1 ጎዳ ቃላይ ሀይሳዳ ያግሸ ታኮ ይስ። 2 “እስራኤለ ቢታባ አሳይ፥ ‘አዋቲ ቃዉኤ ዎይነ ምን፥ ናይታ አቻይ ሀይቅስ’ ያግድ ኦድያ ሌምሶይ አይቤ? 3 ታኒ ኡባ ሃርያ ጎዳይ ታ ደኡዋን ጫቃስ። ህዛፐ ጉየ ህንተ እስራኤለ ቢታን ሀ ሌምሱዋ ሌምሰከታ። 4 አሳ ኡባ ሸምፖይ ታባ፤ አዋ ሸምፖይነ ናኣ ሸምፖይ ታባ። ናጋራ ኦꬅያ ሸምፖይ እ፥ ባዉ ሀይቃና።

5 “እስ አስ ፅሎ ግድኮ፥ ቱማ ፕርዳነ ሱረባ ኦꬅኮ፥ 6 እ ደርያ ቦላ ደእያ ኤቃ ጎይንያ በሳን ሜና፤ እስራኤለ አሳ ኤቃ ጎይነና፤ ባ ሾሩዋ ማችዉ ቱንሰና፤ ኩሸ መቶራ ደእያ ማጫራ አቀና፤ 7 ኦናካ ኡንኤና፤ አጮስ ኦይክዳባ ጉየ ዛሬስ፥ ቦንቀና፤ ኮሻትዳ አስ ሙዜስ፤ ካሎትዳ አስ ማይዜስ፤ 8 ባ ሚሽያ የሎራ ታልኤና፤ ባ ኩሽያ ኢታባፐ ናጌስ፤ አሰ ስገꬅሸ ፅሎ ፕርዴስ። 9 ታ ህግያ ናጌስ፤ ታ ዎጋ አማነተꬃን ፖሌስ፤ ሄ ኡራይ ፅሎ አስ ግድያ ግሾ እ ደኦን ዳና” ያጌስ ኡባ ሃርያ ጎዳይ።

10 ግዶሽን፥ ሄ ኡራስ ሸምፖ ዎꬍያ ዎይኮ ካልድ ደኤይሳታፐ እሱዋ ኦꬅያ ኢታ ናእ ደእኮ፥ 11 እያ አዋይ ሀይሳታፐ እሱዋካ ኦꬆና አግን፥ እያ ናአይ ደረ ቦላ ኤቃ ጎይኖ በሳታን ሚኮ፥ አሳ ማቾ ቱንስኮ፥ 12 መቶታንቾታነ ማንቆታ ኡንኤꬅኮ፥ ቦንቅኮ፥ አጮስ ኦይክዳባ ዛሮና እፅኮ፥ ኤቃ ጎይንኮ፥ ቱናባ ኦꬅኮ፥ 13 ባ ሚሽያ የሎራ ታልእድ ዎ ኤክኮ፥ ሄሳ መላ አስ ደኦን ደአኔ? እ ደኦን ዴና! እ ሄሳ መላ ቱናባ ኦꬅዳ ግሾ ቱማ ሀይቃና፤ እያ ጎመይ እያ ኦይካና።

14 “ሀ ኢታ ኡራስ ናእ ደእኮ ሄ ናአይ ባ አዋይ ኦꬅያ ሀ ናጋራ ኡባ በእሸ፥ ሄሳ መላባ ኦꬆና እፅኮ፥ 15 እ ደረ ቦላ ደእያ ኤቃ ጎይኖ በሳታን ሞና እፅኮ፥ እስራኤለ አሳ ኤቃ ጎይኖና እፅኮ፥ ባ ላግያ ማችዉ ቱንሶና እፅኮ፥ 16 ኦናካ ኡንኤꬆና እፅክ፥ አጮስ ኦይክዳባ ጉየ ዛርኮ፥ ቦንቆና እፅኮ፥ ኮሻትዳይሳ ሙዝኮ፥ ካሎትዳይሳ ማይዝኮ፥ 17 ኢታ ኦሶፐ ባ ኩሽያ ተቅኮ ዎ ኤካናዉ የሎራ ታልኦና እፅኮ፥ ታ ህግያ ናግኮ፥ ታ ዎጋ ካልኮ፥ ያትኮ፥ ሄ ናአይ ደኦን ዳናፐ አትሽን፥ ባ አዋ ናጋራ ጋሶን ሀይቀና። 18 ሽን እያ አዋይ አሳ ማታ ሱግዳ ግሾ፥ ባ እሻታ ቦንቅዳ ግሾነ ባ አሳ ግዶን ኢታ ኦꬅዳ ግሾ ባ ናጋራ ጋሶን ሀይቃና።

