1 ጎዳይ ሙሰኮ፥ “ግብፀ ካዋኮ ባዳ፥ ጎዳይ፥ እብራወታ ፆሳይ ኔኮ፥ ‘ኤንቲ ታዉ ጎይናና መላ ታ አሳ የዳ። 2 ኔኒ የዶና ኤንታ እፅኮ፥ 3 ታኒ ነ ፓራታ ቦላ፥ ነ ሀረታ ቦላ፥ ነ ግማለታ ቦላ፥ ነ መህያ ቦላ፥ ነ ዶርሳታ ቦላነ ነ ዴሻታ ቦላ ኢታ ጋዶ የጋና። 4 ሽን ታኒ ጎዳይ እስራኤለ አሳ መህያ ግዶንነ ግብፀ አሳ መህያ ግዶን ዱማተꬅ መꬋና። እስራኤለ አሳ መህያፐ እሶይካ ሀይቀና። 5 ዎንቶ ታኒ ሄሳ ኦꬃና ግድ ጎዳይ ዎደ ቃንፅስ’ ያጋ” ያግስ።

6 ዎንተꬃ ጋላስ ጎዳይ ግዳይሳዳ ኦꬅስ። ግብፀ አሳ መሄ ኡባይ ሀይቅስ፥ ሽን እስራኤለ አሳ መህያፐ እሶይካ ሀይቅቤና። 7 ካዎይ ሀንዳባነ እስራኤለታ መህያፐ ሀር አቶሽን እሶይካ ሀይቆናይሳ አሰ ኪትድ፥ ኦይችድ ኤርስ። ሽን ሀእካ እያ ዎዛናይ ሙምዳ ግሾ አሳ የዶና እፅስ።

8 ሄሳፈ ጉየ፥ ጎዳይ ሙሰነ አሮና፥ “ጮጨፐ ብዶ ኩጭ ኤክድ፥ ካዎይ በእሽን ቦላ ꬋርጭተ። 9 ሄስ ግብፀ ቢታ ኡባ ቦላ ባና ግድድ ላለታና። ግብፀ ቢታን ደእያ አሳ ቦላነ መሄይ ቦላ ክፃ ጋዶ ኤሀና” ያግስ። 10 ኤንቲ ጮጨፐ ጉꬃ ብዶ ኤክድ ካዉዋ ስንꬃን ኤቅዶሶና። ሙሰይ ሄሳ ቦላ ላልን፥ አሳ ቦላነ መህያ ቦላ ክፃ ጋዶይ ዎꬍ አግስ። 11 ግብፀ አሳ ቦላ ዎꬍዳ ክፃይ ማሮታ ቦላካ ዎꬍዳ ግሾ ሙሰ ስንꬃን ኤቃናዉ ዳንዳእቦኮና። 12 ሽን ጎዳይ ሙሰስ ግዳይሳ መላ፥ ካዎይ ባ ዎዛና ሙምስዳ ግሾ፥ ሙሰነ አሮና ስኦና እፅስ።

13 ሄሳፈ ጉየ፥ ጎዳይ ሙሰኮ፥ “ካዋኮ ጉራ ደንዳ ባዳ፥ ‘ጎዳይ፥ እብራወታ ፆሳይ፥ ታዉ ጎይናና መላ ታ አሳ የዳ። 14 ሀእ ነ እፃስ ጊኮ፥ ነ ሞርናታነ ነ አሳ ፃላላ ግዶናሽን ነ ቦላካ ኢታ ጋዶ ኤሀና። ሄ ዎደ አላመ ኡባን ጎድ ታ ፃላላ ግደይሳ ኔኒ ኤራና። 15 ታኒ ታ ኩሽያ ደንꬃዳ ነናነ ነ አሳ ጋዶን ሾጭዳባ ግድያኮ ሀእ ጋካናስ ህንተ ቢታ ቦላ ደኤከታሽን። 16 ሽን ታ ሱንꬃይ ቢታ ኡባን ኤረታና መላ ታኒ ታ ዎልቃ በሳናዉ ነና ደኦን ዎꬃስ። 17 ኔኒ ሀእካ ኦቶርታዳ ታ አሳ የዶና እፃዳሳ። 18 ታኒ ዎንቶ ሀኖደ ግብፀ ቢታይ መꬎቶሳፐ ሀች ጋካናዉ ቡክ ኤሮና ዎልቃማ ሻች ቡክሳና። 19 ሀእ ኔኒ ነ መህያነ ካረን ደእያባ ኡባ ኤለ ሶ ገልሳና መላ ኪታ። ሶ ገሎና አሳ ቦላነ መህያ ኡባ ቦላ ሻች ቡክድ፥ ኤንታ ዎꬋና ያጌስ’ ያጋ” ያግስ። 20 ካዉዋ ሞርናታፐ እሶት እሶት ጎዳይ ግዳይሳ ስእድ ያይዳ ግሾ፥ ባንታ አይለታነ ባንታ መሄታ ሶ ገልስዶሶና። 21 ሽን ሀራት ጎዳይ ግዳይሳ ስኦና እፅድ ባንታ አይለታነ ባንታ መህያ ካረን አጋግዶሶና።

