1 አብራመይ ባአ ማቺው ሶራነ ባዉ ደእያባ ኡባ ኤክድ ግብፀፈ ነገበ መላ ቢታ ብስ። ሎፀይካ እያራ ዎላ ብስ። 2 አብራመይ ሄ ዎደ መሄን፥ ብራንነ ዎርቃን ዳሮ ዱረትስ።

3 አብራመይ ናገበፐ ደንድድ በሳፈ በሰ አꬍሸ ቤተለ ጋካናዉ ብስ። ቤተለፐነ ጋየፐ ግዶን እ ኮይሮ ዱንካንያ ቶክዳ በሳነ 4 ጎዳስ ካሰ ያርሾ ያርሽዳ በሳ ጋክድ፥ ያን አብራመይ ጎዳ ሱንꬃ ፄግስ።

5 አብራመራ ዎላ ሄመትያ ሎፀስካ ዳሮ ዶርሳት፥ ዴሻት፥ መሄት፥ ሶ አሳትነ አይለት ደኦሶና። 6 ሄ ዎደ አብራመስነ ሎፀስ ዳሮ መሄይ ደእያ ግሾ ኤንቲ ባንታ መሄታ ሄምያ በሳይ ፁምስ። 7 ሄሳ ግሾ፥ አብራመ መሄታ ሄመይሳታ ግዶንነ ሎፀ መሄታ ሄመይሳታ ግዶን ካች ከይስ። ሄ ዎደ ካናነ አሳትነ ፓርዘ አሳት ሄ ቢታን ደኦሶና።

8 ሄሳ ግሾ፥ አብራመይ ሎፀኮ፥ “ኑኒ እሻንታ ግድያ ግሾ ኑ ግዶን ዎይኮ ኑ መሄታ ሄመይሳታ ግዶን ካች ዳናዉ በሰና። 9 ቢታይ ዳልጋ ግድያ ግሾ ኑ ዎልፐ ሻከታና። ነ ሀድርሳ ባጋ ቢኮ ታኒ ኡሻቻ ባጋ ባና፤ ኔኒ ኡሻቻ ባጋ ቢኮ ታኒ ሀድርሳ ባጋ ባና” ያግስ። 10 ሎፀይ ቢታ ዩይ አꬍድ ፄልያ ዎደ ዮርዳኖሰ ዛንጋራይ፥ ጎዳ ጋናትያዳ ዎይኮ ዞኣረ ባጋራ ደእያ ግብፀ ቢታ መላ ሃꬅ ኩምዳይሳ በእስ። ሄስካ፥ ሀንዳይ ጎዳይ ሶዶመነ ጋሞራ ጌተትያ ካታማታ ꬋይሳናፐ ስን። 11 ሄሳ ግሾ፥ ሎፀይ ዮርዳኖሰ ዛንጋራ ኡባ ባዉ ዶርድ ዶሎሀ ባጋ ብስ። ሄሳዳ ሀንድ እሶይ እሱዋፈ ሻከትዶሶና። 12 አብራመይ ካናነ ቢታን ደእስ። ሽን ሎፀይ ዛንጋራን ደእያ ካታማታ ግዱዋን ሶዶመ ማታን ባ ዱንካንያ ቶክስ። 13 ሄ ዎደ ሶዶመ አሳይ ዳሮ ኢታነ ጎዳ ስንꬃን ናጋራንቾታ። 14 ሎፀይ አብራመፐ ሻከትዳፐ ጉየ፥ ጎዳይ አብራመኮ፥ “ነ ደእያ በሳፈ ፑደ ꬎቁ ጋዳ ፑደሀ ባጋነ ዱገሀ ባጋ፥ ዶሎሀ ባጋነ ዉሎሀ ባጋ የዳ ፄላ። 15 ሄ ኔኒ በእያ ቢታ ኡባ ታኒ መርናዉ ነዉነ ነ ሼሻስ እማና። 16 ታኒ ነ ሼሻ ቢታ ባናዳ ዳርሳና። ኦንካ ቢታ ባና ታይባናዉ ዳንዳኦናይሳዳ ነ ሼሻይካ ታይበተና። 17 ታኒ ሀ ቢታ ነዉ እማና ግሾ ደንዳዳ ቢታ አዱሳተꬃንነ ዳልጋተꬃን ስመረታ።” 18 ሄሳ ግሾ፥ አብራመይ ባ ዱንካንያ ሾድድ ከብሮናን ደእያ ማምረ ግታ ምꬃታ ማታን ደአናዉ ብስ። ያን ጎዳስ ያርሾ በሲ ጊግስስ።