1 ኑ እሻቶ፥ ኑ ጎዳ የሱስ ክርስቶሳ ዩሳባነ ኑ እያራ ጋሄታናዉ ሺቃናባስ ኑ ህንተና ዎሶስ። እሳ 2:10. 2 ትንብተን ዎይኮ ሀራ አሳፐ ስእዳ ቃላን ዎይኮ ኑፐ ኤክዳ ኪታዳ ኦꬅድ፥ “ጎዳ ጋላሳይ ጋክስ” ግድ ህንተ ዎዛናይ ዳጋሞፎነ ዋባቆፖ። 3 ህንተና ኦንካ አይ ኦገንካ ባለꬆፎ። ካሰትድ ጌላተꬃይ ቆንጮናነ ꬋዮይ በሲያ ጌላ ኡራይ ዮና ደእሽን፥ ጎዳ ጋላሳይ ጋከና። 4 አስ ጎይንያባነ ፆሳያባ ኡባ እ እፃናነ ባና ꬎቁ ኦꬃና። ሀር አቶሽን፥ ፆሳ ኬꬅ ገል ኡትድ፥ “ታኒ ፆሰ” ጋና። ዳነ 11:36፤ ህዝ 28:2.

5 ታኒ ህንተራ ደአሸ ህንተዉ ኦድዳይሳ አኬከከቲ? 6 እ ባ ጋላሳን ያናፐ አትሽን፥ ሀእ ያናይሳ አይብ እያ ተቅያኮ ህንተ ኤሬታ።

7 አሳስ ቆንጭቦና ጌላተꬃ ፁራ ዎልቃይ ሀእካ ኦꬄስ፥ ሽን ሀእ እያ ተቀይስ ደኤስ። እያ ተቀይስ ኦገፐ ክቻና ጋካናዉ እ ቆንጨና። 8 ሄሳፈ ጉየ፥ ጌላ ኡራይ ቆንጫና፥ ሽን ጎዳ የሱሲ ባ ዶናፐ ከይያ ሸምፑዋን፥ ባ ቦንቾ ዩሳን እያ ዎꬋና።እሳ 11:4. 9 ጌላ ኡራይ፥ ፃላሄ ዎልቃን ይድ ዎርዶ ማላታታነ ማላልስያባታ ኦꬃና።ማቶ 24:24. 10 ሄሳዳካ፥ ꬋዮስ ደእያ አሳታ ዱማ ዱማ ጭምያ ኢታ ኦሶን ባለꬃና። ኤንቲ ꬋይዳይ አሽያ ቱማ ዶስድ ኤኮና እፅዳ ግሾሳ። 11 ሄሳ ግሾ፥ ኤንቲ ዎርዶ ግድያባ አማናና መላ ፆሳይ ዎልቃማ ባለሶ ኤንታ ቦላ የዳና። 12 ሄስካ፥ ቱማ አማኖና አሳት፥ ናጋራ ኦሶን ኡፋይተይሳት ኡባይ ፕርደታና መላሳ።

13 ጎዳይ ዶስያ ኑ እሻቶ፥ ኑኒ ፆሳ ህንተ ግሾ፥ ኡባ ዎደ ጋላታናዉ በሴስ። ህንተ አታና መላ ፆሳይ ጌሻ አያና ዎልቃን ህንተና ጌሽዳይሳነ ህንተካ ቱማ አማንዳይሳን እ ህንተና ባይራዳ ዶርስ። 14 ፆሳይ፥ ኑ ህንተዉ ኦድዳ ዎንገላ ባጋራ ህንተና ፄግዳይ፥ ህንተ ኑ ጎዳ የሱስ ክርስቶሳራ እስፈ ቦንቸታናሳ። 15 ህዛ፥ ኑ እሻቶ፥ ምንድ ኤቅተ። ኑኒ ህንተና ኑ ዶናን ግድን ዎይኮ ዳብዳብያን ግድን ታማርስዳ ትምርትያ ኦይክተ።

16-17 ፆሳይ ኑ አዋይ ኑና ዶሴስ። እ ኑስ ኬሀ፤ እ መርና ምንꬆነ ሎኦ ኡፋይሳ ኑስ እሚስ። ህንተ ኡባ ዎደ ሎኦባ ኦꬃናዉነ ኦደታናዉ ምንꬃና መላነ ማዳና መላ ኑ ጎዳ የሱስ ክርስቶሳነ ፆሳ ኑ አዋ ዎሶስ።