1 ሀ ቢታን ደእያ አሳ ኡባ፥ ጎዳይ ሞትያባይ ደእያ ግሾ፥ እስራኤለ አሳቶ፥ ጎዳ ቃላ ስእተ። ሄስካ፥ ቢታ ቦላ አማነተꬅ፥ ሲቆይነ ፆሳ ኤሮይ ባዋ። 2 ሀ ቢታ ቦላ ደኤይ ባደꬅ፥ ዎርዶ፥ ሸምፖ ዎꬎ፥ ካይሶቶነ ላይማ ፃላላ። ኤንቲ ዎጋ ኡባ መንꬆሶና፤ ሱꬁ ጉሶሶና። 3 ሄሳ ጋሶን ቢታ ኡባይ ዬካና፤ ቢታን ደእያ ኡባይ ዳቡራና። ሳአ ዶአት፥ ሳሎ ካፎትነ አባ ሞሎት ሀይቃና።

4 ህንተኖ፥ ካህነቶ፥ ታኒ ህንተና ሞትያባይ ደእያ ግሾ፥ ኦንካ ሀራ አሳራ ፓላመቶፎ፤ ዎይኮ ሀራ አስ ሞቶፖ። 5 ህንተ ጋላስነ ቃማ ꬉበቴታ፤ ናበትካ ህንተራ ꬉበቶሶና። ሄሳ ግሾ፥ ታኒ ህንተ አይዉ ꬋይሳና። 6 ታ አሳስ ኤራተꬅ ባይና ግሾ ꬋይዶሶና። ህንተ ኤራተꬅ እፅዳ ግሾ፥ ታካ ህንተ ታዉ ካህነ ግዶና መላ እፃስ። ህንተ ፆሳ ህግያ ዶግዳ ግሾ፥ ታካ ህንተ ናይታ ዶጋና።

7 ካህነታ ታይቦይ ዳር ዳር ብያ ዎደ ታና ጉጅ ጉጅ ናቅዶሶና፤ ታኒ ኤንታ ቦንቹዋ ቃራዳ ዬላያና። 8 ታ አሳ ናጋራይ ኤንታዉ ካꬅ ግድዳ ግሾ ኤንቲ ታ አሳይ ባላባ ኦꬃና መላ ኮዮሶና። 9 ካህነት ደርያፐ ዱማትቦኮና። ታኒ ኤንታ ሀኖታ ግሾ፥ ኤንታ ሴራና፤ ኤንታ ኦሱዋዳ ኤንታዉ ዛራና። 10 ኤንቲ ጎዳ አግዳ ግሾ ማና፥ ሽን ካሎኮና፤ ላይማታና፥ ሽን ናአ የሎኮና። 11 ላይማተꬅ፥ ጋምእዳ ዎይነ ኡሽነ ማልአንቶ ዎይነ ኡሽ ታ አሳ ዎዛና ꬋይስስ። 12 ኤንቲ ምꬃፈ ኦሰትዳ ኤቃ ምስለ ዞረ ኦይቾሶና፤ ኤንታ ፃምአይ ኤንታ ኦይሻ ዛሬስ። ላይማተꬃ አያናይ ኤንታ ባለꬅስ፤ ኤንቲ ባንታ ፆሳፈ ሃክድ ላይማትዶሶና። 13 ደረታ ሁጰን ያርሾ ያርሾሶና፤ ሎኦ ኩያይ ደእያ ዎላ ጋርሳን፥ ፂዳ ጋርሳን እፃነ ጩይሶሶና።

ሄሳ ግሾ፥ ህንተ ማጫ ናይት ላይማቶሶና፤ ህንተ ናይታ ማቸት ላሞሶና። 14 ህንተ ማጫ ናይት ላይማትያ ዎደነ ህንተ ናይታ ማቸት ላምያ ዎደ ታኒ ሴርከ። አይስ ጊኮ፥ አደት ባንታ ሁጰን ላይማተይሳታራ ላገቶሶና፤ ኤንታራ ያርሾሶና። ሄሳ ግሾ፥ አኬክ ባይና ደረይ ꬋያና።

15 “እስራኤለ አሳቶ፥ ህንተ ላይማትኮካ፥ ይሁዳ አሳይ ህንተይሳዳ ባላ ግዶፖ። ጋልጋላ ቦፕተ፤ ቤት-አዌና (ኢታተꬃ ኬꬅ) ከዮፕተ፤ ‘ደኦ ፆሳይ ኤርያ መላ’ ግድ ጫቆፍተ። 16 እስራኤለ አሳይ ጌላ ኡሳዳ ጌላትስ። ያትን፥ ጎዳይ ኤንታና ዳልጋ ደንባን ዶርሳ ማራዳ ዋትድ ሄማኔ? 17 ኤፍሬም ኤቃታራ ጋሄትስ፤ ኤንታ አጋግተ። 18 ኤንቲ ዳሮ ዎይነ ኡሻ ኡይ ስሚድ፥ ላይማተꬅ አጎኮና፤ ኤንታ ሀላቃትካ ዬላያባ ዳሮ ዶሶሶና። 19 ኤንታ ጫርኮይ ኤፋና፤ ባንታ ኤቃስ ያርሽዳ ያርሾታ ጋሶን ኤንቲ ዬላታና።”