1 ሀእካ እስራኤለ አሳዉ፥ ህንተ ደኦን ዳና መላነ ጎዳይ፥ ህንተ ማይዛታ ፆሳይ፥ ህንተዉ እምያ ቢታ ህንተ ላታና መላ ታ ህንተና ታማርስያ ዎጋነ ህግያ ስእተነ ኦꬅተ። 2 ታ ህንተና ኪትያ፥ ጎዳ ህንተ ፆሳ ኪታ ናግተፐ አትሽን፥ እያ ቦላ አይኮካ ጉጆፍተ፤ እያፐ አይኮካ ፓጭሶፕተ። 3 ብኤል-ፋጎራ ዙማ ቦላ ጎዳይ ኦꬅዳባ ህንተ፥ ህንተ አይፈን በእደታ። ጎዳይ፥ ህንተ ፆሳይ ብኤል-ፋጎራ ኤቃ ጎይንዳይሳታ ኡባ ህንተ ግዶፈ ꬋይስስ። 4 ሽን ህንተ ጎዳስ፥ ህንተ ፆሳስ አማነትዳ ግሾ፥ ሀች ጋካናዉ ኡባይካ ደኦን ደኤታ።

5 ሄኮ፥ ህንተ ላታናዉ ገልያ ቢታን ኦꬃና መላ ጎዳይ፥ ታ ፆሳይ ታና ኪትዳ ዎጋነ ህግያ ታ ህንተና ታማርሳስ። 6 ህንተ ኤንታ ናግተነ ኦꬅተ። ህንተ ሄሳ ኦꬅኮ፥ ህንተ አይ መላ ጭንጨኮ ሀራ አሳይ ህንተና በአና። ኤንቲ ሀ ዎጋባ ስእያ ዎደ፥ “ቱማካ ሀ ግታ ካዎተꬃይ ጭንጫነ አኬካንቾ ካዎተꬅ” ያጋና። 7 ኑኒ እያ ፄግያ ዎደ ኡባን ጎዳይ፥ ኑ ፆሳይ ኑስ ማታ ግደይሳዳ ፆሲ ማታ ግድዳ ሀራ አይ ዎልቃማ ካዎተꬅ ደኢ? 8 ታኒ ሀች ህንተ ስንꬃን ዎꬅያ ሀ ህገ ኡባ መላ ፅሎ ግድዳ ዎግነ ህገይ ደእያ ሀራ አይ ግታ ካዎተꬅ ደኢ?

9 ህዛ ነ ደኦ ላይꬃ ኡባን ሀ ነ በእዳባ ኡባ ዶጎና መላነ ነ ዎዛናን ዎꬃና መላ ናገታ። ነ ናይታነ ነ ናይታ ናይታ ታማርሳ። 10 ኮሬባ ዙማ ቦላ ጎዳ፥ ህንተ ፆሳ ስንꬃን ህንተ ኤቅዳ ዎደ ጎዳይ ታኮ፥ “ታ ቃላ ኤንቲ ስእድ፥ ባንታ ላይꬃ ኡባን ታዉ ያያና መላነ ባንታ ናይታ ሄሳ ታማርሳና መላ አሳ ታኮ ሺሻ” ግዳይሳ አኬክተ። 11 ሄ ዎደ ህንተ ሺቅድ ዙማ ፃጶን ኤቅደታ፤ ሳሎ ጋካናዉ ታም ኤፅስ። ሄ ዙማ ፃጶይ ሳካና ꬉማንነ ሻራን ጎዘትስ። 12 ጎዳይ ታማ ግዶን ግድድ ህንተዉ ኦድስ። ህንተ እያ ግርሳ ስእደታፐ አትሽን፥ እያ ማላ በእቤከታ። 13 ህንተ ኦꬃና መላ እ ህንተና ኪትዳ ባ ጫቁዋ ህንተዉ ኦድስ፤ ሄስካ ታሙ ኪታታ። እ ኤንታ ናምኡ ሎቸ ሹቻታ ቦላ ፃፍስ። 14 ህንተ ላታናዉ ብያ ቢታን ኦꬃና መላ ዎጋነ ህግያ ህንተና ታማርሳና መላ ጎዳይ ታና ሄ ዎደ ኪትስ።

