1 ኑኒ ድኤትዳ ታማነ ናምአንꬆ ላይꬃን፥ ታማነ ናምአንꬆ አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ግብፀ ካዋስ ሀይሳዳ ያጋዳ ዘሌላ። ኔኒ ካዎተꬃታስ ግዶን ነና ጋሞ መላ ከሳዳሳ፤ ሽን ነ አባ ግዶን ደእያ ዬሩንꬃ መላ። ነ ሃꬃፈ ከያዳሳ፤ ነ ቶሁዋን የꬋዳ፥ ሃꬃ ቡሎያዳሳ። 3 ዳሮ አሳይ ሺቅያ ዎደ ታኒ ታ ግትያን ነና ኦይካና፤ አሳይ ነና ጎችድ፥ ሃꬃፈ ጋፃ ከሳና። 4 ታኒ ነና ቢታን ሆላ አጋና፤ ሳአ ቦላ ምጫና፤ ሳሎ ካፎታ ነ ቦላ ኡትሳና፤ ባዞ ዶአታ ነ አሹዋ ካልሳና። 5 ታ ነ አሹዋ ደረታ ቦላ ላላና፤ ዛንጋራታ ነ አሀን ኩንꬃና። 6 ሻፋታ ኩምድ ደረታ ካማና፥ ጋካናዉ፥ ነ ሱꬃይ ጉካና መላ ኦꬃና። 7 ታ ነና ꬋይስያ ዎደ ሳሎይ ጎዘታና፤ ፆልንቶት ꬉማና፤ አዋይ ሻራን ካመታና፤ አጌናይ ባ ፖኡዋ ድጋና። 8 ኔፐ ቦላራ ደእያ ሳሎ ፖኦታ ኡባ ꬋይሳዳ፥ ቢታ ꬉምሳና” ያጌስ ኡባ ሃርያ ጎዳይ።

9 ነ ቦላ ጋክዳ ꬋዩዋ ነ ኤሮና ካዎተꬃታ ስስያ ዎደ ዳሮ አሳ ዎዛናይ ኡንኤታና። 10 ዳሮ ካዎተꬃት ነና በእድ ዳጋማና። ታኒ ታ ማሻ ኤንታ ስንꬃን ሾዳዳ ሴስያ ዎደ፥ ካዎተꬃት ያሻን ኮኮራና፤ ነ ኩንድያ ዎደ ኤንቲ ኡባይ ባንታ ሸምፑዋስ ያያና።

11 ኡባ ሃርያ ጎዳይ ግብፀ ካዋኮ ሀይሳዳ ያጌስ፦ “ባብሎነ ካዋ ማሻይ ነ ቦላ ያና። 12 ሀራ ካዎተꬃታፐ አꬍዳ፥ ዎዛና ምኖ ኦላንቾት ባንታ ማሻን ዳሮ አሳ ዉርሳናዳ ታኒ ኦꬃና። ኤንቲ ግብፀ ኦቶሩዋ ꬋይሳና፤ ዳሮ አሳይ ዉራና። 13 ዳሮ ሃꬃ ማታን ደእያ መሄ ኡባ ታ ꬋይሳና፤ ህዛፐ ጉየ፥ ሃꬃ ቡሎያ አስ ዎይኮ መሄይ ዴና። 14 ሄ ዎደ ታኒ ነ ሃꬃታ ፅልሳና፤ ነ ሻፋታ ዎፑ ኦꬃዳ ጎግሳና። ታኒ ኡባ ሃርያ ጎዳይ ሀይሳ ኦዳይስ። 15 ታኒ ግብፀ ባይሳ ከስያ ዎደ እያን ደእያ ኡባ ቁቻዳ ꬋይስያ ዎደነ እያን ደእያ አሳ ኡባ ሾጭያ ዎደ ታኒ ጎዳ ግደይሳ ኤንቲ ኤራና። 16 ሀ ኡባይ ኤንታዉ ዘሌለትያ ዘለልስ ግዳና። ካዎተꬃታ ማጫሳት ግብፀስነ እያ ዳሮ አሳስ ዘሌላና” ያጌስ ኡባ ሃርያ ጎዳይ።

17 ኑኒ ድኤትዳ ታማነ ናምአንꬆ ላይꬃን፥ ሄ አጌናን፥ ታማነ እቻሻንꬆ ጋላሳን፥ ጎዳ ቃላይ ሀይሳዳ ያግሸ ታኮ ይስ፦ 18 “አሳ ናአዉ፥ ዳሮ ግድዳ ግብፀ ኦላንቾታ ግሾ ዬካ። እዮነ፥ ዎልቃማ ካዎተꬃታ ማጫ ናይታ ሀይቅድ ዱፎ ገለይሳታራ እስፈ ዱገ ዱፎ ሞይዛ። 19 ኤንታኮ፥ ‘ህንተኖ ግብፀቶ፥ ህንተ ሀራታፐ አꬍድ ማላ ሎኦ? ህንተ ዱፎ ገላና፤ ያን ህንተ ጎዳ ቃፃረቶናይሳታራ እስፈ ሞገታና።’ 20 ግብፀ ቢታስ ማሽ ሾደትድ ኡትዳ ግሾ፥ ኤንቲ ማሻን ሀይቅዳይሳታ ግዶን ኩንዳና፤ ግብፀይ ባ ዳሮ አሳራ ዱገ ጎሸታና። 21 ዱፎን ደእያ ዎልቃማ ሀላቃት ግብፀባነ ግብፀራ እስፍዳይሳታባ ሃሳይሸ፥ ‘ኤንቲ ዱገ ይዶሶና፤ ጎዳ ቃፃረቶናይሳታ ማሻን ሀይቅዳይሳታራ ኤንቲ ዝንእዶሶና’ ያጎሶና።

