1 ኔኒ ጎዳ ነ ፆሳስ ፖሎ ኪተትኮ፥ ሀች ታ ነዉ እምያ ኪታ ኡባ ምንꬃዳ ናግኮ፥ ጎዳይ፥ ነ ፆሳይ ቢታን ደእያ ካዎተꬃታ ኡባፈ አꬅድ ነና ꬎቁ ꬎቁ ኦꬃና። 2 ኔኒ ጎዳ፥ ነ ፆሳስ ኪተትኮ፥ ሀይሳፈ ካልድ ደእያ አንጆ ኡባይ ነባ ግዳና።

7 ነ ቦላ ደንድያ ነ ሞርከታ፥ ጎዳይ ነ ስንꬃን ፆነትዳይሳታ ኦꬃና። ኤንቲ ነ ቦላ እስ ኦገራ ያና፥ ሽን ላፑን ኦገራ ነ ስንꬃፈ ባቃታና።

8 ጎዳይ ነ ኩሸይ ኦይክያባነ ነ ሻልያ አንጃና፤ ጎዳይ፥ ነ ፆሳይ ነዉ እምያ ቢታን ነና አንጃና።

9 ኔኒ ጎዳ፥ ነ ፆሳ ኪታ ናግኮነ እያ ኦግያን ቢኮ፥ እ ነዉ ጫቅዳይሳዳ ጎዳይ ነና ባዉ ጌሻ ደረ ኦꬅድ ኤሳና። 10 ሄሳፈ ጉየ፥ ቢታን ደእያ አሳ ኡባይ ጎዳይ ባ ሱንꬃን ነና ፄግዳይሳ በእድ ያያና። 11 ጎዳይ ነዉ እማናዉ ነ ማይዛታስ ጫቅዳ ሄ ቢታን፥ ነ ኡሎ አይፍያ፥ ነ መህያ፥ ነ ጎሻ አይፍያ ዳርስድ አንጃና። 12 ነ ኩሸ ኦሶ ኡባ አንጃናዉነ፥ ጎዳይ ነ ቢታስ እራ ዎደን ዎደን ቡክሳናዉ ባ ምንጃ ኬꬃ፥ ሳሎ ፐንግያ ነዉ ዶያና። ኔኒ ዳሮ ካዎተꬃታስ ገደ ታልአናፐ አትሽን፥ ኦደፈካ ሃ ታልአካ። 13 ጎዳይ ነና ኡባስ ካጨ ከሳናፐ አትሽን፥ ጎይና ከሰና። ሀች ታ ነዉ እምያ፥ ጎዳ፥ ነ ፆሳ ኪታ ስአዳ፥ ምንꬃዳ ናግኮ፥ ነ ቦላ ግዳናፐ አትሽን፥ ጋርሰ ግዳካ። 14 ታ ነዉ ሀች እምዳ ኪታፐ ሀድርስ ዎይኮ ኡሻች ጋዳ፥ ሀራ ፆሳታ ካሎፋ፤ ኤንታ ጎይኖፋ።

15 ሽን ኔኒ ጎዳ፥ ነ ፆሳስ ኪተቶና እፃዳ፥ ሀች ታ ነና ኪትያ ዎጋነ ህግያ ኡባ ናጎና እፅኮ፥ ሀይሳፈ ካልድ ደእያ ባደꬃት ኡባይ ነ ቦላ ያናነ ነና ደማና።

20 ኔኒ ኢታ ኦሶ ኦꬃዳ ታና አግዳ ግሾ፥ ኔኒ ኤሶን ꬋያና ጋካናዉ ነ ኦꬅያ ኦሶ ኡባን ጎዳይ ባደꬅ፥ ዳጋማነ ካዉሻተꬅ የዳና። 21 ኔኒ ላታናዉ ብያ ቢታፈ ꬋያና ጋካናዉ ጎዳይ፥ ጋዶይ ኔፐ ዱፆና መላ ኦꬃና። 22 ጎዳይ ነና ግልቃተꬃን፥ ምሻን፥ ማዱንꬃን፥ ፁግያ አዋን፥ ኮሻን፥ ዎልኦንነ ካꬅ ꬋይስያ ሀርመን ነ ꬋያና ጋካናዉ ሾጫና። 23 ኔፐ ቦላራ ደእያ ሳሎይ ናሰ ብራታ ግዳና፤ ኔፐ ጋርሳራ ደእያ ቢታይ ብራታ ግዳና። 24 ጎዳይ ነ ቢታን ቡክያ እራ ብዶነ ባና ከሳና፤ ኔኒ ꬋያና ጋካናዉ ሳሎፐ ባን ቡካና።