22 ሄሳፈ ጉየ፥ ጎዳይ ሙሰ፥ “ግብፀ ቢታ ኡባ ቦላ፥ አሳ ቦላ፥ መህያ ቦላነ ጋደን ደእያ ካꬃ ቦላ ሻች ቡካና መላ ነ ኩሽያ ሳሎ ደንꬃ” ያግስ። 23 ሙሰይ ባ ፃምኣ ሳሎ ደንꬅዳ ዎደ፥ ጎዳይ ዎልቃማ ደሾነ ዎልአንꬅ የድስ። ሄሳዳ ኦꬅድ ጎዳይ ግብፀን ሻች ቡክስስ። 24 ጎዳይ ገደራ ሃራ ዎልቃማ ዎልአንꬅ የድስ። ሄሳ መላባይ ግብፀ ቢታን አስ ዱሱ ኦይኮደፐ ሀን ኤረና። 25 ሄ ሻቻይ ግብፀን ደእያ አሳነ መህያ ሾጭስ። ጋደን ደእያባ፥ ምꬅነ ማታ ኡባ ꬋይስስ። 26 እስራኤለት ደእያ ጌሳመ ቢታ ፃላላን ሻች ቡክቤና።

27 ካዎይ ሙሰነ አሮና ፄግስድ፥ “ታኒ ሀእ ናጋራ ኦꬃስ። ጎዳይ ቱማንቾ፤ ታንነ ታ አሳይ ባላ። 28 ደሾይነ ሻቻይ ኑ ቦላ ዳርድ ኡንኤꬅዳ ግሾ ኑስ ጎዳ ዎስተ። ታኒ ህንተና የዳና፤ ህዛፐ ህንተ ሀይሳን ጋምኤከታ” ያግስ።

29 ሙሰይ እያኮ፥ “ታኒ ሀ ካታማፐ ከይዳ ዎደ ታ ኩሽያ ደንꬃዳ ጎዳ ዎሳና። ደሾይነ ሻቻይ ኤቅያ ዎደ ሳአይ ጎዳባ ግደይሳ ኔኒ ሄሳን ኤራና። 30 ሽን ነነ ነ ሞርናት ሀእካ ጎዳ ፆሳ ያዮናይሳ ታኒ ኤራይስ” ያግስ።

31 ታልባይ ጪሸ፥ ባንጋይ ቆርፃ ግድያ ግሾ ኡባይ ሻቻን ꬋይስ። 32 ሽን ግስተይነ ሙርቃይ ጋክቦና ግሾ ሻቻን ꬋይቤና።

33 ሙሰይ ካዉዋ ማታፐ ከይድ፥ ካታማፐ ጋፃ ብድ ባ ኩሽያ ደንꬅድ ጎዳ ዎስስ። ያትን ደሾይ፥ ሻቻይነ እራይ ኤለስድ ኤቅ አግስ። 34 ሽን ካዎይ ሄ ኡባይ ኤቅዳይሳ በእዳ ዎደ ዛሪድ ናጋራ ኦꬅስ። እያራነ እያ ሞርናታራ ባንታ ዎዛና ጉጅድ ምንꬅዶሶና። 35 ጎዳይ ሙሰ ባጋራ ኦድዳይሳ መላ ካዉዋ ዎዛናይ ሙምን፥ እስራኤለታ የዶና እፅስ።