22 “አሶረይ ዱፎን ደኤስ። ኦላን ሀይቅዳ አሶረ ኦላንቾታ ዱፎት እያ ዩሹዋ ተቅድ ኡትዶሶና። 23 ኤንታ ዱፎት ኦላስ ዉርሰꬃ ጋፃን ደኦሶና። እያ ኦላንቾት ዱፉዋ ዩሾን ኬለትዶሶና፤ ካሰ ደኦን ደእያ አሳ ሄራን ቡቀꬅ ደንꬅያ አሳይ ሹከትዶሶና፤ ማሻን ዉርዶሶና።

24 “ኤላም ዱፎን ደኤስ፤ እያ ኦላንቾት ኡባይ ሹከትዶሶና ማሻን ኩንድዶሶና። ደኦን ደእያ አሳ ማታን ቡቀꬅ ደንꬅዳሳት ኡባይ ቃፃረቶና ቢታ ጋርስ አꬍዶሶና ዱፎ ገልድ ዝንእዶሶና። 25 ሀይቅዳይሳታ ግዶን ኤላማስ በሲ ጊግድ ኡትስ። ኤላማ ኦላንቾታ ዱፎት እያ ዩሹዋን ደኦሶና፤ ኤንቲ ኡባይ ማሻን ሀይቅዶሶና። ኤንቲ ኡባይ ቃፃረትቦናይሳታነ ማሻን ሀይቅዳይሳታ ኤንቲ ደኦን ደኤይሳታ ግዶን ቡቀꬅ ደንꬅዳ ግሾ ዱፎ ጌልዳይስታራ እስፈ ዝንእዶሶና።

26 “ሞሳህነ ቶባል ባንታ ኦላንቾታራ ዱፎን ደኦሶና፤ ኤንቲ ካሰ ካዎተꬃታ ኡባ ያሻን ኮኮርስዳይሳታ ግድኮካ፥ ኤንቲ ኡባይ ማሻን ሀይቅዶሶና። ኤንቲ ኡባይ ቃፃረቶናይሳታ። ኤንቲ ደኦን ደኤይሳታ ግዶን ቡቀꬅ ደንꬅዳ ግሾ ማሻን ሀይቅዶሶና። 27 ኤንቲ በን ጎባ ኦላንቾት ባንታ ኦላ ሚሽያ ዳንጭድ ባንታ ጎንዳልያ ትራን ዎꬅድ ባንታ ማሻ ቦርኮትድ ሞገተይሳዳ ቦንቾን ሞገትቦኮና። ሀ ኦላንቾታ ደኦን ደእያ አሳ ግዶን ቡቀꬅ ደንꬅዳ ግሾ ኤንታ ናጋራይ ኤንታ መቀꬃ ቦላ ደኤስ።

28 “ህንተ ግብፀ አሳት ፆነታናነ ማሻን ሀይቅዳ፥ አማኖና አሳታራ እስፈ ዝንአና።

29 “ኤዶመይ ባ ካዎታራነ ባ ሀላቃታራ እስፈ ዱፎን ደኤስ፤ ኤንቲ ካሰ ምኖ ኦላንቾታ፤ ሽን ሀእ ኦላን ሀይቅዳ፥ አማኖና አሳታራ ኦላን ገልዶሶና።

30 “ፑደሀ ባጋ ሀላቃትነ ስዶና አሳይ ዱፎን ደኦሶና። ኤንቲ ካሰ ባንታ ዎልቃን አሳ ያሽስዶሶና፤ ሽን ሀእ ኤንቲ ባንታ ዬላራ ያ ገልዶሶና። ማሻን ሀይቅዳ ቃፃረትቦና አሳራ እስፈ ዱፎ ገሎሶና።

31 “ግብፀ ካዎይነ እያ ኦላንቾት፥ ማሻን ሀይቅዳ ኦላንቾታ ያን በእድ ምነታና” ያጌስ ኡባ ሃርያ ጎዳይ።

32 “ታ ሀይሳፈ ካሰ ካዎተꬃት ግብፀ ካዋስ ያያና መላ ኦꬅዳባ ግድኮካ፥ እነ እያ ኦላንቾት ጎዳ አማኖና፥ ማሻን ሀይቅዳ አሳታራ እስፈ ዝንአና” ያጌስ ኡባ ሃርያ ጎዳይ።