1 ፆሳይ፥ “አሳ ናአዉ፥ ነ ስንꬃን ደኤይሳ ማ፤ ሀ ፃꬃ ማፃፋ ማ፤ ባዳ፥ እስራኤለ አሳስ ኦዳ” ያግስ። 2 ሄሳ ግሾ፥ ታኒ ታ ዶና ዶይን፥ እ ታና ፃፃ ማፃፋ ባርስስ። 3 እ ታኮ፥ “አሳ ናአዉ፥ ሀ ታ ነና ባርስያ ፃꬃ ማፃፋ ማ፤ እያራ ነ ኡሉዋ ኩንꬃ” ያግስ። ታ ምያ ዎደ ታ ዶናን ኤሳዳ ማልእስ።

4 ፆሳይ ታኮ፥ “አሳ ናአዉ፥ ደንዳዳ፥ እስራኤለ አሳኮ ባ፤ ታ ቃላ ኤንታዉ ኦዳ። 5 ኔኒ ኪተትዳይ፥ ኤንታ ዶናይ ኤረቶናነ ቃላይ ገሎና አሳኮ ግደና፤ ሽን ኔኒ እስራኤለ አሳኮ ኪተታዳሳ። 6 ታኒ ነና ኤንታ ቃላይ ገሎና፥ ኤንታ ዶናይ ኤረቶናነ አኬካናዉ መትያ ዳሮ ደርያኮ ታ ነና ኪታብከ። ታ ነና ኤንታኮ ኪትዳባ ግድያኮ፥ ኤንቲ ነ ኦድያባ ስአናሽን። 7 እስራኤለ አሳይ ታ ኦድያባ ስአናዉ ኮዮና ግሾ፥ ነ ኦደይሳ ስኦኮና። እስራኤለ አሳይ ዎዛና ሙመነ ዬል ባይናይሳታ ግድያ ግሾ ነ ኦድያባ ስኦኮና። 8 ሽን ታኒ ነና ኤንታዳ ዎዛና ሙመነ ዬል ባይናይሳ ኦꬃና። 9 ታኒ ነና ያሽ ባይናነ ዛላፈ አꬍዳ ምኖ ኦꬃና። ኤንቲ ማካላንቾ ግድኮካ፥ ኤንታዉ ያዮፋ፤ ኤንታዉ ዳጋሞፋ” ያግስ።

10 ጉጅድ ፆሳይ፥ “አሳ ናአዉ፥ ታ ነዉ ኦድያ ቃላ ኡባ ምንꬃዳ ስአ፤ አኬካ። 11 ድኦን ደእያ ነ አሳኮ ባዳ ኤንታዉ ኦዳ። ኤንቲ ስእን፥ ስኦና እፅን፥ ታኒ ኡባ ሃርያ ጎዳይ ኦደይሳ ኤንታዉ ኦዳ” ያግስ።

12 ሄሳፈ ጉየ፥ አያናይ ታና ፑደ ደንꬅስ፤ ጎዳ ቦንቾይ ባ በሳፈ ፑደ ደንድያ ዎደ *እስ እስ ማፃፋታን “ሳሎን ደእያ ጎዳ ቦንቾይ ጋላተቶ” ያጌስ፤ ታፐ ጉየራ ዎልቃማ ጉንꬁ ስአስ። 13 ሄስካ፥ ደኦን ደእያ መተꬃታ ቀፈይ እሶይ እሱዋራ ቦሸትያ ግርሳይነ ኤንታ ምየን ደእያ ገርቶታ ግርሳራ ጋሄትድ፥ ዎልቃማ ጉንꬃ ግርስ ስአስ። 14 አያናይ ታና ፑደ ደንꬅስ፤ ታና ኤክድ ሀራ በሲ ኤፍስ፤ ጎዳ ግታ ዎልቃይ ታና ሃርስ፤ ታ አያናን ጫመታሸነ ይሎታሸ ባስ። 15 ኮቦራ ሻፋ ማታን፥ ተል-አብባን ደእያ ድኤትዳ አሳኮ ጋካስ። ታኒ ዳጋማዳ ያን ኤንታራ ላፑን ጋላስ ጋምአስ።