25 ጎዳይ ነና ነ ሞርከታን ፆንሳና። ነኒ ኤንታ ኦላናዉ እስ ኦገራ ከያና፤ ሽን ላፑን ኦገራ ነ ኤንታ ስንꬃፈ ባቃታና። ቢታን ደእያ ካዎተꬅ ኡባይ ነ ቦላ ጋክዳባ በእድ፥ ያሻን ኮኮራና። 26 ነ አሀይ ሳሎ ካፎታስነ ባዞ ዶአታስ ካꬅ ግዳና፤ ኤንታ የደꬅያ ኦንካ ዴና።

27 ጎዳይ ነና ፓፆይ ባይና ግብፀ ጋዶን፥ ክፃን፥ ማዱንꬃንነ ፑሶ ሄርገን ሾጫና። 28 ጎዳይ ነና ጎሻተꬃን፥ ቆቀተꬃንነ ዳጋማን ሾጫና። 29 ሴታ ጋላስ ኔኒ ቆቀይ ታታፈይሳዳ ታታፋና፤ ነ ኦꬅያባ ኡባይ ነዉ ጊጎና እፃና። ነ ደኦ ላይꬃ ኡባን ነ ኡንኤታናነ ቦንቀታዳ ዳና። ነና ማድያ አስ ደማካ።

30 ነ ማቾ ኦይቻ ጊግሳና፥ ሽን እዮ ሀር ዳፍ ኤክድ ኢሳና። ኔኒ ኬ ኬፃና፥ ሽን እያን ደአካ። ዎይነ ቶካና፥ ሽን እያ አይፍያ ማካ። 31 ነ ቦራይ ነ ስንꬃን ሹከታና፥ ሽን እያ አሹዋ ማካ። ነ ሀረይ ኔፐ ዎልቃን ኤከታና፥ ሽን ነዉ ጉየ ስመና። ነ ዶርሳት ነ ሞርከታስ እመታና፥ ኤንታ አሻናዉ ነና ማድያ አስ ዴና። 32 ነ አይፈይ በእሽን ነ አደ ናይትነ ማጫ ናይት ሀራ ካዎተꬃስ እመታና። ኤንቲ ስምን በአና ጋዳ ፄልሽን፥ ነ አይፈይ ቶሉ ግድ አታና፤ ሄሳ ድጋናዉ ነዉ ዎልቅ ዴና። 33 ነ ቢታ አይፍያነ ነ ጫዋ ኡባ ነ ኤሮና አስ ማና፤ ነ ደኦ ላይꬃ ኡባን ኡንኤትዳይሳነ ናቀትዳይሳ ግዳና። 34 ነ በእያ ኢታት ነና ጎሻና። 35 ጎዳይ ፓፆይ ባይና ኢታ ማዱንꬃን ነ ጉልባታነ ነ ዎድርያ ሀርግሳና፤ ቶሆፐ ሁጰ ጋካናዉ፥ ነና ሄ ማዱንꬃን ሾጫና።

36 ጎዳይ ነናነ ነ ካዋ፥ ነናነ ነ ማይዛታ ኤሮና አሳ ቢታ ኤፋና። ሄሳን ኔኒ ምꬃፈነ ሹቻፈ ኦሰትዳ ሀራ ፆሳታ ጎይናና። 37 ጎዳይ ነና ላልያ ሀራ ካዎተꬃታ ግዶን ኔኒ ሚቻስነ ካሳስ አታና።