15 ጎዳይ ኮሬባ ዙማ ቦላ ታማ ግዶን ግድድ ህንተዉ ኦድዳ ጋላስ ህንተ እያ ማላ በእቦና ግሾ ሎይꬅ ናገትተ። 16 አደ ዎይኮ ማጫ መꬎን ኦሰትዳባ ግድን፥ 17 ሳአን ደእያ ዶአ ኡባ ሌምሶን ግድን፥ ሳሎራ ፓልያ ካፎ ኡባ ሌምሶን ግድን፥ 18 ሳአ ቦላ ኡሎራ ጎሸትያ መተꬃ ሌምሶን ግድን፥ ሃꬃ ግዶን ደእያ ሞሎ ሌምሶን ግድን፥ ህንተ ቱኖና መላ ህንተዉ ፆሰ ኦꬅድ መꬎፍተ። 19 ሳሎ ፑደ ፄልዳ፥ ጎዳይ ነ ፆሳይ ሳሎፐ ጋርሳን ደእያ ካዎተꬃታስ እምዳ አዋ፥ አጌና፥ ፆልንቶታነ ሳሎ መተꬃታ ኡባ በእዳ፥ ነ ኤንታዉ ጎይናዳ ባሎና መላ ናገታ። 20 ሽን ጎዳይ ህንተና ሀች ህንተ ሀንዳይሳዳ ባዉ ዱማትዳ አሰ ኦꬃናዉ ብራታ ሴርስያ ጮጨ መላ ግድዳ ግብፀፈ ከስድ ኤህስ።

21 ህንተ ጋሶን ጎዳይ ታና ሀንቀትድ፥ ዮርዳኖሰ ፕኖና መላነ ጎዳይ ህንተ ፆሳይ፥ ላታ ኦꬅድ ህንተዉ እምያ ሎኦ ቢታ ታኒ ገሎና መላ ጫቅስ። 22 ሄሳ ግሾ፥ ታኒ ዮርዳኖሰ ሻፋ ፕኖና ሀ ቢታን ሀይቃና፥ ሽን ህንተ ፕንድ ሄ ሎኦ ቢታ ላቴታ። 23 ህዛ ጎዳይ፥ ህንተ ፆሳይ ህንተራ ጫቅዳ ጫቁዋ ዶጎፕተ። ጎዳይ፥ ነ ፆሳይ ነና ኦꬆፋ ግዳ አይ መꬎን ኦሰትዳ ምስለ ነዉ ኤቃ ኦꬆና መላ ናገታ። 24 ጎዳይ፥ ነ ፆሳይ ምያ ታማነ ቃናትያ ፆሲ።

25 ነ ናይታነ፥ ናይታ ናይታ የላዳ ሄ ቢታን አዱሳ ዎደ ደእያ ዎደ አይ መꬎን ኦሰትዳ ምስለ ጎይናዳ ቱንኮ፥ ቃስ ጎዳ፥ ነ ፆሳ ሀንቀꬃናዉ እያ ስንꬃን ኢታባ ኦꬅኮ፥ 26 ህንተ ዮርዳኖሰ ሻፋ ፕንድ ላታናዉ ብያ ቢታፈ እሶይካ አቶና ኤለ ꬋያናዉ ደኤይሳስ፥ ታ ሀች ህንተ ቦላ ሳሎነ ሳአ ማርካያይስ። ህንተ ፖሎ ꬋያናፐ አትሽን፥ ሄ ቢታን አዱሳ ዎደ ደኤከታ። 27 ጎዳይ ህንተና ሀራ አሳ ግዶን ላላና፤ ህንተና እ ላልያ ካዎተꬃታ ግዶን ህንተ ታይቦይ ጉꬃ ግዳና። 28 ያን ህንተ ምꬃፈነ ሹቻፈ አሳ ኩሸን ጊግዳ በኦና፥ ስኦና፥ ሞናነ ስንጎና ፆሳታ ጎይናና። 29 ሽን ያን ደአሸ ነ ጎዳ፥ ነ ፆሳ ኮያና፤ ነ እያ ኩመꬃ ዎዛናፐነ ኩመꬃ ሸምፖፈ ኮይኮ ደማና። 30 ሄ መቶ ኡባ ግዶን ነ ኡንኤታዳ ደእያ ዎደ ዉርሰꬃን ጎዳኮ፥ ነ ፆሳኮ ስማናነ እያ ቃላስ ኪተታና። 31 ጎዳይ፥ ነ ፆሳይ ማሮተꬃን ኩምዳ ፆሰ ግድያ ግሾ፥ እ ነና አገና ዎይኮ ꬋይሰና፤ ነ ማይዛታስ ጫቅዳ ጫቁዋ ዶገና።

