1 ፃሩያ ናአይ እዮኣብ ካዎይ ዳዊቲ አበሰሎመ ላሞትዳይሳ ኤርስ። 2 ሄሳ ግሾ፥ እዮኣብ ተቁሄ ካታማ ኪትድ፥ እስ ጭንጫ ማጫስ ኤህስስ። ኢኮ፥ “ኔኒ ካዮትያ አሳዳ ሀና፤ ካዮ ማኦ ማአ፤ ቅባተ ትየቶፋ፤ ዳሮ ዎደፐ ዶምድ፥ ሀይቅዳ አሳስ ካዮትያ ማጫሳዳ ሀና። 3 ካዋኮ ባዳ ሀ ቃላ እያዉ ኦዳ” ያግስ። እዮኣብ እያ ካዋስ ኦዳናባ እዉ ኦድስ።

4 ተቁሄ ማጫስያ ካዋኮ ባዳ ቢታን ጉፋናዳ፥ “ካዋዉ፥ ታና ማዳርክ!” ያጋሱ።

5 ካዎይ፥ “ነና አይበ መትዳይ?” ያግድ ኦይችስ።

እያ፥ “ታኒ አዝን ሀይቅዳ ማጫስ። 6 ታዉ ነ አይሌስ ናምኡ አደ ናይት ደኦሶና። ኤንቲ እሶይ እሱዋራ ደንባን ዋትዶሶና፤ ኤንታ ሻካናዉ አስ ꬋይን፥ እሶይ እሱዋ ሾጭድ ዎꬍስ። 7 ታ ዳቦት ኡባይ ታ ቦላ ደንድድ፥ ‘ባ እሻ እ ዎꬍዳ ግሾ ኑኒ እያ ዎꬋና መላ ባ እሻ ዎꬍዳ ኡራ ኑስ ሀማ፤ ያትድ ኑኒ ላትያ አስ ꬋይሳና’ ያግዶሶና። ኤንቲ ታዉ ላታስ አትዳ እስ ዱንቻ ቶይሶሶና፤ ታ አዝና ሱንꬃነ እያ ኮቻ ቢታፈ ꬋይሶሶና” ያጋሱ።

8 ካዎይ ማጫሴኮ፥ “ነ ሶ ባ፤ ታ ነ ግሾ ኪታና” ያግስ።

9 ሽን ተቁሄ ማጫስያ፥ “ታ ጎዳዉ፥ ካዋዉ፥ ጎመይ ታናነ ታ አዋ ሶ አሳ ኦይኮ፤ ሽን ካዎይነ እያ አራታይ ጌሽ ግዶ” ያጋሱ።

10 ካዎይ፥ “ነ ቦላ ዶና ፖግያ ኦናካ ታኮ ኤሀ፤ እ ነና ናምአንꬆ ቦቸና” ያግስ።

11 ማጫስያ፥ “ሱꬁ ዛርያ ኡራይ ቆሆ ቦላ ቆሆ ኤሆናዳነ ታ ናኣካ ዎꬎናዳ ካዎይ ጎዳ፥ ባ ፆሳ ሱንꬃን ታዉ ጫቆ” ያጋሱ።

ካዎይ፥ “ደኦ ጎዳይ ኤርያ መላ፥ ነ ናኣ ብናናፐ እሶይካ ሳአን ዎና” ያግስ።

12 ማጫስያ ዛራዳ፥ “ታ ጎዳዉ፥ ታ ካዋዉ፥ ታ እስባ ኦደቶ” ያጋሱ።

ካዎይ፥ “ሃሳያ” ያግስ።

13 ማጫስያ፥ “ያትን፥ ኔኒ ፆሳ ደርያ ቦላ ሀይሳ መላ ቆሆ አይስ ኦꬃዲ? ካዎይ ꬋይዳ ባ ናኣ ጉየ ዛርቤና። ባ ኦድዳ ቃላን ካዎይ ባላ ግደኔ? 14 ኑ ኡባይ ሀይቃና፤ ጉክዳ ሃꬅ ስሞናይሳዳ ኑ ስሞኮ። ሽን ፆሳይ ሸምፖ ꬋዮ ዶሰና፤ ዶገትዳ አስ ኩመꬅ ꬋዮና መላ እያዉ ኦገ ጊግሴስ።

15 “ታና አሳይ ያሽስያ ግሾ ታ ጎዳ፥ ካዋስ፥ ሀይሳ ኦዳናዉ ሀእ ያስ። ‘ታኒ ነ አይልያ፥ ታኒ ካዋስ ኦዳና፤ ኦን ኤር፥ ታኒ እያ አይልያ ኦይችዳባ ካዎይ ኦꬆና አገና። 16 ካዎይ ስእድ፥ ፆሳይ ኑስ እምዳ ላታፐ ታናነ ታ ናኣ ꬋይሳናዉ ኮይያ አሳ ኩሸፐ አሻና’ ጋዳ ቆፓስ። 17 ሄሳዳካ ካዎይ ሎኦነ ኢታ ሻካናዉ ፆሳ ኪታንቾ መላ ግድያ ግሾ፥ ታ ጎዳ ካዋ ነ ቃላይ ታና ሸምፕሶ። ጎዳይ፥ ነ ፆሳይ ኔራ ግዶ” ያጋሱ።

