1 ሄሳፈ ጉየ፥ ጎዳይ ታና ኪትዳይሳዳ፥ ኑኒ ዞኦ አባ ኤፍያ ኦግያ ኦይክድ ጉየ ስሚድ መላ ቢታ መቶትሸ፥ ደረይ ዳርያ ሳይረ ቢታን ዳሮ ጋላሳ ቶይላትሸ ዩይዳ።

2 ሄሳፈ ጉየ፥ ጎዳይ ታኮ ሀይሳዳ ያግስ። 3 “ሀ ደረይ ዳርያ ቢታ አዱሳ ዎደ ዩይዳይስ ህንተዉ ግዳና፤ ፑደሀ ባጋ ስሚድ ቢተ። 4 አሳ ኔኒ ያጋዳ ኪታ፤ ‘ሳይረን ደኤይ ኤሳዌ ናይታ ህንተ እሻታ ግድያ ግሾ ኤንታ ቢታራ ህንተ ካንꬄታ። ኤንቲ ህንተዉ ያያና፥ ሽን ህንተ ኬህ ናገትተ። 5 ታኒ ኤንታ ቢታፈ ቶሆይ የꬍያ በሳ መላ ህንተዉ እሞና ግሾ ኤንታራ ኦለቶፍተ። ታኒ ደረይ ዳርያ ሳይረ ቢታ ላታ ኦꬃዳ ኤሳዌስ ኮይሮታዳ እማስ። 6 ህንተ ምያ ካꬃነ ኡያ ሃꬃ ኤንታፈ ሚሸን ሻምተ’ ” ያጋዳ ኪታ።

7 ጎዳይ ህንተ ፆሳይ ህንተ ኦꬅዳባ ኡባ አንጅስ፤ ህንተ ሀ ዎልቃማ መላ ቢታን ሄመትያ ዎደ ህንተና ናግስ። ኦይታሙ ላይꬃ ኡባን ጎዳይ ህንተ ፆሳይ ህንተራ ደእስ፤ ህንተዉ አይባካ ፓጭስቤና።

8 ሄሳ ግሾ፥ “ኑኒ ኑ እሻታ ግድያ ኤሳዌ ናይት ደእያ ሳይረ ቢታራ ካንꬅድ ብዳ። ቃስ ኤላታነ ኤፅዮን-ጋብራ ካታማታፐ ደንድድ፥ ማፅነ አባኮ ጋꬅያ ኦግያ አግድ፥ ሞአበ መላ ቢታራ አꬍዳ። 9 ጎዳይ ታኮ፥ ‘ታኒ ኤንታ ቢታፈ አይባካ ህንተዉ እሞና ግሾ፥ ሞአበ አሳራ ካጨቶፍተ ዎይኮ ኤንታ ኦሎፕተ። ኤራ ካታማ ታኒ ላታ ኦꬃዳ ሎፀ ኮቻስ ኮይሮ እማስ’ ” ያግስ።

10 (ሄ ቢታን ካሰ ምኖነ ዳሮ ግድዳ፥ ቃስ አናቀ ኮቻታዳ አዱሰ ግድዳ ኤምመታ ጌተትያ አሳት ደእዶሶና። 11 ኤንቲ አናቀታዳ ራፋይመታ ጌተቶሶና። ሽን ሞአበ አሳይ ኤንታ ኤምመታ ግድ ፄጎሶና። 12 ሆራ ቢታ አሳይ ካሰ ሳይረን ደእዶሶና፥ ሽን እስራኤለ አሳይ ላታና መላ ጎዳይ ኤንታዉ እምዳ ቢታን ኤንቲ ኦꬅዳይሳዳ ኤሳዋ ኮቻት ሆራታ ኤንታ ቢታፈ ሾድዶሶና። ቃስ ባንታ ስንꬃፈ ኤንታ ꬋይስድ ኤንታ በሳን ኡትዶሶና።)

13 ጎዳይ ኑኮ፥ “ሀእ ደንድተ፥ ዛረአዳ ሻፋ ፕንተ” ያግን፥ ኑኒ ዛረዳ ሻፋ ፕንዳ። 14 ኑኒ ቃደስ-ባርነፈ ደንድድ፥ ዛረዳ ሻፋ ፕናና ጋካናዉ ሀስታማነ ሆስፑን ላይꬅ አꬍስ። ሄ ዎደ ጎዳይ ኤንታዉ ጫቅዳይሳዳ ኦላስ ጋክዳ አደ ኡባይ ዉርስ። 15 ዱንካንዳ ጉታፐ ኤንቲ ኩመꬅ ꬋያና ጋካናዉ፥ ጎዳ ኩሸይ ኤንታ ቦላ ዴፅስ።

16 ኦላስ ጋክዳ አደ አሳ ኡባይ ኩመꬅ ꬋይዳፐነ አሳ ግዶፈ ሀይቅድ ዉርዳፐ ጉየ፥ 17 ጎዳይ ታኮ፥ 18 “ኤራ ኦግያራ ሀች ህንተ ሞአበ ቢታ ካንꬄታ። 19 ህንተ አሞነ አሳ ቢታ ጋክያ ዎደ ኤንታ ቦቾፍተ ዎይኮ ኤንታራ ኦየቶፍተ። አሞነ አሳታ ቢታፈ አይብባካ ታኒ ህንተዉ ላታ ኦꬃዳ እምከ። ታኒ ሄ ቢታ ሎፀ ኮቻስ ላታ ኦꬃዳ ኮይሮ እማስ” ያግስ።