16 ላፑንꬆ ጋላስ ዉርሰꬃን ጎዳ ቃላይ ታኮ ሀይሳዳ ያግሸ ይስ፦ 17 “አሳ ናአዉ፥ ታ ነና እስራኤለ አሳ ናግያ አስ ኦꬃስ። ታ ዶናፐ ከይያ ቃላ ስእዲ፥ ናጋና መላ ኤንታዉ ኦዳ። 18 ታኒ ናጋራንቹዋ፥ ‘ቱማ ኔኒ ሀይቃና’ ግያ ዎደ፥ ነ ባዳ እያዉ ኦዶና እፅኮ፥ እ ባ ኢታ ኦግያፐ ስማና መላነ እያ ሸምፖይ አታና መላ ነ እያ ናግሶና እፅኮ፥ እ ባ ናጋራን ሀይቃና፤ ሽን እያ ሱꬃ ግሾ ታ ነና ኦይቻና። 19 ኔኒ ናጋራንቹዋስ ኦድን፥ እ ባ ናጋራፐነ ባ ኢታ ኦግያፐ ስሞና እፅኮ፥ እ ባ ናጋራን ሀይቃና፤ ሽን ኔኒ ነ ሁጵያ አሻና።

20 “ፅሎ አስ ባ ፅሎተꬃፈ ጉየ ስሚድ፥ ኢታ ኦꬅያ ዎደ ታ እያ ስንꬃን ꬉበ ዎꬅን፥ እ ሀይቃና። እ ስማና መላ ነ እያዉ ኦዶና ግሾ እ ባ ናጋራን ሀይቃና። እ ካሰ ኦꬅዳ ፅሎ ኦሶይ ዛሪድ ቆፈተና፤ ሽን ታኒ እያ ሱꬃ ግሾ ነና ኦይካና። 21 ሽን ፅሎ አስ ናጋራ ኦꬆና መላ ነ እያዉ ኦድን፥ እ ነ ኪታ ስእድ፥ ናጋራ ኦꬆና አግኮ፥ ቱማ እ ደኦን ዳና፤ ኔኒ ነና አሻና” ያግስ።

22 ሄ በሳን ጎዳ ዎልቃይ ታና ሃርስ፤ እ ታኮ፥ “ደንዳዳ ዛንጋራ ባ፤ ያን ታ ነዉ ኦዳና” ያግስ። 23 ታ ደንዳዳ፥ ዛንጋራ ባስ። ሄ በሳን ካሰ ኮቦራ ሻፋ ማታን ታ በእዳይሳዳ፥ ያን ጎዳ ቦንቹዋ በአስ፤ ታኒ ሳአን ሶምኦራ ጉፋናስ።

24 ሽን አያናይ ታ ግዶ ገልድ፥ ታና ታ ቶሃን ኤስስ። ጎዳይ ታኮ፥ “ነ ሶ ባዳ፥ ነ ቦላ ፐንግያ ጎርዳዳ ኡታ። 25 አሳ ናአዉ፥ ነ ዎዶሮን ቃሸታና፤ አሳኮ ከያናዉ ዳንዳአካ። 26 ሀ ማካላንቾ አሳስ ነ ኦዶና መላነ ኤንታ ቦላ ሀንቀቶና መላ ታ ነ ዶና ሙምሳና። 27 ሽን ታ ነዉ ኦድያ ዎደነ ነ ዶና ዶይያ ዎደ ኔኒ፥ ‘ኡባ ሃርያ ጎዳይ፥ ኤንቲ ማካላንቾ ግድያ ግሾ፥ ስእያ ኦንካ ስኦ፤ ስኦና እፅያ ኦንካ ስኦፖ’ ያጋዳ” ኦዳና።