1 ሳአ ቦላ ደእያ አስ ኡባይ ኮይሮ እስ ዶናን ኦደቴስ። 2 ኤንቲ ዶሎሀ ባጋፈ ደንድድ ብዳ ዎደ ሳናኦራ ቢታን ደምባ በሲ ደምድ ያን ኡትዶሶና።

3 ኤንቲ እሶይ እሱዋኮ፥ “ሃ ዪተ፥ ፁበ መꬍድ፥ ምናና መላ ታማን ፁጎስ” ያግዶሶና። ኤንቲ ሹቻ ግሾ ፁበ፥ ኡርቃ ግሾ ማደ መላባ፥ 4 ኤክድ፥ “ሃ ዪተ፥ ኑ ሱንꬃ ፄግሳናዉነ ቃስ ኑኒ ሀ ሳአ ቦላ ላለቶና አታና መላ እስ ግታ ካታማነ ፄራይ ሳሎ ጋክያ ፖቀ ኬፆስ” ያግዶሶና።

5 ሽን ጎዳይ አሳት ኬፅዳ ግታ ካታማነ ፖቅያ በአናዉ ዱገ ዎꬍስ። 6 ጎዳይ ሀይሳዳ ያግስ፤ “ሄኮ፥ ኤንቲ እስ አስ፤ ኤንቲ ኡባይካ እስ ዶናን ኦደትዶሶና። ኤንቲ ሀእ ሀይሳ ኦꬃናዉ ዶምዶሶና። ኤንቲ ባንታዉ ኦꬃናዉ ሀልችዳባ ፖሎና አጎኮና። 7 ያንያ ግሾ፥ ሃይተ፤ ዱገ ዎꬍድ ኤንቲ እሶይ ሃሳይያ ዶና እሶይ ኤሮና መላ ኤንታ ዶና ዱማዮስ” ያግስ። 8 ጎዳይ ኤንታ ሄሳፈ ሳአ ኡባ ቦላ ላልን፥ ኤንቲ ካታማ ኬፀይሳ አጋግዶሶና። 9 ጎዳይ ሳአን ደእያ አሳ ዶና ያን ቡቅዳ ግሾ ሄ ካታማ ሱንꬃይ ባብሎነ *ባብሎነ፦ እብራወꬆ ዶናን ሀ ሱንꬃ ብርሸꬃይ “ዋላከትስ” ጉሱ ጌተትስ። ጎዳይ ኤንታ ሄሳፈ ሳአ ኡባ ቦላ ላልስ።

10 ሴማ የለተꬃይ ሀይሳፈ ካልድ ፃፈትዳይሳ፤ ꬋዮ ሃꬃፈ ጉየ፥ ናምኡ ላይꬅ ግድን፥ ሴማስ ላይꬅ ፄታ ግድዳ ዎደ፥ ሴም አርፋክሳደ የልስ። 11 ሴም አርፋክሳደ የልዳፐ ጉየ፥ እቻሹ ፄቱ ላይꬅ ደእስ። ሀራ አደ ናይታነ ማጫ ናይታ የልስ።

12 አርፋክሳድ 35 ላይꬅ ደእድ፥ ሳላሀ የልስ። 13 አርፋክሳድ ሳላ የልዳፐ ጉየ፥ 403 ላይꬅ ደእስ። ሀራ አደ ናይታነ ማጫ ናይታ የልስ።

14 ሳል 30 ላይꬅ ደእድ፥ ኤቦራ የልስ። 15 ሳል ኤቦራ የልዳፐ ጉየ፥ 403 ላይꬅ ደእስ። ሀራ አደ ናይታነ ማጫ ናይታ የልስ።

16 ኤቦሪ 34 ላይꬅ ደእድ፥ ፐለጋ የልስ። 17 ኤቦሪ ፐለጋ የልዳፐ ጉየ፥ 430 ላይꬅ ደእስ። ሀራ አደ ናይታነ ማጫ ናይታ የልስ።

18 ፐለግ 30 ላይꬅ ደእድ፥ ራአ የልስ። 19 ፐለግ ራአ የልዳፐ ጉየ 209 ላይꬅ ደእስ። ሀራ አደ ናይታነ ማጫ ናይታ የልስ።

20 ራእ 32 ላይꬅ ደእድ፥ ሳሩጋ የልስ። 21 ራእ ሳሩጋ የልዳፐ ጉየ፥ 207 ላይꬅ ደእስ። ሀራ አደ ናይታነ ማጫ ናይታ የልስ።

22 ሳሩግ 30 ላይꬅ ደእድ፥ ናኮራ የልስ። 23 ሳሩግ ናኮራ የልዳፐ ጉየ፥ 200 ላይꬅ ደእስ። ሀራ አደ ናይታነ ማጫ ናይታ የልስ።

24 ናኮር 29 ላይꬅ ደእድ፥ ታራ የልስ። 25 ናኮር ታራ የልዳፐ ጉየ፥ 119 ላይꬅ ደእስ። ሀራ አደ ናይታነ ማጫ ናይታ የልስ።

26 ታር 70 ላይꬅ ደእድ፥ አብራመ፥ ናኮራነ ሃራነ የልስ።

27 ታራ የለተꬃይ ሀይሳፈ ካልድ ፃፈትዳይሳ፤ ታሪ አብራመ፥ ናኮራነ ሃራነ የልስ። ያትን ሀራን ሎፀ የልስ። 28 ሀራን ባ አዋይ ታሪ ፓፃ ደእሽን፥ ባ የለትዳ ካልዳወታ ቢታን፥ ግታ ኡረ ካታማን ሀይቅስ። 29 አብራመይነ ናኮረይ ናምአይካ ማችዶሶና። አብራመ ማቸ ሱንꬃይ ሶራ። ቃስ ናኮራ ማቸ ሱንꬃይ ምልኮ። ምልካ ሃራና ናእዉ፤ ሃራነይ ምልካነ ዮስካ አዋ። 30 ሶራ ማይንꬅ ግድዳ ግሾ እዉ ናእ ባዋ።

31 ታር ባ ናኣ አብራመ፥ ባ ናኣ ሃራነ ናኣ ሎፀነ፥ ባ ናኣ አብራመ ማችዉ ሶራ ኤክድ፥ ካናነ ቢታ ባናዉ ካልዳወታ ካታማ ኡረፐ ደንድስ። ሽን ኤንቲ ካራነ ካታማ ጋክድ ያን ኡትዶሶና። 32 ታር 205 ላይꬅ ደእድ ካራነን ሀይቅስ።