19 “ሽን ህንተ፥ ‘ናአይ ባ አዋ ናጋራ ጋሶን አይስ ሴረተኔ?’ ” ያጌታ። ናአይ ቱማ ፕርዳነ ሱረ ኦꬅድ፥ ታ ህግያ ምንꬅድ ናግኮ፥ ቱማ ደኦን ዳና። 20 ናጋራ ኦꬅያ ኡራይ ባዉ ሀይቃና። ናአይ አዋ ናጋራ ጋሶን ሴረተና፤ ሄሳዳካ፥ አዋይ ናኣ ናጋራ ጋሶን ሴረተና። ፅሎ አስ ባ ፅሎተꬃ ጋትያ ኤካና፤ ኢታ አስ ባ ኢታተꬃን ሴረታና።

21 ሽን ኢታ አስ ባ ናጋራ ኡባፈ ስሚድ፥ ታ ኪታ ናግኮ ቱማ ፕርዳነ ሱረ ኦꬅኮ፥ እ ቱማ ደኦን ዳናፐ አትሽን፥ ሀይቀና። 22 እ ኦꬅዳ ናጋራፐ እሶይካ ቆፈተና፤ ባ ኦꬅዳ ፅሎ ኦሱዋ ጋሶን እ ደኦን ዳና። 23 ታኒ ኡባ ሃርያ ጎዳይ፥ ኢታ አስ ባ ኢታ ኦግያፐ ስሚድ፥ ደኦን ደኤይሳን ኡፋይታይስፐ አትሽን፥ እያ ሀይቁዋን ኡፋይትከ።

24 ሽን ፅሎ አስ ባ ፅሎተꬃ አግድ፥ ኢታ አስ ኦꬅያ ቱና ኦሶታ ኡባ ኦꬅኮ፥ እ ደኦን ዳኔ? ሀነና፥ እ ኦꬅዳ ፅሎ ኦሱዋፐ እሶይካ ቆፈተና፤ እ አማነቶና እፅዳ ግሾነ እ ኦꬅዳ ናጋራ ግሾ እ ሀይቃና።

25 ግዶሽን፥ “ህንተ፥ ‘ጎዳ ኦገይ ሱረ ግደና’ ጌታ። እስራኤለ አሳዉ፥ ስእተ፤ ሱረ ግዶናይ ታ ኦግያዬ? ህንተ ኦግያ ግደኔ? 26 ፅሎ አስ ባ ፅሎተꬃ አግድ፥ ኢታ ኦꬅያ ዎደ ባ ናጋራን ሀይቄስ፤ ባ ኦꬅዳ ቆሁዋ ጋሶን ደኦን ደኤና። 27 ሽን ኢታ አስ ባ ኢታተꬃ አግድ፥ ቱማ ፕርዳነ ሱረ ኦꬅያ ዎደ ባ ሸምፑዋ አሻና። 28 እ ባ ኦꬅዳ ናጋራ ቆፕድ ጉየ ስምዳ ግሾ፥ እ ቱማ ደኦን ዳናፐ አትሽን፥ ሀይቀና። 29 ሽን እስራኤለ አሳይ፥ ‘ጎዳ ኦገይ ሱረ ግደና’ ያግዶሶና። እስራኤለ አሳዉ፥ ሱረ ግዶናይ ታ ኦግያ? ህንተ ኦግያ ግደኔ?

30 “ህንተኖ፥ እስራኤለ አሳዉ፥ ታ ህንተና ህንተ ኦሱዋꬆ ኦሱዋꬆ ፕርዳና። ኡባ ሃርያ ጎዳይ ሀይሳዳ ያጌስ፤ ናጋር ህንተዉ ꬋዮስ ጋሶ ግዶና መላ ፓፅተ፤ ህንተ ባላ ኡባፈ ስምተ። 31 ህንተ ኢታ ኦሱዋ ኡባ ዎራ የግድ፥ ኦራꬃ ዎዛናነ ኦራꬃ አያና ኤክተ። ህንተኖ፥ እስራኤለ አሳዉ፥ አይስ ሀይቄቲ? 32 ታኒ እስ አሳ ሀይቆንካ ኡፋይትከ። ሄሳ ግሾ፥ ህንተ ናጋራ ፓፅድ፥ ደኦን ደእተ” ያጌስ ኡባ ሃርያ ጎዳይ።