20 [ሄ ቢታይ ካሰ ያን ደእያ አሳይ ፄገትያ ሱንꬃ ራፋይመታ ቢታ ጌተትድ ፄገቴስ። ቃስ አሞነት ኤንታ ዛምዙመታ ግድ ፄጎሶና። 21 ኤንቲ አናቀታዳ አዱሰ፥ ምኖነ ዳሮ ደረ፥ ሽን ጎዳይ ኤንታ ꬋይስን፥ አሞነት ኤንታ ቢታ ላትድ ኡትዶሶና። 22 ጎዳይ ሳይረን ደእያ ኤሳዌ ኮቻስ ኦꬅዳይሳዳ፥ ኤንታ ቦላ ኦꬅስ። ሄስካ እ ሄ ቢታን ደእያ ሆራታ ꬋይስን፥ ኤሳዌ ኮቻይ ኤንታ ቢታ ላትድ ሀች ጋካናዉ ኡትዶሶና። 23 ጋዛ ጋካናዉ ደእያ ሄራን ደእያ አዌት፥ ካፍቶረ ቢታፈ ይዳ ካፍቶረት ኤንታ ꬋይስድ ኤንታ ቢታን ኡትዶሶና።]

24 ቃስካ ጎዳይ ኑኮ፥ “ደንድተ፤ አርኖና ሻፋ ፕንተ። ሄኮ፥ አሞረ ቢታ አስ ግድዳ ሀሰቦና ካዋ ስሆናነ እያ ቢታ ታ ህንተ ኩሸን አꬃዳ እማስ፤ እያ ኦልድ እያ ቢታ ላትተ። 25 ሀችፈ ዶምን ሳሎፐ ጋርሳን ደእያ አሳ ኡባይ ህንተዉ ያያና መላ ታኒ ኦꬃና። ኤንቲ ህንተባ ስእያ ዎደ ኡባን ያሻን ኮኮራና” ያግስ።

26 ሄሳፈ ጉየ፥ ቅደሞታ መላ ቢታፈ ሀሰቦና ካዋ ስሆናስ ኪታንቾታ ቦላ ሀይሳዳ ያጋዳ ሳሮ ቃላ ኪታስ። 27 “ኑና ነ ቢታራ አꬃርክ፤ ኑኒ ዎጋ ኦግያ ፃላላ ኦይክድ ባና፤ እያፐ ኡሻች ዎይኮ ሀድርስ ጎኮ። 28 ኑኒ ምያ ካꬃስነ ኡያ ሃꬃስ ሚሸ ቃንፃና። ኑ ኮየይ ነ ቢታራ ካንꬅ አꬃ ፃላላ። 29 ሳይረን ደእያ ኤሳዌ ኮቻትነ፥ ኤራን ደእያ ሞአበ ኮቻት ኑና አꬅዳይሳዳ ጎዳይ ኑ ፆሳይ፥ ኑስ እምያ ቢታስ ዮርዳኖሰ ሻፋ ኑኒ ፕናና ጋካናዉ ያራ ኑና አꬃ” ያጋስ። 30 ሽን ሀሰቦና ካዎይ ስሆነይ ኑና አꬆና እፅስ። ጎዳይ ህንተ ፆሳይ ሀእ ኦꬅዳይሳዳ እያ ህንተ ኩሸን አꬅድ እማናዉ ኮይዳ ግሾ እያ ዎዛና ሙምስስድ፥ ኦቶራንቾ ኦꬅስ።

31 ሄሳፈ ጉየ ጎዳይ ታኮ፥ “ሄኮ፥ ስሆናነ እያ ቢታ ታ ነዉ አꬃዳ እሞ ዶማስ፤ ሀእ ፆናዳ እያ ቢታ ላታ” ያግስ።

32 ስሆነይ ባ ኦላንቾታ ኡባ ኤክድ ያሃፃ ጌተትያ በሳን ኑራ ኦለታናዉ ከይስ። 33 ሽን ጎዳይ ኑ ፆሳይ ኑስ እያ አꬅድ እምን፥ እያ፥ እያ አደ ናይታነ እያ ኦላንቾታ ኡባ ኑኒ ዎꬍዳ። 34 ሄ ዎደ ኑኒ እያ ካታማታ ኡባ ኦይክድ፥ እያን ደእያ አደ፥ ማጫነ ናአ ኡባ አሾና ꬋይስዳ። 35 ኤንታ መህያነ ኑኒ ኦይክዳ ካታማታፐ ድእዳይሳ ፃላላ ኑስ ኤክዳ። 36 አርኖና ዛንጋራ ጋፃን ደእያ አሮኤራፐነ ሄ ዛንጋራ ግዶን ደእያ ካታማፐ ብድ ጋላዳ ቢታ ጋካናዉ ኑራ ኤቀትዳ እስ ካታምካ ዴና። ጎዳይ ኑ ፆሳይ ኤንታ ኡባ ኑ ኩሸን አꬅድ እሚስ። 37 ሽን ኑኒ አሞነ ቢታኮ፥ ያቦቃ ሻፋ ጋፃን ደእያ ቢታኮ፥ ገዘ ቢታን ደእያ ካታማታኮነ ጎዳይ ኑ ፆሳይ ኑኒ ቦና መላ ድግዳ በሳ ኡባ ሺቅቦኮ።