32 ጎዳይ ቢታን አሰ መꬍዳ ጋላሳፐ ዶምድ፥ ህንተፈ ካሰ አꬍዳ ዎድያ አነ ፕልግተ፤ ሄሳ መላ ግታባይ ፖሎ ሀን ኤርያኮ ዎይኮ ስኤትድ ኤርያኮ ሳሉዋስ ሀ ጋፃፐ ያ ጋፃ ጋካናዉ አነ ኦይችተ። 33 ታማ ላጮ ግዶን ጎዳይ ሃሳይን ስእድ፥ ህንተ ꬋዮና ደኦን ደኤይሳዳ ጎዳይ ኦድሽን ስእድ፥ ደኦን ደእዳ ሀራ አስ ደኢ? 34 ዎይኮ ጎዳይ፥ ህንተ ፆሳይ ህንተ ፄልሽን፥ ግብፀ ቢታን ህንተዉ ኦꬅዳይሳዳ ፓጨን፥ ማላታን፥ ማላልስያባን፥ ኦላን፥ ዎልቃማ ኩሸንነ ምጨትዳ ቀሰን፥ ግታ ያሻን ሀራ ካዎተꬃ ግዶ ገልድ፥ እስ ካዎተꬃ ባዉ ኤካናዉ ቡተትዳ ሀራ ፆሲ ደኢ? 35 ጎዳይ፥ ፆሰ ግደይሳ ህንተ ኤራና መላ ሄሳ እ ህንተና በስስ፤ እያፐ አትሽን፥ ሀራ ፆሲ ባዋ። 36 እ ህንተና ታማርሳናዉ ኮይዳ ግሾ፥ ባ ግርሳ ሳሎፐ ስስስ። ቃስ ሀ ሳአን ባ ግታ ታማ ህንተና በስስ፤ ሄ ታማ ግዶፈ ህንተ እያ ቃላ ስእደታ። 37 እ ሄሳ ኦꬅዳይ ህንተ አዋታ ሲቅድ፥ ኤንታፈ ጉየ የለትያ ኤንታ ሼሻታ ዶርዳ ግሾ፥ ህንተና ግብፀፈ ባ ግታ ዎልቃን ከስስ። 38 ሀች ህንተ በኤይሳዳ፥ ህንተና ገልሳናዉነ ኤንታ ቢታ ህንተዉ ላታ ኦꬅድ እማናዉ፥ ህንተፈ ዳርያነ ዎልቃምያ ካዎተꬃታ ህንተ ስንꬃፈ የደꬅድ ከስስ። 39 ህዛ፥ ቦላ ሳሎን ግድን፥ ጋርሳ ሳአን ግድን፥ ጎዳይ ፆሰ ግደይሳ ኤርተ፤ ህንተ ዎዛናን ዎꬅተ፤ ሀራ ፆሲ ባዋ። 40 ሄሳ ግሾ፥ ህንተዉነ ህንተፈ ጉየ ህንተ ናይታስ ኡባባይ ሎኦ ግዳና መላ፥ ቃስ ጎዳይ ህንተ ፆሳይ ህንተዉ መርናዉ እምያ ቢታን ህንተ ላይꬃይ አዱቃና መላ፥ ታኒ ሀች ህንተና ኪትያ ዎጋነ ህግያ ናግተ።

41 ሄሳፈ ጉየ፥ ሙሰይ ዮርዳኖሰ ሄፍንꬃን ዶሎሀ ባጋራ ሄꬑ ካታማታ ዱማይስ። 42 ሄሳ እ ዱማይዳይ ካሰ ሞርከተꬅ ባይና ደእሽን፥ ኤሮና ደእሸ አሰ ዎꬍዳ አስ ያ ባቃታና መላሳ። ሄ ኡራይ ሄ ካታማታፐ እሱዋኡ ባቃትድ ባ ሸምፑዋ አሻናዉ ዳንዳኤስ። 43 ሄሳ ግሾ፥ ሮቤላ ኮቻስ ጋꬋን ደረ ቦላ ደእያ ቦሶራ ካታማ፥ ጋደ ኮቻስ ጋላዳን ደእያ ራሞታነ ምናሰ ኮቻስ ባሳነን ደእያ ጎላና ካታማታ ዱማይስ።

44 ሙሰይ እስራኤለ አሳስ እምዳ ጎዳ ህገይ ሀይሳ፤ 45 ሙሰይ ሀ ዎጋ፥ አዋጁዋነ ህግያ ኤንቲ ግብፀፈ ከይዳ ዎደ እሚስ። 46 ሄስ ኤንታዉ እመትዳይ ኤንቲ ቤት-ፓኦራ ካታማ ስንꬃን ደእያ ዮርዳኖሰፐ ዶሎሀ ባጋራ ደእያ ዛንጋራን ደእሽና። ሄ በሳይ ሙሰይነ እስራኤለ አሳይ ግብፀፈ ከይዳ ዎደ ኦልድ ፆንዳ፥ ሀሰቦናን ኡትድ አሞረ ሃርያ ካዋ ስሆና ቢታ። 47 ሄ ዎደ ኤንቲ እያ ቢታነ ባሳነ ካዋ ኦገ ቢታ፥ ሄስካ ዮርዳኖሰፐ ዶሎሀ ባጋን ደእያ ናምኡ አሞረ ካዎታ ላትዶሶና። 48 ሄ ቢታይ አርኖና ዛንጋራን አሮኤራ ካታማፐ ብድ፥ ስርዮና ደርያ ጋኬስ፤ ስርዮና ጌተትድ ፄገትያ ደረይ አርሞና ዙማ። 49 ሄ ቢታይ ዮርዳኖሰፐ ዶሎሀ ባጋራ ደእያ አራባ ቢታ ኡባ ኤክድ ብድ፥ ፕስጋ ደርያ ፃጶን ደእያ ማፅነ አባ ጋኬስ።