1 ህዛ፥ ህንተ ክርስቶሳራ ሀይቆፐ ደንድዳይሳዳ፥ ፆሳፈ ኡሻቻ ባጋን ኡትዳ ክርስቶስ ደእያ በሳን፥ ሳሎን ደእያባታ ኮይተ። ማዝ 110:1. 2 ሳሎን ደኤይሳታ ቦላ ህንተ ቆፋ ዎꬅተፐ አትሽን፥ ሳአን ደእያባታ ቦላ ዎꬆፍተ። 3 ህንተ ሀይቆን ሻከትዳ መላ ሀ አላምያፐ ሻከትደታ። ህንተ ደኦይ ክርስቶሳራ እስፈ ፆሳን ጌምስ። 4 ህንተዉ ደኦ ግድዳ ክርስቶስ ቆንጭያ ዎደ ሄ ዎደ ህንተካ እያራ ቦንቾን ቆንጫና።

5 ሄሳ ግሾ፥ ህንተናን ደእያ አላመ አሞታ ዎꬍተ። ሄሳትካ ላይማተꬅ፥ ቱናተꬅ፥ ላይማታናዉ አሞተꬅ፥ ኤቃ ጎይኖ መላ ግድዳ ኡዘተꬅ። 6 ሀይሳታ ጋሶን ፆሳ ሀንቆይ ኪተቶና አሳ ቦላ ያና። 7 ህንተካ ካሰ ሄ ኢታ ኦግያን ብያ አሳ ግዶን ደእሸ ሀይሳታ ኦꬅደታ።

8 ሀእ ህንተ ሄሳታ ኦꬆፍተ። ቃስ ሀንቆ፥ እፆ፥ ካች፥ ዝግርስነ ቦርሶ ኦዳ ህንተፈ ድግት። 9 ጬጋ አሳተꬃ እያ ኦሱዋራ ህንተፈ ቃርዳ ግሾ፥ እሶይ እሱዋስ ዎርዶቶፕተ። ኤፈ 4:22. 10 ፆሳ መꬎ ዳንያ፥ ኤራተꬃን ላመትዳ ኦራꬃ አሳተꬃ ማእተ። መ 1:26፤ ኤፈ 4:24. 11 ሀ ኦራꬃ መተꬃን፥ ግርከ አስ ዎይኮ አይሁደ አስ፥ ቃፃረትዳይ ዎይኮ ቃፃረቶናይ፥ ባርባረ አስ *ባርባረ አስ፦ ጉሳይ ታማርቦና ዎይኮ ኤሮና ዎይኮ የለትዳ መላ ስእ ግድ ደእያ አስ ጉሱ። ዎይኮ እስኩተ አስ †እስኩተ አስ፦ ጉሳይ ዎዛና ምኖ አስ ዎይኮ ዎዛና ኢታ አስ ጉሱ። አይለይ ዎይኮ ዎማኖይ ባዋ። ክርስቶስ ኡባ፤ እ ኡባን ደኤስ።

12 ሄሳ ግሾ፥ ፆሳን ዶረትዳ አሳዳ ጌሻታነ ዶሰትዳይሳታ ግድድ፥ ማሮተꬃ፥ ኬሀተꬃ፥ አሽከተꬃነ ዳንዳአ ማእተ። ኤፈ 4:2. 13 እሶይ እሱዋ ዳንዳእተ። ኦንካ ባ ላግያን ቆሄትዳባይ ደእኮ እያዉ አቶ ጎ። ጎዳይ ህንተዉ አቶ ግዳይሳዳ ህንተካ ዎልስ አቶ ጊተ። ኤፈ 4:32. 14 ሄ ኡባ ቦላ ኡባባ እስፈ ሺሽድ ቃችያ ሲቆ ማእተ። 15 ፆሳይ ህንተና እስ አስ ኦꬅድ ፄግዳይ፥ ሳሮተꬃስ ግድያ ግሾ ክርስቶሳ ሳሮተꬃይ ህንተ ዎዛና ሃሮ።

16 ክርስቶሳ ቃላይ ህንተ ዎዛናን ኩምድ ደኦ። ጭንጫተꬃ ኡባን እሶይ እሱዋ ታማርስተነ ዞርተ። ማዝሙረን፥ ሳባንነ አያና የꬃን ፆሳ ዎዛናፐ ጋላትሸ የፅተ። ኤፈ 5:19-20. 17 ፆሳ አዋ የሱሳ ባጋራ ጋላትሸ ህንተ ኦደትያባ ዎይኮ ኦꬅያባ ኡባ ጎዳ የሱሳ ሱንꬃን ኦꬅተ።

18 ማቸቶ፥ አማንያ አሳስ በሲያባ ግድያ ግሾ፥ ህንተ አዝናታስ ሃረትተ። ኤፈ 5:22፤ 1 ጰፅ 3:1.

19 አዝናቶ፥ ህንተ ማቸታ ሲቅተ፤ ኤንታዉ ኢቶፕተ። ኤፈ 5:25፤ 1 ጰፅ 3:7.

20 ናይቶ፥ ህንተና የልዳይሳታስ ኡባባን ኪተትተ፤ ሄስ ጎዳ ኡፋይስያባ። ኤፈ 6:1.

21 አዋቶ፥ ህንተ ናይት ኡፋይስ ቃንፆና መላ ኤንታ ጫመꬆፍተ።ኤፈ 6:4.

22 አይለቶ፥ ሳአን ህንተዉ ጎዳ ግድዳይሳታስ ኡባባን ኪተትተ። ጎዳ ቦንችሸ ሱረ ዎዛናፐ ኪተትድ ኤንታ ኡፋይስተፐ አትሽን፥ አስ በኦ ግድ ኦꬆፍተ።ኤፈ 6:5-8. 23 ህንተ ኦꬅያ ኦሶ ኡባ አሳስ ግዶናሽን፥ ጎዳስ ኦꬅያ መላ ዎዛናፐ ኦꬅተ። 24 ጎዳፐ ላታ ዎይቶ ኦꬅድ ህንተ ኤከይሳ ኤርተ፤ ህንተ ጎዳ ክርስቶሳ ሀጋዜታ። 25 ፆሳይ አሳ ሶምኦ በእድ ፕርዶና ግሾ፥ ኦንካ ኢታ ኦሶ ኦꬅኮ ባ ኢታ ኦሱዋ ግሾ ዛሮ ኤካና። ኤፈ 6:5-8.