9 ኡባፈ ዎልቃማ ጎዳይ ሀይሳዳ ግድ ጫቅሽን ታ ስአስ።

15 አስ ቶሸታና፤ አሳ ኮቸ ኡባይ ካዉያና፤ ኦቶርትያ ኡባይ ጉፃና። 16 ሽን ኡባፈ ዎልቃማ ጎዳይ፥ ባ ሱረ ፕርዳን ꬎቁ ꬎቁ ጋና፤ ፆሳ ጌሻተꬃይ እያ ፅሎተꬃን ቆንጫና። 17 ሄ ዎደ ዶርሳት ሄ በሳን ሄመታና፤ ዶርሳ ኡርገት ላለትዳ ኬꬃ በሳታን ማና።

18 ጭሞ ዎዶሮን ናጋራ፥ ጋረ ዎዶሮን ኢታተꬅ ጎቸይሳታ አየ! 19 “አነ ፆሳይ ኤለሶ! ኑኒ በአና መላ ባ ኦሱዋ ኤሶዮ! ኑኒ ኤራና መላ እስራኤለ ጌሻይ ቆፕዳ ቆፋ ፖሎ” ያገይሳታ አየ!

20 ኢታ ሎኦ፥ ሎኡዋ ኢታ፤ ꬉማ ፖኦ፥ ፖኡዋ ꬉማ፤ ጫሙዋ ማልኦ፥ ማልኡዋ ጫሞ ገይሳታ አየ!

21 ባንታና ጭንጫነ ቃራ ገይሳታ አየ!

22 ዎይነ ኡሻን ኤረትዳ አሳነ ማꬆይያ ኡሹ ዋላካናዉ ዎዛን ምኖ ግድዳ አሳ አየ! 23 ቆህዳ ኡራ ፅልሳናዉ ዎꬋፈ ኤክድ፥ ፅሎ አሳ ሱረ ፕርዳ ጌላየይሳታ አየ! 24 ኤንቲ ኡባፈ ዎልቃማ ጎዳ ህግያ እፅዳ ግሾነ እስራኤለ ጌሻ ቃላ ካꬍዳ ግሾ ታማ ላጮይ ካለ ኦይከይሳዳነ ቡረይ ታማን ሜተትድ ꬋየይሳዳ ኤንታ ፃጶይ ዎቃና። ኤንታ ጪሻይ ባናዳ ላለትድ ꬋያና። 25 ሄሳ ግሾ፥ ጎዳ ሀንቆይ እያ አሳ ቦላ ኤፅስ፤ እያ ኩሸይ ደንድድ፥ ኤንታ ꬋይስስ። ደረት ቃፅዶሶና፤ ሀይቅዳ አሳ አሀይ ኦገ ቦላ ቡረዳ ሀንስ። ሄ ኡባንካ እያ ሀንቆይ ስምቤና፤ እያ ኩሸይ ሀእካ ደንድዳ በሳን ደኤስ።

26 ጎዳይ ሃሆ ሶን ደእያ ካዎተꬃታስ ማላ ꬎቃን ኤስስ፤ ሳኣ ጋፃን ደእያ አሳ ሱይቅድ ፄግስ፤ ኤንቲ ድርግሸ ፑቱ ጎሶና። 27 ኤንታ ግዶን ዳቡረይነ ꬉበተይ ባዋ፤ ኤንታፈ እሶይካ ꬍስከና ዎይኮ ዝንኤና። ፄሳን ዳንጭዳ ሳቀይ ብርሸተና፤ ኤንታ ጫማ ዎዶሮይ ዱፀና። 28 ኤንታ ቶራይ ቃራ፤ ኤንታ ዶንገይካ ዋፀትድ ደኤስ። ኤንታ ፓራታ ቶሆይ ቃራ ሹቻ መላ፤ ኤንታ ፓራ ጋረታ ገርቶይ ጎተ መላ። 29 ኤንቲ ጋሞ መላ ጉሞሶና፤ ዎዳላ ጋሞ መላ ጉዶሶና። ኤንቲ ሳርቡቅሸ ምያባ ኦይክድ፥ ቶክ ኤክድ ቦሶና፤ ኤንታፈ ዎꬅድ ኤከይ ኦንካ ባዋ።

30 ሄ ዎደ ኤንቲ ግታ አባ ጉንꬃዳ እስራኤለ ቦላ ጉማና። እስ አስ ሄ ቢታ ፄልያ ዎደ ꬉምነ ዋየይ በአና፤ ፖኦይ ሻራን ምተታና።