1 ሄሳፈ ጉየ፥ ሄ ኡራይ ታና ጉየ ዛሪድ፥ ፆሳ ኬꬃስ ዶሎሀ ባጋራ ደእያ ካረ ባጋ ድርሳ ፐንግያኮ ኤህያ ዎደ ድርሳ ፐንገይ ጎርደትድ ኡትስ። 2 ጎዳይ ታኮ፥ “ሀ ፐንገይ ጎርዳን ዳናፐ አትሽን፥ ናምአንꬆ ዶየተና። ጎዳይ እስራኤለ ፆሳይ ያራ ገልዳ ግሾ ኦንካ ያራ ገለና። ሄሳ ግሾ፥ ሄ ፐንገይ ጎርዳን ዳና። 3 ግዶሽን፥ እስራኤለ ሀላቃይ፥ ጎዳ ስንꬃን ኡይꬅ ማናዉ ያን ኡታናዉ ዳንዳኤስ። ፐንግያ ባራንዳራ እ ገላናዉነ ከያናዉ ዳንዳኤስ” ያግስ።

4 ሄ ኡራይ ታና ፑደሀ ፐንግያኮ ኤፍያ ኦግያራ ኤፍድ፥ ፆሳ ኬꬃስ ስንꬃ ባጋ ጋꬅስ። ያን ግዳዳ ታ በእያ ዎደ፥ ሄኮ፥ ጎዳ ቦንቾይ ፆሳ ኬꬃ ኩምድ ኡትዳይሳ በአዳ ሶምኦራ ሳአን ጉፋናስ።

5 ጎዳይ ታኮ፥ “አሳ ናአዉ፥ ፆሳ ኬꬃ ዎጋታነ እያ ህገታ ኡባ ነ በኤይሳነ ስኤይሳ ሎይꬃዳ ናጋ። ፆሳ ኬꬃ ገላናዉነ ከያናዉ በሲያ አሳትነ በሶና አሳት ኦናንተኮ ሎይꬃዳ አኬካ። 6 ማካላንቾ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ህንተኖ፥ እስራኤለ አሳዉ፥ ህንተ ኦꬅያ ቱና ኦሶታ አግተ። 7 ህንተ ታዉ ታ ካꬃ፥ ሞꬉዋነ ሱꬁ ያርሾ ኦꬅድ ሺሽያ ዎደ ዎዛናይነ አሾይ ቃፃረትቦና አላጋ አሳታ ፆሳ ኬꬅ ገልስድ ታ ኬꬃ ቱንስደታ፤ ታ ጫቁዋ መንꬅደታ። 8 ታ ጌሻ ሚሸታ ቦላ አዋቶና እፅድ፥ ታ ኬꬃን አላጋታ አዋይደታ’ ” ያጌስ።

9 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “እስራኤለ አሳ ግዶን ደእያ አላጋ አስ፥ ባ ዎዛናንነ ባ አሹዋ ቃፃረትቦና፥ ኦንካ ታ ኬꬃ ገሎፖ።”

10 “ታና አግድ፥ እስራኤለ አሳራ ኤቃ ጎይንዳ ሌወታ ታ ሴራና። 11 ኤንቲ ታ ኬꬃን ኦሳንቾ ግዶ፤ ታ ኬꬃ ድርሳ ፐንገታ ናጎ፤ ፆሳ ኬꬃ ኦሱዋካ ኦꬆ። ኤንቲ ፁሳ ያርሾነ አሳይ ኤህያ ሀራ ያርሾ ሹኮ፤ ቃስ አሳስ ኦꬃናዉ አሳኮ ሺቆ። 12 ሽን ኤንቲ ካሰ እስራኤለ አሳ ኤቃ ጎይንስዳ ግሾነ አሳ ናጋራኮ ካለꬅዳ ግሾ፥ ኤንቲ ባንታ ናጋራ ሴራ ኤካና መላ ታ ኩሸ ደንꬃዳ ጫቃስ” ያጌስ ኡባ ሃርያ ጎዳይ። 13 ኤንቲ ካህነ ግድድ ኦꬃናዉ ታኮ ሺቆፖ፤ ዎይኮ ታዉ ዱማትዳ ጌሻባኮነ ኡባፈ ጌሻ በሳኮ ሺቆፖ። ኤንቲ ባንታ ኦꬅዳ ቱና ኦሱዋ ግሾ፥ ኦይሸታና። 14 ሄሳ ግሾ ኤንቲ ፆሳ ኬꬃን አዋታናዳነ እያ ግዶን ኦꬃናዉ ደእያ ኦሶ ኡባ ኦꬃና መላ ታ ኤንታ ሹማና።

