1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ፅሮሳ ሀላቃስ ኦዳ፦ ‘ነ ዎዛናይ ኦቶርትዳ ግሾ፥ ታኒ ፆሰ፤ ታኒ አባ ግዶን፥ ፆሳታ አራታን ኡታስ’ ያጋዳሳ። ኔኒ፥ ‘ታኒ ፆሳዳ፥ ጭንጫ ግዳስ ጋዳ ቆፕኮካ ነ አሰፐ አትሽን፥ ፆሰ ግዳካ። 3 ነ ዳነላፐ አꬋዳ ጭንጫይ? አይ ፁርካ ኔፐ ጌመኔ? 4 ቱማ ነ ጭንጫተꬃንነ ነ አኬካን ዱረ ግዳዳሳ፤ ነ ቡቁራ ምንጃ ኬꬃን ብራነ ዎርቃ ሺሻዳሳ። 5 ነ ዛልእያ ኤራን ዳሮ ዎ ደማዳሳ፤ ነ ዱረተꬃ ጋሶን ነ ዎዛናይ ኦቶርትስ’ ” ያጌስ።

6 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታኒ ፆሳዳ ጭንጫ ጋዳ ቆፕያ ግሾ፥ 7 ታ ነ ቦላ ቃይ ባይና ዎዛና ምኖ ሞርከታ ኤሀና፤ ኤንቲ ኔኒ ጭንጫተꬃንነ ኤራተꬃን ሺሽዳ ሻሎ ኡባ ማሻን ꬋይሳና፤ ኤንቲ ነ ቦንቹዋ ቱንሳና። 8 ኤንቲ ነና ስኦለ የዳና፥ ነካ ጪሞ አባን ሀይቃና። 9 ኤንቲ ነና ዎꬋናዉ ያ ዎደ ኔኒ፥ ‘ታኒ ፆሳ’ ጋኔ? ነና ዎꬍያ አሳ ኩሸን ነ ኩንድያ ዎደ ነ አሰፐ አትሽን፥ ፆሰ ግዳካ። 10 ኔኒ አላጋታ ኩሸን አማኖና አስ ሀይቅያ ሀይቆ ሀይቃና” ያጌስ ኡባ ሃርያ ጎዳይ።

11 ቃስ ጎዳ ቃላይ ሀይሳዳ ያግሸ ታኮ ይስ። 12 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ፅሮሳ ካዋስ ዘሌላ፦ ‘ኔኒ ካሰ ጭንጫተꬃን ኩማዳሳ፤ ኔኒ አስ ሌምስድ ኦድያ ፑላነ ጭንጫ ግዳዳሳ። 13 ኔኒ ኤደነን፥ ፆሳ ጋናትያን ካሰ ደአዳሳ፤ ሳርድዮነ፥ ቶጳዘ፥ አልማዘ፥ ብርለ፥ ማርግደ፥ ያስጵደ፥ ሳንፓረነ ባሉረ ጌተትያ አልኦ ሹቻን አሌቀታዳ፥ ሎኦ ዎርቃ አሌቆ ካሰ ማአዳሳ፤ ነ መትዳ ጋላስ ሄ ኡባይ ነዉ ጊግስ። 14 ነና ናግያ ክሩበ ኦꬃዳ ሹማስ፤ ነና ትያስ። ታ ጌሻ ዙማ ቦላ ነ ደአዳሳ፤ ታማዳ ጶልያ አልኦ ሹቻታ ግዶን ስመረታዳሳ። 15 ነ መትዳ ጋላሳፐ ዶማዳ፥ ኢታባይ ነ ቦላ በንታና ጋካናዉ ቦረይ ባይና ደአዳሳ። 16 ነ ዳሮ ዛልኤን ማꬆትዳ ግሾ ቡቀꬃን ኩማዳ፥ ናጋራ ኦꬃዳሳ። ሄሳ ግሾ፥ ታ ጌሻ ዙማፐ ነና ዎልቃን ከሳስ። ነና ናግያ ክሩበይ፥ ሄ ታማዳ ጶልያ አልኦ ሹቻታ ግዶፈ የደꬅስ። 17 ኔኒ ማላ ሎኦ ግድያ ግሾ ዳሮ ኦቶርታዳሳ፤ ነ ቦንቾ ኮያዳ ጭንጫተꬃ ካዉሻዳሳ። ሄሳ ግሾ፥ ታ ነና ሳአን የጋስ፤ ሀራ ካዎት ነና በእድ ባያና መላ ኦꬃስ። 18 ነ ናጋራንነ ነ ባለꬅያ ዛልእያን፥ ነ ጎይኖ በሳታ ቱንሳዳሳ። ሄሳ ግሾ፥ ታም ነ ግዶፈ ከያናዳ ኦꬃስ፤ እካ ነና ምስ። ኡባይ ፄልሽን፥ ታ ነና ፁጋዳ ሳኣ ቦላ ብዶ ከሳስ። 19 ነና ካሰ ኤርያ ካዎተꬃት ኡባይ ዳጋምዶሶና። ነ ዉርሰꬃይ ያሽያባ ግድስ፤ ኔኒ ዛራዳ በንታካ’ ” ያግስ።

20 ጎዳ ቃላይ ሀይሳዳ ያግሸ ታኮ ይስ። 21 “አሳ ናአዉ፥ ነ ሶምኡዋ ስዶናኮ ዛራዳ እያ ቦላ ትንብተ ኦዳ። 22 ነኖ፥ ስዶና፥ ታ ነዉ ሞርከ ግዳና። ታኒ ነ ቦላ ኦꬅያባን ታ ቦንቾይ ቆንጫና። ነ ግዶን ደኤይሳት ፕርዳን ታኒ ታ ጌሻተꬃ በሲያ ዎደ፥ ታኒ ጎዳ ግደይሳ ኤንቲ ኡባይ ኤራና። 23 ታ ነ ቦላ ኢታ ሀርገ የዳና፤ ኦገ ኡባን ሱꬅ ጉካናዳ ኦꬃና። ኡባ ባጋራ ያ ኦላ ጋሶን ነ አሳይ ማሻን ሀይቃና። ታኒ ጎዳ ግደይሳ ኤንቲ ሄ ዎደ ኤራና። 24 ህዛፐ ጉየ እስራኤለ ዩሾን ደእያ፥ እያ ካꬍድ ፄልያ፥ ቢታ ኡባን አጉንꬃዳነ ክንቾተዳ ቆህያ ኦንካ ዴና። ታኒ ኡባ ሃርያ ጎዳ ግደይሳ ኤንቲ ሄ ዎደ ኤራና” ያጌስ ኡባ ሃርያ ጎዳይ።

25 “እስራኤለ አሳ ላለትዳ ቢታ ኡባፈ ሺሻዳ ኤህያ ዎደነ ካዎተꬃታ ኡባ ስንꬃን ታኒ ታ ጌሻተꬃ በሲያ ዎደ፥ ታኒ ታ አይልያ ያይቆባስ እምዳ ባንታ ቢታን ኤንቲ ዳና። 26 ያን ኤንቲ ሳሮነ ናገትድ ዳና፤ ኬ ኬፃና፤ ዎይነ ቶካና። ኤንታ ካꬍድ ፄልያ ኤንታ ሾሮታ ኡባ ታኒ ፕርድያ ዎደ እስራኤለ አሳይ ሳሮ ዳና። ታኒ ጎዳ ኤንታ ፆሳ ግደይሳ ኤንቲ ሄ ዎደ ኤራና” ያጌስ ኡባ ሃርያ ጎዳይ።