1 “ታኒ እስራኤለ ፓꬃናዉ ኮይያ ዎደ ኤፍሬማ ናጋራይነ ሳማረ አሳ ኢታ ኦሶይ ቆንጭስ። ኤንቲ ኡባ ዎደ ጭሞሶና፤ ካይሶት መንꬅድ ገሎሶና፤ ፓንጋት ከይድ ቦንቆሶና። 2 ሽን ታኒ ኤንታ ኢታ ኦሶ ኡባ ኤረይሳ አኬኮኮና። ኤንታ ኢታ ኦሶይ ኤንታ ናቅ ኦይክስ፤ ሄ ኢታ ኦሶይ ኡባ ዎደ ታ ስንꬃን ደኤስ።

3 “ኤንቲ ካዋ ባንታ ኢታተꬃን፥ ሀላቃታ ባንታ ዎርዱዋን ኡፋይሶሶና። 4 ኤንቲ ኡባይ ላሞሶና፤ ሙኑቃይ ደንዳና ጋካናዉ ዳቦ ኡከይስ ታማ ሺሾ ኮሾናይሳዳ ኤንቲ ቴልዳ ጮጨ መላ። 5 ባንታ ካዋ ቦንቾ ባኣለ ጋላሳን ሀላቃት ዎይነ ኡሻን ማꬆትዶሶና። እካ ቀልቅሰይሳታስ ባ ኩሽያ እሚስ። 6 ኤንታ ዎዛናይ ታማ ጮጨ መላ፤ ኤንቲ ሺቅድ ኢታባ ማቀትዶሶና። ኤንታ ሀንቆይ ቃማ ኩመꬃ ጩይሸ አቄስ፤ ሳእ ዎንትያ ዎደ ታማ ላጮዳ ኤፄስ። 7 ኤንቲ ኡባይ ቴልዳ ጮጨ መላ ባንታ ሀላቃታ ሞሶና። ኤንታ ካዎት ኡባይ ኩንድዶሶና፤ ኤንታፈ ኦንካ ታና ፄገይ ባዋ።

8 “ኤፍሬማ አሳይ ሀራ ካዎተꬃ አሳራ ዋላከትስ፤ ኤፍሬማ አሳይ ሽረትቦና ኡይꬃ መላ ግድስ። 9 አላጋት እያ ዎልቃ ምዶሶና፥ ሽን እ ሄሳ ኤርቤና፤ እያ ሁጰይ ፑሉምስ፥ ሽን እ ሄሳ አኬክበና። 10 እስራኤለ አሳ ኦቶሮይ ኤንታ ቦላ ማርካቴስ። ሄስ ኡባይ ሀንንካ ኤንቲ ጎዳኮ፥ ባንታ ፆሳኮ፥ ስምቦኮና ዎይኮ እያ ኮይቦኮና።

11 “ኤፍሬማ አሳይ ሆለዳ ኤያነ ጮ ጭመተይሳታ። ኤንቲ ማዶ ደማናዉ እስ ቶሆ ግብፀ፤ እስ ቶሆ አሶረ ስሞሶና። 12 ኤንቲ ብያ ዎደ ታኒ ኤንታ ቦላ ግተ የጋና፤ ታኒ ኤንታ ካፎ ኦይክያዳ ኦይካና። ኤንታ ኢታ ኦሱዋ ግሾ ታኒ ኤንታ ሴራና።

13 “ኤንታ አየ! ኤንቲ ታፐ ሃክዶሶና። ኤንታዉ ꬋዮ ግዶ! ኤንቲ ታ ቦላ ማካልዶሶና። ታኒ ኤንታ ዎዛናዉ ኮያስ፥ ሽን ኤንቲ ታ ቦላ ዎርዶ ሃሳዮሶና። 14 ባንታ ሂፃን ዝንእድ ዘሌሎሶና፥ ሽን ባንታ ዎዛናፐ ዎሶኮና። ካꬃስነ ዎይነ ኡሻስ ባንታ አሳተꬃ ጋሮሶና፥ ሽን ኤንቲ ታፐ ሃክዶሶና።

15 “ኤንታ ሎህስዳይነ ምንꬅዳይ ታና፥ ሽን ታዉ ኢታባ ማቀቶሶና። 16 ኤንቲ ሀዳባኮ ስምዶሶና። ኤንቲ አማንꬆና ዶንገ ግድዶሶና። ኤንታ ሀላቃት ኢታባ ኦደትዳ ግሾ ማሻን ዉራና፤ ሄስካ ኤንታዉ ግብፀን ሚቻስ ግዳና።