15 “ሽን እስራኤለ አሳይ ታና አግድ፥ ታ ስንꬃፈ ሃክዳ ዎደ ፆሳ ኬꬃ ዎጋ አማነትድ ፖልዳ፥ ሌወ ኮቸ ግድዳ ካህነት፥ ሳዶቃ ያራት፥ ታዉ ኦꬃናዉ ታኮ ሺቆ። ሞꬉዋነ ሱꬃ ሺሽድ ኤንቲ ታ ስንꬃን ኦꬆ” ያጌስ ኡባ ሃርያ ጎዳይ። 16 ፆሳ ኬꬃ ኤንቲ ገሎ፤ ታዉ ኦꬃናዉ ታ ያርሾ በሳ ኤንቲ ሺቆ፤ አዋተꬃ ኤንቲ ኦይኮ። 17 ኤንቲ ፆሳ ኬꬃስ ግዶ ዳባባ ገልያ ዎደ፥ ሊኖፐ ዳደትዳ ማኦ ማኦ፤ ግዶ ዳባባ ፐንገን ዎይኮ ፆሳ ኬꬃ ግዶን ኦꬅያ ዎደ ሱፈ ማኦ ማኦፋ። 18 ኤንቲ ባንታ ሁጰን ሊኖ ጎፅድ፤ ባንታ ፄሳን ሊኖ ቃንꬃ ሱረ ዳንጮ፤ ጫዋያ ማኦ ማኦፎ። 19 አሳይ ደእያ ካረ ዳባባ ኤንቲ ከያናፐ ስን ፆሳ ኬꬃን ኦꬅሸ ማእዳ ማኡዋ ቃርድ፥ ጌሻ ክፍለታን ዎꬆ። ሄስካ፥ አሳይ ኤንታ ጌሻ ማኡዋ ቦችድ ቆሄቶና መላሳ።

20 “ካህነት ባንታ ሁጵያ ሜደቶፎ ዎይኮ አዱስድ ድቾፎ፤ ባንታ ሁጵያ ማራን ቃንፀቶ። 21 አይ ካህነት ግዶ ዳባባ ገልያ ዎደ ዎይነ ኡሽ ኡዮፖ። 22 ኤንቲ አዝን ሀይቅዳ፥ ዎይኮ ሳዮ ማጫስ ኤኮፎ። እስራኤለ አሳፐ ጌላኦ ኤኮ፤ ዎይኮ አዝናይ ካህነ ግድድ ደእሸ ሀይቅዳ ማጫስ ኤኮ።

23 “ካህነት ጎዳስ ዱማትዳባነ ዱማቶናባ ግዶን ደእያ ዱማተꬃ ታ አሳ ታማርሶ፤ ጌሽነ ቱና ግዶን ደእያ ዱማተꬃ ኤንታ በሶ። 24 አይ ሞቶይ ደንድኮካ፥ ካህነት ህገይ ኦደይሳዳ ፕርዶ። ታ ህገይነ ታ ዎጋይ ገይሳዳ ታ ባለታ ቦንቾ፤ ታ ሳምባታ ዱማይድ ቦንቾ።

25 “ካህነይ ሀይቅዳ አሀኮ ሺቅድ፥ ባና ቱንሶፖ። ግዶሽን፥ ሀይቅዳይ አዋ ዎይኮ አዮ ዎይኮ እያ አደ ናአ ዎይኮ ማጫ ናአ ዎይኮ እሻ ዎይኮ አዝና ገላቦና ምቾ ግድኮ ባና ቱንሶ። 26 ቱንዳፐ ጉየ፥ ላፑን ጋላስ ጋምኦ፤ ሄሳፈ ጉየ፥ እ ጌሽ ግዳና። 27 ጌሻ በሳን ሀጋዛናዉ ግዶ ዳባባ ገልያ ዎደ ባ ናጋራ ግሾ ያርሾ ሺሾ” ያጌስ ኡባ ሃርያ ጎዳይ።

28 ካህነታስ ላት ባዋ፤ ታ ኤንታዉ ላታ። እስራኤለ ቢታን ኤንታዉ አይ ላታካ እሞፕተ፤ ኤንታ ላታይ ታና። 29 ኤንቲ ካꬃ ያርሾ፥ ናጋራ ያርሾነ ናቆ ያርሾ ሞ። እስራኤለ ቢታን ጎዳስ ዱማይዳባ ኡባይ ኤንታሳ። 30 ኮይሮ ጋክያ ዱማ ዱማ ካꬃ ፄራ አይፈይነ ህንተ ጎዳስ እምያ እሞታ ኡባይ ካህነታሳ። ህንተ ኬꬃይ አንጀታና መላ ህንተ ꬊልያፈ ኮይሮ ኩሽያ ኤንታዉ እምተ። 31 ካህነት ባዉታ ዎይኮ ዶእ ዎꬍዳ ካፎ አሾ ዎይኮ መሄ አሾ ሞፖ።