38 ኔኒ ዳሮ ካꬅ ነ ጎሻን ዘራና፤ ሽን ቦለይ ምድግን፥ ጉꬃ ካꬅ ሺሻና። 39 ዎይነ ቶካዳ እያ ሀርማና፥ ሽን ጉፁነይ እያ ምድግን፥ እያፐ አይፈ ደማካ ዎይኮ እያፐ ኡያካ። 40 ነ ቢታ ኡባን ሻማሆይ ዶላና፥ ሽን አይፈይ ቆቆፈትድ ዉርያ ግሾ፥ ሻማሆ ዛይተ ደማካ። 41 ነ አደነ ማጫ የላና፥ ሽን ኦል ድእድ ኤፍያ ግሾ ኤንቲ ኔራ ዶኮና። 42 ነ ምꬃነ ነ ቢታ አይፍያ ቦለይ ዉርሳና።

43 ነ ግዶን ደእያ በተ አሳይ ነ ቦላ ꬎቁ ꬎቁ ጋና፥ ሽን ነ ጉየ አታዳ ዝቅ ዝቅ ጋና። 44 እ ነዉ ታልአናፐ አትሽን፥ ነ እያዉ ታልአካ፤ እ ሁጰ ግዳና፤ ኔኒ ጎይና ግዳና።

45 ጎዳ፥ ነ ፆሳ፥ ነ ኪተቶና እፅዳ ግሾነ እያ ዎጋነ ህግያ ናጎና እፅዳ ግሾ፥ ነ ꬋያና ጋካናዉ ሀ ባደꬃት ኡባይ ነ ቦላ ዎꬋና፤ ነና ኤንቲ የደꬃና። 46 ሀ ባደꬃት ነ ቦላነ ነ ኮቻ ቦላ መርናዉ ማላታነ ማላልስያባ ግዳና። 47 ነዉ ሳእ እንጀትዳ ዎደ ጎዳ፥ ነ ፆሳ ኡፋይሳንነ ጋላታን ጎይኖና ግሾ፥ 48 ነና ኮሻን፥ ሳሞን፥ ካሎተꬃንነ መቶን ኡባባ ꬋያዳ፥ ጎዳይ ነ ቦላ የድያ ነ ሞርከታስ ሃረታና። ጎዳይ ነና ꬋይሳና ጋካናዉ ነ ሞርገን ብራታ ቃምባራ ዎꬃና።

49 ጎዳይ ነ ኤንታ ቃላ ኤሮና ካዎተꬃታ፥ ቢታ ጋፃፐ አንኮይ ፕራꬍድ ዎይሳዳ ነ ቦላ ኤሀና። 50 ኤንቲ ዎዛና ምኖታ፤ ጭማ ቦንቾናይሳታ፤ ናይታስ ቃቶናይሳታ። 51 ነ ꬋያና ጋካናዉ ኤንቲ ነ መህያነ ጎሻ አይፍያ ማና። ኔኒ ꬋያና ጋካናዉ ነ ካꬃ፥ ነ ዎይንያ፥ ነ ዛይትያ፥ ነ ሚዛነ ነ ዶርሳ ዉድያ ማሮኮና። 52 ጎዳይ፥ ነ ፆሳይ ነዉ እምያ ቢታን ደእያ ነ አማነትያ አዱሰነ ምኖ ድርሳት ላለታና ጋካናዉ ነ ካታማ ዩሹዋ ተቅድ ነና ኡንኤꬃና።

