1 ቃስካ ጎዳ ቃላይ ሀይሳዳ ያግሸ ታኮ ይስ፦ 2 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ትንብተ ኦዳ።

6 ግብፀ ማደይሳት ኩንዳና፤ እያ ኦቶሩዋ ዎልቃይ ዉራና። ምግዶላፐ ብድ አስዋና ጋካናዉ፥ ኤንቲ ማሻን ሀይቃና። ታኒ ኡባ ሃርያ ጎዳይ ሄሳ ኦዳይስ። 7 ግብፀይ ቢታ ኡባፈ አꬍዳ ባይሳ ቢታ ግዳና፤ እያ ካታማት ሀራ ላለትዳ ካታማ ኡባፈ አꬍድ ላለትድ አታና። 8 ታኒ ግብፀ ታማን ኦይꬅያ ዎደነ እያ ማደይሳት ኡባይ ሀይቅድ ዉርያ ዎደ፥ ታኒ ጎዳ ግደይሳ ኤንቲ ኤራና።

9 “ሄ ዎደ ታኒ ሳሮ ደእያ ቶጰ አሳ ዳጋንꬃናዉ አሳታ ማርካበን ኪታና። ግብፀይ ፕርደትያ ጋላስ ቶጰ አሳ ቦላ ዋየይ ያና። ሄ ጋላሳይ ጋክስ” ያጌስ።

10 ኡባ ሃርያ ጎዳይ ሀይሳዳ ያጌስ፦ “ባብሎነ ካዋ ናቡካዳናፆራ ኩሸን ታኒ ግብፀ ዱረተꬃ ꬋይሳና። 11 ካዎተꬃታ ኡባፈ አꬍድ፥ ዎዛና ምኖ ኦላንቾታ ካለꬅድ ይድ፥ ቢታ ꬋይሳና፤ ኤንቲ ግብፀ አሳ ቦላ ማሸ ሾድድ፥ ቢታን አሀ ኩንꬃና። 12 ናይለ ሻፋ ታኒ መልሳና፤ ታኒ ግብፀ ኢታ አሳታ ኩሸን አꬃዳ እማና፤ ሄ ቢታነ ያን ደእያባ ኡባ አላጋታን ꬋይሳና። ታኒ ጎዳይ ሀይሳ ኦዳስ” ያጌስ።

13 ኡባ ሃርያ ጎዳይ ሀይሳዳ ያጌስ፦ “መምፕሳ ካታማን ደእያ ኤቃታነ ምስለታ ኡባ ታ ꬋይሳና፤ ግብፀ ቢታን ዛሪድ ሀላቃይ ዴና፤ ቢታ ኡባ ታኒ ያሽሳና። 14 ታኒ ጳትሮሳ ጌተትያ ዱገሀ ባጋ ግብፀ ባይሳ ከሳና፤ ፑደሀ ባጋራ ደእያ ፆኣነ ካታማን ታማ የዳና፤ ተብሳ ካታማ ፕርዳና። 15 ግብፀ ሚፃ ግድዳ ፐሉስያማን ታ ሀንቁዋ ጉሳና፤ ተብሳ አሳ ኡባ ዉርሳና። 16 ታኒ ግብፀን ታማ ኦይꬃና፤ ፐሉስያም ዳሮ ዋየታና፤ ተብሳ ድርሳ ግምበይ ላለታና፤ መምፕሳ ካታማ ዱፆና መቶይ ጋካና። 17 ኦናንነ ቡባስቱ ካታማን ደእያ ናአተꬃት ኡባይ ማሻን ዉራና፤ ማጫሳይ ድኤትድ ባና። 18 ግብፀ ዎልቃ ታ መንረꬅያ ዎደ ፃፍናሳን ጋላስ ቃማና፤ እ ኦቶሩዋ ዎልቃይ ዉራና፤ ግብፀ ሻር ካማና፤ ሄ ካታማ ዩሾን ደእያ ጉታቲ ኡባ ድኤትድ ባና። 19 ታኒ ግብፀ ሄሳዳ ኦꬃዳ ፕርዳና። ታኒ ጎዳ ግደይሳ ኤንቲ ሄ ዎደ ኤራና” ያጌስ።

20 ኑኒ ድኤትዳ ታማነ እስንꬆ ላይꬃን፥ ኮይሮ አጌናን፥ ላፑንꬃ ጋላሳን፥ ጎዳ ቃላይ ሀይሳዳ ያግሸ ታኮ ይስ። 21 “አሳ ናአዉ፥ ታ ግብፀ ካዋ ቀስያ መንꬃስ፤ እያ ዎይሻንነ ጩርቃን ፃፅድ፥ ኮልድ ፓꬅያ ሂል ባዋ፤ ህዛፐ ጉየ እ ምኖተꬅ ደምድ ማሸ ኦይካናዉ ዳንዳኤና። 22 ሄሳ ግሾ፥ ኡባ ሃርያ ጎዳይ ሀይሳዳ ያጌስ። ታኒ ግብፀ ካዋስ ሞርከ ግዳና። ካሰ እያዉ መቅዳ ቀስያነ ሎኦ ደእያ ቀስያ ናምኣካ ታ መንꬃና፤ እያ ማሻይ እያ ኩሸፐ ሳአን ዎꬋናዳ ኦꬃና። 23 ታኒ ግብፀታ ካዎተꬃታ ግዶንነ ሀራ ቢታታን ላላና። 24 ታኒ ባብሎነ ካዋ ናምኡ ቀስያ ምንꬃዳ፥ ታ ማሻ እያ ኦይꬃና። ሽን ግብፀ ካዋ ቀስያ መንꬃና፤ ባ ሞርክያ ስንꬃን እ ሀይቃና ሀንያ አሳዳ ኦላና። 25 ታኒ ግብፀ ካዋ ቀስያ ዳቡርሳዳ፥ ባብሎነ ካዋ ቀስያ ምንꬃና። ታኒ ባብሎነ ካዋ ታ ማሻ ኦይꬅያ ዎደነ እ ግብፀ ቦላ ደንꬅያ ዎደ ግብፀት ታኒ ጎዳ ግደይሳ ኤራና። 26 ግብፀታ ታኒ ካዎተꬃታ ግዶንነ ቢታ ኡባን ላላና። ታኒ ጎዳ ግደይሳ ኤንቲ ሄ ዎደ ኤራና” ያጌስ።