ ኤሮን አꬎ ኬሀተꬃይነ ሳሮይ ህንተዉ ኩሞ።

3 ባ ቦንቾንነ ሎኦተꬃን ኑና ፄግዳ እያ ኤሮን ደኦስነ ፆሳ ዳንድ ዳናዉ ኮሽያባ ኡባ ፆሳይ ባ ዎልቃን ኑስ እሚስ። 4 ህንተ ኢታ አሞ ጋሶን መትያ ሀ አላምያን ደእያ ꬋዮፐ ከስ ኤካናዳነ ፆሳ ፆሳተꬃን ሻከታናዳ፥ ሀ እሞታታ ባጋራ ዳሮ አልኦነ ግታ ኡፋይሳ ኑስ እሚስ። 5 ሄሳ ግሾ፥ ምንድ፥ ህንተ አማኑዋ ቦላ ሎኦተꬅ፥ ሎኦተꬃ ቦላ ኤራተꬅ፥ 6 ኤራተꬃ ቦላ ባና ሃሮ፥ ባና ሃሮ ቦላ ገንጫ፥ ገንጫ ቦላ ፆሳ ዳኖ፥ 7 ፆሳ ዳኖ ቦላ እሻተꬃ ኬሀተꬅ፥ እሻተꬃ ኬሀተꬃ ቦላ ሲቆ ጉጅተ። 8 ሀይሳቲ ህንተዉ ዳርድ ደእያባ ግድኮ፥ ጎዳ የሱስ ክርስቶሳ ኤሮን ማድያ አስነ አይፈራ ደእያ አስ ኦꬃና። 9 ሽን ሄሳት ባይና ኦንካ ማታን ደእያባ ፃላላ በእያ ቆቀ። እ ባ ካሰ ናጋራፐ ጌይዳይሳ ዶግስ።

10 ሄሳ ግሾ፥ ታ እሻቶ፥ ህንተ ፄሳነ ህንተ ዶሩዋ ምንꬃናዉ ካሰይሳፈ አꬅድ ምንተ። ህንተ ሄሳታ ኦꬅያባ ግድኮ፥ ꬉበተከታ። 11 ሄሳን ኑ ጎዳነ ኑና አሽያ የሱስ ክርስቶሳ መርና ካዎተꬃ ገልያ ኩመꬃ ማታይ ህንተዉ እመታና።

12 ሄሳ ግሾ፥ ህንተ ሀይሳታ ኤርያባነ ሄ ኦይክዳ ቱማን ምንድ ደእያባ ግድኮካ፥ ታኒ ሀይሳታ ኡባ ዎደ ህንተና ሀሳይሶ አግከ። 13 ታኒ ሸምፖራ ደእዳ ዎደ ኡባን ህንተና ሀሳይሳናይስ ኮሽያባ ጋዳ ቆፓይስ። 14 ኑ ጎዳ የሱስ ክርስቶሲ ታዉ ቆንጭሳዳይሳዳ ታኒ ሀ ሀይቅያ አሳተꬃ ጋምኦና ቃራ የጋዳ ባናይሳ ኤራይስ። 15 ታኒ ህንተፈ ሻከትኮካ ህንተ ሀይሳታ ኡባ ዎደ አኬካና መላ ታዉ ዳንዳኤትያባ ኡባ ኦꬃና።

16 ኑኒ ጎዳ ክርስቶሳ ዎልቃነ እያ ዩሳባ ህንተዉ ኦደይ፥ እያ ግታ ቦንቹዋ በእድፐ አትሽን፥ መꬍ ከስዳ ሀይሰ ግደና። 17 ዳሮ ዎልቃማ ቦንቹዋፈ፥ “ታኒ ኡፋይትያ፥ ታ ዶስያ ናአይ ሀይሳ” ግያ ቃላይ ይዳ ዎደ፥ ፆሳ አዋፐ ቦንቾነ ጋላታ ኤክስ። ማቶ 17:1-5፤ ማር 9:2-7፤ ሉቃ 9:28-35. 18 ኑኒ ጌሻ ዙማ ቦላ እያራ ደእያ ዎደ ሄ ቃላይ ሳሎፐ ይሽን ስእዳ።

19 ኑስ ሄሳፈ አꬍያ አማነትዳ ትንብተ ቃል ደኤስ። ሳእ ዎንታና ጋካናዉነ ባካል ህንተ ዎዛናን ዶላና ጋካናዉ፥ ꬉማን ፖእያ ፖኦ አስ ናገይሳዳ፥ ህንተ ሄ ቃላ ናግኮ ሎኦ ኦꬄታ። 20 ኡባፈ ካሰትድ ሀይሳ ኤርተ። ጌሻ ማፃፋን ፃፈትዳ ትንብተ ቃላ ኦንካ ባ ዶስዳዳ ብርሻናዉ ዳንዳኤና። 21 ትንብተ ኡባ፥ ፆሳይ ኪትዳ አሳት ጌሻ አያናይ ካለꬅን፥ ኦድዶሶናፐ አትሽን፥ አሳ ሸነን ኦድቦኮና።