53 ነ ሞርከት ካታማ ተቅድ ነና ኡንኤꬅያ ዎደ ምያባ ꬋያዳ፥ ጎዳይ ነ ፆሳይ ነዉ እምዳ ነ ኡሎ አይፈ ግድዳ ነ አደ ናይታነ ነ ማጫ ናይታ ማና። 54 ነ ግዶን ሀር አቶሽን ካሰ እንጀን ደእዳ አስካ ባ እሻስ፥ ባ ዶስያ ማቸስነ ባ የልዳ ናይታስ ባ ካꬃፈ ሻከና። 55 ሞርከት ካታማ ተቅድ ኡንኤꬅያ ዎደ ማናባይ ሀር ባይና ግሾ፥ ምያ ባ ናይታ አሹዋፐ ሀራ ኦደስካ እመና። 56 ነ ግዶን ካሰ እንጀን ደእዳ፥ ባ እንጅያፈ ደንዶይሳን ሳአ የꬋናዉ ሻተትያ ማጫስያ፥ ባ ዶስያ አዝናስነ ባ የልዳ ናይታስ ኡዘታና። 57 ሞርከት እያ ደእያ ካታማ ተቅድ እዮ ኡንኤꬅዳ ግሾነ ዋይስዳ ግሾ፥ እዉ ሀር ምያባይ ꬋይን፥ ባ የልዳ ናኣነ ዶኣ ኤንታ ጋꬆና ጌማን ባርካ ማና።

58 ሀ ማፃፋን ፃፈትዳ ህገታ ነ ናጎና እፅኮ፥ ማላልስያነ ያሽያ ጎዳ፥ ነ ፆሳ ሱንꬃ ቦንቾና እፅኮ፥ 59 ነ ቦላነ ነ ኮቻ ቦላ ጎዳይ፥ ያሽያ ጋዶ፥ ዳሮ ዎደ ጋምእያ፥ ፓፆይ ባይና ኢታ ሀርገ የዳና።

60 ካሰ ግብፀ አሳ ቦላ በአዳ፥ ነ ያይዳ ግብፀ ሀርገ ኡባ ዛሪድ ነ ቦላ ኤሀና፤ ሄ ሀርገይ ነና የደና። 61 ጉጅድካ፥ ሀ ህገ ማፃፋን ፃፈትቦና ሀርገታነ ጋዶታ ኡባ ነ ꬋያና ጋካናዉ ጎዳይ ነ ቦላ ኤሀና። 62 ጎዳ፥ ህንተ ፆሳ ህንተ ስኦና እፅዳ ግሾ፥ ሳሎ ፆልንቶዳ ዳርዳ ህንተፈ ጉꬅ አታና። 63 ጎዳይ፥ ህንተዉ ሎኦባ ኦꬅያ ዎደነ ህንተ ታይቦይ ዳርያ ዎደ ኡፋይትዳይሳዳ ሀእ ህንተ ቦላ ጋዶ ኤህያ ዎደነ ህንተና ꬋይስያ ዎደ ኡፋይታና፤ ህንተ ላታናዉ ብያ ቢታፈ ሾደትድ ꬋያና።

64 ጎዳይ ነና ሀ ጋፃፐ ያ ጋፃ ጋካናዉ ካዎተꬃታ ኡባ ግዶን ላላና። ያን ነኒ ዎይኮ ነ ማይዛት ኤሮና ሀራ ምꬅነ ሹቻ ፆሳታ ጎይናና። 65 ሄ ካዎተꬃታ ግዶን ህንተ ሸምፖ ደመከታ፤ ቶሆይ የꬍያ በስካ ነዉ ዴና። ያን ጎዳይ ነዉ ቆፋን ኩምዳ ጉገ፥ አሞን አርጋጭዳ አይፈነ ኡፋይስ ቃንፅዳ ዎዛና እማና። 66 ነ ደኦይ ህርጋን ኩማና፤ ጋላስነ ቃማ ዳጋማንነ ሀይቆ ያሻን ኡንኤታዳ ዳና። 67 ነ ዎዛናን ኩምዳ ያሻፈነ ነ አይፈይ በእያ ፓላባፐ ደንዶይሳን፥ ዎንትያ ዎደ ነኒ፥ “አዉደ ቃማንዴሻ” ቃስ ቃምያ ዎደ፥ “አዉደ ዎንታንደሻ” ያጋና። 68 ታ ነና፥ “ዛራዳ ሀ ኦግያራ ባካ” ግዳ ኦግያራ ጎዳይ ነና ዛሪድ ማርካበን ጉየ ግብፀ የዳና። ያን ነኒ አይለ ግዳናዉ ነ ሞርከታስ ነና ባይዛናዉ ኮያና፥ ሽን ህንተና አይለያናዉ ሻምያ አስ ደመከታ።