18 ካዎይ፥ “ታኒ ነና ኦይቻና፤ ኔኒ ታፐ ቆቶፋ” ያግስ።

ማጫስያ፥ “ታ ጎዳይ፥ ካዎይ ኦደቶ” ያጋሱ።

19 ካዎይ ማጫስዉ፥ “ሀይሳ ኡባን እዮኣባ ኩሸይ ኔራ ደኢ?” ያግድ ኦይችስ።

ማጫስያ፥ “ታ ጎዳዉ፥ ካዋዉ፥ ነ ሸምፖይ ኤሮ! ኔኒ ታ ጎዳይ፥ ካዎይ፥ ኦድዳ ኡባፈ ኡሻች ዎይኮ ሀድርስ ጋናዉ ዳንዳእያ አስ ባዋ። ኤ፥ ሀይሳ ታና ኪትዳይ፥ ነ አይለ ዶናን ሀይሳ ዎꬅዳይ ነ አይልያ እዮኣባ። 20 ነ አይለይ እዮኣብ ሀይሳ ኦꬅዳይ ሀእ ደእያ ሀኖታ ላማናሳ። ካዋዉ፥ ነ ፆሳ ኪታንቾ መላ ጭንጫ ግድያ ግሾ ቢታን ሀንያባ ኡባ ኤራሳ” ያጋሱ።

21 ካዎይ እዮኣባኮ፥ “ሎኦ! ታኒ ሀይሳ ኦꬃና! ባዳ ሄ ናአተꬃ አበሰሎመ ኤካዳ ያ” ያግስ።

22 እዮኣብ ካዋ ስንꬃን ጉፋንድ፥ “ታ ጎዳዉ፥ ካዋዉ፥ ባ አይለይ ኦይችዳባ ኦꬃናዉ ኤሮ ግዳ ግሾ፥ ነ ስንꬃን ሳባ ደምዳይሳ ነ አይለይ ሀች ኤርስ” ያግስ።

23 ሄሳፈ ጉየ፥ እዮኣብ ደንድድ ገሹራ ብድ አበሰሎመ የሩሳላመ ኤክድ ይስ። 24 ሽን ካዎይ፥ “አበሰሎመይ ባ ሶ ባናዉ በሴስ፤ እ ታ ሶምኦን ከዮፖ” ያግስ። አበሰሎመይ ባ ሶ ብስ፤ ካዋ ሶምኡዋ በእቤና።

25 እስራኤለ ግዶን ማላ ሎኦተꬃን አበሰሎመ መላ ሳበትዳ አስ ባዋ። ሁጰፐ ቶሆ ጋካናዉ እያን ቦርያባይ ባዋ። 26 እ ባና ዴፅያ ዎደ ባ ሁጵያ ቃንፅሴስ። ባ ሁጵያ ቃንፅስያ ዎደ ኡባን ምዛነን ማዛኔስ፤ እያ ብናናይ ካዎ ምዛነ ልከን ናምኡ ክሎ ግራመፐ አꬌስ። 27 አበሰሎመስ ሄꬑ አደ ናእነ እስ ማጫ ናእ የለትዶሶና፤ ማጫ ናኤ ሱንꬃይ ትማሮ፤ እያ ማላ ሎኦ ናአ።

28 አበሰሎመይ ናምኡ ላይꬅ ኩመꬅ ካዋ ሶምኦ በኦና የሩሳላመን ደእስ። 29 አበሰሎመይ፥ “ታኒ ነና ካዋኮ ኪታናዉ ኮይያ ግሾ ታኮ ሃያ” ያግድ እዮኣባኮ ኪትስ፤ ሽን እዮኣብ ዮና እፅስ። ናምአንꬆ ኪትስ፤ ሽን እዮኣብ ሀእካ ዮና እፅስ። 30 አበሰሎመይ ባ አይለታኮ፥ “ሄኮ፥ ታ ጋድያ ማታን እዮኣባስ ጋደይ ደኤስ፤ እያን ባንግ ደኤስ። ብድ እያን ታማ የድተ” ያግስ። አበሰሎመ አይለት እዮኣባ ባንጋን ታማ የድዶሶና።

31 እዮኣብ አበሰሎመ ሶ ብድ፥ “ነ አይለት ታ ባንጋን አይስ ታማ የድዶና?” ያግድ ኦይችስ።

32 አበሰሎመይ፥ “ታ ፄግን ነ ዮና እፅዳ ግሾሳ። ኔኒ ካዋኮ ባዳ፥ ‘ታኒ ገሹራፐ አይስ ያድና? ታኒ ሀኖ ጋካናዉ ያን ደእዳኮ ሎኦሽን’ ያጌስ ጋዳ ታዉ ኦይቻና መላ ኮያስ። ሀእ ታኒ ካዋ ሶምኦ በአናዉ ኮያይስ፤ ታኒ ባላ ግድኮ፥ እ ታና ዎꬎ” ያግስ።

33 እዮኣብ ካዋኮ ብድ፥ አበሰሎመይ ግዳይሳ ኦድስ። ካዎይ አበሰሎመ ፄግስስ፤ አበሰሎመይ ሶ ገልድ፥ ካዋ ስንꬃን ጉፋንድ ዝግስ፤ ካዎይ አበሰሎመ ዬርስ።